مقدمة :
فكرت كثيرا فى عرض هذه التجربة ..وهو نوع من أنواع الكتابة الأدبية ..وهو كتابة السيناريو سواء لفيلم أو مسلسل تلفزيونى
وأخيرا قررت عرض التجربة عليكم ..
فقد تكون ملكة كتابة السيناريو لدى إحداكم ..فتكون دليله فى كيفية
كتابة فيلمه الأول ..
------------------------------------------------------------
تأليف /رضا الهجرسى
فيلم سينمائى
كيد الهوانم
___________
مشهد 1 مبنى ماسبيرو نهارى /خارجى
(قبل السادسة صباحا) منظر اجمالى للنيل فىمنطقة
مبنى ماسبيرو . تدخل الكاميرا على المبنى ثم على السلالم
الامامية للمبنى . يصعد سلالم المبنى رجل فى الاربعين
مكتمل الشياكة بطريقة راقية كامل الرجولة بوسامة يمشى
بثقة كمن يعرف قيمة نفسه و يشير الى الذين يقابلونه على
السلم و يحييهم بشىء من الكبر و الغرور الى ان يدخل من
باب الدخول الرئيسى . و يشير اليه رجال الامن و يرد
التحية و يكمل سيره الى الداخل (و هو بطل قصتنا المذيع
المشهور " سمير سرحان " )
Cut
مشهد 2 فيلا الدوينى نهارى/خارجى
منطقة الزمالك . تتحرك الكاميرا الى ان تصل الى فيلا
راقية بسور و حديقة مكتوب عليها ( فيلا الدوينى) و هى
دورين و تقف سيارتان على يمين و يسار باب الفيلا .
احدى السيارتين عتيقة الطراز و الاخرى احدث موديل
و انسيابية متوسطة الحجم و يقف سائق يفتح كابوت
السيارتين و يراجع الزيت و المياه
Cut
مشهد 3 بهو الفيلا نهارى/داخلى
الفيلا من الداخل مؤثثة بشياكة راقية . يوجد
سلم للدور الثانى مغطى بالموكيت . تنزل من
السلم سيدة شابة فى سن يقارب الثلاثين تلبس
بنطلون و جاكت تحته قميص بكرافت و هى
بطلة قصتنا ( المخرجة التليفزيونية " سميحة
الدوينى " ) تمسك بيدها شنطة جلد شيك و باليد
الاخرى اكلسير. و هى طويلة . نحيفة بقوام انثوى
رقيق بنشاط و هى تنزل مسرعة و بعد نزولها
السلم تقف فى نهايته لتعدل حذائها ثم تتجه يسارا
الى غرفة السفرة .
Cut
مشهد 4 الفيلا نهارى/داخلى
تجلس على السفرة سيدة تظهر عليها علامات
الرقى فى لبسها المحتشم فى العقد السادس من
عمرها (55 عاما) بصحة جيدة و قوام معتدل
تدخل سميحة اليها مسرعة و تقبلها على خدها
برقة و بسرعة . و تلمس " ثريا هانم " و هى
امها خدها برقة و رقى سميحة: صباح الخير يا ست
الكل
ثريا: صباح الخير
تنظر سميحة ناحية المطبخ سميحة: امال فين دادة فكيهة. دادة
فكيهة… يا دادة . دادة
تدخل دادة فكيهة حاملة كيس بلاستيك.
و هى سيدة فى الستين من عمرها تلبس
جلبية سوداء و طرحة و هى تضع الكيس
على السفرة دادة: جاهزة يا روح دادة. كل اللى
طلبتيه جاهز
سميحة: اوعى تكونى نسيتى
و هى تشير للكيس و تضع يدها عليه دادة: منسيتش. قشطة بالعسل.
لانشون . جبنة بيضة عليها
بيض مسلوق. لحمة باردة و..
سميحة: و ال….
تقاطعها دادة: و عصير البرتقال الفرش.
و قزازة تانية عصير مانجة.
و موز باللبن مهروس فى
الخلاط . و كمان…
تقاطعها ثريا هانم فى استغراب ثريا: ايه ده كله. انتى رايحة شغلك
و لا طالعة رحلة ..
تضحك دادة فى سخرية دادة: رحلة. ده عشان...
تقاطعها سميحة و هى تضع يدها
على فمها سميحة: بعدين. دادة . خلاص قفلي..
ثريا: فيه ايه انا مش فاهمة حاجة
تخرج دادة و هى تشير بيدها دادة: خلاص. خلاص. بس على
الله يطمر فيه
ثريا: يطمر فى مين .فهمينى يا سميحة
و هى فى ارتباك سميحة: يطمر فى مين . ما انتى عارفة
يا ماما . دادة خلاص راحت فى
الفساخونيا
ثريا: فساخونيا . انتى بتجيبى الالفاظ دى
منين. شغلك فى البرامج اللى بتعمليها
فى الحوارى و الحتت البلدى بوظت
لسانك خالص ..
تتناول سميحة الكيس و تقبل امها
بسرعة سميحة: سلام بأه يا ست الكل
و هى تمسك بالكرواسون و تشير
ناحيتها ثريا: طب كلى حتة كرواسون قبل ما
تخرجى
و هى تتجه الى باب الخروج
و تحمل الشنطة و الكيس و اكلسير
الورق سميحة: مقدرش يا ست الكل . يا دوب
الحق
تركز الكاميرا على وجه ثريا و هى
تردد و تهز راسها و هى تمسك بالكرواسون
فى يدها ثم تتناول الكرواسون و تضعه فى
فمها بعد ان تنهى كلامها فى غيظ
ثريا: فساخونيا. فساخونيا. حفيدة
الدوينى باشا اللى واخدة شهادتها
من امريكا تقول فساخونيا...
فساخونيا يا سميحة
Cut
مشهد 5 امام باب الفيلا نهارى/خارجى
تنزل سميحة على سلالم الفيلا مسرعة
و تتجه ناحية سيارتها الحديثة الموديل
و تضع الكيس على الكرسى الخلفى.
و الشنطة والاوراق على الكرسى الامامى.
و يراها محمود السائق فيسرع ناحيتها و هو
يرفع يداه على راسه بالتحية دون ان تنظر السائق: صباح الخير يا ست
اليه و هى تدخل السيارة و تجلس سميحة
سميحة: صباح الخير يا اسطى
محمود. العربية تمام
السائق:كلة تمام يا هانم ..
تغلق باب السيارة يميل عليها الاسطى
محمود السائق: حضرتك مش حتطلعينى
فى صباح الخير يا مصر
زى ما وعدتينى. العيال
كلت وشى. كل يوم يقعدوا
قدام التليفزيون قبل ما
يروحوا المدرسة علشان
يشوفونى. و ام العيال قالت
للجيران كلهم و ….
تنزل بالسيارة و هى تنظر اليه سميحة: قريب. قريب يا اسطى
محمود. سلام
تخرج من الفيلا بسرعة
cut
مشهد 6 شوارع الزمالك نهارى/خارجى
السيارة تتحرك فى شوارع الزمالك
متجهة الى ناحية الكورنيش ثم الى
مبنى ماسبيرو. و قد بدات بعض
السيارات فى الحركة . تصل السيارة
الى مبنى ماسبيرو .تدخل موقف ماسبيرو
ثم تنزل مسرعة و تتناول شنطتها و الاكلسير
ثم تصعد سلالم ماسبيرو و تحيى رجال الامن
و تدخل المبنى.
cut
مشهد 7 غرفة الاخراج الزجاجية نهارى/داخلى
يجلس المساعدين امام الشاشات. و تجلس
مساعدة الاخراج و بجانبها كرسى خالى.
و هى سيدة فى نفس سن سميحة. متوسطة
الطول . سمينة بعض الشىء. بيضاء. اسمها
" علية ". تدخل سميحة مسرعة و هى تحمل
الشنطة و الاكلسير و الكيس البلاستيك و تضعه
على ترابيزة خلف الباب ثم تجلس على الكرسى
و توجه كلامها الى مساعدتها علية سميحة: صباح الخير يا علية
كله جاهز
علية: كل حاجة جاهزة.
الشرايط. الضيوف.
المذيعين. كلهم موجودين
و هى تنظر من خلال الزجاج الي غرفة
التسجيل سميحة: كلهم جم
تهمس علية فى اذن سميحة علية: ماتخافيش. جه. ولمى
نفسك شوية
تتظاهر كأنها لم تسمعها و هى تنظر
الى سمير باعجاب سميحة: قدامنا قد ايه و نطلع
على الهوا
علية: خمس دقايق
تكلم باقى الطاقم حولها و المذيعين
من الميكروفون سميحة: طب يا جماعة. حننزل
بالتتر الأول. و بعدين
الكاميرا حتركز على
وش الأستاذ سمير و
بعدين ترجع الكاميرا لورا
فى صورة توتل للأربعة
مع بعض. و بعدين الأستاذ
سمير حيتكلم و بعديه
الأستاذة آمال و نكمل…
يلا يا جماعة حنبتدى
Cu t
مشهد 8 غرفة السفرة نهارى/داخلى
مازالت ثريا جالسة على السفرة و امامها
الكابتشينو و هى سارحة ثم تنظر ناحية
المطبخ و تنادى برقة ثريا: فكيهة. فكيهة
تحضر دادة فكيهة من المطبخ فكيهة: أيوة يا هانم ..
تسألها ثريا فى بطء و هى شاخصة
النظر ثريا: انت طبعا تربية حوارى
فكيهة فى امتعاض و هى تمصمص
شفايفها و تشير بيدها فكيهة: يا فتاح يا عليم. خير يا
هانم ..
فى عصبية ارستقراطية ثريا: سالتك سؤال تجاوبينى
على طول
فكيهة: ما انت عارفة .طب
ده انتى مكانش يحلالك
اللعب وأنتي صغيرة ألا
حارتنا..
تتكلم فى غضب و هى تشير بيدها
ثريا: اخرسى يا مجنونة. انتى
عايزة تقولى أن انا تربية
حوارى..زيك ..
فكيهة: لا يا ستى. يقطعنى.
مقصدش. انا عايزة اقول
انك عارفة انى تربية حوارى
و لما جيتى مرة عندنا
الحارة انتى و دادة فهيمة اللى
هية خالتي .. و قلتى انا عايزة
فكيهة معايا... و من ساعتها
و انا هنا معاكى. خير يا ستى
جري أية لدة كلة ..
ثريا: المهم. المهم. أنتي تربية حوارى
فى استسلام فكيهة: ايوة يا ستى تربية حوارى
ثريا: تبقى اكيد تعرفى يعنى ايه لما
اقولك انتى خلاص فى الفساخونيا
تضرب صدرها بيدها فكيهة: انا يا ستى فى الفساخونيا. الله
يسامحك
ثريا: هية دى شتيمة
فكيهة: طبعا يا ستى شتيمة
ثريا: طب لما اقولك انتى خلاص فى
الفساخونيا. ابقى شتمتك قلتلك ايه
فكيهة: تبقى يا ستى شتمتينى و قولتيلى
يا ام عقل مفوت..
تبتسم ثريا كمن فهمت اخيرا ثريا: آه يعنى عقلك فوت.مجنونة يعنى.
طيب طيب خلاص روحى المطبخ
يلا خلاص
و هى حزينة فكيهة: حاضر يا ستى ادينى رايحة
تسير فكيهة فى اتجاه المطبخ و
تنظر ثريا اليها و هى تهمس ثريا: روحى يا…. فساخونيا
تسمع ثريا صوت ابنتها الصغيرة
(سمية) و هى تصرخ و تظهر على
اول السلم و هى تنزل مسرعة
و تلبس بيجامة حرير و حافية .
جميلة بشقاوة . ذات شعر طويل
جميل اسود. و تنظر اليها امها
و تقوم وتذهب اليها. تجرى سمية
الى التليفزيون فى بهو الفيلا و تفتحه
و تجلس على الفوتيه المواجه و تمسك
بالريموت و تجلس رافعة قدميها
الاثنين على الفوتيه و تجلس بجانبها
ثريا ثريا: طب قولى صباح الخير الاول
و هى مازالت تنظر للتليفزيون
و التتر قد بدا ببرنامج صباح
الخير يا مصر سمية: صباح الخير يا ماما. برنامج
صباح الخير يا مصر بتاع
سميحة حيبتدى و عايزة اشوف
شكله ايه
ثريا: شكله ايه. برنامج زى كل البرامج
سمية: لا يا ماما. انا ما اقصدش البرنامج
انا اقصد…
تتوقف عن الكلام و يبدا ظهور
وجه سمير كاملا على الشاشة
و تنظر اليه سمية فى اعجاب سمية: يا بنت الايه يا سمسم. ليكى حق
الواد زى القمر
تنظر اليها فى استغراب ثريا: مالها سمسم بالاستاذ سمير
تنظر اليها سمية سمية: انتى تعرفيه يا ماما
ثريا: مين ما يعرفش الاستاذ سمير
سرحان. اشهر مذيع فى التليفزيون
و انا من المعجبين بيه
فى تلقائية و اندفاع سمية: ما هو ده اللى بنتك حاطة عينها
عليه و بترسم عليه علشان تتجوزه
فى فزع ثريا: انتى بتقولى ايه يا مجنونة انتى.
سميحة عايزة تتجوز سمير سرحان
و هى مازالت تنظر الى التليفزيون سمية: ايوة يا ماما ايوة
و ترفع يدها للسماء بالدعاء سمية: ربنا يوفقك يا سمسم يا رب. علشان
اتجوز انا وخالد. يا رب
تقف ثريا فى عصبية و تكلم
نفسها ثريا: دى كارثة يا ربى. سمير سرحان.
دى كارثة
و هىمازالت تنظر الى التليفزيون
و تشير اليه سمية: ليه يا ماما هوه فيه احلى من كده.
استنى يا ماما حيتكلم حيتكلم
تركز الكاميرا على شاشة التليفزيون
ويظهر سمير و على يساره مذيعة
مشهورة قديمة و على يمينه مذيعة
شابة و بجانبها مذيع شاب و يبدا
سمير فى الكلام و هو يبتسم باشراق سمير: صباح الخير اعزائى المشاهدين
و اهلا بحضراتكم فى صباح يوم
جديد و حلقة جديدة من برنامجكم
صباح الخير يا مصر
ينظر سمير الى المذيعة على يساره
فتكمل الكلام المذيعة: صباح الفل اعزائى المشاهدين .
و كما هى العادة حنقدم لكوا
موضوعات متنوعة تناسب
و ترضى جميع الاذواق .
و كعادتنا برضه كل يوم حنبتدى
مع ست الكل
و هنا تبدا اغنية يا صباح الخير
يااللى معانا لام كلثوم و تنتقل الكاميرا
الى سمية و امها و تشيرسمية الى
التليفزيون سمية: بقى القمر ده كارثة
و هى تسرح ثريا: ده اكبركارثة. بقى سمسم رافضة كل
العرسان اللى اتقدمولها علشان
سمير سرحان . دى كارثة
و هى تعتدل فى جلستها على
الفوتيه سمية: ماله سميريا ماما. هه. ماله
تنظر اليها فى غضب ثريا: انما انتى ايه اللى مصحيكى بدرى كده
. مش بعادة يعنى. الضهر لسه بدرى
عليه
سمية: و حاصحى اعمل ايه. الكلية
و خلصتها بقالى سنتين و انتوا
مصممين على جواز سمسم الاول.
و انا و خالد بقالنا سنتين مخطوبين.
حرام عليكوا بقه. الافكار دى بطلت
من زمان و دخلت المتحف
ثريا: اتلهى انتى والمتر بتاعك ده. لا عيلة
كبيرة و لا ثروة و لا قرايب ليهم
مراكز كبيرة و لا ….
و هى تجرى ناحية السلالم
لتصعد لغرفتها سمية: كفاية. كفاية ده انتى شركتيه خالص
تنظر اليها ثم تهمس لنفسها
فى ارستقراطية ثريا: بقه دول احفاد الدوينى باشا. واحدة
رايحة تتجوز واحد من الناس الغلابة
و التانية حاطة عينها على واحد مضرب
عن الجواز و كل المجلات و الجرايد
مسمياه اشهر عازب فى ماسبيرو
تلتفت بعصبية و تركز الكاميرا
على وجهها و هى تتكلم بقوة
و غيظ و رقة ارستقراطية ثريا: والله بناتك يا ثريا هانم يا بنت الدوينى
باشا خلاص راحوا فى الفساخونيا
Cut
مشهد 9 غرفة الاخراج نهارى/ داخلى
يسمع صوت ام كلثوم و هى تغنى يا
صباح الخير يااللى معانا ثم يفتح سمير
باب الغرفة و يدخل فتقوم سميحة
و تستقبله سمير: خير يا سميحة فى حاجة.
احنا مش متفقين على كل
حاجة
سميحة: لا انا مش بعتالك علشان
كده
تمسكه من يده وتتجه نحو الترابيزة
و تمسك الكيس البلاستيك و تخرج
منه لفات السندوتشات و زجاجات
العصير و المياه المعدنية و ترجها سمير: ايه ده كله
سميحة: انا قلت انت عازب و اكيد
نزلت من غير ما تفطر
يمد يده و يبدا فى تناول الطعام سمير: انا فعلا مافطرتش و ميت
من الجوع
تفرح سميحة و تخرج كبايات بلاستيك
و تبدا فى صب العصير و تناوله لسمير سمير: كمان. انما ايه ده كله. ده
انتى جايبة فطار لكل الزملا
. اهوة ده الاخراج و لا بلاش
سميحة: لا. لا. زملا ايه. ده فطار
ليك انت و بس
تقف يده بالسندوتش سمير: لية انا و بس. ده كله
و الاصناف اللى بحبها كمان
يواصل الاكل سمير: على العموم ميضرش. انا
جعان
سميحة: كل براحتك. انا قلت لآمال
تقدم حالة الجو و الرياضة
و الفقرة الزراعية. يعنى قدامك
ساعة على الاقل على ما تطلع
على الهوا تانى
سمير: طب وانتى مش حتخرجى
و هى تصب نوع آخر من العصير
و تناوله له مع ساندوتش سميحة: لا مش مهم. "علية" حتخرج
Cut
مشهد 10 مكتب سميحة و علية نهارى/داخلى
غرفة بها تكييف و مكتبين متقابلين
امام كل مكتب كرسيين فوتيه و ترابيزة
و مكتوب على المكتب الاول يافطة
خشب "سميحة الدوينى" "مخرجة"
و المكتب الثانى يافطة " علية الشحات"
"م. مخرج"
يفتح الباب و تدخل سميحة و علية .
تجلس سميحة على مكتبها و تضع
علية الاوراق التى فى يدها على مكتبها
و تعود و تجلس على كرسى امام سميحة
و تظهر السعادة على سميحة و هى تسرح
و تبتسم
تشير "علية" امام وجهها لتوقظها علية: هيه. هيه اصحى. نحن هنا
سميحة: فى ايه يا علية بس.
اخص عليكى صحيتينى
ليه . ده كان حلم لذيذ بشكل
علية: يا خبر اسود. انتى بتنامى
و تحلمى كمان و انتى مفتحة
عنيكى و صاحية
سميحة: انا باحلم بيه و انا صاحية
و انا نايمة وانا ماشية و انا
باكل و انا….
فى استهزاء ثم فى جدية علية: بس. بس. كفاية كده حرام
عليكى و اصحى بقة من الحلم
قبل ما يبقى كابوس و يدمر لك
حياتك. ده سمير سرحان يا
بنتى . بيغير الستات مع لون
كرافتته
فى ثقة و هى تقف وتمشى حول
المكتب سميحة: و لو. وده يا جاهلة لانه
ماقابلش الست اللى تلف
الكرافتة حولين رقبته مايفكهاش
الا مع طلوع روحه
علية: وانتى بقه اللى حتلفى الكرافتة
حولين رقبته
سميحة: ده اكيد و مهما حاول يقاوم.
حالفها حالفها
فى جدية و مسحة من الحزن على
وجهها علية: والله انا خايفة عليكى اوى يا
سميحة. ده ياما ضيع بنات و
خرب بيوت و حكاياته
و فضايحه اسألى عنها فى
زوارق و اروقة و دهاليز
ماسبيرو علشان تتعظى وتفوقى
قبل ما تضيعى و يحصل لك
زى ما حصل للى قبلك و اللى
قبلك … دواليك. دواليك
و هى تقترب منها و تضحك و تتجه
ناحية باب الغرفة سميحة: دواليك و اروقة ودهاليز. هية
قلبت معاكى فصحى ليه .مش
حتنسى انك بنت مدرس عربى
علية: رايحة فين
سميحة: حاروح اشوف الطلب اللى
قدمته بالبرنامج الجديد المدير
وافق عليه و لا لسه
فى لغة استهزائية علية: لازم يوافق عليه يا بنتى. ده احنا
خالنا الدوينى بيه رئيس الشئون
القانونية ووكيل وزارة
و هى تغادر الغرفة سميحة: طيب يا حقودة راجعالك
تكلم نفسها فى غيظ علية: قال مايوافقش قال. طب ده انا
اتعينت قبلك بسنتين ولسه مساعدة
اخراج. و انتى بقيتى مخرجة
فى لغة استهزائية علية: و عايزاه مايوافقش
Cut
مشهد 11 غرفة نوم سمية نهارى/داخلى
غرفة نوم حديثة تنام سمية على
السرير بحيث يكون راسها بعيدة
عن المخدة و قدميها على زاوية
السرير. يدق جرس الموبايل بتون
لاغنية شبابية. تمد يدها بكسل و تمسك
بالموبايل و تضعه على اذنها و هى
نائمة و تتكلم ببطىء و كسل سمية: آلو. مين
تعتدل و تجلس على السرير بنشاط سمية: خلودة حبيبى. عندى ليك
خبر حتطير من الفرحة لما
تسمعه
تتمدد على السرير و ترفع قدميها
الاثنين لاعلى و تهزهم سمية: خلاص عقدتنا اتحلت.
سمسم جالها عريس. هوة
مش جالها. هية اللى حتاخده
. افهمنى بس سميحة بدال
حطته فى دماغها خلاص
فنش . انتهى . راح. دى
سميحة يابا . تربية امريكا.
و انت عارف الامريكان لما
يحطوا فى دماغهم حد. خلاص
راح. لما تيجى حافهمك على
كل حاجة . خلاص بقة سيبنى
اكمل الحلم . سلام
Cut
مشهد 12 غرفة مكتب سمير سرحان نهارى/داخلى
يجلس سمير على مكتبه و بجانبه
السكرتيرة و هو ينظر الى الاوراق
امامه و يجلس امامه شاب و شابة
و مكتوب يافطة خشب على مكتبه
( سمير سرحان" كبير المذيعين")
يرفع عينيه من على الورق و يوجه
كلامه الى الشاب و الفتاه سمير: طب يا شباب احنا حنعمل
لكوا فترة اختبار ثلاث شهور
. و خلال الفترة دى….
يسمع دق على الباب و يفتح الباب
و يظهر رجل فى الاربعين من عمره
غير مهتم بملابسه . يلبس قميص بدون
كرافتة (و هو صديق سمير و يعمل معد
للبرامج و اسمه "حامد الشرقاوى"
و يتكلم بلكنة تميل الى الريفية و يقيم
بصفة مؤقتة مع سمير فى شقته). حامد: ادخل و لا مشغول
ينظر اليه سمير و يقف مسلما عليه
و يقف معه الشباب سمير: اتفضل يا استاذ حامد.
استريح
ثم ينظر الى الشباب و يشير الى
السكرتيرة سمير: طب يا شباب حتروحوا مع
منال. و تملوا استمارة البيانات
و بالتوفيق ان شاء الله
يخرج الشاب و الفتاه مع السكرتيرة
و يجلس حامد و ينظر اليه سمير سمير: خير ايه اللى رماك علينا
حامد: وحشتنى يا اخى جيت اشرب
معاك فنجان قهوة
يعتدل و يستند على الكرسى سمير: سيبك من الكلام ده و خش فى
الموضوع على طول
حامد: بصراحة هوة مش موضوع
واحد هما موضوعين. و اطلب
لنا القهوة بقة علشان الكلام
حيطول
يدوس سمير على زرار اسبيكر
بجانبه سمير: منال لو سمحتى تعالى
تفتح منال الباب و تدخل سمير: الاستاذ حامد يا ستى عايز
يشرب عندنا قهوة
و هو ينظر الى منال مبتسما حامد: بس بشرط تعمليه بنفسك و من
البن المخصوص بتاع الاستاذ
سمير. لحسن البن بتاع البوفيه
ماسخ و مالوش طعم و لا وش
منال: امرك يا استاذ حامد. حالا
ينظر اليها سمير ممتنا سمير: متشكر اوى يا منال
وهى تغادر الغرفة و تنسى الباب
مواربا منال: لا العفو يا استاذ سمير تحت
امرك
سمير: ايوة يا سيدى قوللى بقة ايه
الموضوعين اللى عندك و مش
قادر تستنى لما نرجع الشقة
حامد: قولتلى ايه هما الموضوعين.
نبتدى بالاهم و بعدين المهم
سمير: نبتدى بالاهم
حامد: مبروك. مدير البرامج وافق على
الطلب اللى قدمته سميحة الدوينى
بالبرنامج الجديد
فى حركة تمثيلية و صوت ضخم
و هو يفتح يديه حامد: "قضايا الساعة الساخنة" و بعت لى
الطلب علشان ابدا الاعداد للحلقة
الاولى
سمير: الف مبروك يا سيدى ليك و لسميحة
حامد: و ليك يا استاذ
سمير: و انا دخلى ايه
حامد: سميحة فى طلبها اصرت انك تكون
مقدم البرنامج و سيادتك المذيع اللى
حتحاور الضيوف
يقف فى غضب سمير: مش ممكن .مستحيل انا اشتغل مع
المهووسة دى. مش ممكن. دى
مجنونة. دى . دى . دى
حامد: دى ايه يا استاذ . قول طلع اللى فى
قلبك طلع. ما خلاص حتخبى ايه.
كل ماسبيرو عرف خلاص
فى عتاب حامد: و انا صديق عمرك. و قاعدين مع
بعض و بناكل من ايد الزفت عليوة
سوا و تخبى عليا. اخص عليك اخص
بقه دى اصول الصحوبية و الصداقة.
ده انا طول عمرى ما خبيت عليك سر
سمير: اخبى عليك ايه يا مجنون انت
حامد: موضوع خطوبتك انت و سميحة
يضحك بسخرية و استهزاء
و هو يجلس سمير: خطوبتى انا و سميحة
حامد: ايوة استعبط ما خلاص يا استاذ
اتكشفت
سمير: انت بتقول ايه. ما انت عارف رايى
فى الجواز
و هو يشير بيديه للخلف الى
اتجاه ظهره حامد: كنت عارف. و صدقتك. وخدعتنى.
و…
يقاطعه فى حزم و غضب سمير: و انا زى ما انا و رايى ما اتغيرش.
و لو خيرونى بين عشماوى و الجواز
حاختار عشماوى و حاعيش عازب
و حاموت عازب
حامد: الله امال ايه اللى انا سمعته و شفته ده
سمير: سمعت ايه و شفت ايه
حامد: شلة النميمة كلها قاعدين يتكلموا انكوا
اتفقتوا على كل حاجة و انكوا بترتبوا
اجراءات الخطوبة و انا بنفسى. بعنية
دى شفتهم بيهنوا سميحة
سمير: كدب. كدب. انا عمرى ما فكرت فى
الجواز ولا حافكر
فى غضب سمير: و بعدين لو فكرت. و ده مستحيل.
حافكر فى سميحة الدوينى. ده انا ابقى
اتجننت
حامد: انا مش عارف يا اخى. انت محيرنى
بجد . مبتكرهش الستات بل بالعكس
علاقاتك و فضايحك معاهم مالهاش
عدد و عمرك ما رفضت ست. بقه
مافيش واحدة من كل اللى عرفتهم
دول خلتك تفكر تتجوزها او ترتبط
بيها. و الغريب ان كلهم او معظمهم
ستات محترمين ومن عائلات محترمة
و فى منتهى الجمال و الرقة. انا بقه
مابقتش فاهمك و لا فاهم التناقض
الغريب ده
سمير يقف من على كرسيه
و يقف حامد من الناحية الاخرى
و يمسك سمير ورقة و قلم و يرسم
دائرة و يكتب داخل الدائرة الجواز
سمير: اهدا و انا حاشرح لك. الدايرة دى
طالما انت براها فانت سعيد و حر
و مسيطر على كل حياتك
ثم يرسم سهما يدخل الى الدائرة سمير: اذا دخلت جوا الدايرة فقدت
السيطرة على حياتك بالكامل.
حريتك. سعادتك. الستات برة
الدايرة بيحاولوا يرضوك
و يسعدوك و يدوك كل الحب. ليه.
علشان يغموا عنيك و يسحبوك
جوا الدايرة. و متى دخلت
و اتشالت الغمة تلاقى امنا الغولة
قدامك و تكون يا غلبان جوة
الدايرة. و انت اكبر مثل على
الكلام ده
حامد: انا
سمير: ايوة انت . اتجوزت مرتين. و كل
مرة قبل الجواز تقولى ملاك يا
سمير. دى بتحبنى حب. دى متقدرش
تعيش من غيرى. و بعدين حصل
ايه افكرك. الاولانية طلبت الطلاق
و بهدلتك اما التانية
حامد: امتثال
سمير: امتثال. دى بقة مش طلبت الطلاق.
دى خلعتك. قانون الخلع اتوافق عليه
من هنا تانى يوم كانت رافعة القضية
و لقيتك داخل علية بشنطة هدومك
مخلوع
فى استكانة و استسلام حامد: لا اصل انت مش فاهم. امتثال طول
عمرها تحب تكون الاولى فى كل
حاجة. اول ما سمعت ان القانون
اتوافق عليه كانت بايتة على باب
المحكمة. لكن ربنا نصرنى عليها.
و كنت تانى راجل اتخلع فى مصر
كلها. و بعد ما عرفت انها تانى ست
خلعت جوزها حاولت ترجعنى تانى
و انا بانفة و شموخ رفضت تماما
ارجع لها
يجلس و يجلس حامد سمير: على الله تكون فهمت و صدقت
حامد: لكن يا اخى بيقولوا ان ورا كل عظيم
امراة
سمير: اهى الجملة دى بالذات الستات اللى
روجوا ليها و لغوا بقيتها
حامد: بقيتها. و هى ليها بقية
سمير: طبعا ليها بقية. الجملة الحقيقية اللى
سفوا نصها الستات بتقول. ورا كل
رجل عظيم امراة تجعله اقل عظمة .
يعنى لو ماكانش وراه الست دى كان
حيبقى اعظم من كده بكتير
يقوم مفزوعا حامد: يا ساتر يا رب منك يا اخى. لخبطت
نافوخى. انا ماشى و مش عايز قهوتك
يمسكه سمير ليجلسه و هو
يضحك سمير: طب اقعد بس. انا حاقولك راى عالم
كبير فى الذرة. سالوه ليه مفكرتش
تتجوز على الرغم من كثرة علاقاتك
النسائية. رد عليهم بثقة و بدون ما
يتردد. اذا كان نفسى اشرب كباية
لبن اروح اجيب معزة تعيش معايا؟
حامد: ده كان راجل مجنون و معتوه. بقه
الستات الحلوة ذى المعيز يا راجل
سمير: اهوة الراجل ده كان المثل و القدوة
و ما تتصورش انا آمنت بكلامه و…
تتحرك الكاميرا ببطء و هم يواصلون
كلامهم ناحية باب الغرفة الى ان تصل الى
الباب و تظهر سميحة و هى تمسك اوراق
على صدرها و تضع اذنها على الباب ثم
تتحرك يدها علامة التوعد و تغادر المكتب ببطء حتى لا يشعر بها احد cut
مشهد 13 غرفة نوم سميحة ليل/ داخلى
تجلس سميحة على السرير مقرفصة
قدميها و تنشر امامها اوراق موزعة
على السرير و تمسك قلم فى يدها
تضعه فى فمها و تمسك ورقة تقراها
باهتمام. تقف بجانب السرير فكيهة
تضع فنجانا من الشاى و تاخذ الفنجان
الفارغ من على الكومودينو الملاصق
للسرير. سميحة لا ترفع نظرها اليها
و تخرج فكيهة و عند الباب تدخل
سمية وتخرج فكيهة و يترك الباب
مفتوحا. ترتمى سمية على السرير
و تجلس بجانبها مقرفصة و تلبس كل
منهما بيجامة حريرية من بنطلون
و بلوزة. تترك سميحة الورقة و تنظر
الى سمية بخبث وهى تلف يدها سميحة: ايه فيه ايه. عايزة ايه.
انتى مش شايفانى مشغولة
سمية: مفيش حاجة يا سمسم يا
حبيبتى. انا بس عايزة اطمن
و هى تعتدل سمية: عملتى ايه. سلم ولا لسة
شوية. طمنينى. انا عايزة
اطمن عليكى يا اختى يا
حبيبتى
سميحة: عايزة تطمنى علية يا
عفريتة ولا على نفسك
فى غضب مصطنع سمية: انا خلاص قلت لخلودة يجهز
نفسه وان عقدتنا خلاص
اتحلت و حنتجوز انا وانتى
فى يوم واحد ذى ما وعدتينى
. طمنينى اخبار الطريقة
الامريكانى اللى اتفقنا عليها
ايه
تقف على السرير و تفتح يديها
و تضمها بطريقة كانها تحاصر
شىء ثم بيديها اليمين تمدها الى
الامام فجاة مع كلامها سمية: الحصار من جميع الجهات.
ثم الهجوم فى القلب فيسلم العدو
على طول
ترتمى على قدميها و تضع وجهها
امام اختها سمية: طمنينى. العدو سلم ولا لسة تحت
الحصار
تلقى سميحة بالقلم فى عصبية و تضع
يدها على جبهتها فى ياس. تقترب
اختها منها و تلمس شعرها. سمية: ايه الحكاية يا سمسم يا حبيبتى
ترفع راسها بعصبية و هى تصرخ
بصوت عالى سميحة: الحكاية بقت شلختم
تتوجه الكاميرا بسرعة الى باب
الغرفة وثريا هانم تقف بقميص نوم
كامل و هى فى ذهول ثريا: شل.. شل.. شلخ…
تعود الكاميرا الى سمية و هى تعتدل
ناحية امها سمية: شلختم يا ماما. شلختم
تتراجع ثريا هانم وهى تنظر بفزع
الى الخلف و هى تصرخ ثريا: فكيهة.. فكيهة
تنظر سميحة الى سمية فى استغراب سميحة: فى ايه
سمية: ما هى فكيهة القاموس الشعبى
بتاع ماما. حرام عليكى يا سمسم.
دى ماما ما فاقتش م الصبح من
فساخونيا تقومى تمسيها بشلختم.
دى مش حتنام النهاردة. طول
النهار سامعاها هية و فكيهة. ماما
تسالها و فكيهة تشرح لها. سيبك
دلوقتى من ماما و فكيهة و احكيلى
ايه اللى حصل و ايه اللى خلى
الحكاية شلختم
تنظر اليها سميحة و تركز الكاميرا
فى وجهها و تتركز الكاميرا على
وجه سمية و تتحول الى ماعز تماما
ثم تعود الى وجهها مرة اخرى.
تهزها اختها سمية: هيه. سمسم رحتى فين
تهز سميحة راسها لتفيق سميحة: لا مفيش انا معاكى.قلتى حاجة
تصفق بيديها سمية: لا ده احنا رايحين فى الفساخونيا
خالص. بس يا سمسم انا فى سؤال
محيرنى و نفسى اسالهولك
سميحة: ايه هوة
سمية: انتى اتقدملك عرسان كتير جاه
و مال و مركز ووسامة و رجولة
. اشمعنى سمير سرحان. فيه ايه
غير كل اللى اتقدمولك. ليه
متمسكة بيه بالشكل ده
ترجع سميحة بظهرها الى الخلف
ببطء و تضع يديها الاثنين خلف
راسها و تستند على المخدة فى حالة
حالمة و تمد رجليها الاثنين وتضع
رجل فوق الاخرى و تغمض عينيها
و هى حالمة. وتتنهد و تا
موضوع: كيد الهوانم ..سيناريو فيلم كوميدى .. 
الثلاثاء 24 يناير 2012 - 23:40
