سوزان يابتي رجعنا ليك رسوم المغادرة .. بتسحبي الملف ولا ما بتسحبي ؟؟

سوزان رايس أمريكية ما عندها والي جات مع وفد مجلس الأمن
قالوا رسلتا هيلاري قالت ليـها أمشي معاهم أنا مشغولة
سألنا تحت تحت عن الشاغلا قالوا بتـها بتتوحم ووحما شين خلاص
بتها شيلسي العرسوها داكي الليلة قالوا بتنحل في يناير 2011م
إن شاء الله ربنا يحسن خلاصا وتنحل بالعافية والسلامة الشاملة
لكن هيلاري ما قصرت وصت سوزان ما خلت ليـها شي
وقالت ليـها أعملي حسابك من أبا كبير
ولأن سوزان ما ناقشه التكتح قالت لي هيلاري "تقصدي البشير ؟"
بشير شنو يا سوزي ؟
أنا بقصد كبير بتاع سوق المواسير وشرحت ليـها الكثير المثير الخطر
أها الوفد لمن جا دارفور عائدا من جوبا
طوالي إجتمع بالزول زاتو "الوالي بتاع سوق المواسير"
في الاجتماع تكلم الوالي كلام فاضي كتير
"رفض التدخلات الأجنبية والمحاكمات السياسية"
وطالبن بسحب ملف البشير من الجنائية كان دايرين لحل لمشكلة دارفور
وعشان يتفادوا تعقيد الأوضاع على الأرض وإبطاء عملية السلام
وبعد الوالي منح رئيس الوفد رئيس بعثة بريطانيا بالمجلس الفرصة للحديث
أها ما كتر النضم بس تطرق إلى وجوب إنشاء المحاكم وتحقيق العدالة
والاهتمام بالمرأة والطفل والاهتمام بضحايا الحروب ومعالجة قضاياهم
والسيطرة على انتشار الأسلحة والجريمة
وقام الوالي بالتعقيب على حديث رئيس الوفد البريطاني
وقال ليهو يازول هوي كلامك دا كلو كضب ونحن عندنا الإحصائيات
وبعد تعقيب الوالي طلب رئيس الوفد فرصة للأعضاء للحديث
قام الوالي اعتذر نسبة لانتهاء الزمن المخصص للقاء وفقاً لبرنامج الوفد
والوالي زاتو ما فاضي وعندو إرتباطات يعني يا وفد قوم لف
لكن رئيس الوفد حنس الوالي وقال ليهو عيب كدا نحن ضيوفك
المهم في النـهاية الوالي ياالله ويامين سمع حديث ممثل الصين وممثل روسيا
وكان تعقيب الوالي هادي لإعتبارات الصداقة بالصين الشيوعية وروسيا
لكن النقاش إحتد بين الوالي وممثلة هيلاري "سوزان" آخر المتحدثين
سوزان براها جابت الختا لي رقبتا ما كان في داعي تقول كلاما دا وتحرج الوالي
"قسمت بالله ومتنضرة نضرا سدادو عمري الملف ما بنسحبوا "
الوالي غضب وهاج فيـها هيجة شديدة عارفا محرشاها هيلاري
قام قال ليـها "بتسحبي "
"وتربة أمي ما نسحبوا "
"يتسحب ولا ما يتسحب إنت مالك ومال المحكمة الجنائية"
"ياختي هييي أمشي أقضي ليك شغلة"
" إنت زاتك ما موقعة على النظام الأساسي للمحكمة"
ولمن الوالي بعقب عليـها هي كانت بتتكلم مع المترجم
قام الوالي شكما وقال ليـها "أسمعي هنا خلي عندك زوق وما تقاطعيني"
وقرب يطردا قبال دا طرد ليهو نرويجية من قاعة في نيالا
سمعا تحرش ليـها في أمريكية كانت مخطوفة
المهم في النـهاية الاجتماع فرتقوا والوفد واصل برنامجو لحي ما جا الخرطوم
في الخرطوم زول إشتغل بيـهم مافي الناس مشغولين في همومهم
غايتوا رجعوا بطنن طامة وسوزان تاني سوت ليـها مشكلة
قالوا لمن جات المطار قالوا ليها تدفعي رسوم المغادرة قالت ما بدفع
المسئولين قالوا ليها دي رسوم سيادية يعني كسر رقبة تدفعي
وقالت ليهم رسوم لي شنو وبتودوها وين ؟
قالوا ليـها تدفعي بس ما شغلتك إن شاء الله نبني بيـها قفص حمام
قامت يا الله ويامين دفعت ليـها 15 دولار وقالت ليـهم
"بركة النبي محمد يخشن عليكم بالساحق والبلا المتلاحق"
خافوا من الدعاء رجعوا ليـها قروشا

حقيرة حقيرة في الحيطة القصيرة
رسوم مغادرة 35 ألف جنيه تنقص تعريفة يرجعوك
والعجب أكان كنت ما عامل حساب والزول الجابك المطار رجع طوالي طيارتك تصفر
لكن بت رايس عفيت منها قالت ليهم ما بدفع والراجل اللجي يهبشني قعدوا يجاروا زي ناس الحريقة
غايتو السيادة والوطنية وشنو كدا ماعارف مع الامريكان بتبقى هظار ساي
أسي في ذمتكم الأولى بالإعفاء المواطنين ولا سوزان رايس ؟؟
مالا هي محتاجة ليكم عشان تعفوا ليـها رسوم المغادرة وتقلعوها من حباب عيون السودانيين ؟
وبعدين فعلاً الرسوم دي بتمشي وين ولمصلحة من ؟؟