كرعين "جداد" الغبيانين ديل قايلنها كرعين "خروف" مع كامل التقدير لكن تتابع التصريحات تصاب بالظهايمر البلقى ليهو فرصة في مكرفون أو كاميرا ترا "يتعولق" علينا جنس دا مصطفى اسماعيل من تجربتو بس إتوصل لهذه الفرضية فرضية الـ"ترقيات" والمعايير "السماوية" أسي بالله الناس في شنو ومصطفى اسماعيل في شنو ؟؟ أسي القال ليك مشتهي ليهو ترقية منو ؟؟ كان في الوطني ولا كان في الوطن البقى وطن الوطني ؟؟ وأظنو وجعتو حكاية واحد في الابيض كاشف حالن كشفا وقالوا عليهو "فاطي سطر" حايم في السوق ويردد "تسرق ملايا تتدقا تسرق ولاية تترقا" بعدين وهو مش وزير الاستثمار والموارد البجنبوها ويدخلوها في بطن المسئولين؟؟ طيب أها دا علاقتو شنو بالترقيات والموارد البشرية أكان ما ساي ؟؟ قالا كدا دون أن يطرف ليهو جيب ولسان حالو " ما تكون تقي وبتخاف من الله ما بتترقى كان روحك مرقت " حتى لو أكان واسطتك بقت "بدرية" وباسطتتك بقت باللوز وجوز الهند برضو مافي ترقية الفرضية دي لو إنعكست الله قال بي قولك وساهل يثبتو عليك إنك ما تقي وما بتخاف من الله وفي الحالة دي ما عليك إلا تخمخم "بوقجك" وتتطلب الله مافي لا قراتيوتي ولا إند أوف سيرفس عشان كدا الود مصطفى جاب "الكرايتيريا" الجديدة دي "تقوى ومخافة الله وبب بب تترقى" إذكرت حكاية حكاها لينا واحد من الاطباء قال في ميز الاطباء في التمانيات كان في واحد مجنن جن وكان فاكيـها في نفسو أصلو أبوهو كان شغال في المطار "الناس البأشروا بي يدينن الاتنين للطيارة عشان تقيف في المدرج ديلك" "يأشر للطيارة بي جاي بي جاي لمن خلاس تقرب تدقشو" كان كلما يرقوهو يجي ولدو الطبيب المزعج في الميز "أبوي رقو أبوي رقو" واحد معاهم في الميز كان مزعلاهو الحكاية دي جداً يوم بعد ما سمع حكاية الترقية قام شب ليهو في حلقو قال ليهو "شنو ياخي أبوي رقو أبوي رقو مجننا ؟؟" "أها يعني بعد الترقية دي تاني حا ينزلا بي كعبو ؟؟" المهم عزيزي الداير تترقى ما تنطط عينيك ساي !! قصة الترقية في عهد الجماعة ديل أسهل من التساهيل ذاتا وتقي ما دايرة ليها درس "عصِر" تعمل "غُرة" زي تيس ودحميد وتفك نفسك في السوق دي صعبة ؟؟ تاكل خدار الفراشين وتصادر عِدة السمكرجية وتساكك ستات الشاي وبالمرة تعمل ليك كشتين صباح ومساء للركشات وكوارو الحمير وتلغف ليك كان مربوعين كان تلاتة من أراضي خيران السوق وتقيف داب وردة لأراضي المستودعات وحصالات المستشفيات الصعب في دا شنو بالله ؟؟ لكن فوق دا لازم كلامك يكون كبار كبار وتستعمل لغة البي بي سي وحذاراك من لغة ناس مونتكارلو ودبنقا دي طوالي تعدمك الحبة ومرة مرة تدخل كلمات زي الغزو الاستعماري البربري الغاشم والامبريالية العالمية والصليبية والبعث الحضاري وخلاس وتكتر من ندين ونشجب ونستنكر ونهيب ولازم كمان تجيب طاري "حقيقة" و"نحسب" بفتح الحا والسا تمش تكسر السا تذكرن الحسابات يقومو يكسرو كراعك سيرة المراجع العام تتفها من خشمك ــ أوعك ولا بالغلط بسبب أو بدونه تكتر من قوى الاستكبار والطابور الخامس وأياك تتكلم عن الاعلان العالمي لحقوق الانسان ولا المعاهدات والاتفاقيات الدولية لانو دي بتكفرك بالمزيقا والكلام عن معاملة الاسرى في أزمنة الحروب ممنوع وجنيف وفيينا يمرقوك من أمة لا اله إلا الله أعمل "هسابك" والعجب لاهاي "أعوذ بالله" تحفر ليها وتدفنا تحت عنقريبك وإن قلت دارفور دي فيها مشكلة ولا تكلمت عن معاناة أهلها طوالي يرقوك يسكنوك في الدرجة الوظيفية التامنة "أحمد شرفي ــ غرقا ملخشم" دا كان أهلك لقوك كان في السبلوقة ولا الشلال الكم كدي ماعارف وإياك تقول عبد الخالق محجوب الله يرحمو "ما شغلتك" ومصطفى سيد أحمد تنساو لاشفتو ولا سمعتا بيهو وتسمع قيقم وجون قرنق ما عندك بيهو شغلة ولا عارف أي حاجة عن طيارتو أما علي فضل طوالي تمسك في الملاريا "والله يغفر لي" تلحقك ليهو " أوعك خليك واعي وبعدا يكون كويس كان "كبيت" على الخلطة دي شوية "هِتافات" "لا لدنيا قد عِملنا .... "نحن للدين فداء ..... فليعد للدين مجده أو ترق من الدماء" أو ترق كل الدماء" ياخي مالك ومالا قالوا ليك كل الدماء تقول كل الدماء هو يعني كان دمك مع الدِمي دي ؟؟ ما كلام ساي ينتهي بإنتهاء مراسم "خراج الروح" وكان عزموك لي حفلة ما تسكسك إلا في "يانفس أقسمنا لتنزلن" "لتنزلن أو لتكرهن" " لتنزلن أو لتكرهن مالي أراك تكرهين الجنة" كلام واضح يرقيك من صول لي عميد في حول بالله شوفتو جنس "الغبا" دا ؟؟ الناس تترقى تترقى تترقى اللعمى شايل "المتمكن" نحن برانا تحت تحت قلنا إمكن كفاءة وكِدا أتاريهم "أتقياء" وخائفين الله !! طلعنا نحن المابنعرف لينا خرطة ولا في إيدنا جواز "طفر" زي ما قال "قيقم"
موضوع: رد: "في وطن الوطني" الترقية تقوى ،، والمرا بصل ،، والملاح كرعين الجمعة 30 يناير 2015 - 8:59
تيكو الف مرحب والبركة فينا وفيكم وتسلمي من كل شر و"إسمك في" دي زمان كانت قماش أقرب للدانتيل زمن الخرطوم بالليل والقمر الروسي زمن الترقية بالخبرة والاقدمية الترقية خليناها الللمونا في الاقمشة دي عموما لك التحايا وتمام التقدير
ابو اسلام
موضوع: رد: "في وطن الوطني" الترقية تقوى ،، والمرا بصل ،، والملاح كرعين الجمعة 30 يناير 2015 - 10:27
موضوع: "في وطن الوطني" الترقية تقوى ،، والمرا بصل ،، والملاح كرعين 
الخميس 29 يناير 2015 - 12:06
