(( وحتي الكفن حيرفعوا عنه الدعم العنده كفن يخليه جاهز والما عنده يشوف ليه واحد من اهله المهاجرين او المغتربين يشتري ليه . ولا نعمل زي الهنود حريق بس ولكن حتي الحريق مكلف ما في حطب ما في غاز النار يولعوها بشنو بالغنا يعني النار ولعت . ولمتين نغني في لمتين يلازمك في عشاك مر الطعم .. الحكومة بلسان وزير ماليتها قال ليكم انتو شعب مستهلك تستهلكوا بس تستهلكوا اكل تستهلكوا بنزين تستهلكوا وكت .. تستهلكوا غاز .. تستهلكوا كهربا .. وتقعدوا تشكو الجنيه دق الدلجة .. الموية ما صحية .. الحاجات زادت الدوا غالي .. الفول غالي .. بص الوالي غالي .. الرغيف غالي .. والغالي بغلاته .. شعب المافيا .. زيت ما في غاز ما في .. عرس ما في .. كاس خارجي ما في .. شغل ما في .. شعب شكاي خلاث من زمن نميري يشكي .. في بيت البكا يشكي .. في بيت العرس يشكي .. في الكورة في الهاف تايم يشكي .. في الفيسبوك يشكي في الواتساب يشكي .. وبعد ده يغنوا للبشير "ليك أسبوعين ما جيت".
قال ليكم وزير المالية : بطلوا استهلاك انتجوا ياخ .. ناكل مما نزرع الزمااااان ديك تذكروها ونلبس مما نصنع اختها رجعوا تاني! .. الداير ياكل يزرع في المزرعة السعيدة في الفيسبوك والداير يلبس يخيط عند عابدين عوض مين عابدين عوض ده!!! وزير المالية ده نازل بدستور عاوزين نرفع الدعم ليه كام سنة هو كان القباله .. كل ما السنة تقرب تخلص يبشرونا برفع الدعم ويطالبوننا بالدعاء من اجل التخفيف .. وكل ما تصب مطرة يخوض الوالي الجديد والقبله مع الخائضين ..ويقوم البشير يمشي الحج يمسك استار الكعبة يدعو يا رب موت الشعب الفضل الكعب ده!
شعب نقناق جنو نقنقه شابكننا الفساد الفساد لغاية ما جبتوا لي رقبتكم اها الترابي "في خشمها" قال ليكم انتم المفسدين ولا حد سواكم .. شعب ما بعرف يتحكم ياخ عبود 6 سنين كوركوا فيه نزلوا .. نميري 16 سنة كوركوا فيه طيروا .. لغاية الآن لينا 26 سنة وشوية لغاية ما هرمنا وكبرنا وقربنا نمشي الترب مستنيين "آخر ظهور للإنقاذ" )).
عمر الفاروق عبد الله الشيخ / سودانيزاونلاين
موضوع: بالمناسبة .... (( الحكومة تريد تكفين الشعب )) 
الأربعاء 9 ديسمبر 2015 - 9:28
