علينا جاي "الهوبلي".. أوعة يفوتك ... وزارات سفارات وكالات .. تطلب وزارة تاخد وزارتين هوادة الفرص محدودة والمروءة مهدودة

علينا جاي ..وزارات سفارات وكالات "الهوبلي"..
عرض ساري لحدي يوم القيامة أوعة يفوتك
تقبل تخش معانا وتطلب وزارة الداخلية
نديك ليها وتاخد وزارة البيئة والبحث العلمي "هوادة"
سلطة جماعة "الهوس الديني والإستعلاء العرقي" قسمت البلد كيمان وتقسم في الوزارات كتر خيرا
ما شاء الله الحكومة إستجابت لحاجات الناس بعد موجة الغلاء ونزلت الوزارات والسفارات ورقدتا هبطرش
حد ممكن يصدق الوزارة بقت أرخس من كيلو الطماطم وكان مكضبني قدامكم قصة وزارة الخارجية
فالوزير أخد وزارة الخارجية وشال معاها سفارة السودان في روما "لزوجته الأخرى"
ويشهد الله "علام الغيوب" الوزير بعد دا كلو ماقادر يشتري كيلو طماطم سعرو 12 جنيه "من غلاتو"
الناس في البلد يتلفتو محتارين تدي الواحد وزارة يقول ليك زحها مني "تقول كاس عرقي"
ياربي الحصل شنو الوزارات دي مالا زمان الناس تتكاتل بالسيوف عشان تقعد في ضل الوزارات والسفارات
واحد سائق "أمجاد" سمع "علينا جاي علينا جاي" ضحك وقال : "الدائر يموت فطيس اللركب معاهم"
أسي يقولو ليك هاك وزارة المالية ومعاها وزارة الثروة السمكية والسياحة هوادة تقول ما دائرا ؟؟
والمثير للدهشة الوساطات البتقوم وتقع عشان يقنعوا رؤساء بعض الأحزاب بإستلام وزارات عاتية !!
فالتسريبات "تحت تحت" حملت "شمارات" التوزيع "العازل" لتركة المسحوقين على الممحوقين
ومن التسريبات مطالبة حزب "كبير ما مصدق" برفع نسبة حقائب المشاترة في "سلطة الأسود بالزبادي" لـ 60%
أنا لي كم يوم فكرت أعمل حزب أدعو له كل الناس البحلموا يكونوا وزراء أو سفراء أو تشريعيين
وبيني وبينكم قلبت الوزارات وزارة وزارة ما لقيت لي وزارة أمد يدي عليـها خصوصا الزراعة
أصلي بحب الزراعة ومن زمان عندي غرام مع أخبار الرادي خاصة عن "زيارة وزير الزراعة لأي حتة"
فالمرة دي إستبعدت وزارة الزراعة من قائمة الوزارات الحا نطالب بيـها في قسمة السلطة "بالفتح"
خفت أجي وزير للزراعة يقومو ناس الجزيرة الزهاجة "ضحايا المشروع" يضحو بي ويجدعوني في الكنار
وتقومو تحرسو الترع وتجارو بالميجر "قلع ولا ما قلع" لا لا دي وزارة "مفضية" للموت النباتي والإنساني
طيب قلت أشاوركم في وزارة المالية بالله مش أحسن لينا من وزارة الزراعة المروية والما مروية ؟؟
بس حا تواجهنا مشكلة مرتبات وإستحقاقات وبدلات وحوافز وعمولات الوزراء المابخافوا الله ديل
طبعاً نهائي ما حا أفكر في وزارة دفاع "الهلال" أمسك منو وأخلي منو ما أعرف شي بالأطراف وشي من العمق
وأصحاب الحقوق المهضومة هاجمين بالأطراف ومريحين الوسط للشوط الجائي والحالة بدون محترفين "إنفصلوا"
دكتور خليل وجماعتو من جهة وكمان جا عليهم الحلو وعقار وصانع ألعابـهم "الماهر" ياسر عرمان
ياخي ديل خلو باكات الحكومة "يلحسوا" زي الكلاب وعبد الرحيم حسين يفتش للـ "آوت" ما لاقيهو
يابوي أنا مالي !! وزارات جات لحدي عندنا نرجعا ؟؟ وتاني نلقاها وين ؟؟ مرة جمعة غضب ومرة جمعة سلب
طيب الواحد لو مسك وزارة الصحة ما حا يلقى طريقة "يخسس" ليهو مستشفى تكون خاصة بيهو
وكذلك وزارة التربية والتعليم المدارس الكبيرة كبيرة قسموها لجامعات رسوم دخولا تقريك في ماليزيا
ياخي أنا في شنو ما أشوف وزارة الخارجية والله أضرب وظيفتين ب"دقن" واحد وأعين مرتي سفيرة في بنما
ومجلس الوزراء لو دعاني لإجتماع يلقوني في بنما وأفك ليهم تصريحات أعمل فيها ببحث العلاقات الودية مع بنما الحبيبة
لكن خائف يقولو لي تمش دولة العدو الصهيوني باقي مصطفى عثمان قال حا يطبع علاقته معاها "ويكيليكس"
ومع ان دكتور مصطفى "نكر الشمار " وقال دا كلام فاضي لكن القائم بالأعمال الامريكي حلف طلاق وأكد الخبر
أها الواحد لو مسك سفارة مصطفى اسماعيل في تل أبيب تقوم تجيب لينا الهوا ونبقى في حاو وتُر
أقول ليكم حاجة ما نبقى علي وزارة الألقاف ..سنتين "حج" تتخللها زي تمانية عمرات نعمل لينا منهم قرشين تلاتة
حا أستبعد الوزارات "المجهجهة" زي السياحة والثروة السمكية والبحث العلمي والبيئة والري والقوى المائية
ونركز علي الوزارات الفيـها "الكدة" زي الخارجية لتسكين زوجات الوزير في وظائف السفارات بالخارج
غايتو وزارة الصحة والله ما بطالة وحتى لو فاتتنا "خسخسة" مستشفيات العاصمة ممكن نركز على مستشفيات الأقاليم
يعني مستشفي زي مستشفى ود مدني ممكن نفكفكو لعشرين مستشفى كالأمل والرحمة والشفاء والعناية والنور وهلمجرا
ويوم أسمع "الشعب يريد تغيير النظام" والله تفتشوا لي سما أرض ما تلقوني بس أجر مع الجماعة مع اني ما حا أكون شائل حاجة
زي بتاع "الجو الرطب" الرسلو يجيب "السيجارة" وأدوه "حقـها في ذلك الوقت" ورقة أبو خمسمائة جنيه
ولمن قرب للبيت "بتاع السيجارة" جات مارة بالقرب منه عربة هايلوكس مليانة عساكر قام صاحبنا "شرط" الخمسمائة "سداً للذرائع"