دينيس كلب ود ادريس الكلاب تنبح وهو في محلو ينيص

التابعوا أحوال حكومة عنبر المجنونات في الأيام السابقة أكيد إستغربوا من الدهشه
فالحكومة محاصرة ببلاوي وتلاتل من كل الإتجهات وعلى جميع المستويات
على مستوى البناء التنظيمي فالشكلة بعد طرد صلاح قوش واقفه نار شرق
وقوش بقى ليـهم زي "ديك العِدة" إن نـهروا كسرا وإن خلوا طقشا وبعثرا
وحالة الإستقطاب وصلت أعلى مراحلـها "والحشاش من يُفرِغ غبينتو"
الذمم إلا تلبس ليك كمامات وبدلات اللبس تكسي عرايا السكن العشوائي
والعجب بدلات الأعياد تحلف تقول السنة فيها عيدين حقات زول واحد
وعشان تعيد عيد الله الواحد دا إما تركب الموجة أو توقع أبوجا
وزير مالية النظام شغال "عواسه" طرقة في الريكة وطرقة في الخشوم
موقع ليهو عقد عمل منح بموجبه عيدية وحق كساوي المساكين لمحسوبه
وقالوا "والعهدة علي حريات" ماكل ليهو قروش يتامى والورثة مزرزرنو
وزير الخارجية نادوا لي إجتماع أمين الجامعة العربية إعتذر بـ"دق العيش"
بقت عليهو حكاية حبوبتنا النادوها في قضية توزيع تركة المرحوم والدها
وقفت جنب السلك الشائك قبالة مخزن السكة حديد ونادت ليـها عسكري عابر
وقالت ليهو " عليك الله دحين ديك ما المحكمة يا عشاي" قاليها "إياها" قالتلو
"خلاس ياود أمي النبي كان ما دخلت للقاضي وقلت ليهو بدرية واقفه ليك"
إجتماع عشان تعيين أمين جديد للجامعة العربية تقول مشغول ما فاضي
مشغول في شنو ؟؟ كان تمش "تلجق" وتجي علي الأقل يقولو أهو جا بدون رجا
ومع بقية المآسي المعروفه فالشعب صابر والحكومة ماسكاها أم ها الله ها الله
وأتاريـها "بي تحت تحت" ناوية تركب الدبابة وتعمل ليـها حرابة مع الجنوبيين
والتحرشات بدأت بإنتخابات جنوب كردفان التي كسبها الحلو وخسرها
الكسب بعدد الاصوات وتوقيع المناديب والخسارة بالمفوضية المتكسبة
ولأن الفوز كان بطعم الخسارة والحال مُتردي والعيشة أصبحت بطالة
كان لابدّ من "الهروب للأمام" وعمل حرب لترتيب الأوضاع المنفلته أصلاً
الفرصة أتت من إطلاق نار على القوات المشتركة في أبيي وقتل عشرين
وقبل التحري لمعرفة المعتدي إمتدت أصابع الزناد إلى الحركة الشعبية
ناسيين "وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى"
وفي خلال أربعة وعشرين ساعة كانت جيوش كتشنر على أبواب أبيي
وطوالي الآلة الإعلامية دورت في تمجيد الجنود البواسل في طرد العدو
"المرتزقين" تحدثوا عن الخسائر التي كبدوها للعدو في الأرواح والممتلكات
وعرضت قناة الجزيرة صور لأرض المعارك في منطقة أبيي وما جاورها
كرانك وقطاطي قش متناثرة لا أعتقد بأنـها محتاجة لأكثر من قشة كبريت
وبواسلنا ظهروا أمام كاميرات الجزيرة يهللوا ويكبروا بفتح القسطنطينية
ويحمل معظمهم أسلحة لو وقعت في يد ثوار ليبيا ..القذافي كان لحق أمات طه
بل الرئيس "البقص الكيس" أصدر فرماناً بحل إدارية أبيي فوراً وجنوباً
وفي الخرطوم ناس المجلس الوطني وبعد التداول أقروا الإجتياح بالأغلبية
التقول إجتاحوا جزر الفوكلانز وأخرجوا الارجنتينيين نكاية في البريطانيين
الأغلبية الماتلقت لملاحقة المتهربين من المراجع العام حسب تقريره للمجلس
الأغلبية الساكتة ومسئولي لغف الحج شغالين "بُنية" وداخل المجلس الوطني
وطبعاً شغالين "عكس" الشعب يقول دائر طعام يردوا ويقولو ما بنغير النظام
طعام شنو يعني يضيعوا الحكم عشان طعام حلاة لقلق وتلقوها عند الغافل
معقول يضحوا بالمخصصات البرلمانية عشان يطعموا الناس ومن طرف كمان
اضيع انا وقلبى يزيد عناهو
فليحيا مشروعي ويبلغ مناهو
ارسل ليهو صوتي ويرسل لي كاشو
ليه ماطيع اوامره .. واتحمل اذاهو !!
طيب ما تلفتوا نظر "الحاكم الفارس" إلى حقيقة الوضع المأساوى ولدرء البلوى
يكونوا ما سمعوا ببرتكول ابيي المبرم في 2005 ولا باتفاق السلام الشامل
ولا باستفتاء 2011 البتقرر بموجبه "ابيي" إلتحاقها إما بالشمال أو بالجنوب
لاسمعوا بالإدارة المشتركة ولا جايبين خبرلكيفية تقاسم عائدات البترول
ولا لتأكيده على حقوق الرعي بالنسبة للمسيرية الذين يعيشون في شمال أبيي
ما سمعوا "كلو كلو" بتكليف مفوضية تحديد وترسيم حدود أبيي المتنازع عليها
ونسوا قرار التحكيم الهللو ليهو عندو صدوره وتملصوا منو عقباتن
بالله عليكم الله دا مجلس تشريعي ولا فرقة شيالين "كورس" مع عمار الشريعي
أما "الهارس مالنا ودمنا جيش الهنا" بقت عليهو حكاية دينس
ودنيس دا كلب لواحد اسمو ود إدريس "الكلاب تـهوهِو .. وهو ينيص"
جيش سلاحو يا كافي البلاء ما بيتم توجيهه إلا للمواطنين الغلابة
يوم واحد ما سمعنا بيهو عبر ليهو حد من حدود السودان وإستولى على غنائم
حتى حلايب تركوها للمصريين ولاسياسي ولا عسكري قال بغم مافي
بس فالحين في قطاطي المشردين في دارفور والجنوب التقول سلاحهم "نِبلة"
ولسان حالهم :
نحن أولاد بلد نحكم نجور على كيفنا
فى لقى فى عدم دايما مقسم حيفنا
نحن أب خُرس بنملاه وبنطرد ضيفنا
نحن فى رقاب الغرب والجنوب مجرب سيفنا
غايتو الجنوبيين غاطسين ليهم في بير وعلي العليهم واقع فيهم فيل
كبري في بحر العرب ما معروف مسقوف بي شنو حرقوا خلو دخانو متلعب
واحد عاقل ساي من السياسيين "أبان حلاقيم" يقول ليهم بي وراكم مافي
يدوسوا على الدساتير بدون أي حرج ويلوكوا في العهود زي الماحاصل حاجه
كشفوا حال البلد بين الامم ومجلس الأمن اليوم والتاني متخمخم جائيهم
والتصريحات بالفم المليان "ما بنطلع من أبيي إلا وفق ترتيبات جديدة"
مش كدا وبس أوعزوا لوزير الخارجية بطرد القوات الاممية "يونيمس"
الرد جاهم سريع "ما بنرحل إلا بقرار من مجلس الأمن هو الجابنا خلي يقلعنا"
اللإنكسر السلم بعد ما طلعنا
وما خايفين من السما ينفتح يبلعنا
والزراعنا غير الله اليجى يقلعنا
النشوف الجيش حا يجهز معداتو عشان يقلعهم ولا لا ؟؟
لا
لا
يا مبشتن لحالي وكابوسك في بالي
ما بفارق خيالي في أنصاف الليالي
بس اعطف بحالي وأوعي تقولو لا
لا
لا لاله.

والله يا المحبوب كان ناس الحيكومة عارفين انت قاعد ليهم ذى قعادك دة .. كان لا ولدوا المحن ولا خلوك تلولى جنياتهم ...