ضيوف في عيد دوت كوم.. الأخ حافظ أحمد..

الأخ/ حافظ أحمد..
عيد سعيد
معذره للإقتحام.. بس خلينا ندردش معاك شويه علي الهواء في أيام العيد دي..
و بعد
# كيف إستعديت للعيد..؟؟
# كيف تستقبل صباح العيد و كيف بقية أيامه و أمسياته..؟؟
# أمنيات تتمناها كل عيد و تجدها.. ما هي..؟؟
# أمنيات تتمناها كل عيد و لا تجدها..ما هي..؟؟
# العيد بين الأهل و الأحباب و الصحاب مجموعة أعياد..ما رأيك..؟؟
# المقيمون خارج الوطن ينتظرون العيد كإنتظارهم لمولود مشوه..ما رأيك؟؟
# حافظ أحد الأعضاء الناشطين في دوت كوم و يشكل مع بني جيله دعماً حقيقياً لحاضر و مستقبل دوت كوم.. ماذا تقول..
# عيديه لأعضاء دوت كوم.. ماذا تقول فيها..؟؟

# كيف إستعديت للعيد..؟؟

والله اخ الرشيد العيد استعديت ليه ما بين مطار الدوحة والبيت

لانه كنت في وداع الاخ انور لحدي الساعة الواحدة صباحاً واتمني يكون وصل بخير وسلام .

# كيف تستقبل صباح العيد و كيف بقية أيامه و أمسياته..؟؟
كلعاده هنا ما عندنا صباح للعيد بعد الصلاة ح تجي تنوم وكل المعايدات بتم فى الفترة المسائية , اما امسيات العيد او بالاخص امسيات الدوحة بصفة خاصة فلها رائحة ذكية ونكهة خاصة لا تخفي عليك يا ابو حبيب وانت من شهد علي ذلك .
وممكن تسأل منها الاخ انور وهو الان بين الاهل في الحصاحيصا وقد قضي اجمل لحظاته معنا .

# أمنيات تتمناها كل عيد و تجدها.. ما هي..؟؟

الصحة والصحة والصحة

والحمد لله علي هذة النعمة

ولو سمحت لي ان اشير لحدث مر بي هنا في الدوحة وهو قبل عدة اسابيع كنت اشكو من الم حاد فى احد الاضراس واتمني انه ما حد فى الدنيا دي يوجعو ضرسة .
مشيت لمستشفي حمد العام هنا في قطر و هناك قد طلب مني الرقم الصحي .
وقدر ما فتشو علي رقمي الصحي ما لمو فيهو فسالتني الموظفة .
ليك كم فى الدوحة ؟ قلته ليها سبعة سنه
اجابت سبعة سنه وما عندك رقم صحي قلته ليها قهرتك بالنبي ما تقولي ما شاء الله .
الحمد لله الواحد طيلة فترة وجوده وهو موفور الصحة والعافية وهذة نعمة من المولي عز وجل واتمني الصحة والعافية لكل فرد من ابناء مدينتي .

تخريمة : يعني ناس emo و رؤي ديل الا يبيعو داندرمة في مدرسة المشاغبين .

# أمنيات تتمناها كل عيد و لا تجدها..ما هي..؟؟

ان اكون العام القادم حاضر العيد فى الحصاحيصا

باعتبار انه لي اربعتاشر عيد بعيد عنها

واتمني العيد الجاي اكون هناك ولو بالعدم عيد راس السنة .

# العيد بين الأهل و الأحباب و الصحاب مجموعة أعياد..ما رأيك..؟؟

كنت اتمني العيد معاهم لكن الحمد لله اهو الواحد علي اتصال دائم بالناس العزاز وربنا يلمنا بيهم في ساعة خير .

# المقيمون خارج الوطن ينتظرون العيد كإنتظارهم لمولود مشوه..ما رأيك؟؟

كلام في محله ووصف دقيق اهنيك علي الاختيار

# حافظ أحد الأعضاء الناشطين في دوت كوم و يشكل مع بني جيله دعماً حقيقياً لحاضر و مستقبل دوت كوم.. ماذا تقول..

بكل تواضع لست وحدي الذي يسهم فى تطوير الموقع ,,, ولكني لن ابخل باي جهد من اجل تقديم خدمة لاعضاء الحصاحيصا دوت كوم , واتمني ان اكون عند حسن ظن الجميع

# عيديه لأعضاء دوت كوم.. ماذا تقول فيها..؟؟

سوف تكون العيدية مؤجلة وتعلن فى الاحتفال بإطفاء الشمعة الاولي للحصاحيصا دوت كوم .