ناس وناسين "ذاكرة قلوب نبضت بحبـهم وما انفكت "

حبوبة أصبحتي كويسة ؟
كويسة يا ولدي لكن البارح أصلي ما نمت
قالتـها حبوبتي مكة وأخدت ليـها "قنتة" حديثة الولادة
وصنقرت علي حيلا والكانون قاعد في فردة من سفنجتا الخضراء
زحت الكانون شوية وأدتو هزة خفيفة قضت علي شوية الهبود
وعلى إثر الهزة تكشفت جميرات يبدو عليـهن الإعياء والتعب
تعب قعر البراد الذي لا يحرك ساكن غليانه إلا يجيب خبر الجمر
ومن الفجر تلقاهو كاتم علي نفس الجمر "الحي" ينزل البراد يطلع المصفا
يتبادلوا في الأدوار بفرح طفولي والجمر مسلم أمرو لإرادة حبوبتي
ومع طلعة روح الشمس تلقى الجميرات خلاص بقن هبود رمادي دقيق
لكن للأمانة بعد الهزة "فقد أبلين بلااءاً حسنا" وسمعت بأضاني صوت الفورة
إتناولت ليـها كباية من صينية عطنتا في موية في كورة ألمنيوم كبيرة خاتاها جنبـها
كبت لي كباية شاي حمرا وريحتا قوس قزح دواشات منعشة تدشدش العضيمات تِدِشدش
مزيج من روائح الهبـهان والقرفة يعني "شاي صورة وبوخ"
ناولتـها سجارة برنجي وقالت لي أديني الكبريتة هديك في التربيزة
"ياحبوبة ما هدا الكانون جمبك ما تولعيـها ساي خليني النشرب الشاي"
ناولتـها الكبريتة وشن الكبريتة صندوق أصفر معفص المفتاح المرسوم عليهو إنعوج
وبداخله تلاتة قشات مجدعات كل واحدة في بلد زي عناقريب الصيف
ولعت السجارة وجرت ليها نفسين طويلين وقالت لي " النبي ما تشوف لي الموية جات"
"بالله ما تخربي مزاجي دايراني في السقط دا أجدع ليك الخرتوش في الزير؟؟"
" كُر علي ما سمعت بقصة الخرتوش وحات أحمد والحاج البلقاهو عندها ما بخليـها "
"خرتوش ليبي جديد لا شق لا طق إشترتو مُسك اليمن شهر ما تماهو "
قلت ليـها حبوبة ما تقعدي ساي يعني حا يكون مشى وين بعدين إنت مالك ومال التلاتل
"النبي خرتوش موية يرفعوا بيهو تراب في راس بيت عديلة ولا عوجا ؟؟"
"الحبال دي ما راقدا الداير يرفع ليهو تراب ما يعصر صلبو في الجابرة دي ويفتل ليهو حبل"
مُسك اليمن ــ وهي إبنتـها الوحيدة ــ وبتنطق إسما بضم الميم ما عارف ليه
ضمة لذيذة تكاد تحس بدفئـها يسري في عروقك إلفة
ويعبر إلى مكمن النفس مِسك فواح
كنت دائما ما أستنطقـها هذا الإسم عشان أحس ضمة الميم السمحة دي
قلت ليـها "ممازحاً" يا حبوبة ما تخلي مِسك اليمن تجيب ليها خرتوش تاني
ردت بسرعة " القروش ياولدي مُسك اليمن مصاقرا ليـها الأفران من دغش الرحمن"
وأخدت ليـها "سكتة" وأظنـها إتذكرت "العِتالة وشيل شوالات العيش الدُغُش"
كانت بتشيل مع بتـها بجنس الحاجات دي وما بتفرط في شي داخل ولا مارق
جندت نفسـها لحراسة التوابير من الشفع ما يلعبوا بالموية في وردية الصباح
وفي المساء وهي راقدة في عنقريبا كل مرة ترفع راسا "التِلِف زيون دا حدو متين ؟؟"
وما بتنسى "غسيل العِدة من الصباح"
تلقاها تحت الشجرة خاتا الطشت قداما تدعك في الكبابي وتـهرج زعلانة
حبوبتي بت التوم كانت معاها جيتا يوم وشايل لي "جق ألمنيوم فيهو خليط برتقال"
تغسل في عِدتا ولمن شافتني بعد ما سلمت عليـها قالت لي " دا شنو الشايلوا دا ؟؟"
قلت ليـها عصير خلطتو لحبوبتي بت التوم وإتناولت مني الجق "كدي الجق دا" بي زعل
إتناولت كبابة من كبابي الشاي المغسولة ومختوتة في العنقريب "حِداها" عشان تنشف
وبدت تكب وتشرب وأنا أسوي "حبوبة كفاك .. حبوبة
حبوبة
حبوبة ما بالغتي
أسي خليتي ليـها شنو ؟؟
قالت لي " حبوبتك بت التوم إنتهـت أكان فيك عمار سويهو فيني أنا دي "
بعد وفاة بت التوم جاتا بت ود بت التوم قالت ليـها دايرة تشوف وتحصر التركة
قالت ليـها " هديلك كرعين عنقريب مجدوعات في ضهر البيت .....
جيبي ليك كارة شيليهن آآختي"

يا سلام يا المحبوب ياخ .... والله جمّيتنى جنس جمّه قى هذا الصباح البارد...

ابدااااع يا حبة واصل
رحم الله حبوباتنا والزمن الجميل

والله يالمحبوب رجعتني الصداقة بي كرعي وانا اساسق من الحليلة لي حوش ورا وشميت ريحة القلوة ودقة البن ودخلت توش بعد ما صفقت بي ايدي اصلو الباب فاتح للقاشي والماشي ناسا سمحين بالحيل ما بقفلو الباب وما بربو كلب واخدت قعدتي وشربت البكري والتني وعووووووووووووووك وما خلينا نكتة وشمار لامن متنا من الضحك واها ودعتكم الله .. يا زول ماش وين الغدا ؟ ما بستغنى والله ماش عشان ناصر عندو كورة وبعد ده كلو حلفو علي الا اشيل باقي ملاح الفطور ملاح نعيمية كااارب شان اضوقو ناس البيت ورجعت قبال اطلع من الباب اصلي نسيت ابوي كان موصيني لي شوية ( التي ) وبعد ده كلو تقول لي ود الشريف لا ساك لا لاك ... ودمت يا رااااااااااااااااائع .

زمن الإغتراب البصح بالصح
إغتراب ليهو معنى مش زي بتاع "كُضُم كُضُم" الحسي دا
مغترب يعني مغترب جلابية "زبدة" بيضاء ترقش
وشوية كاش في جيب الجلابية الكبير
نظام أعاين فيهو وأضحك
وأضحك
وأغترب وما أجيهو راجع
زمان المغتربين كانوا بجو قريب أيام العيد بالذات عيد رمضان
الجو كان جميل بخلي رمضان ساهل موية
زي إمتحان الإنشاء "زمان برضو"
في زول بغلبو يكتب عن العصافير ؟؟
ولا في زول ما بقدر يكتب عن رحلة قام بـيها
ومن أول يوم في رمضان تبدأ الشمارات
شمارات المغتربين على شاكلة "قالوا داير فلانة"
"بالله أسي جاب شنو إيا تياب الهزاز ديل ؟؟"
"ما شاء الله كسر الحيطة وعمل البوابة تلاتة ضلف ودخل ال 78 وغتغتا بي مشمش جابو معاهو"
والبقول ليك شفنا الشنطة
والبقول ليك "ها قالوا ما راجع تاني"
وراجت حينـها "خروج من غير دعوة"
و "دخول من غير مرقة"
وراجت تجارة "العُمرة"
وأصبح الزوغان أمنية لا تدانيـها حتى الإقامة أم بال طويل
كنا بنقعد في فسحة تفتح عليها خمسة بيوت وتلاتة دكاكين
وقد تزيد وكتير تلقى الناس مرقت والشمس فوووووق
ودا في حالات إنقطاع الإرسال الكهربائي
فبتتوقف جميع المروحيات
وحكمة الله كمان بتقيف حتى الطاقات النفاثة
ولمن خلاص تبقى علي المغيب تلقى الفسحة إتملت ناس
دكان حسن إمام الدين مليان
ودكان عبد الرحمن يقنت
الهلالاب مبتهجين بالفوز على المريخ قبال شهرين
والمريخاب طوالي بستعملوا "الفرمالة"
الكاسات المحمولة وهناً
السكر من أكثر المطلوبات للعدالة الصينية المضروبة
ومرات مرات "هاك أديني ...والقائمة تطول "
هاك أديني شاي
وهاك أديني بن بخمسمائة
وهاك اديني كبريتة
وهاك أديني ماعونين فحم
ويكثر الطلب على البرنجي المصنوع خصيصاً لرمضان
هاك اديني خمسة سجارات
ناس التمباك "سلف سيرفس" تخت الخمسمائة وتشيل الكيس "بالراحة"
"أديني علبة سجائر" نادرة جداً
وبتتراوح مبيعات السجائر ما بين أربع وخمس حسب موقع رمضان من الشهر الافرنجي
ما عدا الجراد كان بشتري سجارتين
قبل الاذان بدقيقة ينادي أي واحد يجيب ليهو السجائر
من بعيد يصيح "تعال آآجنا أجر لي مسك اليمن جيب سجارتين"
الدفع كان بتم عن طريق "المقاصة"
وقبال الاذان برضو
يا الله الونسة قبل الإفطار كان ليها مزاق مرقة مزاج
الونسة بتاخد طابع أقرب للجدية عندما يكون الجراد موجوداً
ويكتفي الهلالابي فيصل بالمداعبة عن طريق التحكم من قرب
وتلقى صديق المريخابي يتنفس بي ضلعو
مغيوظ من ضحكات فيصل المجلجلة "غالب ومغلوب"
يالهم من ناس بطيبة أرضهم
الجراد عندو جدعات "قرشلية" لكنـها لا تخلو من طرافة
جا واحد "مغترب" ومن أحب الناس إليه "جاري لا حق الفطور"
بس مغترب على طريقتو الخاصة
الجراد عزمو قال ليهو "إتفضل أفطر معانا "
الراجل إعتذر ووعد بتلبية الزيارة في اليومين القادمين
بعد يومين فعلاً جاء وبت العوض ماقصرت شايلت الفطور كعادتـها
أول الغيظ بدأ في إمامة الصلاة
الضيف توسم فيني الخير وقدمني
"الله أكبر
الله أكبر
أشهد ألا إله إلا الله ...."
قاطعه الجراد وهو ينظر لي بإستنكار
"ياخوي هوي نحن هنا بنصلي فرادي"
وقد صدق فقد كنا نؤدي الصلاة كل بطريقته
والجراد كان بفضل السرعة مع الإتقان
وأظن آخر مرة يصلي فيـها جماعة بعد إفطار كان في البيت
يوم أن أمنا أحد الإخوة المغتربين الذين يتبعون لطائفة الأنصار
على مضض أقمنا الصلاة وقدمنا الأنصاري لإمامتنا
وفي معيتنا خليفة خلفاء بالطبع
وللأمانة فقد كان الراجل مجوداً
ساعده صوته الجميل في التجويد
وفي الركعة التانية قرأ سورة "ألهاكم التكاثر
حتى زرتم المقابر
كلا سوف تعلمون
ثم كلا سوف تعلمون
كلا لو تعلمون علم اليقين
لترون الجحيم
ثم لترونـها عين اليقين
ثم لتسألن يومئذ عن النعيم"
والجراد "يقنت متبرم "
"السلام عليكم ورحمة الله
السلام عليكم ورحمة الله .."
الجراد "شب" ليهو " ياخوي مالك طالب فينا مغسة ؟؟
"ياخي نحن من الصباح صائمين السبب البخليك تزازي بينا بالمقابر شنو ؟؟
ومن يومـها فالفروض فردية
وإمتثل الضيف للأمر والحمد لله الصلاة عدت وكل زول أخد راحتو
وبعداك بدأت رحلة معانقة ومصاقرة الجرادل الربعية
والصينية إرتدت على أعاقبـها بسلامتـها إلا من عصيد
الشاي والقهوة إحتلن المكان وعسكرن
وأنا ما قائل
نـهارات زي ديل يجرسوني
تفتحت الأسارير
وتبرجت علب السجائر
وأكياس التمباك في حبور
كبابي الشاي تطاقش
كبايتي وكبايتك
والقهوة حكراً على الفي أي بي
رشف ضيفنا رشفة من الشاي أودت بعقله وقال :
"والله شاي رهيب لكن لو لقى ليهو هبهان كان بدع"
تململ الجراد في عرينه
"الليلة" الله يستر ما يلهينا التكاثر ويوردنا موارد لسان ما بعد الإفطار
وواصل
"والله ياعم أحمد جبت معاي هبهان من السعودية تشم ريحتو من عرفات"
"خلي خالد دا يمشي معاي البيت أديهو ليكم هبهان"
وتكررت المنح مع كل ما يأتي ذكره
تلفزيون المسلسلات
وزيت رز السحور
"أصلو زمان كان بجيبوهو قبال الطراويح الدكاكين بتقفل والرز دائر وقت"
وحبوب الاسبرين
وخراطيش الموية
وما عارف الخراطيش دي إستمدت العظمة دي من وين "عندها"
الجراد صنقر ودنقر وقال للراجل " ياخوي نحن عزمناك فطور ولا وعود"
ضحكنا وعندها أذن الآذان
والدكان قفل
واليوم داك غاب الرز عن السحور
وفي فطور اليوم التاني قال "تبت لله والرسول تاني ما أعزم لي مغترب"
وبالفعل قام يوم عزم واحد من أعمامنا الأوفياء
الراجل برضو وعد بالحضور في يوم تاني
الجراد قال يزيد الحسبة وأصر على الراجل أن يصطحب "الأولاد"
وفي اليوم الموعود
والجراد مجهد نفسو في توحيد جبهات النفس بعد يوم عمل طويل
"دق الباب كو كو كو "
والوقت داك ما دخلنا عالم "جرس الباب"
مع إننا "موحلين" في جِرس رمضان"
"يابا يابا جوك ضيوف "
"قول ليهم إتفضلوا "
دا عمنا موسى خليل ومعاهو المدام
مر الفطور وودعنا الرجل صاحب الثقافة الاجتماعية الراقية
وما قفلنا الباب سمح الجراد وقف في نص الحوش " عليك الله شوف الرجل دا"
إنبريت ليهو "مالو رجل راقي وإجتماعي شوفو بالله جاك بي مرتو "
"عليك الله زح مني كدي ولا كدي"
"يابا إنت ما عزمتو وقلت ليهو جيب معاك الأولاد"
"طيب يقوم يجيب معاهو مرتو ؟؟"
"وإنتو في دا ولا كمان قال لي لازم تلبي الدعوة ومعاك الأولاد"
"غايتو هديك بت العوض سوقوها وأمشوا ليهو لكن أنا علي الطلاق ما أمش"
رحمة ونور يارب

ياورقة حبابك ومنك نستفيد
يديك العافية وحقك في الحفظ والبنطون

ونشوف دي
وبمناسبة المحالج تحضرني قصة حاج قسم السيد رجل المطافي المبدع
وحاج قسم السيد رجل كان له حضور طاغي وفي كل المناسبات
ففي المناسبات الدينية بزيد تألق وبهاء خاصة في رمضان
وحتى في زمن الإذاعات والتلفزيونات الجات حديثاً
مافي زول بفطر إلا على ضربات حاج قسم السيد على النوبة
وقبل الفجر مافي سحور إلا يجي حاج قسم السيد بالنوبة
وكان يسكن في الناحية الجنوبية إلا انه يذهب لأقاصي الشمال
بختار الشوارع التي تتوسط الغرب والشرق تماما
وما كان في زول بقول ما بسمع حاج قسم السيد
فالرجل كان ببذل مجهود خرافي لتوصيل صوته لإيقاظ الصائمين
وفي الأعياد كان فاكهة العيد وبدون منافس
هاشاً باشاً بقامته الفارعة ووسامته التي لا تخطئها القلوب
فلم يجمع الناس على حب رجل بقدرما أجمعوا علي حبه
فبادلهم حب برضاء وطمانينة وسلام
وأنتمنى أن أعود لذكرى هذا الرجل الفاره في كتابة توثيقية
أما في المناسبات الإجتماعية فكان فاكهة بطعم ولون مختلف
ففي شجرة زاوية الختمية توسط مجموعة كبيرة من الناس
المناسبة كانت "فراش" على أحد الأموات لا أذكره
وكنت أحد المتابعين لحكايته تلك
وفي العادة ببدأ حكاياته وونسته في زمن يقل فيه المعزون
ويفعل "الفطور" فعايلو
فتجد الناس "مرخمين" بين النوم والصحيان
والفترة دي بتبدأ بعد الفطور وحتى آذان الظهر
اليوم داك جا حاج قسم السيد وبدأ حكايته التي لم أسمع بمثلها قط
حكاية أعمل فيها "الراوي" كل أدوات الحكي "غير المكتوب"
بدأ الحكاية بنهاية حوار كان عن الغرق
"فلان غرق ومرق بشيمة ود السيد"
"الناس تعبت مصنقرين في البحر لأكثر من اسبوع"
"قلع ولا ما قلع"
"والدوام لله البحر بشيل عوامو"
فاستلم المايكرفون وعندها بدأ الجميع في إعداد أدوات المتابعة
فاستعان البعض بـ "المساند" المبعثرة في السباتات والفرشات
وأسند بعضهم ظهورهم على "جذع الشجرة " من جهة الشمال
ودي دائما بتكون "ركن نقاش" على خلاف الجهة الجنوبية للشجرة في زاوية الختمية
ساد هدوء "متلهف" وأظنه الهدوء الببدأ مع الحكاية
وبدأ الراوي كمن يستكشف ميدان أو ملعب حكايته الساحرة
" ما أظن واحد فيكم سمع بي قصة سماعين الكردفاني ؟؟ "
"وبصوت واحد شبينا ليهو أهدا مالو كمان ياحاج وبعدين حا نكون سمعنا بيهو وين؟"
في الحقيقة سماعين دا من أغنى أغنياء غرب السودان إن لم يكن السودان كلو
رجل خير وبر وإسهاماتو في كردفان ماليها حد ولا عد
وعلى نفقته الخاصة فقد بنى المدارس والشفخانات والمساجد الله يديهو العافية
ووالله ياخوانا "المدة" بالفتح بتزيد المال وأبداً ما بتنقصو
أها حاج سماعين دا والله مافي زول قصدو في غرض صداهو تب
وسبحان الله من قام قام في الجاه والعز لكنو بتاتاً ما بِخِل على زول بي حاجة
وشدة ما كان غنيان والله البقر بس حوالي تلاتة مليون وتسعمائة ألف بقرة
والضان شوف عيني كان مشيت الابيض الراجل عندو إجي قريب 11 مليون راس
والله ووالله وما طالبني حليفة "العتان والحملان والسخل " إجن حوالي 24 مليون
تصدقوا وتامنو بالله "وأجبنا بنعم الإندهاش" الرواعية براهم قريب 500 ألف راعي
دا غير الناس والخلوق البجيبم للحليب قريب مليون ونص بني آدم
ما شاء الله أنا زول ربنا فاتح عليهو زي دا ما لاقاني
"بصراحة بدأ يحس بعلامات عدم التصديق"
وعشان تصدقوا أها النوريكم الناس البجمعوا "الفرصة" من هز "سِعِن" الروب
شوف عيني السِعِن إلا يهزو ناس تلاتة ألف بي هنا وتلاتة ألف بي هناك
والفرصة من "فضالتو" كان بخليها للنسوان الكبار يسترزقن منها
وبعد الجماعة ما يهزو الروب شوف عيني النسوان يجمعن في الفرصة بالمراكب
والنسوان الصغار صغار راكبات "طيفان ..جمع طوف "
أها مرة قالوا في واحدة من حبوبات سماعين تجمع في الفرصة إنقلبت بيها المركب وغرقت
ما خلو طوف ولا مركب والحكومة اتبرعت ليهو بي بنطون ام روابة للبحث عن الشهيدة الله يرحما ويغفر ليها
تلاتة يوم الناس تكوس وجابوا غطاسين من أبو جبيهة وأم برمبيطة .....
ونتابع بكرة كان الله ادى العافية
ورحمة ونور يارب العالمين