أخواني الأفاضل..أخواتي الأماجد..
بالدارجي كده في شاعر زمان قال..
رمضان ولي هاتها يا ساق
مشتاقة تسعي إلي مُشتاق..
و المقصود هنا هو ساقي الخمر و المشتاقه هي الخمر و المشتاق هو الخمير العربيد.. بالتأكيد لا أدعوكم لما ذهب إليه الشاعر.. لكن لدي دعوه أن نواصل ما نفعله في رمضان في غير أيام رمضان.. و احد يقول لي(كيف)...؟؟؟
كيف...؟؟؟
أوريكم كيف..
# موش أنحنه في رمضان قاعدين نقعد نسمع القرأن و ذلك الوعيد و التهديد المُتضمن في أياته، حتي أنه أحياناً يخيل لنا أننا دُهدنا في نار جهنم و كبكبنا فيها علي و جوههنا مع أولئك الأقوام و القري الهالكه؟؟؟ والعياذ بالله.. في الفطر برضوا تعالوا نعمل نفس الشئ، حيث أن القرأن الكريم أيضاً به أيات تذكرنا بعفو الله و مغفرته و رضوانه و البُشري بالفوز برضائه و العتق من نيرانه،، لو أردنا ذلك؟؟
# موش نحنه في رمضان الواحد فيما بيكون(ود ناس)، وكلو ما يجي يفقد أعصابو بيقول( اللهم إني صايم).. في الفطر قول(اللهم إني فاطر، و لكنني أتأدب و أتخلق بي خلق نبيك الكريم و صحابته الأبرار)!!!
# يا رجال.. النسوان ديل عاطفيااااااات في رمضان و غير رمضان..ياخي كان الوليه دي مٌزهجاك، العيد ده فرصه، زيارات هنا و هنا و برامج منوعه.. ياخي إنشاء الله كده تدجل عليها(و طبعاً المشاعر الحقيقيه الصادقه أفضل) قول ليها (و الله أنا ما شاغل نفسي إلا بيك و بي أولادنا ديل).. حاول تصفي معاها الحال.. لأنو دوام الحال من المُحااااااااال؟؟
# يا نسوان.. الرجال ديل الواحد مهما يكون، يمكن ترويضو..؟؟ بس بطلن النقه..نق..نق.. نق، والعجب المتعلمات، نقه بي منطق؟؟ في العيد ده قولن للرجال ديل..( البيت ده مٌكتفي، و حاتك يا أبو أولادي، ما عاوزين لا ملايات لا ستاير جديده و لا شي.. بس أكسي وليداتك ديل وساعد أهلك الله يساعدك، هم أحوج ليك مننا.. و ربنا يديك العافيه في الدنيا والعفو في الأخره) و برضو بيكون كلام طيب حتي لو كان للإستهلاك..؟؟ و الكلمه الطيبه جواز سفر..
# حاول أن تصل من هجرك سواء أن كان قريب أو صديق و لو برسالة جوال،، ما تقول لي (الأقارب عقارب) و غيورين حاسدين و حاقدين!!! ياخ إنته ما و ريتم ذي ده قبل ده..؟؟؟ولو من ردة فعل أفعالم؟؟؟ و أصحابك ديل ما كان بيناتكُم ملح و مُلاح؟؟ ما تقول لي ده ما بتغير..ده غتيت و بغيض و مقيت!!؟؟ و الله كلمة(سلام) ترد الروح و نحنه بنو البشر جُبلنا علي العفو و التسامُح..
# إذا جلست إلي أحدهٌم و بدأ يكضب و يتبوبر عليك، و إنته عارف الجمبك ده كضاب ساكت و إنته ما الزول البتبورو أو يكضبو عليهو.. أول شئ أحمد الله أنك في نعمه؟؟ ما بقول ليك جاريهو، لكن أسأل الله أن يصلح حال الجميع بما فيهم إنته ذاتك.. و الله أنفسنا دي في كتير من الأحيان أولي بالتصدُق عليها بالدعاء ليها من غيرها..يعني نحنه جوانا مافي قباحات وتناقضات؟؟
#يا أخوان ، بديت أشعُر إنو كلامي ده ماشي كتير و قد يكُون جارح و مٌمل، عاوز ألغيهو، لكن قلته خلاص قعدتا قريب ساعه أكتب فيهو، معقول يضيع ساكت كده.. وما ياها حياتنا و ياها أنفسنا..يعني حا نكضب علي منو؟؟؟ فإن و جدتوا خيراً، فأشكروني(في سركم) ، و إن وجدتوا غير ذلك، قدروا الوقت القعدتو ده.. و أعذروني..
....رمضان ولي هاتها ياساق.. هات كل تلك الخصال و الأخلاق الحميده و غير الحميده، موش كلها جايه من كلمة (الأخلاق).. ربنا يهديني و إياكٌم إلي أفضلها.
عيد سعيد
و دمتم..
موضوع: الرحيل إلي جهنم.. في العيد و بعدهـ؟؟؟ 
الأحد 13 سبتمبر 2009 - 1:24
