الدوام لله وربنا يلزمكم الصبر .. ياخونا شكر الله سعيكم وينتهي العزاء بخراج الروح

والناس تنجخ وتتنهف قايلين هيا بكا والدموع ما تديك الدرب يبكوا ويستريحوا

جا داخل نائب الرئيس وهرج فيهم هرجي شديد خلاص ونهرن تنهر شديد

"الله يخيبكن ويخيب ولادتكن مالكن الببكيكن شنو ؟"

بنبكي من الورطة الاتورطناها دي قلنا ليهم انقاذ اها الليلة بقت نخاسة مالك ما عارف يوم تسعة يناير قرب

"وما يقرب اكان قرب القال ليكم منو حالنا بكون أسوأ بعد تاريخ التاسع من يناير "
"تسع يناير تسعة يناير جننتونا انتو ماعندكن شغلة تقضوها تتنهفوا زي الميت ليكن زول"
"دي كلها تصريحات فاكنها اعداء المشروع الحضاري وسط المواطنين عشان يخوفوهن"
"هدفهن النيل من من سلامة واستقرار واقتصاد البلاد وتخويف المستثمرين من السودان"
"والمفروض تتكلموا معاهم عشان يراجعوا انفسن ويتقوا الله قبل أن يطلقوا هذه التصريحات"
"وكان علي الامريكان فالحمد لله التزمنا ليهم باننا ما حا نتحايل ونعطل الاستفتاء تاني في شنو "
"وأنا بأكد ليكن بأن مصلحة الجنوب والشمال ودول الجوار والعالم أجمع في بقاء السودان موحداً"
"والاستفتاء لا يعني نهاية الدنيا وبعد التاسع من يناير القادم حا نكون أفضل من الآن"
"قوموا علي حيلكم عشان نعمل الاحتياطيات لأسوأ الاحتمالات"
"وكمان نعمل لينا حوار مع الجنوبيين لتغليب خيار الوحدة وإطلاق حملة في الاسابيع القادمة تبشر بأهميتها"
"وأنا أعتقد بأن أي خروج عن هذه الروح يعد مخالفاً للتوجه العام للدولة"
"ما تخلو الشيطان يأمرنا بفاحش القول والسلوك"
"نحن دايرين نقدم للناس الكلمة الطيبة وحسن المعاملة"
"ومن يوم الليلة دي حاندعو الناس للعفو والتصالح والصبر"
"وإن وقع الانفصال لازم نكون قدر التحدي الجديد بذات روح التصالح والحوار وحسن الجوار"

قام رئيسنا الما نوريقا قال ليهو " جون كيري في ولا فات ؟"



رد نائب الرئيس
"جون كيري فات جوبا وجائي داير تقابلو ؟ "

هل دموع الدكتور نافع هى الطوفان
الذى يغرق الأنفصال؟؟

وَلا يَبْكِي عَلَى نَفْسِهِ حُرٌّ
وَلَكِنَّ دَمْعِي فِي الْحَوَادِثِ غَالِ

لماذا بكى نافع على نافع الان ؟؟

نافع على نافع صقر المؤتمر الوطنى بكى وهويستمع لحديث مواطنة عن الوحدة التى أضاع حزبه فرصها وأستنفذ جميع سبل أعاقتها هو وجماعته المتشبسة بالسلطة، أو ربما لاننا لم نعتاد نافع على نافع باكيا وليقين راسخ لدينا أن دموع الرجال عزيزة وغالية وربما لاتذرف الا عندما تعرف الحب الشائع بانه من أسباب بكاء الرجال..ولم نعرف عن نافع على نافع بأنه يعرف الحب خارج نطاق المؤتمر الوطنى وحب السلطة والتسلط والغاء الأخر والأستهزاء به..وهذا ليس تشفى فى الرجل وهو يذرف دموعه الغالية حبا وهياما على ست الحسان (وحدة السودان) بعد أن رفضها وهى طائعة وجاء يبحث عنها وهى ضائعة..

مثل بكاء نافع أمر لايجب الأستهانة به ومرور الكرام عليه فالتاريخ كما يدون للأبطال والرموز كذلك يدون لمن هم أسباب رئيسية فى صنع الأبطال والرموز لمجدهم..وهى المعادلة التى تسير عليها الحياة فى الصراع الأزلى ما بين الخير والشر.

ربما أن دموع نافع هى دموع ندم ولحظة صحوة ضمير، ومراجعة للذات ونقدها وهم من زرعوا فينا وهم الدولة الأسلامية العادلة والعهد الفاروقى الأستثنائى ، والمشروع الحضارى وما شابه من الشعارات الزائفة ، لنصحو على مفأجأة أن هذه الشعارات ما هى الا واجهة لتجار الدين يسترون بها عوراتهم التى بفضلها سيطروا على الشعب السودانى وحولوه الى شعب متشرد هائم على وجهه فى بلاد الله التى فتحت له أبوابها للنجاح بينما أوصدت أبواب بيته فى وجهه،وأخر داخل البيت لوث عقول نصفه وحول النصف الأخرمابين هتيفة وأرزقية يجيدون بيع مواقفهم وتقليب وجوهم شطر المال والسلطة ، وأخرين شرفاء أنزوا فى ركن قصى يصارعون ضيق شظف العيش والحصار الذى فرض عليهم مقابل مواقفهم.

ربما بكى نافع على نافع على تلك الأفعال التى صدرت عنه سواء بالامر المباشر أو الاشراف عليها بنفسه فى بداية عهد مشروعهم الحضارى الفاشل..والذى ستكون أكبر وصمة عار تلتصق بجبينه تقسيم السودان الى دولتين..ولن يغفر له التاريخ والأجيال القادمة جرم ما أقترفت يداه رغم سيطرته على الألة الأعلامية ألا أن هذا العصر يفضح أى سر مهما تم التعتيم عليه عصر المعلومة الذى يكشف زيف ما خدع به الأنقاذييون الشعب السودانى.

ربما كان نافع رجل محظوظ وجاءته الدموع فى هذا الوقت لتكون له طوق نجاة من التاريخ وغسول طهور لما أرتكبه حزبه فى حق الشعب السودانى ، فالدموع أحيانا تزيح هم الجبال من على الصدور، وهى بكل الأحوال مفيدة سواء كانت دموع تماسيح كما شاع فى أمر الذين يدعون البكاء للأستعطاف ، أو دموع حقيقية نابعة من الدواخل صادقة المشاعر.

وبناء على أفتراضية حسن النية فى دموع نافع أنها صحوة وثورة حقيقية تهب من صحوة ضمير ويسطر لنفسه صفحة ذهبية فى التاريخ ، وحزبه فى تدارك ما جعل نافع يبكى ويلفت اليه الأنظار هذا أذا كان نافع والمؤتمر الوطنى سيدعمهم القدر دائما بالحظ الذى أعتادوا عليه فى ادارة الأزمات التى تسببوا بها للشعب السودانى وهاهم فى طريقهم لفرض واقع الدولتين والتى تسبب فيها حزبه.

على نافع أن يمسح دمعه ودموع الكثيرين بالفرصة التى جاءته على طبق من ذهب تحملها له الدموع التى ذرفها تأثرا بحديث تلك المواطنة. ولايمكن لنا أن نأمل فى أن يكون نافع فى مثل رقة الشاعر الذى قال:ـ
الدمعة لو بتعين كان بدرى عانتى
ما خلت الأيام الآم صابتنــى
لهذا علينا أن نتوسم فى دموع الدكتور نافع على نافع خيرا ونعتبرها هى التى تعين على الوحدة هذا اذا أراد وحزبه.)) عبد الغفار المهدى /سودانايل

بصراحة دموع الرجال غالية وعزيزة "ما عارف دي القالا منو " ولكن موضوع البكاء موضوع اعتقد بانو جديد ، المهم ياجماعة عليكم دينكم وايمانكم البتقع في عينو صورة نافع يبكي يزودنا بيـها ، أنا من أمس أفتش ليها

(( كتبت الرائد صحيفة حزب البشير : شدد الأمين لديوان الزكاة البروفيسور عبد القادر الفادني على ضرورة استصدار قانون يمنع رهن المنازل التي تسكنها الأسر لإسهامه درءا لتشتتها بفقده.وأكد لدى مخاطبته تدشين مشروع الرسائل القصيرة لدعم الغارمين والمعسرين بسجن النساء بأم درمان أمس، استمرار المشروع بغض النظر عن وجود أو عدم وجود غارمين.

وطالبت راعي المشروع حرم رئيس الجمهورية وداد بابكر، بتمليك المساجين وسائل للإنتاج تقيهم شر الحاجة والخطيئة، ودفعت بمقترح تعميم مشروع النزيل المنتج الذي وقعته إدارة السجون والإصلاح والاتحاد الوطني للشباب السوداني على الولايات.

وأزالت وزير التنمية الاجتماعية عفاف أحمد، النقاب عن اتجاههم لإطلاق سراح (50) نزيلا ونزيلة في القريب، في إطار دعم والي الخرطوم د. الخضر لأجل سجون خالية.

واقترح ممثل وزارة الداخلية مدير شرطة ولاية الخرطوم الفريق محمد الحافظ، في الاحتفال الذي يشرف عليه والي الخرطوم د. عبد الرحمن الخضر ووزير الرعاية والضمان الاجتماعي أميرة الفاضل ووزير التنمية الاجتماعية عفاف أحمد، اقترح تغيير اسم سجن النساء بأم درمان باسم "مدينة التائبات"، مثمّناً دور والي الخرطوم د. الخضر في الاهتمام بالسجون وتخصيص ميزانية لأول مرة لتنميتها، وشدد على حاجة سجون الولايات إلى بيئة جديدة وفرص تدريب للنزلاء.

وناشد مدير الإدارة العامة للسجون اللواء أبوعبيدة سليمان في الاحتفال، الذي نظمه برنامج سند وقلد بإذاعة ساهرون بالتعاون مع سوداتل وديوان الزكاة بالولاية ولجنة الغارمين والمعسرين، جهات الاختصاص ببذل مزيد من المجهود للارتقاء بالبرامج الإصلاحية وإعادة صياغة المساجين ليعودوا فاعلين في المجتمع.)) الراكوبة

مشروع الدموع المنتج من تداعيات المشروع الحضاري ، فقد
قيل في معجم الاثر قبل حضور البهم (الاثر تعني الحياة الاجتماعية في السودان فبل الانقاذ) انو فلانة دي كاسرة فينا ضلعة بمعني انها مبكيانا ولان بكاء الرجال عيب وكترت البتابت عيب فقد غلفها البكايين بمصطلح الضلعة لان الضلعة اكثر خشونة ومدعاة للفخر والتحمل كما هو حال الجماعة بتاعين الوست بقولهم : والله امبارح بكينا ليك ناس فلان جنس بكاء اخدوا مننا سيك ، علي اننا لم نسمع من قبل بشخص او فئة او (جماعة) تبكي الاخرين وتذرف الدموع بالانابة عنهم

بعد التحية
الشى المحير دموع باقان
فى حفل بروفات النشيد الوطنى
قال نتيجة لانفعالات الموسيقى والكلمات
والحلم الذى تحقق
ودموع اخلاص قرن لضياع الحلم الماإتحقق
وهو الوحدة
يعنى باقان بيبكى فرحاً بالانفصال
واخلاص قرنق بتبكى حزنا على الوحدة
واعتقد أنه هذا سيكون حال الشعب الجنوبى
فى مقبل الايام
لكن الجماعة ديل ما قعد يبكو
واحد عندو وقيعة واتنين عندهم
زكام من غبار المناخات المتقلبة هذه الايام
فى زول ببكى بى عين واحدة
فى زول ببكى بى نخرتو
غايتو فاضل بس ياسر سامعنو بيسكل
واحد يجيب لينا صورتو
مع خالص التحايا

يا صلاح دا كله شغل بتاع فوتو شوب شغل مدبلج كله نحنا ناسنا ديل ما ببكيهم إلا خشية الله وبس ... لكن نعمل شنو في ناس الراكوبة وسودانيزون لاين .......... الله المستعان ...

المحبوب كتب("الله يخيبكن ويخيب ولادتكن مالكن الببكيكن شنو ؟")
الأسلوب دا يا المحبوب ما حلو في حق رئيسنا ووزير دفاعنا الناس ديل قدموا الغالي والرخيص في سبيل الوطن ولما ناس الحركة الشعبية ديل وصلوا لحدي الكرمك ايام الاحزاب ما في زول دحرهم غير هؤلاء والبشير لما أستلم السلطة كان قائد في ميوم ما كان قاعد في الفنادق الخمسة نجوم ولا كان بياكل في في الأيسكريم وما باع بلده للخواجات .... ليك الله يا بلد