ريحتك دمور فرير ولا بت السودان اصيل .. بوبا عيار تقيل الفصل بوبا .. عيار تقيل
2 مشترك
كاتب الموضوع
رسالة
المحبوب أحمد الأمين
موضوع: ريحتك دمور فرير ولا بت السودان اصيل .. بوبا عيار تقيل الفصل بوبا .. عيار تقيل الجمعة 27 أغسطس 2010 - 8:34
... الصغيرة شجيرة الأراك ياقمر عشرة الفي سماك شاغلة روحي وقلبي المعاك وين لقيتك لامن آباك القمر بوبا عليك تقيل
العيون الما بدمعن نامن أو صاحيات يبرقن لا بصيدن لا بعشقن سرهن في الجوف يحرقن كشفن رموشن أو غمضن كلو موت ماتقول برحمن القمر بوبا عليك تقيل
الصغيرون الما كبير الرقيبة قزازة عصير السنون براقن يشين العيون متل الفناجين مابتحش قشة تناقير مابتشيل جردل على الزير الزراب فوقا تقول حرير شتتي شبار يامضمير خلي قلوب الصبيان تطير انتي ريحتك دمور فرير ولا بت السودان اصيل القمر بوبا عليك تقيل
الجزير ام بحرا حما فيك روحي وحبي النما مابسيبا ان بقا في السما ما بخلي الناس تظلما روحي في دربك سالمة يا غرق يا جيت حازمة القمر بوبا عليك تقيل
القديما قديما الحمام الويزين في موجو عام يا مرايقة قليلة كلام وا حلاتا تقول السلام القمر بوبا عليك تقيل
الغزال الفوق في السلم المحبة تزيد الألم كل يوم اصبح لي في هم سيسبان عودك منظم شمعدان نفسك يامختم البرتكان نهدك مدردم القمر بوبا عليك تقيل
الصغيرون ام الجنا ياكريم ربي تسلما تبعد الشر من حلتا جنة للأم الولدتا الفي جبل عرفات وضعتا تسلم البطن الجابتا في ترباية حبوبتا التميرة الفي سبيطتا الصفار صابغ خضرتا معزورة امها كان دستا وا هلاكي النار شافتا معزباني انا ود حلتا القمر بوبا عليك تقيل
الدفيفيق الدابو ني البسيمتو بتكويني كي اهلو ضنو عليها وعلي حبها النساني والدي ما بخليك ان بقيت حي يا قصيبة السكر الني نهدك الما رضع جني ووب على امك ووبين علي القمر بوبا عليك تقيل
الديوان الديمة مقشوش بالزهور والورد معروش بالحرير الأصلي مفروش ريحتو مايقوما بلا رتوش كان دا وصفو ماهو مغشوش قدروا الساكنينو في الحوش القمر بوبا عليك تقيل
بحر الدمير العبا ونزل مرة يسقي الفل والنخل فيهو عام وزينا وقدل ياهنينة البيك عقلي انشغل بعت روحي عشان ليك اصل وانت ابعد لي من زحل يا قمر بوبا عليك تقيل
المبارك شيخ الضهر العليك ساسكت وفتر قلي جنيت ولا دستر واي أنا المرضان مكنتر جابو لي حكيم خير وشر قالي يا زول مرضك كتر سببك كم شلاخا خضر القمر بوبا عليك تقيل
إسماعيل حسن رحمة الله عليه رائد الشعر الغنائي عندنا وبلا منازع فقد أثرى الوجدان بفيض من الكلام الشجي الدافي الحنين وبالإضافة لعبقرية محمد عثمان وردي في تخليد روائع إسماعيل حسن إلا ان الكلمات نفسها كانت قريبة من الناس وبما يفوق التصاوير وبالتالي لم يجدوا صعوبة في إستيعابـها وحفظـها في أقاصي سويداء القلوب فكُتِب لشعره الخلود خلود "الدمور فرير ، وبت السودان أصيل" فهل سيظل السودان كما هو أصيلاً أم ستنتاشه أسهم الغدر وينفطر وجدانه السليم المترع بالجمال والحب وجدان شكله عباقرة في كل شي ويسعى لتفتيته أُناس يفتقدون كل شي على إطلاقـها ومقابل شنو ؟؟ المشروع الحضاري ؟؟ الذي أصبح هو ومشروع سندس الزراعي سيان ؟؟ على كل حال ربنا يحفظ أهل هذا البلد من بأس الذين حلوا به ويسرعون الخُطى لتقسيمه لا هماهم والد ولا ولد وجعلوا عيشة أهله في كبد لا طعام في يوم مسغبة ولا كفالة يتيم ذا مقربة أو مسكين ذا متربة فلم يجعل الله لهم عينين فعميت أبصارهم وبصائرهم وحرمهم من النعمتين فتواصوا بالغدر وتواصوا بالحرمنة فكفروا بآيات الله وهم أصحاب المشأمة عليهم نار مؤصدة
Badr Abbas
موضوع: رد: ريحتك دمور فرير ولا بت السودان اصيل .. بوبا عيار تقيل الفصل بوبا .. عيار تقيل الجمعة 27 أغسطس 2010 - 10:37
المحبوب أخوى رمضان كريم عليك ودعائك لله سبخانه وتعالى فى منتصف رمضان ويوم الجمعة هذا الموافق 17 من رمضان وانا صائما ومتوضئ ومتحرك الى صلاة الجمغة أسالك كما سالك عيدك ابن امتك المحبوب ان تستجيب لدعوته وان تفرح قلوبنا وان تزيل هذا الهم والغم وان ترينا فيهم قدرتك امييييييييييييين يا رب العالمين. تخريمة:- (ووب على امك ووبين علي) دى يا المحبوب على وزن مشيتك ذى الكديس فى الرملة والعجب أمك . تحياتى دوما
ريحتك دمور فرير ولا بت السودان اصيل .. بوبا عيار تقيل الفصل بوبا .. عيار تقيل
موضوع: ريحتك دمور فرير ولا بت السودان اصيل .. بوبا عيار تقيل الفصل بوبا .. عيار تقيل 
الجمعة 27 أغسطس 2010 - 8:34
