عشاق هذا الزمان..كوميدى

عشاق هذا الزمان
____________________ تأليف/ رضا الهجرسى
1
الفرار

على ضوء القمر جلس العاشقان يتناجيان ..
هى: أمجنون بى.
هو: نعم
هى: أمفتونا ..بخفتى ..وجمالى.. ودلالى .
هو: نعم .
هى: ولا تستطيع النوم ..ألا وصورتى ..بين أحضانك.
هو: نعم.
هى: أتحبنى ..كل هذا الحب.
هو: نعم .
هى: أتتزوجنى..
هو: هههه
هى: طب أرجع يا جبان ..وحاسب الجرسون ..معيش فلوس 2
3
حب.. ست أبوها
__________
وقف العاشقان ينظران الى القمر وضوءة يغمر المكان و يسحر الألباب ..وبجانبهم شجرة جميز ضخمة ..وساقية
شبحان أحداهما ضخم الجثة فى أفراط ..والأخر قصير القامة ..وهما ست أبوها بنت العمدة ..وعويس أبن عمها
وخطيبها ..يشب عويس بقدمية عاليا ويضع يدة اليمنى على كتف ست أبوها ..ويشير بيدة اليسرى فى أتجاة القمر
وفى لهجة ريفية وبصوت ملأة الحب الهيام والشاعرية ..
عويس: شايفة الجمر ..يا ست أبوها ...
ترفع يدة من على كتفها وتدفعة دفعة شديدة ..تسقطة على الأرض ..تقترب منة وهى تزمجر كالأسد ..ترفعة من تلافيف
جلبابة وتضع وجهها فى وجهه ..وهى تشير بأصبعها فى أتجاة القرية ..
ست أبوها: أنى بجة عايزة أعرف.. مين من نسوان المخروبة دى اللى جالتلك الكلام دة..
عويس وجميع أجزاء جسدة ترتعد بين يديها القويتين الممسكة برقبتة ..
عويس: نسوان مين ..وجالوا أية ..
ست أبوها: أصل شوف ..حتجر ..يعنى حتجر ..وألا ورحمة أمى ..حشبحك ع الجميزة دى ..وبعدين أعلجك ع الساقية ذى البهيمة
فى لحظة كرامة عنترية من عويس ..يرفع يدها بقوة ..
عويس: تشبحى مين وتعلجى مين ..يا بنت المهبولة أنتى ..عيب دة أنا حبجى رجلك ولازم توجرينى وتحترمينى كمان ..
ست أبوها: ما هو لازم أعرف هية ..مين ..اللى أستجرت تقول على ست أبوها بنت العمدة ..وكبير الناحية كلتها.الكلام دة
عويس: كلام أية ..بس
وهى تدعى البكاء وتشير ناحية القمر
ست أبوها: أن ست أبوها .اللى عينيها ذى البجرة ..عامشة وضابشة ..ومبتشوفش الجمر وهو فى تمامة.....
حب شاب روش
___________
جلس الشاب الروش وهو فى حالة هيام شديد ..منتظرا خطيبتة الروشة .فى أحدى الكازينوهات الموجودة ع النيل ..أقبل علية صديقة فى خطوات
مترددة ..ونظرات زائغة ..وبصوت مرتعش ألقى علية التحية..
الصديق: هااى روش ........... رد علية الروش: هااايين صديقى ..
الصديق: أنا مش قادر خالص..خالص ..أنا لازم أبوح بسر خطير ..بس خايف خالص..خالص ..أنك متعملش كنترول على نفسك وتتهور.
الروش: ياااااة ...هوه سر خطير كدة ..
الصديق: خطير..خالص..خالص..
الروش: متشتغلنيش...أسبيك...ديرتك ..وألا أنت عارفنى لما حد يعصبنى..بعمل فية أية..
الصديق: يااااى ..عارفك...عارفك ..خالص...خالص ..أنا حقولك ..أنا وأ نا جاى على هنا دلوقتى ..شفت..شفت..ياااى ..مش قادر أنطقها
الروش: أنطق ..يا غتت ...حموت فى أيدك..
الصديق: أنا شفت خطيبتك الروشة ..قاعدة قاعدة روشة ..خالص..خالص..برة ع الكورنيش.. ومع مين.....مع واحد صاحبك كمان ..
قفز واقفا وهو فى شدة الغضب ..وخرج فى خطوات سريعة ...ثم عاد بعد فترة ألى صديقة ...مبتسما ..
الروش: أخص عليك ..يا وحش .. خضتنى...دة لا صاحبى ,,ولا أعرفة ..خالص...خالص.
4
حب الفرافير ________
ينسل ضوء القمر الساحر ويتجة فى أتجاة عشة الفرفورة والمبنى من فضلات الصاج و الخشب ..فى أحدى المناطق العشوائية ..يلتصق الفرفور
بالجدار الخلفى ..ويناجى حبيبتة الفرفورة ..وفى صوت ملأتة الرقة والرومانسية..يتناجيان
الفرفور: فاكرة يا فرفورة يا حبيبتى ..أول مرة شفتك فيها ..
الفرفورة: فاكرة يا فرفور يا حبيبى ..كان ورا جبل الزبالة الكبير ..وبالأمارة فضلت ماشى ورايا سرحان وهيمان ..لغاية ما وقعت فى طرنش
المجارى ..هههه وبقت ريحتك معفنة ..أكتر ما هى معفنة ..
الفرفور: انا عارف يا حبيبتى ..أنى بصيت لفوق ..لما حبيتك ..وعارف أنى من الطبقة المعدمة ..وأنتى م الطبقة الفقيرة ..
الفرفورة: متقلش كدة يا فرفور يا حبيبى ..أنا حقف جنبك لحد ما أطلعك لمستوايا ..وتبقى فقير ..وتملى عين أبويا..ويوافق يجوزنا لبعض ..
صوت الأب صارخا من داخل العشة ..يهرب الفرفور ويختبئ خلف كوم الزبالة ..وتصرخ الفرفورة وأبيها يضربها ..يلتف أهالى المنطقة
العشوائية.. حول العشة من الخارج ..والفرفورة تصرخ من أعماق قلبها ..
الفرفورة: بحبة ياااااابة ..
الأب: يا بنت الكلب..
الفرفورة: بموت فية ..يااااااااااابة..
الأب: حموتك ..ولا المعدوم أبن المعدوم دة ..يشوف ضفرك ..
الفرفورة: جوزهونى ياااااااابة...وألا حرمى نفسى من فوق جبل الزبالة الكبير...
أهالى المنطقة بالكامل وفى صوت واحد
الأهالى : هوة مين ..يا فرفورة ...
الفرفورة: الفرفور ..يا ناس..
صرخ الجميع من أطفال وشيوخ ورضع ..الخ. من أعماق ...أعماق قلوبهم..
الجميع: طب....أستنضفى...يا بنت الكلب..... 5
حب النجوم
_________

جلس النجم السينمائى فى بهو فيلتة وأمامة كومة من المجلات والجرائد ..يتصفحها فى عصبية ثم يلقى بها بعيدا ...تدخل علية النجمة وتنظر الى المجلات والجرائد الملقاة فى أرجاء المكان ..تجلس بجانبة وتمسح بيديها على شعرة بحنان وحب وهيام..
النجمة: برضة ..يا حبيبى ..منزلش ..عنك ولا خبر ..
النجم: ولا.عنك يا حبيبتى ..دة مش طبيعى ابدا ..أحنا اللى أخبارنا وصورنا ..كانت مالية المجلات والجرايد ..والصحفيين كانوا بيطاردونا فى كل حتة . .والأشاعات والفضايح اللى بتتفبرك لنا ..مرة واحدة كدة ..لا خبر ولا أشاعة ...دة حتى المنتجيين اللى كانوا بيبوسوا أيدى وأيدك ..عشان نمضى عقد معاهم وبأى شروط ..بقوا بيتهربوا مننا..أنا حتجنن يا حبيبتى ..أية اللى حصل ..وأية اللى أتغير فينا..
النجمة: جوازنا ..يا حبيبى.
النجم: جوازنا ؟؟ ..واية دخل جوازنا ..فى المصيبة دى ...
النجمة: يا حبيبى ..اهدا..عشان نعرف نفكر ونلاقى حل ..وحل سريع ..لأن البنك بعت لك أنذار أنك بتسحب ع المكشوف ..وأنا حسابى اللى بيصرف . ع البيت ..
النجم: أية دة بأة ..أحنا بنتذل ولا أية ..متنسيش يا هانم الفلوس المتلتلة اللى صرفتها عليكى والهدايا اللى بالووفات ..ولا نسيتى ..لا .أحنا عندنا كرامة
برضة..
النجمة: يا حبيبى وعمرى اللى راح .وعمرى اللى جى .عمرى ما أذلك أو أجرحك .وأنت عارف ومتأكد أنى مقدرش أعيش من غيرك ..بس لازم نلاقى
حل وحل سرع كمان
النجم: أنا عارف ومتأكد يا حبيبتى من أخلاصك وحبك ..وأنك متقدريش تستغنى عن حبى ..أو تعيشى بعيد عن حضنى وحنانى...بس اية هوة الحل؟؟
فى هيام شديد وهى تمسك بيدية وتضمهم الى صدرها فى حنان بالغ..
النجمة : نطلق يا حبيبى ..

____________

يسلم يراعك ، أضافة حقيقية ومبدعة للمنتدي .

(هبه) بت الحصاحيصا كتب:

الله يرحم زمن عبد الحليم وأم كلثوم

وحب الزمن الجمييييييل

وعايزنا نرجع ذى زمان ..قول للزمان ..أرجع يا زمان ..
الأخت العزيزة ( هبة ) بت الحصاحيصا ..سعدت بتعليقك الراقى الظريف..دمتى مبدعة

راشد محمد الجاك كتب:

يسلم يراعك اخونا رضا الهجرسى ....
ننتظر المزيد منكم ...

الأخ العزيز ..راشد محمد الجاك ..شكرا على مرورك الكريم ..وأن شاء اللة هناك المزيد والمزيد ..

صداح فاروق وراق كتب:

يسلم يراعك ، أضافة حقيقية ومبدعة للمنتدي .

أشكرك أخى صداح فاروق وراق ..وأنا يشرفنى وجودى بينكم فى المنتدى ..

ههههههههههههههههههههههه كلهم بجد احلى من بعض تسلم ايدك وافكارك المضحكة

وردة الصحراء كتب:

ههههههههههههههههههههههه كلهم بجد احلى من بعض تسلم ايدك وافكارك المضحكة

الأخت ..وردة الصحراء ..
أشكرك علي ظرف تعليقك ..وأرجو أن أكون قد أخلت البهجة الي قلبك ووضعت البسمة علي شفتيك