الشمش غابت والشهر هلا ..أشطف الآبري وسبك الحلة

السحور المدنكل ...وخمر العاشقين وأنفاس نسام السحر

لم أبرح موقعي المتصنت ، فالفكي عبد الباقي صائم ليهو صيام حقو براو ، صيام مختلف ، قبيل قلت ليكم الراجل مشغول في شنو نحن ماعارفين ، وهوي انتو تعرفو كيف إتو فاضيين ؟ ما ملانين وحدكم حسن ، وسرعان ما بدأ الفكي عبد الباقي في إنشاد قصيدة أخرى لعبد الغني النابلسي لا تقل لطافة من سابقتـها ، ختم بها إنشاده بتقول ...

هبت سحراً فينا انفاس ربا نجد
فالمهجة قد ذابت بالشوق وبالوجد

يا طلعة من أهوى في أشرف أوقاتى
والوجه له نور قد أشرق في ذاتي
حتي ظهر المخفي للعز وللمجد

هذا العلم المفرد قد كان وما كنا
والمجلس يحوينا خذ كاسك وأدنا
لاشئ هنا يبقى من والد أو جد

عندي خبر يروي عني وعن الساقي
الصدق له نالت أهل الشرف الباقي
غير المولى عدم لاشئ هنا يجدي

صلى بسلام الله أمد الدنيا ربي
للفرد نبي الله والآل مع الصحب
ما أنشد عبد غني مدحاُ لذوي الود

وعندها أقام الصلاة بعدما سمعت "الله أكبر" ، فجرجرت جتتي ، ودخلت في حيرة من أمري ، ونازعتني نفسي ، فالرز باللبن وكورة النشا أمامي ، وأسحار النابلسي في شدو الفكي عبد الباقي ملأت روحي علي الشبعا العلي ، فبكيت

خارج النص يعني تخريمة

أحمد الأمين الجراد طيب الله ثراه ، ممكن يموت لكن ما ممكن ما يتسحر ، الكهرباء قاطعة والدنيا شتا راقدين جوة البيت ، صاح لواحدة من بناته " يا بت شوفي لي الساعة كم الليلة شالتنا نومة النوبة دي ما سمعناها ما تكون الواطة أصبحت " ، وأشار عليـها عشان تصحيني وتسألني ، وعندما سألتني عن الساعة قلت ليها " الله .. الساعة خمسة إلا تلت " ، عادت بسرعة وكلمتو " يابا الواطة دي أصبحت سألتو ليك من الساعة قال لي خمسة إلا تلت " قال ليها " أمشي جيبي السحور دا بسرعة ..أخوك دا علي الطلاق من يومو ما بشوف" ، تسحر ونام

ياتلاميذ المدرسة ست سميرة المِدرسة

كوشك .. كوشك .. كوشك مرقت مشت المدرسة ، الجو كويس ومطرة أمبارح صلحتو ، كالعادة صائمة ورويحتا كارة ، والهِدِم اللبيض يجر بالواطة ، وقفت في نص الطابور ، وبعد شوية بدأت في المرور على التلاميذ والتلميذات ، ووقفت قدام واحدة منهم وبعد أن سوت ليها الإسكاننق اللازم

" إسمك منو يا فالحة "
"إسمي عوضية يا آبلة"
"ياعوضية ما عندكم مشط في البيت ؟"
"عندنا يا آبلة"
"طيب ما كان تنفشي وترقدي بي شعيراتك المنكشات ديل "
والبنية ما شاء الله عليها مكوفتا شعرتين مدلدلات في صدرها بشرايط بيضاء ناصعة
"يا آبلة شعيراتي هديل مسرحات .. شعرك إتي المنكش "
"كفى .. يكفي قدحك ..يا لميضة أنا صائمة إتي صائمة ؟"
"بس .. آبلة جواهر قالت لينا في حصة التربية الاسلامية .. الصيام يعني ما ناكل وما نشرب من الصباح للمطاح .. لكن ما قالت لينا كمان ما نسرِح"
تحسست شعرها وصاحت في وجه التلاميذ "إنصراف"

مائدة رحمن .. البخش الأراضي ما بطلع فاضي

بعد ما خلصت شغلي اليومي ، مسكت الجريدة ، وبديت أقرأ في العناوين الكبار كبار ، ومن حسن حظي لقيت عنوان كبير " المفوضية تقيم إفطارها السنوي بميدان الإستقلال " ، والله لم أصدق ، وهتفت الله ينصر دين المفوضية أهو الواحد لقى ليهو منها فطرة ملح ، أصلوا ما طالعين منها بي حق ولا بي باطل ، ضربت تلفون للتجاني حسن ننسق معاهو هو باقي عندو خبرات كبيرة في هذا المجال الحيوي الهام ، رد علي كلمتو ..
* هاي تجاني شائف في إعلان في صوت الجماهير بخصوص مائدة الرحمن بتاعة المفوضية "
" أهلين أهلين كيفك .. الخبر دا ما شفتو المفوضية ياتا "
* ياخي أنا عارفا ليك ياتا ..وهو يعني نحن عندنا كم مفوضية تعمل مائدة رحمن ؟".
" ايييييك .. ياخي أنا أمبارح حللت الصيام في مائدة المفوضية القومية الشاملة ، وفطرت في مائدة مفوضية الهيئات الرياضية "
* طيب صليت وين .. تعال قول لي جامع مفوضية الاتحاد الاوربي .. ياخي دي حاجات ما بتستحمل هزار .. خليك جاد شوية الدنيا رمضان "
" رمضان ولا ود اب عين ..والله إنت الماناقش حاجة "
" غايتو أنا ماشي مائدة الرحمن بتاعة مفوضية الاراضي ماش معاي بغشاك ولمن اقرب لي بيتكم بشد ليك سلك تقوم تجيني برة "
* وإشمعنى بس دي ما إمكن يكون في مائدة أحسن منـها "
" والله أمبارح مشينا مائدة رحمن مفوضية التعويضات و اعادة التأهيل واعادة التوطين .. فطورن طلع طين بس " .
" مائدة مفوضية الترتيبات الامنية تالت يوم في رمضان طلعت شلف برضو والله تميتا قمردين " .
" أحسن تجي معاي وعندي كشف بباقي موائد رحمن مفوضيات كتيرة ، شوف عندك مفوضية إعادة الدمج والتسريح ، ومفوضية الاعمار والتنمية ، ومفوضية شؤون القبائل والمصالحات ونزع السلاح ".
* والله ما شاء الله عليك رمضان دا صلصة معاك والعشى كيف برضو مفوضيات ؟؟"
" أبداً والله العشا منسقيات "
* ودي شنو شنو كمان ؟؟"
" دي شنو قول لي ديل شنو .. دي ما العضة ذاتا .. والله إنت وهم بشكل "
* كدي خلينا في موضوع المفوضيات ..نفطر أول ، وبعداك نشوف موضوع العشا مع المنسقيات "
" ياخوي هيي أنا كلمتك قلت ليك ماشي مائدة رحمن الأراضي تمشي معاي ولا أجليك "
* أنا دائر أعرف إنت ليه مركز على الأراضي مش ممكن تكون في واحدة أحسن "
" يا دقوسة إنت ما سمعت بالبخش الأراضي ما بطلع فاضي " .
* وكان يعني الخش أي واحدة من ديل وطلع فاضي منو ؟؟ .... أحيييي ... حلو .. مُر علي ".

الصدقات للأغنياء والمسئولين والعاملين آلهة
والمؤلفة جيبوبهم وسبب الخراب وإبن السفير

" يا تجاني وين إنت قافل موبايلك من ساعة الفطور دي فطرة ما منظور مثيلـها ولا شنو ؟"
* لا والله كنا في فطور خاص عاملو علي نصير في بيتو عازم ليهو جماعة أصحابو *
" ياخي والله علي نصير الله خلقو ما صاحب ليهو زول ياخي هو خلى ليهو صليح في الدنيا دي "
* يا وهم إنت ... إنت قايلوا عازم ناس الحلة ياخي دا عازم حاجات كدا ما تشوفا إلا في التلفزيون*
" يكون عازم نسرين سوركتي ؟"
* لا يا حبيب دا عازم ناس الجلد وقطع الرأس بي فتح الجيم *
" دي كلمات متقاطعة عديل .. ياخي ما ترتر الشمار وتريحنا"
* لن ترتاح يا سفاح .. بالجد عازم جميع المسئولين في البلد مع بعض المهنيين وكدا *
" عازم المسئولين ولا المسئولين عازمنو ؟ "
* لا هو عازمن .. هم عندهم بيوت ولا بختو ليهم حلة في نار ؟*
" طيب ديل مسئولين من شنو الماعندهم شغلة بالبيوت ديل "
* ديل المسئولين مننا نحن .. إنت وأنا البنصاقر الغيوم وبزورنا الفقر الحتى لو جافا الظهور ما بغبنا*
" انتي وانا "
* إنت وأنا ومن حقنا صارفين علينا من دم قلبنا وجهدنا *
" أكيد عمك دا عازم ليهو عشرومية وزير ومستشار "
* لا دا عازم جمع قليل من المسئولين الولائيين والمحليين وناس المفوضيات والمنسقيات ورؤساء ومديري مؤسسات الدولة والشرطة والسجون ومدراء المستشفيات ومدراء المصانع وناس موباتل وسوداتيل وأريبا وناس الإم تي إن*
" إنت تعال الراجل دا لو عزم جيرانو وأهلو ما كان أحسن ليهو .. ما ديل هم الفيهم الأجر والبلقاهم في الحارة والباردة "
* ومالو ما المسئولين بلقاهم في الهابرة والنابلة*

ياحلاتو قمر العشا مع الونسة والدردشة

كو كو ... كو كو ... كو كو كو ..كاكا كو كاكاو كاكاو

كِري رِب .. فتحت الباب

اتي الباب دا قايلاهو دربُكا ولا شنو تاني جيبي معاك شيالين

المسلسل بدأ ولا لسه ؟

ما بدأ ..خُشي .. أسي شغالة أغاني وأغاني

تصوري جابو في نفس المواعيد ثنائيات للطيب عبد الماجد وبنات حواء

غايتو ما عارفة لكن هداك التلفزيون شغال والبيت مليان ناس والله الرموت زي شليل

إتي لسه شايلة الرادي والله إنتي ضهب بي شكل

ضهب أنا ولا إنت البتاكلي قروش الجمرة وجاية تكوسي في المسلسل عند الناس

لكن إنتو ناس ؟

كيف يعني شواطين

لا قاقرين .. يختي إنتو ناس ونغم

والله لو منك اتابع الدراما الفي الرادي ودي أحسن ليك بالذات في رمضان

الحسنة شنو ياختي لاخدرة ولاماء ولاوجه حسن

إنت عارفة الدراما الإذاعية كانت بتؤدي رسالة أسمى وبما لا يقاس

كأنو الدراما التلفزيونية بتؤدي رسائل غرامية

دا مش المعنى ، الدراما زمان كانت بتتوفر ليها نصوص من الواقع تماماً ، بتكتب من واقع الناس وحالهم ، وبلغة سهلة وبسيطة بفهما الناس بمختلف فئاتهم ، وبتلمسوا فيها مشاكلم وسكك حلها ، وبالطبع بلعب الإخراج الإذاعي دور كبير في توصيل الحوار للمتلقين أو المستمعين ، ومن الجانب الآخر فالعمل الدرامي الإذاعي بنمي فيك قدرات التخيل بإعتبار إنك بتتعاملي بحاسة السمع ، وما بتكتمل المشاهد عندك إلا بإستكمال حاسة الشوف ، وهنا بيجي دور الخيال البخليك تاخدي المشهد زي ما هو بكافة زواياه ، نحن كنا في رمضان بنتسمر أمام الرادي وبنجد متعة كبيرة جداً في متابعة أعمال درامية كان ليها صدى واسع ، وكنا بنحس بأنها بتعبر عن قضايانا ، ولو شفت المنضرة وخطوبة سهير وحكاية نادية كنت آمنت ، أسي الناس أهملت الإذاعة وهجرها الكتاب الذين ولوا وجوههم شطر التلفزيون ، ومع إحترامي لي رايك فالبنشوف فيهو الآن تسليع للدراما أو ممكن نقول خروج بالدراما عن مقاصدا إبتداء

الكلام الكتير دا فوت علي أغاني وأغاني

أها دي برضو من الحاجات الأثرت على الدراما الإذاعية والتلفزيونية على حد السواء

كيف علاقة دا بدا شنو

كيف ما عشان الناس المسئولين من الإذاعة والتلفزيون في الدولة ما عايزين زول واحد يهبش الواقع ، ويتناول قضايا الناس الأساسية أو فلنقل الحياتية ، ودا لأسباب متعلقة بنمط التفكير المنغلق للدولة من جانب ، ولتوجيه الموارد في غير تنمية وتوعية وتثقيف الناس وتلمس قضاياهم ، والتلفزيونات بتسيطر عليها الحكومة بالتالي تبث برامج قليلة التكلفة تلهي بيها الناس ، وتنسيهم الدراما البدخلا أصلاً في المشاكل والمحصلة نغني ونغني لمن رمضان ينتهي

أفهم من كدا بانك ضد الغنا

بالعكس أنا بحب الغنا جداً والغنا ذاتو ما دراما في شكل من الأشكال ، لكن أنا بتكلم وفي بالي رمضان فالغرض أو حكمة مشروعيته العمل على تنقية القلوب وتحرير العقول

قلوب وعقول والله لو الناس سمعوا كلامك دا التجار ما يبيعوا توب سهرة واحد

رن تلفوني خلتني وفاتت

تقدم احد سعاة مكاتب الادارة المركزية ــ ايام المرحوم عوض الامين عبد الله سرار "له الرحمة ــ بإجازته السنوية ، وناس عوض الامين قالوا ليه "شنو إجازتي إجازتي ماشي بيها وين ؟"
الراجل زعل وقام قال ليهم "ماشي بيها جمهورية مصر العربية المتحدة "
سخروا منه وأوعزوا للمدير بالتصديق له بشهر عشان يلحقوا حدو
الراجل أخد الشهر ومشى عد ليهو كم يوم متجولاً بين عديد ابوعشر والقلقالة وأم دقرسي ، وجا بعد الشهر لقى ناس عوض الأمين بفطروا تحت أشجار الإدارة الظليلة فسلم عليهم
"إزيكم يقماعة "
فعقدت ألسنتهم الضحكة

هلا والله
هلا بالطيب الغالي أخونا في الله المدثر العثمان الجاهوري
أكرمكم الله وهداكم
إشفيك مدثر
ويشو الباب يا عمري
شو اضرب وما اضرب
أنا توي تعبان وما فيني شد أتعافر

خلي لساني دا شوية انطلق سمح

المحبوب أحمد الأمين كتب:

هلا والله
هلا بالطيب الغالي أخونا في الله المدثر العثمان الجاهوري
أكرمكم الله وهداكم
إشفيك مدثر
ويشو الباب يا عمري
شو اضرب وما اضرب
أنا توي تعبان وما فيني شد أتعافر

خلي لساني دا شوية انطلق سمح

]color=blue]أخونا الحاج المحبوب مساك الله بالخير ..
يقولون يا المحبوب بقيت ما بتصافح الجكس ولا بترد عليهن في المنتدى ...
هل هذا الصحيح يأخي ...
ورمضان كريم وعساك من عوداوا ...
الأخيرة ده إلا تسأل منها راشد الجاك (استعين بصديق) ..[/color]

ياجاهوري تتكلوا بالشِعب لي قولة فلان كعب

والله العظيم وأنا صائم ولا راسمالوا


ياولد روق ساي خلي الراجل يقيس لي إخيتك في التبادي.

يابا الشبط دا عجبني أقيسو .

ياشافع ما قلت ليك رووق والله أخبتك بالمركوب دا إلا أجيب خبرك الداهي أب كريشه دا .

يابا الجزمة القيستوها لي دي زيزي والله ما اعيد ليك بي جزمة زيزي الليلات خنزير هو عيد هو ولا لقيط قطن؟

ياشافعة ما تصمي خشمك العريض دا أخير ليك بلقطك أسي برميك.

تلقطني في شنو يايابا إت من زمن الزيزي والله ما بلبسا يوم العيد تبقق لي كرعي في الحر دا !!

أها يعني إشتري ليك معاها مروحة .. خلاس عندي شرابات في البيت البسيها معاها كان حرت عليك يوم العيد .

تعال آآشافع قيس الكبك دا .. خُت الشبط لانو كبير عليك .

ما كبير والله أنا قستو .

الشبط دا سعروا كم يا ابن العم ؟

والله وانا صائم وماك طالبني حليفة الشبط دا واقع معاي بي 54 لكن عشانك ياحاج شيلو بي 55 النربح فيك فِرِد جنيه .

لييي ياخي 55 اصلوا مصنوع من شنو ؟

والله مصنوع من جلد دبيب.

طيب وهو الدبيب كلو بي كم ؟؟

ياحاج خلاص جيب 54 وشيلوا بي راسمالو .

أنا ما بدفع 54 هديل 20 شلتهن شلتهن ما شلتهن نشوف لينا دكان تاني.

خلاص جيب 25 .

يابا عليك النبي اكان ما إشتريت لي الكعب العالي دا الزيزي دي لا بلبسا ولا شتين.

طيب يا دو اللعم الكعب العالي بي كم ؟

دا بي 70 ياحاج صناعة ايطالية.

آآشافعة شديتك فوق الله والرسول ..أمرقي لي بره الكعب العالي بعتر ليك برميك بلحقك أبوي.

يابا جدي كان بلبس كعب عالي أكان حضر ناس النظام العام ما كانوا جلدوا.

ات الدخلك في حاجات النسوان شنو شيل شبطك دا وارجاني بره في الشجرة ديك عامل كريشتك.

اديتك في شبط الشافع 25 وهاك دي 30 والدنيا رمضان ما دايرين نكوس بالسوق مع الشفع ديل.

خلاص جيب 5 زيادة.

والله ولا تعريفة أنا امهن الجابتن ما دفعت فيها غير 6 جنيه

أمرقي آآشافعه لي برة .

والاسكرتي ؟

إسكرتي شنو كمان؟

يابا أمي ما قالت ليك تشتري ليها إسكرتي وبلوزة وشبط كعب عالي.

أحييي من أمك تقلع لي في النصائب داك الليلة دُقُنذمة ما خيت ليك جلباية.

يابا داك فستان للمدرسة دايرني أعيد بيهو ؟

خلاص أرحكاكي الطبالي هناك الحاجات بي رماد وشها.

يابا طبالي شنو أنا قلت ليك دايرة لي بينسات؟

آآبت أمرقي إمرقك جِلدك والله كترتي ومسختي بلقطك بالكيس دا بخلي دكتورك يسنتت.

يابا إنت كان تعبان أنا براي بمش أديني القروش.

إقرش حلقك ما لِك ممسكاني قروش ؟

قروش الصندوق اللدتك ليهن امي مع الصباح اتا قايلني ما شفتها؟

جِد لي أُمك يعني دايراني أكمل قروش الصندوق كلها والعيد لي أسي باقي ليهو إسبوعين آآرح علي الطبالي أرحكاكي بطلي اللماضة وقلة الأدب.

والله ما تشتري لي الإسكرتي والبلوزة ما أتحرك من محلي دا .

خلاص يابن العم شوف ليها إسكرت خفيف كده يكون سعرو معقول

إسكرت خفيف كيف ياحاح الإسكرت لازم يكون تقيل عشان نظامو كدا.

أنا قلت ليك يعني يكون مناسب

عندنا إسكرت بوضي بي 100 والجينز 65 وإسكرتات القماش العادي الواحد بي 40 .

خلاص جيب من أبو 40 واحد النشوفو

لو سمحت يا ابن العم زح لي شوية النمرق

الدكان ما هدا واسع بس بقت علي المحل الواقف فيهو انا دا ؟ أها أمرق مرق جلدك

يابا يا با .

مالك آآشافع تاني داير شنو علي الطلاق غير الشبط تاني سفه من حقتي ما أديك ليـها ؟؟

الولد الإتكلمت معاهو ومرق دا نشال أهبش جيبك

أنا أخو الطاهر !!!!!!!!!!!

علي الطلاق الحقه شالا مشى علي وين؟

دخل في دكان الصعوط داك .

آآناس سلام عليكم في واحد نشلني ودخل عليكم .

ايوة في واحد دخل أسي وسألنا من موقف طابت ومرق بالباب التاني.

عليكم الله عاينو لي معاكم للبنية دي النلحق الزول دا أرح آآجنا.

هدا هدا يايابا .

شوف ياود اللعم تدينا قروشنا وحقتنا بالحسنا .. وإلا والله ألم فيك السوق دا كلو ناس صائمين وروحن كاره يلمو فيك تكفت وشلاليت لمن يوصلوك المركز .

شلت منو الحقه والجزلان وحسبت قروشي لقيتا بي صمتا تفيت ليهو في وشو ومليت ليهو وشو دقيق الريق ما ناشف .