نافع غنمايتين لكل اسرة في شندي !! وفي الاعادة إمكن سخيل مدغلب

من أطرف ما قرأت قصة توزيع نافع علي نافع لعدد (2) غنماية لكل أسرة في شندي ،،
ويقال بأن الناس في شندي واقعين تك تيك في غنم نافع ،،
سمعنا بي توب اوكامبو ،،
ودجاج المتعافي ،،
لكن غنم نافع دي جديدة لنج ما سبقوا عليـها الوراهو والقدامو ،،
ولما كان الشيء بالشيء يحلبُ ،،
فنافع عبر عن إهتمامه بالحلب وبطريقة مبتكرة ،،
تشيل غنمايتين
تحلب غنمايتين
يحلبوك أربعة سنين ،،
وشال الأغنام حلب صوتنا
ومن شدة جشعك ما زلنا مستحلبين
حلبك بلا يخمك

يا ابو عويض سلامات ولعلك وافراد الاسرة في خير وبركة ،،
بالله شفت جنس الرخسة دي ؟؟
بتعاملوا مع الناس باعتبارهم مغفلين ،،
وعشان شنو ؟؟ أصوات انتخابية
غايتو كل يوم يطلعوا بي كائنة

يا أستاذ محبوب :

الغنمايتين ديل من النوع الحلوب أم اللاحم ؟ لأنو لو من النوع الحلوب معناتها نافع حيجي برضو الأنتخابات الجاية بنفس العطية بأعتبار أنها عطية طويلة الأمد Long term أما أن كانت من النوع اللاحم فهذا يعني أن نافع قنعان من خيراً فيها !

حليب المحبوب ............... إسم جميل بكرة تلقي الناس واقفة طوابير عشان تشتري الحليب دا .........

ونقوم يا بكري نعمل ليه نكهات ... فراولة .. كاكاو ... فانيليا ... بالموز ... وبالصابون يا ما مامون ... 3/ صفر

ابو رائد كمان لحنتها ليه
خلاص نشوف فرفور اعمل الاعلان
بي طريقة شامبيون

فرور أبو صلعة ............. لا لا لالا لا لا لا لا لا لا لا لا

شوف لينا الولد بتاع سوداني ون شايف الجيكس كله مكسر فيه عشان نضمن التوسيق يطون 100%

والله ياعوض الموضوع انا ما قايلو بالفايدة دي ،،
وعلى فكرة يابكري الموضوع حقيقي وأنا إتصلت بي قريبتي في شندي وأكدت بأن واحدة من بنات جيرانن صوتت 3 مرات ،، وإستلمت 6 غنمايات وقالت لي من فلاحتا 2 من الغنم طلعن دارات (( واحدة بتتوحم ليـها شهرين والتانية دخلت في السادس بي صوتين ) ،،

ما شاء الله نافع طلع احسن من بتاع الخطة الاسكانية
القال للناخبين عندي ليكم خطة اسكانية بدل بيوت الصفيح والخيش دي ،،
واحد من الغلابة هلل وكبر وأدوه المكرفون
قال ليهم ياجماعة الخير الكلام بتاع الخطة السكنية دا كلام ساي
زيو وزي خطط مازدا مع الفريق القومي ،،
يوصلكم النهائيات وتطلعوا قبل البدايات ،،
يازول هي خطتك مقطعة في وشك كلامك دا قولو في الاف ام 3 ،،
انت قايلنا نحن طير ولا شنو ؟؟ ،،
لكن بعد دا كلو الراجل فاز واكتسح الدائره وعدما طافي النار ،،
أها جماعتك هديلك في صفايحن وخيشن لا خطة لا غنماية

يا المحبوب ............

الغنمايات ديل معاهن فحل ( تيس ) ولا بعد ما يولدن ويكمل اللبن ببقن ببقن شنو ؟
الناس ديل فارات كان لازم مع كله غنماية يطلبوا فحل عشان الحياة تستمر لانه بعد 4 سنوات في انتخابات تاني

أو كان يوزعوا غنمايتين وتيس مجاني حسب نظرية أهل التسويق

يا المحبوب بطل الحركات بتاعتك دي

يابورايد الكلام دا والله حصل ،،
لو عندك صديق اتصل بيهو شندي بعيدة ؟؟
وبمناسبة الغنماية دي ،،
واحد زرع حوشو باشجار ضل ،،
وقال بالمرة كمان يتبرع لنسابتو بأشجار ضل لحوشن بتاع المناسبات ،،
اشجاره قامت زي الليل
وفي زيارة لمنزل نسابتو ،،
لقاها صقيعة ،،
سال يا جماعة الشجر الجبتو ليكم مشى وين ؟؟
نسيبتو قالت ليهو والله أكلنو الغنم ،،
قال ليها ،،
خلاص اكان جاتكم مناسبة جيبو الغنم اقعدوا في ضلهن ...

دسكو ..غنمايتك ما بعرفا .. وكان علي انا والله جريو ما طلعت بيهو

الْمَحْبُوْب شَايْفِك بِتَحُجي فِيْنَا
لَكِن رَايَك شِنُو فِي مَصْنَع الْمَحْبُوْب لِمُنْتَجَات
الالْبَان وَنُجِيْب لِيَك كَم مِصْرِيَّة يَعْمَلُو الاعْلان
بَدَل فَرْفُور عَارِفِك مابِتُرِيَدِه وَاهِم حَاجَة تَعْمَل لَيِّنَا
خَط انْتَاج جَدِيْد جِبْنَة مُثَلَّثَات مِن حَلِيْب نَافِع
بِكَوْن جَايِب غُنْم مُهَجَّنَه وَانَا مَسْكِنِي الْبَوَّابَة
عَشَان تِمْنَة لَبَن مَاتَمْرّق بِدُوْن تَصْرِيَح

تعرف يا المحبوب ................

مرة إبن العم هاشم كبير في الأنتخابات الاولي كان قاعد في مركز الانتخاب بتاع الاتحاد الديمقراطي وهو طبعاً أتحادي على السكين
عاوز يشرب موية ما لقى الكوز دور شمال يمين فوق تحت سما أرض ما الكوز ... كان الخيمة الجمبهم بتاعة ناس التروابي مشي عندهم لقي الكوز قال ليهم دا شنو دا دا كمان بسوط

قوية يابورائد
هاشم كبير تحفة والله
انتو المحبوب وين ياناس افقدوه مايكون حصل ليه شي ولا تكون نطحته غنمايه اصلو ما اتعامل معاهن

انا من الصباح بقول بكري دا بشكل في الكلام مالو ،،
أها جبت الغربال وقعت في الجابرة وقلت نشوف آخرتا شنو ،،
أها الغربال دخلت فيهو الكلمات الفوق ديك وتعالوا شوفو الطلع ،،

الْمَحْبُوْب شَايْفِك بِتَحُجي فِيْنَا
لَكِن رَايَك شِنُو فِي مَصْنَع الْمَحْبُوْب لِمُنْتَجَات
الالْبَان وَنُجِيْب لِيَك كَم مِصْرِيَّة يَعْمَلُو الاعْلان
بَدَل فَرْفُور عَارِفِك مابِتُرِيَدِه وَاهِم حَاجَة تَعْمَل لَيِّنَا
خَط انْتَاج جَدِيْد جِبْنَة مُثَلَّثَات مِن حَلِيْب نَافِع
بِكَوْن جَايِب غُنْم مُهَجَّنَه وَانَا مَسْكِنِي الْبَوَّابَة
عَشَان تِمْنَة لَبَن مَاتَمْرّق بِدُوْن تَصْرِيَح

والمعنى في الجملة الاولى ( أهم حاجة تعمل لينا )
لاحظ علامة الكسرة في حرف الهاء وبدلاً من أهم بالفتحة والتشديد اصبحت اهم بكسر الهاء
والفرق بين اهم واهم بكسر الهاء فرق كبير

الكلمة التانية غنم بضم الغين ومقصود بيها غنم بالفتح
الغُنم بضم الغين تعني الفوز والظفر بالشي وتعني في الضمان التكافؤ .. الغرم بالغنم
لكن الجات من نافع علي نافع الدكتور البيطري أغنام ( معوز ) موش غنم

كدي يا بكري بمناسبة التشكيل القطعتو من راسك دا شكل لينا مفوضية تمرقنا من الورطة النحن فيها دي

يا المحبوب .. دحين غنم النافعاب محينات بلبن
غير مضروب !! وعشان ما يتلخبطن مع غنم
الحلة الفوق سو ليهن وسم مطارق شجرة ولا لسه !!!