نكتة الهلال الجديدة - المطربة و سيد العدة ..!!

نكتة الهلال الجديدة - المطربة و سيد العدة ..!!


في صالون فاخر ..
المطربة المعروفة مكومة كل تيابها ( الخمسة ) تالاف ( الما خمج ) و قاعد ة تفرز
فيهم بي زعل اي توب فيهو لون ابيض ولا ازرق تختو في كوم براهو بعيد كدة ..
تمهيدا" لي انو ترميها في اقرب كوشة ( خمسة ) نجوم ..
اصلو قالو زعلاااانة شديد من الجماعة ( الزرقاء ) .. يعني ( خمسة ) و خميسة في
عين اللي ما يصلش على النبي بعد ما اشترت الفانيلة بتاعت ( ود نوباوي ) قصدي
( ود البخيت ) بي ( خمسة ) مليون ..
يقوم يلاقيها جارها ( الاحيمر ) و يقول ليها :
الجاتكم من مازمبي خامستكم ..!!
ده كلو كوم و انو الكهربا تقطع مع بداية ( ردحتها ) الغنائية كوم تاني .. هي حصلت ..!!
يعني فانيلة" تشتري قطعا" تلقى ..
كو كو كو كو كو ...
صوت دق في باب الشارع ..
المطربة ( في سرها ) :
ده منو المتخلف ده ..؟!! .. ما بتعرف تدق الجرس .. يجرّسك ( موبوتو ) يا ربي .. !!
ثم ترفع صوتها عاليا" و تنادي :
يا ماهيتا .. انتي يا بت يا ماهيتا .. ( دي الخدامة حقتها ) ..
اتاريها ما عارفة انو البت ( ماهيتا ) مشت تاخد ليها ( خمسة ) ونسة مع خدامة
الجيران ..
المطربة بي زعل :
البت دي بتطير وين كل مرة .. تطيري من الدوري النهائي يا رب ..

تلبس توبها ( طبعا" اختارت ليها واحد مافيهو لا ابيض و لا ازرق و لا حتي سماوي ) ..
تفتح باب الشارع في تأفف ..
كان لقت ليك سيد العدة واقف شايل ليهو كمية من العدة و شوية هدوم ( منتهية الموضة
من نسوان الحلة ) ..
المطربة :
اهلا" .. نعم ..؟!!
سيد العدة :
نعم الله عليك .. ما عندك هدوم دايرة تبدليها ..؟!!
المطربة :
بتقول شنو ؟!! .. انا ..!! ابدل هدوم بي عدة .. و الله ياهو ؟!!
ياااي .. انا بريستيجي ما يسمح لي بالحاجات البلدي دي ..
سيد العدة :
يا زولة برسيمك ابيض .. قولي خير ..
المطربة :
ابيض في عينك .. ( و تهم باغلاق الباب )

سيد العدة ينتظر في تقل دم مبالغ فيهو ..
المطربة :
ايوة .. ايوة .. دقيقة انتظرني .. بجيك هسي ..
سيد العدة :
سمح .. !!

بعد قليل تعود المطربة حاملة ( نيلة ) زرقاء قصدي فانيلة زرقاء بأطراف اصابعها
كأنها تخاف منها ..
المطربة :
أها .. ده بجيب شنو ؟!!
سيد العدة :
احم .. احم .. و الله يا اختي
المطربة ( تقاطعه ) :
يختوك في مجموعة مازمبي .. قول آميين .. اختك من وين ؟!!
سيد العدة :
معليش يا مدام ..
المطربة :
كدة كويس .. قلت ليك ما عرفتني ..؟!! انا مااااا الفنانة المطربة النجمة فلانة ..
ما شفتني في التلفزيون ... ؟!!
سيد العدة ( في سره ) :
تلفزيون شنو ..؟!! انتي كمان فايقة و رايقة ..
ثم بصوت عال : يعني انتي اخت اذاعة لندن ؟!!
المطربة ( في سرها ) :
يذيعوك في نشرة الميتين يا يابا ..
ثم بصوت عال : ما قلت لي الفانيلة بتجيب شنو ..؟!!
سيد العدة :
و الله عشان خاطرك كدة بديك فيها ( خمسة ) كبابي ..
المطربة :
و الله باااالغت يا سيد البلد هي بسم الله يا سيد العدة .. !!
الفانيلة دي انا مشترياها بي ( خمسة ) مليون .. !!
سيد العدة ( في سره ) :
الزولة دي ما نصيحة ولا شنو ..؟!! .. فانيلة شنو المشترياها بي ( خمسة )
مليون دي ..
ثم يطلق ساقيه لريح ( خماسين ) ....






رايكم شنوووووووو ... !! ..
حلوووووة ..؟!! ولا ...؟!! ...