الحاجة ام جمعة تاج الدين يوسف المقدم

[ندعوك للتسجيل في المنتدى أو التعريف بنفسك لمعاينة هذه الصورة]

الحاجة ام جمعة تاج الدين يوسف المقدم

الاسم بالكامل:
ام جمعة تاج الدين يوسف المقدم
من مواليد الحلة التحت( الحي الشرقي حاليا)
الميلاد:
ما بعرف تاريخ لكن بتذكر حفر الترعة الكبيرة ( الكنار) كنا وقتها بنوت صغار بالحيل تقريبا مواليد 1917
صديقات الطفولة:
ستنا بت عيسي خربوتلي شقيقة محمد عيسي .. امنة بت علي عبدالله زوجة المرحوم العمدة شيخ ادريس احيمر .. فاطنة بت الكجك وزينب اختها.
التعليم :
ما ..
العمل:كان عندنا حظ في التعليم .. نحنا صغار لمونا وقاموا كسونا ملابس وطرح جديدة وجابوا لينا واحدة مصرية قبطية قالوا لينا دي مدرستكم وما عارفا الحصل شنو؟؟ قاموا طردوا المدرسة وقعدنا في البيوت ساكت
انا كنت صغيرة لمان عملوا دار الرعاية وكانت تساعد الحريم وترشدهم علي اتباع التعليمات الصحية وخاصة عند الحمل من الذكريات التي لا زلت اذكرها ونحن شغالين في دار الرعاية كنت شغالة مع ست الدون زوجة المامور احمد عبدالوهاب بحيري من مدني والدة مامون بحيري ومن رفاعة كانت معانا نفيسة عوض الكريم واما من الحصاحيصا كانت الداية بخيتة بت الصيفي ودار السلام بت الحسن وفلاتية بت الحسن ومن الرجال كان يعمل بالشفخانة المساعد الطبي محمد عبد الحفيظ شايقي من مروي وواحد بقولولو محمد حسين من مدني ثم واحد اسمه حيدر من الكاملين وبعد داك عزالدين الحلفاوي.
المرتب:
القروش كانت مبروكة بتذكر كنت بصرف 5 ريالات ثم بقت 7 ريالات والان انا معشي حوالي 45 جنيه!!
السوق :
[b]السوق كان في نص السوق الحالي صف دكاكين فاتح علي زنك التشاشات والصف التاني بتاع ناس حاج صباحي والجزارة في مكانها القديم ومن اشهر التجار كان من العمارة اربجي الحاج بشير محمد علي سعد( والد المهندس مهدي بشير مدير شركة السكر السودانية) حاج محمد صالح والنوش وحسين علوب والنور عنقرة ( والد عنكل).. اما الكناتين في الحلة كانت بسيطة واولهم دكان علي جلي وتاج الدين وحسين الشريف وفي الحلة التحت كان دكان سليمان افندي باشا والد عبيد العياشي.[/b]
الزواج زمان:
اول بالتبادي المهر ما كان بفوت ليهو 7 او 10 ريال والشيلة مش زي الزمن دا كانت حقت العزومة زيت وعيش رز وعدس بالاضافة للضبيحة. وبيوت العرس كانت تعمل الشربوت والحسوة والمريسة وكانت الحفلات تستمر لي 40 يوم والحفلات كانت بيعملوها الفنانين وكانوا بقولو ليهم ( الطمبارة) وبتذكر واحد كان اسمه جاد المولي وبعد داك الطيب ود الماحي وود الازرق واحمد المصطفي حسين.
انا اتزوجت واحد ترزي من ام درمان ابوروف واسمه منصور مصطفي وولد منه بنتي الوحيدة ست ابوها.[/b]
[b]السفر زمان:
كنا نسافر بالكليتون وهو القطر المحلي نمشي بيهو لحدي مدني والخرتوم ولكن في كتير من المشاوير كنا نركب العربات وكانت لجميل ود المقدم عربية وحاج عطايا وعثمان نقد وترتورة وحاج محجوب والامين ابوشنب ( والد علي الامين) وعبدالرحمن ابو الطيش وغيرهم
وختاما اقول ليكم مع السلامة يا وليداتي يديكم العافية

[ندعوك للتسجيل في المنتدى أو التعريف بنفسك لمعاينة هذه الصورة]

يديك العافية ياحاجه ويمتعك بالصحه .. قولى امين

متعك الله بألصحة والعافية ويحفظك يا أم الكل

الله يخليك لينا ياوالده أميييييييييييييين

متعك الله ...وبارك لك في ما مضى من عمرك ..وما آتي منه,,, وادخلك من باب رحمتة ...
(الما عندو كبير يشتري ليهو كبير)

الله اديك العافية وابارك فيك وارجع الزمن الجميل