هاشم وداعا يا أيها المحمود

نعم إنه هاشم محمود محمد إدريس
إبن الصداقة البار
إبن أي بيت من بيوت الصداقة
إبن بت السيد وبت العوض
إبن بتول بت علي والستية بت الجاك
إبن بنات البشير وبنات البسر
نعم انه انت
من حملت على ظهر قلبك حبهم
ومن وقفت إلى جانبهم تودهم وتبرهم
في أفراحهم وكرهم
حقيقي يا هاشم ولحدي الآن ما قادر أتصور
أتصور أن نكون أو يكونوا أو يكن بدونك
كيف ستكون مجالسنا في الصداقة التي أحببت حد الثمالة
مع ود البركة ولا مع عباس الامام وجعفر الامين
والراحل المقيم فينا عوض الامين
وداعا يا أيها المدهش
أيها الملهم الجميل
إنه يوم ولا كل الأيام
كيف يفوتني أن أقول لك وداعا وأنا متأكد بأنك حا تسمعني
الله يا سيد ليتني كنت معكم في هذا اليوم
مبارك والرضي ومحمد يوسف ومصطفى البشير
واولاد الطيب الامين وناس ورملي واولاد الماحي
ناس عابدين وبدر الدين وعثمان عبد الوهاب
ومحمد ومحجوب وعصام محمود
وأهلنا في الصداقة جميعا نساء ورجال
لنحسن جميعاً وداع هاشم
ولندعو جميعاً بأن يلهمنا الله الصبر على فقده
فقد مؤنس
وأنيس
وفعال
تعجل ورحل
لم يتأخر
لم نقل له وداعاً
سلم روحه بسهولة ويسر وغادر
ترك لنا كلام كتير
ترك لنا قيم كتيرة وذكريات مهولة
ما أروعك ياهاشم
وما أجملك
وما أحلاك
كلامك
وسلامك
حبك للناس وحبهم لك
حزنك وفرحك
ضحكك وبكاك
ما أطيبك وما أنقاك
وداعا هاشم يا أيها المحمود

فات علي أن أسجل هذا النعي في الصفحة المخصصة
فليعذرني الادمن فقد تفاجأت بالخبر
لذلك الرجاء إحالته للاجتماعي
"إنا لله وإنا إليه راجعون"

انا لله وانا اليه راجعون
له الرحمه وللاهل والبلد جميل الصبر

ارمي الدمعة فوق الدمعتين ياعين
بعد الليلة حابسها الدموع لمين
نزيف الدنيا من حد البلد غربي
ونزيف الدنيا لاحد البلد شرقي
وجوم عامة الليالي العامره
كل الدنيا خاتة الخمسة فوق الاتنين

رحيلك وجعة ياهاشم
رحيلك نجعة من دار الفرح والزين
رحيلك طعنة في جوانا
رحيلك وقفة فوق درب العليك باكين
فيها نهاية المشوار وحد الفرحة والامال
وحد الفال وحد الزين

ارمي الدمعة فوق الدمعتين ياعين
وبعد الليلة حابسها الدموع لمين
بعد نزلت سكاكين القدر
ديل مسنونة ديل فوق ديل
وشربت من بواكرينا المعتق
حالتو ياالداسنو من السيل
وياالمحزون وحرابنا متكلات قدامو
فوق مشنكسات الخيل
وياالداخرنو من زمن الحساب
شفعنا رابطين الحجر بالتيل

وفجاءة يجينا من طرف السماء مرسيل
ينعب فوق كلوب كاكول
غراب هابيل يبقي رحيل
رحيل كل الغيوم الهامعة متواسرات
رحيل كل الشهور العامرة بالخيرات
رحيل الطينة من طرف الجزر يومات
رحيل الخضرة قدام منجل الهدام جفاف وممات
رحيل البادية فوق برقا وراء نجيمات
رحيلك مو رحيل اجيال
رحيل اجيال .............؟
رحيل بلدا تمام وكمال

وياالعرشت فوق نخل السواقي الشال
واتمددت فوق النيل من الشلال و لشلال
وياالهاجرته فوق ريش الرهو رحال
تظل مرسوم علي باب الليالي سؤال
بعد عشعشت في خاطر الغبش موال
واتبللت من الموية بين السعفة والبلال
بعد عرقك برق في ترابنا حد ما شال
واتمددت غادي وجاي
يمين وشمال

بعد الحال
منو البقدر يجيب غربال يغربل روحك
المدسوسة في الاجيال
وفي نفس الدغش مبثوثة في الشتلة
ونداها السال

بعد الحال
منو البقدر يطاول حرفك المعقود
علي برقا حرير وهلال
مسطور فوق رقاب البرد
فوق الصخرة والتمثال

بعد الحال
رحيلك يا المشرشر في مداخل الدنيا
كالاوصال
رحيلك هزه في العقدة
ومجامع الروح كما الزلزال

ارمي الدمعة فوق الدمعتين ياعين
بعد الليلة حابساها الدموع لمين
كتير من شاف ديارو العامرة
هاجت فوق درب وداي
كتير من عدا فوق سردب
بلا يوادع بلا يناشد كبار القوم
وياخد راي كتير ياعين
كتير الغابوا ماحضروا
وكتير الراحوا ما عادوا
وكتير البمشوا منو جاي
الا الناعي

عمرو الناعي شافوا لو مصير
وتبكي طويرة الاحزان سنين وسنين
مصيرة تساسك المسكينة بين الباسا
والباساي
ترفرف من سخاي لسخاي
وتسال عن صدور مغسولة بالدوباي
و تنزل فوق حلقات مجالس الشاي
اقول الشيخ وفي الشاشاي
تبل الريق من الدمع البيوشل من ارامل الحي
وتشرق بالرحيح في الردحه و الوب احي
وتمرق من محاري الناس تولول فيها جرس الصئ
وتصرخ فايقة ياجلابة اقيفوا لي
وتسعد ضايقة ما شفتوه زولا لي

صديق وهبة
البركة فيكم جميعا
البركة في ابنه محمــــود
وفي سيد وعصام ومحمد ومحجوب
البركة في ناس الصداقة جميعا بدون فرز صغيرهم وكبيرهم نساء ورجال
فلم يجمع أهلنا في الصداقة على محبة شخص بقدر ما حبو هاشــــــم فله المغفرة وحسن اولئك رفيقا
"إنا لله وإنا إليه راجعون "

اخي سعيد
كتر خيرك ياخي وربنا يجعلا اخر الاحزان والمغفرة لهاشم والصبر لآله وذويه

المحبوب. احسن الله عذاكم وربنا يتقبلو القبول الحسن..٠ وتعاذينا بقدر حبكم للراحل..

تقبله الله القبول الحسن ، وعزاءنا للأخ المحبوب وللأخت هبة والأخوان صديق وياسر الامين وحسن كيشو وكل آل وجيران ومعارف الفقيد .

ربنا يرحمه ويغفر له ويجعل قبره روضه من رياض الجنه

له الرحمة والمغفرة ........اللهم تقبله قبولا حسنا واجعل مثواه الجنة......

أحسن الله عزائك في مصابك الجلل اخي المحبوب ..
ودعواتكم له بالرحمة ..
لا آراك الله مكروها في عزيز لديك
وألزمك الصبر والسلوان وإنا لله وإنا إليه راجعون ..

المحبوب وكل الاهل الصداقة احسن اللة عذاكم وربنا يتقبلو القبول الحسن
وتعاذينا بقدر حبكم للراحل وكل ال وجيران ومعارف الفقيد

انا لله وانا اليه راجعون
اللهم اسكنه فسيح جناتك مع الصديقين والشهداء
والهم اهله الصبر وحسن العزاء

له الرحمة والمغفرة

الشكر الجزيل لكم جميعاً إخواتي وإخوتي الأعزاء أعضاء الحصاحبصا دوت كوم
والشكر لمؤسس الموقع الدكتور بكري الذي جعل التواصل ممكنا
وفي مثل هذه الظروف والتي ودعنا فيها أعزاء كثر
الشكر لكم على المرور والدعــــاء
وربنا يرحمه ويغفر له
ولا اعتراض على حكم الله
فدعوني أناجيه فقد افتقدناه كثيرا جدا
وربنا لا يريكم مكروه في عزيز

فياهاشم ما شلعت ضليلة حكاوينا الما إنتهت
ما قلت صاد
بعد البعاد
ماقلت راجع
مالا الخطى ما شالتك ؟
مالا الفضاءآت ملتك ؟
ما لا ياهاشم
حتى الكليمة الطيبة البنسمعا منك غلبتك ؟
ولا الضحكة كمان أعيتك !
ما قلت بتعود
للحكاوي
وللغناوي
ماقلت بتواصل
تزور
ما كنت بطايب
تواسي
في القواسي كان آلام كان سقم
تلاعب
تداعب
تجامل
تغني
شجن أليم
وعم عبد الرحيم
والواعي ما بوصو
من أمس الضحى
جوهو الجنود ساقو
يامقنع ولياتو
ما كنت بتدندن
غزال البري ياراحل
تبقى الراحل الواعي
وانت الغزال
كيف فات علينا شوفك
تنهد قدامنا قامات كتوفك
وما نجيب خبر
كيف تشيل همك براك
وانت شايل همنا
ما انت شوفنا
ما انت طوفنا
الراسي فوق دفق جروفنا
ما انت هاشم
طبعك براك
تنضم درر
تحكيها الحكاوي تسيل عبر
تنقع دموع
تبلل مقل
يالما مُقِل
أرجع تعال
سدد طاقات الارتحال
كفينا عذابات السؤال عنك أرح
أرجع تعال
وأفتح مسامات الفرح
زي زمان
ياحليل زمان
زمان حضورك المشتهى
أيام بـهاك يامنتهى
ويا مبتدأ
فرقك صعب
غياهب لواعج
متاعب عذاب
وكوم ضهب
قربك ذهب
ذكراك حاضرة
ولن تذهب تغِب
إبتسام
وسماحة
وأدب
هب من ثباتك هِب
أغشانا طِل
نسمنا طل
وأنشر عبق
وأنثر كلام
أو أحكي قُل
اليامُقِل
يالماك تضاد
ما إنت حزمة إتساق
ما إنت وحدة شعور
ثاقب فِكًر
واثق خطى
وما وجِل
سمح قولك
تطيب خواطر
تفقد تزاور
خيرك مناور
صبرك معاول
تبني وتناول
تفتح جداول
تسقي الشقوق
تفرهد خمائل
ما أروعك محبوب قبائل
من حاج عبيد لي عند حبائر
الموت حق
مافي إعتراض
الدمعة جابرانا مش عناد
فلتحيا ذكراك
وليغفر الله لك
ولمن وددت ووداك
الله كريم
الله رحيم
رحمن صمد
لم يلد ولم يولد
فبرحمته فليرعاك
وليتغمدك
وفي جناته فليكن مسكنك
فما انبلك
وليجعلك الله العزيز
في عليائه وملكوته
مع الصدقين والشهداء
فانت منهم من غير شك

رخم الله هاشم ذاك الشاب المتقد والتعازى لكل الصداقه التى هى حقا اهله قاطبة

الهم ارحمه وادخله الجنة وتجاوز عن خطاياه يا رب العالمين

الف رحمة ونور عليك يا هاشم