ناس "نجاض" عملو ليهم "كعبة" في الساحة الخضراء لتدريب الحجاج واليومين ديل مضيوفين معاهم "نجاد"

خليك ياالمحبوب من التكلفه المية ألف جنيه والحاجات الحاصله كلها دي
هو الكعبه البنوها دي حلال ولا حرام .. كونو يعملو حاجه زي دي وتشبيه بالصوره دي
ما الناس الحجت زمااااان ديل كانو بيشرحو ليهم الأمراء طريقة الحج وبيقروهو في الكتب وبحجو زي العجب ...
مش يمكن تكون دي بدعه من بدع الزمن الغريب ده..
الله يسترنا

هبة كل عام وانتو بخير
وربنا يوعدكم بحجة أصلية
ويكفيكم شر "حج" لغف ونهب قروش المساكين
اليوم أورد "كوستاوي" صور المجسمات
والمية مليون راحت ساي "أوانطة"
إلا إذا كان صاحب الساحة الخضراء أجر ليهم الموقع بي 90 مليون
ونشوف الصور والمابخاف الله نخافو وفي كل الاحوال ربنا موجود وشاهد

دي الكعبة ومقام سيدنا ابراهيم وحجر اسماعيل وحديدة مدلدلة "حجر أسعد"

السعي بين الصفا والمروة لاحظ "الس يرميك" "وهاجر متمحنة تفتش لي زمزم"

كارة عرفة "أم لستكين"

خيام منى ومزدلفة "خياط الليل أب كراعا برا"

رمي الجمرات

(( امس الاثنين في نص اليوم لقيت لي وكت فاضي قررت امشي (احج) في الكعبة الجديدة في الساحة الخضرا بالخرطوم .. الحقيقة كنت عايز اشوف على الطبيعة المشروع الذي اثار كل هذه الضجة والسخرية .. واهو الواحد يشوف ليهو كعبة في بلدو .... مشيت الساحة الخدرا ... وقريب من المدخل الجنوبي لقيت نسوان حاجات فيما يبدو ... واحدة منهن سألتني : ( يا ولدي (الكعبة ) السووها دي بي وين )! وصفت ليهن المدخل .... وخشيت اول حاجة لقيت صيوان فيهو كراسي بتاعت بلاستيك .. وبعض الحجاج والحاجات قاعدين ... ما كتيرين وعرفت انو الناس جو الصباح .. وانا مشيت نص النهار كانو مشو ... في الداخل اكتشفت انو المشروع ما (كعبة) بس زي ما كنت متخيل ...
لقيت هناك كل خطوات ومشاعر الحج ... مخيمات منى ، رمي الجمرات ، حتى جبل عرفة لقيتو قاعد ! عملت جولة سريعة ... لفيت على المجسمات ، واخدت لي كم لفة حول الكعبة ، وصورت كمية من الصور ....جاني واحد من امرا الحج ... بدا يشرح لي عن المشوع ويدافع عن الفكرة ... فهمت منو انو التكلفة المذكورة عبارة عن تكلفة المشروع التدريبي ككل بما فيهو نثريات الاكل والماء للحجاج اثناء التدريب وايجار الصيوان وخلافه .. لقيت حتى مجسم لــ (حمام) افرنجي يعني عشان يعلمو الحجاج استعمال الحمام .. (طبعا دخول الحمام مش زي خروجو ) ! ......الطريف انو لقيت في (سوق عكاظ) موازي ، يعني في ناس ببيعو الشاي والعصير وحتى (الاحذية) النسائية الخفيفة التى تناسب الحج ! ....رجعت من المشوار وانا مستمتع تماما ، واخبرت الزملاء في المكتب اني مشيت الحج ! .... فعلا اذا كان احساس الحج الوهمي كدا ... فمعناهو الحج الحقيقي حاجة ما بتتوصف ... ربنا يكرمنا بزيارة بيتو .)) وائل فحل سودانيزاولاين

صيوان الحجاج

سوق عكاظ

الحمامات الارشادية

ناس "نجاض" عملو ليهم "كعبة" في الساحة الخضراء لتدريب الحجاج واليومين ديل مضيوفين معاهم "نجاد" - صفحة 2 2h6drx41

المصدر السابق

طبعاً بعد ما عملوا الحج في الساحة الخضراء فلازم يشوفو مشاكل العباد "المتدربين"
واحد إمام في مسجد في أم بدة الحارة (40) قال الغلاء وإرتفاع الأسعار سببو "ندى القلعة"
أيوة "ندى القلعة" المغنية البتعرفوها كلكم كانت السبب في تردي الأوضاع الإقتصادية في البلد
والله في الأول قلت إلا ندى القلعة دي عملوها وزيرة في التشكيل الجديد البكوسو ليهو في الناس
ومشيت أبعد قلت خلاص أدوها المالية عشان عواسة الكسرة حسب توجهات حكامنا الميامين
وبأمانة من الصورة الملحقة بالخبر فالإمام دا متلقي حجج وكائس ليهو سبب مع ندى القلعة ساي
ولو ما كدا فعينو في الفيل يطعن في ندى القلعة ؟؟ ما كان يسأل من المجسمات ال بي مية مليون
الإمام دا لو قال بقصد "غلاء التياب" ولوازم الزينة والإكسسوارات والبدرة والكريمات كنا قلنا كلامو صاح
لكن وعلى حد علمي فالغلاء شمل كل شي وما حدا بالناس للتظاهر حاجات الأكل والشراب "المعايش"
فما سمعنا بي زول قال مالاقي لي ربع كيلو توب سهرة أغطي بي بنياتي من "السقط" والدنيا حر
ولا سمعنا لينا بي زول كمان قال ما لاقي ليهو نص رطل بدرة وكريمات أجمل بيها وشيشاتن

(( فتح إمام مسجد الحارة (40) بأمبدة النار في كل الاتجاهات علي فنانات اليوم و بالأخص ندي القلعة التي أصبحت تغني الهابط الذي لا معني له إطلاقاً و أضاف قائلاً بان من الأسباب الرئيسية التي أدت الي الغلاء في الأسعار هو ما تتغني به الفنانة ندي القلعة و عدد من الفنانات السودانيات و ذلك نسبة للمظهر العام الذي أصبح من سلبيات الفنانات السودانيات و الذي قاد الي كل هذا الغلاء و العيش الضنك الذي يشهده الشعب السوداني اليوم كما ان هناك عدداً من الفنانات أصبحن لا يراعين الذوق العام و يظهرن بشكل غير لائق و مناسب مع الفتاة السودانية التي يضرب بها المثل في العالم و انه يطالب بان يتغير الحال عند الفنانات السودانيات من حيث المظهر العام و الشكل و تغيير لون البشرة مما قاد الي تقليد بعض الفتيات لهن و التشبه بهن بالإضافة للغناء الهابط الذي يتغنين به مما أدي الي حالة الغلاء الفاحش )). موقع النيلين

المحبوب أحمد الأمين كتب:: نجاض ونجاد

(( أقامت وزارة التوجية والاوقاف والهيئة العامة للحج والعمرة بولاية الخرطوم مجسما لبيت الله الحرام، على الجزء الشرقي من الساحةالخضراء، وذلك بغرض تدريب الحجاج على كيفية اداء مناسك الحج، وكشفت أن عدد حجاج الولاية بلغ 9522 حاجا وحاجة.

وحذر وزير التوجيه والاوقاف عثمان الكباشي من وصفهم ب"المتنطعين وأنصاف المتفقهين" من استصدار الفتاوي المضللة للحجيج، داعيا أمراء الافواج لجلب الحجاج الى المجسم للتعرف على كيفية أداء المناسك.

وأكد مدير هيئة الحج والعمرة بولاية الخرطوم الدكتور علي شمس العلا أن الهيئة أقامت المجسم بتكلفة 100 ألف جنيه سودانى الغرض منه تعريف الحجاح على كيفية أداء مناسك الحج.)).

» "خادم القرآن المشير" والله كِدا بقت "تسريحة بُقُجي" طيب لو بقت "خادم كعبة الساحة الخضراء" مالا عيبا لي !! وبي حقنا
» الساحة الخضراء في الحصاحيصا (شاهدوا الصور )
» نصر "الحجاج" السلمي ، و"نصر" الحجاج "الثقفي" ، وميلودراما سعيد بن جبير
» الجن بداوة كعبة الاندراوة !!
» عفوا سيدي الحجاج