أشياء لا أحبها 00 بوست هائف 00 ولكن 00

تشكر ياابو حراز على البوست الظريف
بكره الشيشه والتمباك
وبكره وقوف النسوان جنب الباب
ولمة الاولاد جمب الدكاكنين يشاغلو فى البنات

(هبه) بت الحصاحيصا كتب:: لك التحيه يا أبو حراز
ورجعنا ليك تاني
في حاجتين بكرههم لما أركب المواصلات
أول حاجه جني وجن الناس الورا يدوني القروش أوصلها للكمساري
أو الكمساري يدني أرجع ليهم الباقي
أكون قاعده الطريق كلو أنا أودي وأجيب

والحاجه التانيه يكون باقي في العربيه نفريت أو تلاته بعد ما نقرب نصل آخر المحطه يقوم السواق يركبهم في عربيه تانيه عشان هو يلف ويمشي ياخد دور جديد

الله يقطع المواصلات

الأخت هبة
مش الناس ناولوك القروش طوالي تختي على شنطتك
وتخلي الكمسار محتار عشان تاني مايعملوا كده
لكن طبعاً هذه الأشياء من بساطة السودانيين وطيبتهم
برضو الوالي الجديد ريحكم من الشغلانية دي والظاهر سمع كلامك
بصاتكم دي مش بتذكرة

ركبت مرة مع والدي ماشي يتعالج
وتعرفي ناس الجزيرة كرم لمن عوير
اها كل واحد يجي في الحافلة { حسنة لله }
طوالي الوالد يقوم يديهو خمة قروش
يمكن جمب الحافلة دي اكتر من 6 كل واحد أخذ رزقو وجرى
قمت شلت منو القروش
وقلت ليهو ياحاج والله بطريقتك دي ماتتعالج
جيب القروش دي هنا

هسي في واحد قاعد في السوق العربي عندو طريقة عجيبة جدا
لابس درويش
بس بعاين في النسوان
والنسوان منو ما اي واحدة هي من ضحاياه
متخصص { نسوان حوامل }
يخلي الولية بعد تركب وتتوهط في الكرسي
وبالزجاج بيكون ظاهر بس راسها
عدمك المحتال دا بيجي ويقول للولية المسكينة { بتلدي ولد } !!!
الزولة المسكينة دي تقوم باقي القريشات كلهن تديهن ليهو
اها يجي للتانية { بتلديلك تيمان } وليد وأمورة حلوة

سألتو مرة وقلت ليهو ياحيوان طريقتك دي مش حلوة
قال لي يا اخوي والله انا حكاية خمسمائة والف دي مابتخارج معاي
3 نسوان حوامل وبرجع بيتي من الساعة 12 وبيكون معاي 50 الف

حنو كتب:: تشكر ياابو حراز على البوست الظريف
بكره الشيشه والتمباك
وبكره وقوف النسوان جنب الباب
ولمة الاولاد جمب الدكاكنين يشاغلو فى البنات

حنو سلام وشكراً من الأعماق على الاعجاب بالبوست
أكره مثلك التمباك لدرجة ماتتصورها
وأكثر مايحيرني الناس دي بتلقى مكان وين تخت فيهو التمباك
وكثيراً ماتجد النسوان مغتاظات وقت الغسيل من وجود بقايا بالجلابية
الشيشة الوالي اصدر قرار بعدم تعاطيها في الاماكن العامة
الغريب في السعودية هنا في الكثير من القهاوي تجد الشيشة حضوراً وبشدة

معانا واحد عزابي شحد تمباك من واحد تاني
وصاحبه قال ليهو والله لو تخلي التمباك ما اديك ولا سفة
الراجل زعل وقام شال { الحقة } وجاب ليهو حجر ماكن وكسرها
وقال انعل ابو التمباك البيهدر كرامتنا
من الليلة فارقتو فراق الطريفي لي جملو

العصرية نشوف ليك زولك عيونو زي الشرار
مالكم ياعمو 00 قال والله التمباك
قلنا ليهو لازم يكون عندك اصرار وعزيمة وطموح
ودي تجربة واختبار حقيقي
طوالي قال انا ابوك يا رقية تاني ما حا اسف نهائي
المغرب نلقى ليك الزول جاب ليهو حديدة بتاعت البن وقعد يصلح في الحقة
يازول عاوز تفجخها زيادة ؟
لاعاوز اصلحها 00
ورجع الى قواعده سالماً في نفس اليوم
قال أنا ابوك يارقية قال !!!

ابوذر حسن طه كتب:: ابوحراز اخوي كيف حالك ورمضان كريم ونسال الله ان يتقبل منا ومنكم
حقيقه في حاجات الواحد بيقرف او بعاف منها
ولكن انا اكره او بالاصح لا احب شيئان
الاول الطاحنيه لا اطيق رائحتها واذا لامست خشمي بالغلط تجدني استفرغ
والشي الاخر الذي اكرهه حد التفلق بالحجار الراجل السمح البعرس ليهو مرة شينه 00او المرة السمحه يعرسها راجل شين

أخي أبوذر حسن طه
لك التحايا النواضر ايها الرجل الجميل الدواخل
وااسف لتأخير الرد
اول شيء نسألك 00 شنو لسه مالقيت العروس ؟؟
ان شاء الله تلقى حاجة يابانية اصلية
اوعاك ماتقع الكوري

عندي ود عمي ونحن صغار كان بحب الطحنية موت
لكن ابوه ما كان بيديهو قروش
والمشكلة قاعدين ياخدوا من بتاع الدكان لحد مايتم شهر وبحاسبوه
والشفرة ما بين سيد الدكان والأب هي { السبحة }
قال ليهو لو ما جاتك سبحتي دي ماتدي اي زول حاجة من ناس البيت
اها صاحبك يخلي ابوه بعد ينوم وبيكون دارع السبحة في كراع العنقريب
طوالي بميشي بيها الدكان ويقول لبتاع الدكان
قال ليك ابوي ادينا طحنية
ومربى
واناناس
اها عمك لمن يجي يحاسب آخر الشهر بشوف الدفتر
وبحلف بالتكتلو انهم ما اخذوا طحنية
اها سيد الدكان بيقول ليهو علي بالطلاق سبحتك جات لحد هنا
اها شوف الناس بتجاهد كيف علشان تاكل طحنية

اما حكاية واحد شين يتزوج سمحة وواحدة شينة تتزوج وسيم كتيييييييييييييييييييرة جداً الحكاية دي
ويبدو ان الطبيعة تريد أن تخلق موازنات

ياخي عندنا واحد مجنون كنا بنهزر معاه وجات بت شينة
قلنا رايك شنو نعرس ليك الزولة دي
قال يبقى علينا جن وشناة
ياناس ماترحمونا
شكلك كده ياشين حاتعرس ليك مرة سمحة
شكيناك على الله كان عملتها

جني وجن الواحدة مما تسمع ليها طرف خبر تلفح توبها وتقوم جارية
مرات من الشفقة تلقاها لابسة شبب كل فردة براها
يعني بعضهن الواحدة ماتتأكد كويس من الخبر
طوالي تقوم جارية
واحد قالوا كل ما يجي من الحواشات يلقى المرة مافي
ياولد أمك وين
أمي مشت البكاء مع ناس فلان
كل يوم المصيبة دي راكبة ليها عربية
ماحصل جاء داخل البيت ولقاها قاعدة
اها المهم يوم جاء من الشغل ولقى البكسي بتاع الحلة مقلوب
والناس الفيهو قالوا كلهم ماتوا
اها جري على البيت
كان لقى ليك زولتك قاعدة تشرب في القهوة
سألها طوالي { إنتي الليلة مامشيتي البكاء مالك } ؟

كمان واحدة تانية منجضا راجلها نجاض العدو
قدر ما حاول يتزوج فيها تديهو ليك العين الحمرا
اها عاشت معاهو 75 سنة
وبعديها { اتلحست } عليها الرحمة
وصاحبنا مبسوط قال خلاص اربعة يوم ويعرس
المهم الناس في السودان اغلبهم بيعملوا باب الحوش ضيق
حاولوا يشيلوا الجنازة بالباب لكن ماطلعت
اها قالوا يرفعوها بفوق الحيطة
تاريها الحيطة بت اللذين دي فيها سلك كهرباء عريان
السلك ضرب ليكم الجنازة
اها كان المرة صحت واتوهطت في نص العنقريب
انتوا مودني وين ياسجم الرماد
رجعت تاني وعاشت 25 سنة
اها تاني ماتت
الجماعة برضوا رفعوها بي فوق
كان عمك قعد يكورك
السلك ياجماعة
السلك
السلك !!!

ابو حراز اخوي جيتك راجعه تاني ..من الحاجات البكرهه برضو الزول البوعد ومابوفي يااخي انا شايله ليك سيف بتقدر اوعد مابتقدر قول مابقدر ..تاني حاجه الزول البتدي سرك وبكره تسمعوا في الاذاعه دا بقص قلبي..الزول الاناني

ابو حراز تحياتنا من الحاجات البكرها عدم حسم المواضيع المهمه والهظار والبيت الوسخان والمره الحركته تقيله والكوره لانو عندى اربعه اولاد وكرهونى الكوره بانواعه

سلام حاجة جعفر
سلام أم مازن

سأرد عليكم ان شاء الله
طبعاً بحثت كثيرا عن البوست
ولم أجده الا قبل قليل
كنت خايف يكون مشى صفحة الوفيات
لكن الحمد لله وجدناه في استراحة المنتدى
تحية قلبية

كيفك ياحاجة جعفر
ناسف لتأخير الرد لظروف انقطاع النت
كثيرون لايوفون بوعودهم خاصة فيما يتعلق بالقروش والديون
يعني الواحد يجيك مزنوق ويقول ليك ان شاء الله بكرة حا ارجع ليك قروشك
وياتي بكرة وبعدو
ويمر شهر شهرين وسنة وسنتين
وبعديها عليك أن تقرا الفاتحة على قروشك وتترحم عليها

مرات برضو الواحد يخطب ليهو بنت ناس
وبعد شوية الحكاية تجوط في راسو
ويبدأ في التهرب من مواعيد العرس
لحد ما في النهاية { صاحبنا ينط }

[/font

ام مازن كتب:: ابو حراز تحياتنا من الحاجات البكرها عدم حسم المواضيع المهمه والهظار والبيت الوسخان والمره الحركته تقيله والكوره لانو عندى اربعه اولاد وكرهونى الكوره بانواعه

تحية ام مازن
مثلما أن الحصاحيصا في الحب لاتقبل القسمة على اثنين
فإن هناك بعض المواضيع التي لاتقبل التأجيل والهزار
بل لابد من اتخاذ قرار حاسم حتى لاتتأرجح الحياة

البيت الوسخان بالطبع مشكلة كبيرة
والبيت النظيف دائما يفتح النفس

الكورة تسبب الكثير من المشاكل للأسر
فيوم تكون هناك كورة تسقط اشياء كثيرة ومهمة من العائلة
وعلى النسوان أن يشيلن الصبر
صراحة حاجة ترفع الضغط

أبو حراز
لك التحية
من الأشياء التي لا أحبها الأتي..
# البوبار في الفارغة..!! يقابلك أحدهم و أنت تعلم أنه لاشئ و يبدأ يفهمك إنو هو كل شئ..!!
# التتفن و التكسر في بيت النسابة مهما كان لطفهم و أدبهم معك و تقديرهم لك..!!
# الزول العندو مية وش..!!
# طولة لسان أخواننا الهلالاب..!!
و أشياء أخري أعود لها لاحقاً..

الرشيد حبيب الله التوم كتب:: أبو حراز
لك التحية
من الأشياء التي لا أحبها الأتي..
# البوبار في الفارغة..!! يقابلك أحدهم و أنت تعلم أنه لاشئ و يبدأ يفهمك إنو هو كل شئ..!!
# التتفن و التكسر في بيت النسابة مهما كان لطفهم و أدبهم معك و تقديرهم لك..!!
# الزول العندو مية وش..!!
# طولة لسان أخواننا الهلالاب..!!
و أشياء أخري أعود لها لاحقاً..

أخي الرشيد
حمداً لله على السلامة
كثيراً ما أسأل نفسي أنت وأنا بالحصاحيصا لكن لم نلتق حتى اللحظة
وقد تفاجأت بانك حضوراً في حفل تكريم الدكتور
ولو كنت اعلم ذلك لذهبت الى حيث تجلس للسلام عليك والتعرف عليك أكثر
انا كنت غاتس بمنصة تقديم الحفل
ويالها من لحظات صعبة حينما تقدم حفلاً أمام مجموعة من المثقفين
كيف انت وكيف مع رمضان
لو اتيت قبل الغروب بقليل
ورأيت شخصاً بجور النهر ي
تلو على هذا النهر المتغطرس بعضاً من الخواطر فربما اكون انا
أأتيه مرة بعد أخرى لأسأله عن حال المدينة
وعن عشقه المتطرف لها

نعود للبوبار
مرة ركبت معي مجموعة من النساء للذهاب للضقالة
اها ياجماعة ماشين وين ؟؟
ماشين بيت علوية بوبار !!!!
وأكاد اجزم أن السودانيين لو الله اداهم قروش زيادة
فسترى العجب
وسيقبالك البوبار وهو يمشي على قدمين بين كل الأزقة
ساعود لاحقاً للرد عليك ان شاء الله

السلام عليكم والله بوست جميل للغايه...
ومعليش جينا متاخرين ....والحاجات الما بحبها كتير بس اكتر حاجه ما بحبها والمصيبه انو كمان في المنتدي دا برضوا موجوده التعامل من اجل مصالح شخصيه او غيروا....والتعامل بدون عدل....الواحد بحس انو لازم يلبس اسموا طرحه علشان يرضي الناس ...

وكمان من الاشياء التي لا احبها انو يدوا الحلق للي ما عندوا اضان ..كان لمصلحه او هدف..والمصيبه انو هو يفتكر انو بجد عندوا اضان ويتصرف علي هذا النحو بدون اي فهم ..وكمان للاسف الحاجه دي في المنتدي موجوده..........

محمد قوليب2 كتب:: السلام عليكم والله بوست جميل للغايه...
ومعليش جينا متاخرين ....والحاجات الما بحبها كتير بس اكتر حاجه ما بحبها والمصيبه انو كمان في المنتدي دا برضوا موجوده التعامل من اجل مصالح شخصيه او غيروا....والتعامل بدون عدل....الواحد بحس انو لازم يلبس اسموا طرحه علشان يرضي الناس ...

أخي محمد قوليب 2
التعامل من اجل المصلحة الشخصية لايقتصر على المنتدى
بل هو كالخلايا السرطانية منتشر في كل مكان
أحياناً حتى على مستوى العائلة الواحدة داخل البيت
ذكر ابن السياسي المخضرم عبد الله خليل في سهرة تلفزيونية يوم امس كلام من هذا النوع
حيث قال انه لم يستطع مقابلة والده أثناء العمل
وكان يأتي اليه الكثير من الناس
وبعد أن ترك الحكم والوظيفة
كان الأشخاص الذين يزورونه بعدد اصابع اليد اليمنى
وقد تلاحظ أخي ذلك في كثير من المسئولين
خاصة عندما يحالون للصالح العام أو المعاش
كان لدينا مدير بوضع وظيفي حساس ومهم جداً
وكل السكان في المدينة يحتاجون اليه
وبحكم أنني كنت مديراً لمكتبه فقد كانت تصلنا الكثير من الدعوات
تاتي الدعوة لمكتبي ومن ثم اعرضها عليه
بعضها يذهب اليه
والبعض الآخر يتركه
أذكر أن مدير إحدى الدوائر الحكومية اتصل بي طالباً المدير
وافهمته أنه مشغول
كان ذلك في تمام التاسعة صباحا
المهم قال لي المدير المتصل أنه يدعو مديرنا لوجبة عشاء بمزرعته
وقد ابلغت المدير بذلك ووافق على الموعد المسائي
وفي الساعة الواحدة بعد صلاة الظهر وصلنا خطاب عاجل من الوزير بنقل مديرنا
وعليه التنفيذ فورا بعد يومين وتسليم ما لديه من عهدة ومكاتب وايصالات
وحيث أن المدير مهم جدا لهذا انتشر الخبر بعد قليل من اشخاص محيطين به
في تمام الساعة الثانية اتصل بي المدير صاحب العيزومة وقال لي
ارجو أن تعتذر لرئيسك بأن الدعوة قد تأجلت !!!
وبالفعل تأجلت حتى استلام المدير الجديد !!!

[b]

اخونا ابوحراز غلبنا معاك ....
ممكن تتدخل الخاص ....

محمد قوليب2 كتب:: وكمان من الاشياء التي لا احبها انو يدوا الحلق للي ما عندوا اضان ..كان لمصلحه او هدف..والمصيبه انو هو يفتكر انو بجد عندوا اضان ويتصرف علي هذا النحو بدون اي فهم ..وكمان للاسف الحاجه دي في المنتدي موجوده..........

كيف يامحمد
مرات الواحد ممكن يشتري أضان عديل عشان الحلق
كلامك عميق يعبر عن الواسطة والمحاباة
وعدم وضع الشخص المناسب في المكان المناسب
أذكر مرة أن اسرة تناقشت مع اسرة أخرى
وامتد التلاسن لفترة طويلة
المهم أحدى الأسرتين كان لهم ابن ضابط يعمل بالسجون
وقالوا لمرأة الأخرى وليدك القصير دا قايلة حايشيلوه في الجيش
الزولة قالت ليهم وليه مايشيلوه
قالوا ليها والله مستحيل بالقصر دا ياخدو
ردت عليهم وقالت :
والله عندنا قريبنا ممكن يزيدو 4 بوصات !!![center]

لك التحيه اخي ابو حراز وعلي قولك دي حاجات حاصله في المجتمع بكثره بس المصيبه الاكبر نحنا لمن ندخل المنتدي دا علشان الواحد يرتاح بين اهله و يتعرف علي اهلو وناسوا ويتواصل معاهم لاننا بعيدين عنهم وحتي نعرف اكثر عن الحصاحيصا وناسها...بس تقوم تدخل تجد التعامل كما لو كنت بسوق ...ودي المصيبه والشئ الوحيد الما حبيته بالمنتدي وربما يكون من احد الاسباب لان نترك المنتدي...
ولك مني كل التقدير والتحيه

محمد قوليب2 كتب:: لك التحيه اخي ابو حراز وعلي قولك دي حاجات حاصله في المجتمع بكثره بس المصيبه الاكبر نحنا لمن ندخل المنتدي دا علشان الواحد يرتاح بين اهله و يتعرف علي اهلو وناسوا ويتواصل معاهم لاننا بعيدين عنهم وحتي نعرف اكثر عن الحصاحيصا وناسها...بس تقوم تدخل تجد التعامل كما لو كنت بسوق ...ودي المصيبه والشئ الوحيد الما حبيته بالمنتدي وربما يكون من احد الاسباب لان نترك المنتدي...
ولك مني كل التقدير والتحيه

أخي قوليب 2
لك كل التحايا
صدقني أخي محمد منتدى الحصاحيصا مازال بخير
وإن كانت هناك هفوات بسيطة
لكنها مجرد ربع قطرة من محيط الايجابيات الواسع والكبير
والفوضى السوقية ان جاز التعبير تجدها في اي مكان
حتى في بيوتنا
ويمكن ان فوضى هذا الشعب هي ماتميزه على غيره
لأن جمال السودان يكمن في هذه الفوضى البريئة
ادخل يا اخي وتصفح المنتدى
وشارك بالرأي
فكلنا نخطأ ولكن من يدري ربما أنت وغيرك من يقودنا الى الطريق الصحيح
الى حيث النور والضوء
تحياتي واشواقي

محمد ازيك اهوابوحرازالرائع ابدع معاك ممكن تدخل عشانوفهو وجه مشرق لهزه المدينه والودلك وله

راشد عبدالرحيم كتب:: محمد ازيك اهوابوحرازالرائع ابدع معاك ممكن تدخل عشانوفهو وجه مشرق لهزه المدينه والودلك وله

تحياتي وأشواقي اخي راشد
شكراً من الأعماق على هذه الروح
وكم اتمنى أن نكون جميعا وجوهاً مشرقة ومتلألأة لهذه المدينة الأنثى
فهي تحتاج لأقلامنا
ولحروفنا
ولابداعاتنا
حتى تنهض كل يوم
وتستيقظ باكرا
حتى لاتتثاءب
وحتى لايغشاها النعاس أمنة
بكم جميعا تقف هذه المدينة على اقدامها
وتخطو كل خطوات النجاح والأمل المشرق

» لا تنم حتى تأتى بخمسة أشياء هى:
» خمس أشياء حكيمة من أجل حياة كريمة ...
» سبعة أشياء يجب أن لاتمارسها بعد الأكل
» أشياء تحميك من الشلل الرعاش
» بوست مبالغة