مقبرة تحتوي على "25 جثة" بالشمالية والوالي فتحي خليل قال لا جثة واحدة بس!!

جماعة كانوا بفتشوا على الذهب في منطقة دمبو العقب غرب ارقو بالولاية الشمالية
وبدل الذهب لقوا ليهم مقبرة جماعية تضم خمسا وعشرين جثة
تبينوا الجثث وإكتشفوا انها لرجال ذوي سحنات سوداء
وانهم كانوا كان يرتدون ملابس مدنية ملطخة بالدماء وتبدو عليهم اثار اطلاق نار
وان الجثث كانت مرصوصة على صفين في حفرة على شكل غرفة
الغرفة مساحتها اربعة امتار مربعة بعمق ثلاثة امتار تمت تغطيتها ببلوك من الاسمنت
ناس راديو دبنقا المنسوب ليهم الخبر وسمعوا الشهود إتصلوا بفتحي خليل والي الولاية الشمالية
لكن فتحي خليل قال ليهم ياخي دي جثة واحدة بس ما تسمعوا كلام المطرطشين ديل

حاجة غريبة 25 جثة وفي غرفة داخل الأرض أكيد ديل ما ناس أرقو
لانو ناس ارقو بعرفو شنو الموت وحرمة الموت وكرامة الانسان ميت وحي
وبعرفو كويس جدا كيف يسترو موتاهم بعدما يغسلوهم ويحنطوهم ويكفنوهم ويشيعوهم
بعدين العندو مروءة منو يحفر ليهو غرفة تحت الارض ويرص فيها بلوكات كمان
ومدفونين بملابس ملطخة بالدماء ومرصوصين صفوف ومرصصين بالجبخانه

غايتو يا فتحي خليل شيل شيلتك لو كلام الجثث دا طلع صحيح
في ناس كتار عندهم ناس مفقودين من بداية الفتوحات الدموية
زرافات ووحدانا وأكيد أهلهم أصبحوا في أرقوا عشان يتأكدوا

المصدر

((عثرت مجموعة من الباحثين عن الذهب في منطقة دمبو العقب غرب ارقو بالولاية الشمالية على مقبرة جماعية تضم خمسا وعشرين جثة لرجال ذوي سحنات سوداء مدفونه في فيما يشبه الغرفة مدفونة تحت الارض ، وقال شهود لراديو دبنقا من الباحثين عن الذهب ان الموتى كان يرتدون ملابس مدنية ملطخة بالدماء وتبدو عليهم اثار اطلاق نار .

واوضح الشهود ان الجثث كانت مرصوصة على صفين في حفرة على شكل غرفة مساحتها اربعة امتار مربعة بعمق ثلاثة امتار تمت تغطيتها ببلوك من الاسمنت ،واشار الشهود الى ظهور طائرة هلكوبتر حامت فوقهم لحظة عثورهم على تلك المقبرة وان قوة مشتركة من الامن والشرطة قد حضرت الموقع فور علمها بالخبر وامرت الحاضرين بالانصراف وعدم الاقتراب وضربت طوقا امنيا كثيفا علي المكان .

ومن جهته نفى بشدة فتحي خليل والي الولاية الشمالية لراديو دبنقا العثور على مقبرة جماعية في تلك المنطقة، وقال ان ماعثر عليه في تلك المنطقة هو جثة لشخص واحدة فقط عثر عليها المنقبون عن الذهب واوضح ان الشرطة حققت وتقصت في الامر.

ومن جهته قال الدكتور عبدالباقي الجيلاني وزير التعدين الاتحادي انه لا يملك اي معلومات حول هذا الموضع وانه سمع بهذا الامر لاول مرة من راديو دبنقا .)) الراكوبة /راديو دبنقا

الصور من سودانيزاولاين

الوالي فتحي خليل كذب العدد بتاع الجثث
ولكنه نسى تكذيب الغرفة المعمولة بالمسلح فهل دي لشخص واحد فقط
ولو صح زعم سيد فتحي فدي ما بتكون مقبرة خمسة نجوم ولا شنــــــــــــــــــــــــو
طيب الجثة الواحدة بس دي ملطخة بالدماء وعليها آثار أعيرة نارية "رصاص" ولا دا برضو دا كلام ساي

يا محبوبى الساى قصد عنادى ويا العاطف ود اسماعين عندى سؤال برئ !!
انتو 25 جثة دى محسوبة مع 30 مليون جثة فى السودان ؟
أفيدووووونا افادكم الذى يمهل ولا يهمل

الإخوة الأفاضل عاطف وبدر لكما التحية وتمام التقدير
وزي ما حا نشوف الحفر بدأت تتفتح وكأن الجثث من باطن الأرض تنادي
ياخي دا بؤس ما حصل تخيل برودة الدم ويجيك زي فتحي خليل يقول جثة واحدة بس
طيب يا حضرة الوالي جثة واحدة مالا دافننها في غير مقابر المنطقة المعروفة والاسمنت لزومو شنو
نتمنى أن تتوالى المطالب بالتحقيق في الأمر والناس ما تسكت على هذه البشاعة والفظاظه ويمهل ولا يهمل

(( ...........ومن جهته نفى بشدة فتحي خليل والي الولاية الشمالية لراديو دبنقا العثور على مقبرة جماعية في تلك المنطقة، وقال ان ماعثر عليه في تلك المنطقة هو جثة لشخص واحدة فقط عثر عليها المنقبون عن الذهب واوضح ان الشرطة حققت وتقصت في الامر......))

نصدق فتحي خليل الوالي
ولا كلام حكومة الوالي
ياخي عيب ديل أموات الله لا غزا فيكم بركة

1999- 960 = 1039 سنة
ناس ميتين ليهم 1039 سنة طيب الملابس الملطخة بالدم والاجساد العليها رصاص دي شنو

الله اكون في عونك يا سودان اقصد شمال السودان

المحبوب أحمد الأمين كتب:

((الخرطوم -الصحافة: جددت حكومة الولاية الشمالية نفيها تقارير عن وجود مقابر جماعية بمنطقة دمبو الحفير شمال دنقلا وغرب أرقو، وقالت إن المقبرة المعنية ضريح قساوسة لكنيسة نوبية.

وقال الباحث في التراث السوداني ومشرف موقع كرمة الأثري فريد محمد أحمد لشبكة «الشروق»، إن المقابر المقصودة هي مقابر كنيسة نوبية، حيث تعد كضرائح لقساوسة نوبيين وترجع إلى العصر المسيحي النوبي إلى عام 960م، واكتشفت إبان فيضانات 1999م التي غمرت المنطقة بأحد منازل المواطنين والمقبرة بها خمسة أفراد، مشيرا إلى أن هنالك أكثر من 800 موقع شبيه بالولاية)).

كلام عجيب والله
الان عرف الشعب السوداني مقابر الموتمر اللاوطني الجهوي.....
لا مجال لشك هولاء هم شهداء الزراع الطويل....
وهولاء هم الذين انكرهم النظام الفاشي اليوم تبادل الاسري,,,,
ومازال البقية مفقودون,,,,
حسبي الله ونعم الوكيل من اصحاب مشروع المثلث حمدي
وسوف يظهر كلهم ان طال الزمن او قصر وسوف يتحملون وزرهم .
لماذا لم يتريس الوالي الكذاب قليلا لكي يرتبو امورهم ويصدرون تصريحا موحدا ..؟.
وزير ينفي الخبر جملة وتفصيلا واخر يقول انهم فراعنة( يعني علي الاقل عشرة الف سنة ) واخر يقول انهم قساوسة عصر المسيحي..وما زال عليهم اثر ضرب ودماءهم باينة واخر يقول جثة شخص مجهول في الصحراء.. وما زال مسلسل النفاق ..هل الشعب السوداني غبي و السازج بهذه الدرجة؟؟؟