زمن ((قالوا ليكن تعالو مارقين علينا ))
((العقد يوم اللتنين))
((ويوم الجمعة السيرة))
كداري
نخيل باسق وفارع بي "رتبو"
وبحر مويتو صافية لبن
والعريس بـهلالو وضريرتو في هامتو
الحريرة في يدو بي خرزا
والسوميتة في رقبتو
وفوق لي دا سبحة المرجان السوداء
زمن صينية الجرتق
والكورية المترعة بالزيت المعتق بالطيب
والدلكة والبخور المسبع
حنة العريس البفرعوها بالعديلة البيضا ووداعة الله
والأماني تقدمو وتبرا
الحفلات والرتاين والشبال والبطان لامن العريس يسير
مجرتق تشوفو ماش قدام ينقز
((أدقا أدق..
أدقا دق ..
أدقا أدق ))
الناس كلـها تغني
والمابغني "النقدا النقدا النقدا" يخاف يشيل
وأسي ((قالوا ليكن تعالو مارقين علينا ...))
إنت ذاتك تنـهجم (( مالكن في شنو ؟؟))
يقولو ليك لا أبداً عندنا "حِوار" يوم اللتنين))
((ويوم الجمعة "الوثبة" ))
((والسيرة للمقابر بالتعذيب والكلاشنكوفات والانتنوف فو فوو فووو )).
والحفلة بي فرقة جاز "قوات الدعم الشنيع"
العروس من أم العريس ما تفرزا
والعريس من "الوزير" إلا يفرزوهن بالدي إن أي
تاكل ما تاكل مافي زول جايب خبرك
العريس مهموم
كلفت كلفت يسوق عروسو ويفوت
وإن باقي ليـهو حاجة من قروش الكشف
يجاسف ويمشي لكوندة السعادة في مدني
وبالمواصلات عرقن يتخلت
وزي ما قالوا صفقة ورقصة وآخرها كوم "حِوار"
قدر ما أعاين في الأرض أرجع عشرات الأفئدة للوراء
وقريب دا والله ما زمناً طول أيام عرس نفيسة والناير
وياريتكن كان حضرتو معانا عشان كتو تعرفو الفرق
هلا هلا
أيام المطر من رشتو والعريس من بشتو
أسي قالوا الوزير من كرشتو
والمعتمد من كشتو
لمن بقت ذكرى وتاريخ
يقولو ليك أيام عرس النايـر لنفيسة بت الجاك
الناير ود قسم السيد مالكن ما بتعرفوهو ؟؟
أكيد ناس كتار منكن يكونو شافوهو في سوق الحصاحيصا الكان سمح داك
جا "صبي" فارع الطول لا يخلو من وسامة
لا طول لا قصر
هيبة لا تخطئـها العين
يزيد من ألقـها تـهذيب وإحترام وميز نفس
حبوبتن لينا كانت عندها "كلبة" مسمياها "ميز النفس قاسي"
وكأنـها تجسد حديث المصطفى عليه السلام عندما قال :
"عدنا من الجهاد الأصغر للجهاد الأكبر " جهاد النفس
الله يرحما ويجعلـها من أصحاب اليمين
في الحقيقة الناير جا زيارة ساي تتخيلو ؟؟
لكن ربنا وفقوا الحمد لللاي
وإشتغل راعي بدرجة سفير للنوايا الطيبة
قدم السيرة الذاتية بتاعتو للجنة الإختيار
ومن بين تلاتة عينوهو راعي بمعاش كويس
وكفالتو كانت علي شيخ الحلة وقاعد في ديوانو
غايتو ديوان شيخ الحلة دا كان زي مخيمات اللاجئين
القراحين
وناس التعداد
وناس الرش
والمدرسين الجايين من برا
"والطلبة بوزعوهن في باقي البيوت"
الدايات والزائرات الصحيات
وناس سنجر والقطبة والكُرُشي "أوتذكرين"
وناس "نحو" اللمية
وحفارين "التوليتات"
(( خفت أقول الإسم الأصلي يقوم الدكتور يوقفني لمباريتين متوازيتين))
الناير من الصباح مع البـهائم ما بجي متراوح إلا العصيييييير
سالامن !!
وطايابن بالوا طوييييل !!
وإن لاقاك ماش الشغل يسألك "نعل ما عندكن عوجة ؟؟"
وهي العوجة كيفنـها آآلناير آآعشاي ؟؟
الشغل الكل يوم دا براهو مو عوجة ؟؟
حدو متين مانا عارفين
جماعة قاعدين عند ناس ود البقيع يتونسوا يعيدوا ويكرروا
ويكررو ويعيدو
والبعيدو بكررو "ما منك ما منك من العليك"
مرة يبكوا ومرات يضحكوا ومــــرات يغنوا
عطا المنان قال "خلاص داير أخلي الزفت دا "
شب ليهو عادل قرض قال ليهو "العرقي ؟؟"
رد سريع "لا لا ياخي بتبالغ عرقي شنو ؟؟.. الشغل"
كوركوا ليك فيـهو "دا الشغل دا الشغل آآآآآآي"
"عسل إنت و بسكويت آآآآي"
"سمِح إنت وبركة الجيت آآآآآآآآي"
بعد راقو قال ليـهم "البسمعكن هاجين كدي يقول قاعدين تمزوا بي زيتون"
"إياهو فول الحاجات دا ؟؟...."
"..إن شاء الله ينفخكن بركة النبي محمد يلحقكن غنم زهراء"
شب ليهو عاصم كدايس ولسانو بقى حجر طاحونة :
"نحن
نـ ح ن ما شقانا نا نا نا العرقي السكو سكو آآيابا .... ب ب ب
يشقنا فول الحاجات ؟؟"
وواصل ..
قبل شوية شايفك قريت سورة التين والزيتون
ووقفت مالك ما حافظا ؟؟
وبدأ عاصم يقرأ
"والتين والزيتون
"وطور سنين
"وهذا البلد الأمين
"لقد خلقنا الإنسان في أحسن تقويم
"ثم رددناه أسفل سافلين..."
"صدق الله العظيم ...وعلى فكرة أحسن سافلين ديل إنتو"
ورجعوا للغناء تاني "ياناس إنتو وين إنتو يا الرحتو طلولتو"
"ما قلت ليكن .. أها شوفو جنس اللخبتة دي"
المهم غناء لكنو متقطع والبطاطير ماشة في الحسيان
وبقوا في عالم تاني ما شفتوهو يا خلاني
عمر منفلا باقي متلقي حجج قام يلغلغ
"سافلين نحن يا مِحنة ؟؟.."
وبدأ يغني
"محنة يا محنة .."
"الله لي من ديل السكنوا الجزيرة الله لي من ديل"
وتسللوا من المكان شيلني وأشيلك "طب العاصب"
أها الناير وبفضل مجهوداته وصبره وأمانته وقوة شكيمته
إنتظمت كتير من الأغنام في فصول رعايتو
الغنم من تصبح اشللة تجر جري على السرحة
وشِدة ما إرتاحن معاهو لمن سون ليـهن كريشات
مشيتن الكانت مكلوجة ديك بقت عديلة سوط
مرة واحدة جاية راجعة من السرحة ماشة قدامي جنب الفرن
تمشي "كدي كدي زينا ساي"
غنم الرضية الكانن مركلسات اليوم كلو في الكوش ديلك تذكروهن !!
وحات الرسول بقن ما شاء الله إنتظمن في سرحة الناير زي العجب
وما بغيبن إلا لظروف المرض أو الولادة
فسرحة الناير شالوها الناس وبقت قصة
وغنم الحلال الجنبنا قالن يجن يسرحن إن شاء الله يقعدن في الدُخولية
لكن شيخ الحلة كل سنة يقول ليـهن السنة الجاية
اللبن رقد هبطرش والعتان على قفا من يشيل
اللبن ما تلحقوا حليب تاكلوا روب
وإن إجتمعوا أربعة في حريق أو وست ساي
ياكلوا العتود في "فِِرِد" وجبة
نفيسة بت الجاك كان بين بيتن وديوان شيخ الحلة شوك
ختبوها كم واحد لكن أبت
سماحتن فايتة الحد خِلقة وأخلاق وزي ماقال ود البنا في المعنى
نور المحيا الفجر والليل هضليم
ليـها راحة الدنيا وللناس التأليم
الشف يتلاصف "مرفوع فووووق"
متحكر في الصدير الشرط القميص
هلا هلا
مرة شافا عوض الباشا في البحر بالفستان الترفيرا بردلب وقع
شالوا شيل ودو لشيخ محمد
فتح ليهو الكتاب قاليهن "لحظة"
الجماعة من حيسوو سموهو "لحظك الوقاع"
لاقاها النور ود اب صفية في الطاحونة
شمشرة ساي "مالك الليلة آآنفيسة هنا ؟؟"
"بري والله آآآلنور ..أيوب أخوي في الخلا بالحمار .."
والنور كرعينو ساحن الرب الرب
الرب
يبلع في ريقو "قتي لي شنو آآآنفيسة؟؟"
وواصلت "أها قت الندقق لي ملوة أفطر بيـها العجين"
قوم يالنور تاني يوم من الصباح
أنـهز ليـهن شوالين الليلات دقيق فيني من كبرو
يات من يجي كايس المخلت ومكفكف جلابيتو يرجع قمحان يكفكف في دميعاتو
أهل الحواشات وأسيد البـهائم
المِدرسين والتمرجية وأهل الدكاكين في السوق
وأصحاب المال
لم ينجح أحد
بس زول واحد القندولو مفندر الريكة
النايــــر
إن نامت الناير
وإنت صحت أريت أبصلعة طاير
والناير شايل قلبو في يدو
ومن يشوفا "يقعد يتوحوح "
"إشتقت لي وصالا ...
"دي قِست علي مالا ...
"مشغولة في دلالا ..."
يصلي العشا ويجي ينبطح قدام الديوان
وطيف نفيسة ما بفارق خيالو ولسان حالو :
"متين يا نفسي نتهنى ..
"نقوم لي نقزو نتمنى ..
"متين يانفسي نتهنى نقوم لي نقزو نتمنى .."
وهي بي هناك تدندن
"يا ابويا يالسني ..
"يالسني طمني..
"بجافي ليك اهلي..
"واسكن معاك مدني..
"مدني الجمال وانا مالي..
"الخدار مرق لي وداري.."
وقولة الناير تِتِرِب يقوم
"الناير .. النـــــــــــايِر عليك النبي تعال أحلب لي الغنماية دي"
"النـــــــــــايِر.. الناير أموت ليك وتدفني كدي ...."
"كان ما جيت دخلت لي الزُريعة دي من الهبوب ...."
نان هي نفيسة نصاح ما موقفة الحلة كلـها علي قنقرة ضنبا
عمي الجاك يا حليلو الفار نقز في عِبو
يوم فاجاها "إنتي يانفيسة آآبتي أنا ماني قاعد شنو يا الناير يالناير ؟؟"
ردها كان جاهز :
" يابا هوي ما ترقد في عنقريبك ساي إن قدرك بي شيت الناير ؟؟"
قال ليـها "أحي آآآريدة "
"سجل لي براي أنا سجل الريدة
"سجل لي عرباتك ..
"سجل لي باكاتك ..
" ما إنت الكجيك ذاتك "
ما صبح اشللة وفي ليلو داك جا صحا الناير من النوم
وجابا ليـهو من قاصرا "نفيسة دي بدور تعرسا ولا ساي ؟؟"
قال ليـهو "إن بقى قِبلت بي أنا ماني داير أخير منـها طب آآعمي الجاك"
قال ليـهو "عاد القبول دا كيفنو يا ولدي ؟؟"
"إنت قايلني لحقت جيمي كارتر ما شائف ونائم فوق أضاني ؟؟"
"والخدار مرق لي وداري دي يا ولدي فاتت أضاني "
"مرة ناديتا تطلع لي العنقريب قالت لي سمح آآلناير جاية"
الناير ضحك وصارحو "إندفق" وبثه كل ما به من شجون
إسبوع ما عديناهو إلا والحلة كلـها تزغرت
وقمر السبوع الداير
الليلة الناير ساير
وحننو والبنات عشوقو
الناير مرق حلاة القدلة فوقو
نفيسة تعلمت حوالي أربعين رقصة
" من فريع البان البسوح نديان منو ياسلام ...سلِم"
والعجب لمن يكسروها بي " سوحي الريلالا بالجنبة موحي يالريلالا"
ما خلو ليـها شيء
"الموص بالسكر كورة الصباح قبال الفطوروكورة بعد الغدا "
الحلبة بالجرادل
القراصة واللقيمات
والشعيرية والسكسكانية بالسكر والسمن البلدي
وشدة ما "إتصلحت" الرقبة بقت حزز حزز
والله الحجاب لمن ربطو ليـها في ضراعا اليمين
التاية عمتي متعقدة بلحيل من حكاية "الضِِرعات" دي
ماتت خالاتا صفية وجات تارسة تبكي
لقت "المحترفين" متحزمين بالتياب "مليون صنف"
والكتوف "رف في رف والدموع أتف
أتف
أتف "
والضرعات العين الحاسدة ما تعاين ليـهن
نست البكا "كلو كلو" وقعدت تعاين في بنات خالتا
حنان وبلقيس والزينبية حلاوة لبن "التش تش"
يوجن يوجن من السماحة
والعجب الوصف تقول كاتبو بازرعة ولحنو السني الضوي
والله كان بتقوم كان قدلت وسطِن
"الليلة يالوحدتي بينا ....
"الليلة ياست اللبينة ...
"آآآلماك إضينة ....
"أحيييي يا أمي لي ...
"الليلة ياست الدار ...
خليتينا للشقا والودار الليلة يا أمي تعالي لي"
التاية إنسحبت من الملعب بالرااااااحة لعدم تكافؤ الضِرعات
وجات لقتنا جايين من المقابر عاجنين لينا رهيفة بي ملاح قرع
دخلت يدها شالت ليـها لقمتين مازادتن
"أريتا شطة العدو"
إتوحوحت وزحت بعيد
كوركت لرقية تجيب ليـها موية
بعد شربت .. ترت ليـها عنقريب في الضل وولعت ليـها سيجارة
للتعترني قلت ليـها :
"أفو خالتك ميتة وإنت بعد أكلتي كمان ولعت ليك سيجارة ؟؟"
قالت لي "ياولدي دا بكاين ما عندي ليـهو ضِرعات"
قلت ليـها "كيف في شنو ؟؟"
ردت قالت "جيت جارية دمعتي في عيني"
"من بعيد فكيت التوب وإتحزمت وقعدت أوصف"
"أها من ما دخلت لقيت ليك ديك يالضرعات "
" حنان وبلقيس والزينبية الضراع قدر دا "
"ولمن عاينت لي ضِرعاتي قلت يا بت خليك عاقلة"
"إنسحبت وعدلت توبي ...
"وقت الله ينعلك يا إبليس ...
"وقعدت لي في ضل لمن الجنازة شالوها"
"الحريم الزي بقر المتعافي ديل بياكلن شنو ما عارفاهن"
ولمن ضحكنا قالت هوي ضحكن دا بجيب لي الهوا
الحريم ديل في بكا أمي إبكن برا في الصقيعة
لمن حلفوا عليهن ودخلوهن علي الضل
أها لمن قرب عرس نفيسة
البت بقت زي الأبنوس بريحة الطلح والصندل
عمي الجاك فرحان جهز غرفة من الطين اللخدر الخالص
لي "الدُخلة"
ما بيت بيت العريس
شفتو العريس معظم كيف ؟؟ تقول محترف
الحمير إنطلقت بالحـــــــلال
"قالوا ليكن ناس الجاك عندنا عقد يوم الجمعة ...
"وقالوا ليكن العقد في الجامع تجو تتغدوا معانا"
الغدا كوكتيل ولا مرطبات مشحتف ؟؟
ما ضلِع الضلعة قدر النصيبة
المابجيبو شنو
التلج بي نشارتو
والعيش بالشوالات
موية الشراب بالبراميل
للكسرة العواسة شغالة ورديات تقوم دي تقع دي
والناير سار
سار
سار
وبقينا في شيتن آخر
سير سير
حليل الغنا البقى كلامن ماسخ
وحوار لا هنا لا هناك
وجوه مكرورة "عاملة ناصبة" نجضت الناس "نجاض"
لا رحمة ولا "وِداد"
حتى العرضة بقت وثبة
زي ما الفول المدمس بقى دكوة
ونواصل
موضوع: قالوا ليكن باكـــــــر تعالوا مارقين علينا "من الأمس" 
الخميس 22 مايو 2014 - 12:50
