أنا لها..أنا لها..فايزهـ السيد و رحمه G.T؟؟

يسرني تمثيل حواء في هذا البوست.. و كما تكون اللقياء مع أخواننا الأفاضل علي نفس البوست بالمنتدي العام، تكون حواء بكل و قارها المعهود هنا علي المنتدي الإجتماعي.. فهذه نقابتهن و ليس(غابتهن)..فهن يعشن في الأضواء و إن أبي أدم؟؟ يعشن بمزيج من الإلفه بين العفه و طيب المعشر.. فلنحسن إستقبالهن و إكرامهن، فهن الطاهرات العابدات الناسكات المتواجدات دوماً بين حنايا الإمومه و صبابات الهوي الأول.. حيث كان أدم بريدا..و ما أصلو الريده ذاتا،، تعلم الزول العباده.. و عبادتنا لهن هنا ليس شرك بالله، بل تقدير يشق الدواخل تحناناً و و جدا..
البدايه الكريمه مع الأخت فايزهـ السيد و بقية الفضليات في الطريق إنشاء الله..


أسئلة البدايه مدرجه أسفل و بالتأكيييييييييد نتوقع المذيد من بقية البورداب..



• الإسم الرباعي كاملاً
• الميلاد و النشأهـ
• السيره الذاتيه الأكاديميه و العمليه
• علاقتي بالحصاحيصا
• ما أحبه في الحصاحيصا
• ما أكرهه أو أنتقده في الحصاحيصا
• هؤلاء هم أصحابي..؟؟؟
• هؤلاء هم أعدائي..؟؟؟
• علاقتي بالدين و الإنشاد الديني و المتصوفه..
• علاقتي بالسياسه و الرياضه و الفن..
• متي أفرح حد البكاء؟؟
• متي أحزن حد الرثاء؟؟
• أسئله توقعتها و لم أجدها هي...؟؟؟ و أجوبتها هي...؟؟؟
• شكراً لكم علي حسن إستضافتي.. أقترح لكم ضيفاً أخر هو .... أو أترك لكم المجال لإقتراح ضيف أخر..
و دمتم..
________________________________________

كل يوم اشوف البوست ده والاحظ انو فائزة السيد ما دخلت
وقالت الكمبيوتر الوينذر بتاعو طفش
وحسن كيشو ما مديها فرصة لازم يدخل المنتدى بالساعات
يلا يا فوزى ورينا واحكى لينا عن البنطون ورفاعه

زمان لما العريس مايجى ساعة العقد واحد من أولادعم العروس بيدق صدره وبعقد اها الشورى شنو؟؟؟؟

نحنا غنينا يارحمه ولسع العروس ما جات امكن ما عاجبها العريس

والله يا استاذ حسن فايزة الظاهر بتدلل علينا ولا حسن كيشو مارس الاستعلاء الذكورى وحلف طلاق ماتظهر فى اللقاء وتتكلم عن تفاصيلها الشخصية

استاذ مهدى كدى ادخل لينا بى ( يامدلل سيب دلالك ده )يمكن تعمل نتيجة ولا غش لينا حسن كيشو بـأغنية عرضة يمكن يتنازل عن موقفه

يا الجيتو الحفله بدري..
طاب ليلكم و طول إنتظاركم..
العروسه المفترضه حضرت هذا المساء و ناورت حوالي بيت العِرس و شتتت؟؟.. عليه تقرر الأتي..
# حرمان حسن وراق و عمار تلودي من الحضور لبيوت الأعراس حتي و لو كانت أفراحهم الشخصيه..!!؟؟
# مُعاودة المٌطرب مهدي بكش للغناء فوراً و ضربة البدايه من هذه الحفله، معذره البوست.. و بما أنك يافنان أكدت أنك قد تغنيت بأغاني خاصه لشعراء من الحصاحيصا، أخوك أحياناً (بتشوعر) للمدام لزوم تجديد العلاقه و كدهـ.. فهل تتقبل مني إحدي (متشوعراتي)؟؟ أقصد أشعاري..
# الأخت رحمه أتت معها دلوكه لزوم الزفه و رقيص العروس و الحسناوات الجالسات و كدهـ، فهل تقبل منا أن نعيد لها ذكري ذلك اليوم حين زفافها و تجلس هي علي كرسي العروسه و يا حبذا لو أتت لنا بزوجها الكريم أيضاً و إستضافوا بعضهم البعض علي هذا البوست..؟؟ فهل تفعلينها مشكوره أختي..؟؟
و لا زال النداء لكل بنات حواء للحضور و لو متأخرات..
و دمتم..

ليه يا الرشيد ياخى
انا اخوك الصغير وقطر العرس ما فات منى لسه
مازى صاحبك ابو طاقية حمراء

ازيكم جميعا اول حاجه كان عندنا مشكله فى الجهاز حتى الخميس وبعدها سافرت الحصاحيصا

وحضرت السبت المساء ودخلت الحفله ورغم سعادتى بوجود الرشيد والمخضرم مهدى والوزيره رحمه

لكن بدل مافى الواجهه القى ناس ايمو وايناس وهنويه وبت امها وتلودى وصفوان ومحمد على لقيت

حسسسسسسسسسسسسسسسسسسسسسسسسن وراق قلت احسن اجى بكره وهسع دخلت انفخ المايكرفون

وطبعا الحفله لازم تكون مسائيه وادو وراق فاليوم .

الاستاذة فايزة منتظرين ....
بس المسا ... مابتلقى زول فى الاجتماعية ...
كلهم ... بكونوا فى الرياضية ...
الا يلخبتوا ليك الانضباط !!!!!

الاخت فائزه والله موضوعك ده الجميع منتظر
وطول شديد بقي زي تصليح ورصف شوارع
الحصاحيصا ...........

[quote="راشد محمد الجاك"]الاستاذة فايزة منتظرين ....
بس المسا ... مابتلقى زول فى الاجتماعية ...
كلهم ... بكونوا فى الرياضية ...
الا يلخبتوا ليك الانضباط !!!!![/خلاص الكوره خلصت والهلاال طار الله ارحمه واغفر ليه .........ويالله نبدا الحفل الساهر وانا ببدا ليكم اول اغنيه .....انا تاني ما بندم عليك اصلو الندم بجيب شنو.....لمتين انا بترجي فيك والذي كان رادك منو......................................

نحن كاسرين ركبه ومنتظرين الحفله

وراق ده ياخد فاليوم
وحسن كيشو ياخد شنو
فى تقديرى الفاليوم ما بيعمل ليهو حاجه

في حفله ولانمشي ونجي

الاسم الاول:-انسان يدين بالولاء للحقيقه يرفض ان يزج به فى صراع بين احمد وجون باسم الدين

اقرب الناس اليه هم اقربهم لحق الاخرين فى:-


الحياة

الحرية


الديمقراطيه

الاسم الثانى :- فوزيه محمد السيد محمد النصرى

الميلاد :- قنطرة ود السعيد والتى حرف اسمها لود السيد تبعد 2كيلو جنوب اركويت يعنى غرب الكنار فى 17/10/1956
والدى هو محمد السيد محمد النصرى وكما يحلو لمحبى العنصره بالحصاحيصا ود السيد الشايقى

ينحدر من البيديريه الدهمشيه(والله اعلم)جاء الى الجزيره بعد ان تمرد على شيخ الخلوه وهو يافع وحط رحاله بسنار ليعمل عاملا بالخزان فى بداياته وحتى وصل مقاول .لم يخط حرفا فى كتاب لكنه تعلم الانجليزيه مخاطبة ومن سنار الى خزان جبل اوليا ء لينتهى به المطاف ملاحظا بمشروع الجزيره والتى تنقل فى قناطرها والتى كانت ودالسيد اخرها حيث جاء الى مدينة الحصاحيصا معاشيا.

اخيرا دخلت حواء البرنامج كده الحكاية بقت مشجعة لانها بقت عادلة يلا يست فايزة فى انتظارك حتى نواصل

الاسم المتداول:- فايزه السيد وحقيقى ماعارفه سر تحويل ابوى لاسمى من فوزيه لفايزه ورغم انه عندنا تكرار اسماء كثيره فى الاسره


ماسمانى عليهم لكن ربما تكون فايزه واحده فى الخاطر.

وقالو فوزيه اللى سمونى عليها هى فوزيه صالح عبيد( طبيبه )وعمها عوض الريح عبيد ترزى كان فى الحصاحيصا وساكنين مع ناس تلودى.

وفى مرحلة الطفوله كان حولى القنطره مكونه من 3 صفوف كل صف 3 بيوت والترعه والكنار وقطيه التلفون ويوجد كبرى على الكنار يقع شرقه خط السكه حديد وبيت كبار الموظفين المفتش والمهندس.
وكنت دايمة الحركة بين شرق الكنار والقنطره وكان مصطفى السيد لديه دكان وهو كنتين صغير متاخم السكه حديد وطبعا القنطره كانت سنده(وسنده يعنى القطر بقيف فيها دقايق قليله)وصول القطر العصر للقنطره هو الحفل الذى نرتدى له المختلف لنلوح حتى تنتهى الدقايق ونرجع وكأن الدنيا بايدينا ونترقب لغد جديد.الارض كان يفلحها اهل اربجى والضقاله وكنت دايمة الاصرار لركوب الحمار مع المزارعين .وكذلك حمار بايع العيش الذى يتدلى العيش فى حماره على صندوقين كل واحد على جنب.ومن الاشياء التى كنت اتمرد فيها ان يتم ارسالى للمنزل من الدكان حين حضور القطار .اوحين ملاحقة المزارعين.ومن الاشياء التى اذكرها انى كنت اصر ان ازرع باله كان مصطفى وعثمان يغرسونها فى الارض ويعتلوها واحس انها لعبه وهى (السلوكه)
وكان دورى ان اضع التيراب الذى يكون نصفه خارج التربه ويكون نصيبى فى الاخر الجلد.ومن الاشياء التى مازالت فى ذاكرتى فى يوم حضر للدكان واحد بعجله يقال ان اسمه مجوك وكعادتى طلبت منه ان اذهب معه الى حيث لاادرى المهم اركب هذه الدراجه التى كان عثمان ومصطفى يحرموننى من الركوب معهم وفعلا ذهبت الى مكان ماذكره ان هنالك اناس جالسون على بنابر وعددكبير وقبل ان يجلسنى مضيفى لحق بى مصطفى واوقعنى ضربا
وعندما كبرت عرفت ان تلك البقعه تدعى كجنت وهى مكان لعمل الخمور البلديه.

استاذ الرشيد آسفة على الردمتأخر بس كنت مشغولة مع بناتى شوية عموما حضر الماء فبطل التيمم ولكن أعدك أن تكون الضيفة القادمة هى أنا بإذن الله .. دمتم

يا رحمة نحن فى انتظار الرحمة مع تحياتى لعصافيرك ولبنت اختى يلا ادخلى عشان نعرف

فايزه .. السيد .. الجيره والملح والملاح ..
مرحب بيك وبالحكى الجميل ...
امريقنا من ودالسيد .. وتعالى لينا فى الحصاحيصا بسراع ... عشان فى حاجات كتيره راجينك بيها ...

وفى عام 61 تم ادخال علويه بت عمى المدرسه من سنه ثانيه لانه سنها تجاوزت سن المدرسه ومصطفى وعثمان اجتهدوا معاها فى فتره وجيزه ولانه مافى زول قريب لى فى السن اتعلمت معاها ودخلت برضو ثانيه قالو اول امتحان هى جات الاولى وانا ال11 لكن كنت مقتنعه انى احسن وكانت السنه الوحيده القضيناها فى مدرسه ودسلفاب ومنها رحلنا الحصاحيصا وكنا طبعا معجبين ببت المفتش والمهندس لانه على الاقل بجيبوهم بعربات خاصه وكنا بنشوف قمه رغبتنا فى الحياه ناكل عسل ذى بنات المفتش وانا كنت بعمل مظاهره واجدع القروش واطالب بالعسل وطبعا بكون نهايتى جلده.وفى مره اتاخرت العربيه ومشينا برجولنا وكانو القاده ناس علويه دخلونا مزرعه واحد وقال لينا حاسلمكم البوليس وطبعا حتى الوقت داك ما كنت شفت بوليس ومافى حساباتى اانه اجى يوم اكون البوليس فى كل البيوت .وجينا الحصاحيصا 62 واول ضربه كانت بالنسبه لى انه الناظره (الاستاذه الجليله السره عبيد رحمها الله)
رفضت قبولى الا من سنه اولى والظاهر انه فى سابق معرفه بين والدتى والمرحومه شمه والده بكرى وشقيقة استاذه السره استخدمت هذه العلاقه فى ابقائى بالسنه الثانيه وتحول الرغم من ال11 للاول ومن الناس البتذكرهم فى الشرقيه بثينه الزين الحبيب ومحاسن بله .ومن الشرقيه وهى المرحله الوحيده لى بالحصاحيصا الى رفاعه الوسطى وفيها تم تغيير السلم التعليمى ثم الثانوى العام والعالى ايضا برفاعه وكان فيها عددمحدود من الحصاحيصا ومن دفعتى كان فتحيه محمد طه ونجوى ابراهيم احمد.وكانت فى البدايه ايام صعبه لصغر سننا ثم تعودنا على حياه الداخليه وكنا نجى الحصاحيصا كل 15 يوم وبموجب بطاقه يتم ابرازها عند مايزورنا اهلنا او لاستلامنا للطلوع(كما كنا نسميه)واذكر انه لما نجى الحصاحيصا نلقى الطلبه فى البنطون لانتظاز القادمات من رفاعه
طبعا بذكر اولاد الحله الجديده وده الحى الوحيد الكنت بعرفه لكن مافيهم واحد هنا عشان نقوله لكن من الملامح هسع الظاهر حسن وراق كان منهم.
وعلى فكره فى الفتره دى انا كنت بعمل خلال الاجازه فى دكان ابوى وكان بالقرب مننا طاحونه العم عثمان حمد وكنت بحتمى بصلاح عثمان حمد لما
اجى واحد اضايقنى فى الدكان .ولو ماوجدته بلجاء للعزيز مبارك محمد احمد رحمه الله كان فى الفتره ديك مافى انفراجه فى علاقه الرجل بالمراءه وما كان ممكن الواحده تطلع باريحيه لكن الكان متوفر انه ود الجيران بحس انه بحميك.فى الفتره ديك ماكان عندى احساس بالحصاحيصا سوى حدود الحله الجديده
او قليلا امش لبثينه الزين ونجوى ابراهيم.ومن رفاعه الى الخرطوم جامعة القاهره الفرع (محاسبه) والتى تخرجت منها 79.

تعينت فى ديوان المراجع العام ياناير 80
وانتقلت الى الحصاحيصا 81 بالمجلس وحقيقى اول ما لم يعجبنى فى الحصاحيصا انى كنت مصنفه ببت ود السيد الشايقى.
واول اسبوع رسلت الرساله التاليه الى صديقتى فاطمه:-
فاطمتى انا حزينه وتصورينى عندما احزن.....
لقد سبقتنى الامال لهذه المدينه موطن اسرتى امال كانت تصل ذرورة النشوه وكنت احس انى ساحط رحالى من على ظهرى اتيت
واصطدمت بارضية الوافع الحياة هنا ضحلة...................ضحلة........
مدينة اهلها مسطحون كحدوة الحصان (اوقولى من صادفتهم حتى الان )
قمة الاهتمام هنا التناحر بين الدباسيين والشماليين ومن هو الاصل
اما المراءه جريمة يتابعون خطوها.............صوتها
وبعد هى ملاذهم الاخير.