يا هنداوي شوف

حبيب الشعب هنداوي
وحبيبة الجماهير نجوى البحاري
وأحبابنا أحمد وأمجد هنداوي

طبعاً لي أكثر من إسبوع قاشر ومشنط على سنجة عشرة بعد أن تم منحي بطاقة عضوية الحصاحيصا دوت كوم ، البنطلون الأسود الماخمج مقاس 36 والقميص الأكس إل والقاش المصنوع من جلد النمر الفاخر خصيصاً لعمار بوتيك لصاحبه عمر حسن عبد اللطيف هع ،، البوتيك هناك جمب دكان عمنا ميرغني الطيب ،، باقي نحن ما بنشتري من الفراشة والطبالي !! يا عمار بوتيك أو طه عبد الباقي ،، ودا كلو بروفه خفيفة للقادم من رحم معاناة وكبد " بفتح الباء" نهارات رمضان العظيم لانو المرة دي جاينا العيد ونحن في حالة نفسية طيبة وكمان معانا العضوية ،، أمشو وأني بنجو مع العفش ،، ووحياتك قلت هنداوي ما دام ما بارك لينا العضوية أكيد حا يجينا في العيد ،،

باقي إستعدينا لعيد رمضان دا بالذات قلنا الناس بتسمع بالعضوية وبجو للمباركة أهو كلو مبروك ،، وقبل كام يوم من العيد "فضلت خيرك" جيرنا البيت " جير أصفر " باقي مشيت السوق ولقيت ليك أكياسو بألوان بيكاسو مردومة قدام دكان ناس عباس عثمان ،، الجمب شركة بتاتة ،، تذكرا ؟؟ أصلوا هاودونا شوية في السعر ،، والله نفس الجير بخيشو اللخشن دا لقيناهو عن ناس عمك بشير رحمة الله لكن جير ناس عباس عثمان لونو شوية فاقع ومن شدة سماحتو تعاين فيه وتضحك وتمشي وتجيهو راجع.

المهم يازول ربنا ريحنا من حكاية الهبود ،، اليوم كلو الشفع حايمين يجمعوا في الهبود وما باقي ليهم إلا كانون ياوندي ،، يازول جبنا الجير وعطناه في موية ناصصت البرميل ومن شدة سمحاتو ولضتو مجرد ما دخل الموية زبدو قام زي البقاق ،، وعطنا معاه الفرشة أليلة الجير باقي راقدة ناشفة في المخزن من عمن أول ما في زول طراها ولمن جابوها تحلف تقول " مضروبة ملاريا" منفشة ومكودبة وغبشا ورويحتا مارقة،، وقالو داك الليلة فرشة لي ناس ود صالح مرقوها يوم التيسوعة للعيد الشافع هبشا فد هبشه السريحة اكانت توديه دار الآخرة ،،

بعدين نحن زاتو برميل الجير دا لمينا فيه بي ساهلة ولا بي أخوي وأخوك ؟؟ ما بي شق الأنفس والثمرات ،، وانت عارف براميل الجير دي في عيد رمضان عندنا زي السكاكين في عيد الضحية يعني كان ما حجزتها من بدري " زي الساوند " والله الجير إلا تسفو ،، والعجب السلم ،، أها دا قصتو عجيبة خلاس ،، حائم اليوم كلو من بيت لبيت زي كلب الرماضة ،، وكان ما سيقانو الله خلاهن من حطب غلاد كان زمان لحق أمات طه ،، وما بتتخيل فرحتنا بيه كانت قدر شنو !! البيت كلو قعد ينطط ،، الشفع تركو حصين الطين واقفة تحت ضل النيمة تتشهق زي ما قال عاطف خيري ،، وتتخيل رمو الشايلاهو ايدم وجو مسيرين السلم ،، والإبتسمات زينت خشوم الصائمين التواقة لجغمة موية الفطور لليوم الطال نهارو دا،،

ومع إنو السلم زاتو جابوه مربط بدلاقين الدنيا والعالمين والله حالتو تحنن الكافر عدو محمد ،، وعشان كانت الدنيا صيام والشمس جادت علينا في اليوم داك بما لا تتخيل "أشعة وحرارة" أو كما قال حشفاً وسوء كيلة ،، عشان دا كلو وكسباً لعامل الزمن الجميل حرصنا حرص تام على تلوين الأزيار بلون الحيمور القاني ولك أن تتخيل لونها البزيد من عذوبتها في صباح العيد والواحد منا مترع " إن شاء الله " بسمن النعيمية وحلاوة الشعيرية والسكسكانية "نتمطق شوية" وطبعاً ما نسينا نزيل البقع السوداء الموجودة على مسافات متباعدة أسفل الحيط من آثار نيران قوات عواسة الآبري الصديقة.

ويا هنداوي ماك طالبني حليفة ،، أصبح علينا العيد بعد ما روح البيت بلغت بيوت الخرطوم ،، وأقول ليك فاصل ونواصل ،،

حسن وراق
لك التحايا والود

أول حاجة بشكرك على المرور ، وبثمن على مشاركتك القرن أوسطية ، والتي يمكن تصنيفها في اطار الفزلكة التاريخية ، وبصراحة كلامك دا ببور لينا جيرنا دا ساكت ، واللهم باعد بيننا وبين المحن.

تاني حاجة ، أنا ما إتبوبرت وإتفشرت " قشرت " بي بيت حبوبتي أم حبوبة والدة الجراد ، والبيت البتتكلم عنو دا ما دايرلو جير لا من عباس عثمان ولا من بشير رحمة الله ، ووالله نحن لو بيتنا بمواصفاتك القرن أوسطية دي كان هديناه أو هديناه لناس إدارة الفلكلور والتراث الشعبي بوزارة الثقافة والإعلام.

تالت حاجة ،، " حنقوق ، وتفتا ، وأزرق نيلة ، وحُق ، وفلنكوت وتميمة " إنت الكلام دا بتجيبو من وين ؟؟ عالم بيئة !! عليك الله خلينا نواصل في إغراء أخونا هنداوي عشان يغشانا ويبارك لينا العيد والعضوية.

وعلى فكرة ، هنداوي ما براه ، والله أنا التارقِت بتاعي ناس كتار منهم على سبيل المثال لا الحصر " الرشيد حبيب الله ، وفضل الله سيد فضل الله ، والجاهوري وفائزة السيد ، ومبارك ربو ، وعبد الوهاب أحمد صالح ، وحسن علي حسن وكمال حسن الجمل وهلمجرا ، عليك الله مش بستاهلو يجيرو ليهم البيت ، ويشنقلو ليهم العتود في نص الحوش ؟!

عدت ليك يا هنداوي والعود أحمد ،، وأبدأ من حيث إنتهيت ، وكما ذكرت ليك قبيل أصبح علينا العيد بعد ما روح البيت بلغت بيوت الخرطوم ،، رائحة قطن المراتب الجديدة عبقت المكان وما أبالغ لو قلت ليك إنت داخل علينا لولا الغرف المنتصبة في الحوش بألوانها الترابية لتخيلت إنك في فناء محالج الحصاحيصا ، سيان إن كنت في نمرة "8" أو ماربليس ، وبيني وبينك أصلو نجدناها بعد حصولنا على شوال كِبس " بكسر الكاف" إشتريناه من واحد شغال في المحالج ،، إعتاد على عرض القطن البتوزعو إدارة المحالج للعاملين عشان يرقعو بيه الميزانية.

وبالمناسبة سعر الشوال لم يشمل سعر الترحيل يعني البيع " اكس ورك" ، المبايعة تمت في السوق بالقرب من الجزارة بجانب صيدلية عبد الكريم علي موسى ، وكسباً للزمن فقد يممت وجهي شطر الكمبو كداري مباشرة من ذلك المكان ، وبالقرب من الناحية الشمالية الشرقية لدار الرياضة ، وقبل ما أعبر الخور " فاصل جغرافي يفصل بين الكمبو ودار الرياضة " وبالضبط بالقرب من العامودين بتاعات النور الهناك ديلك " أحدهم واقفاً والثاني منحني بفعل عوامل التعرية " إستوقفت أحد القادمين من جهة الكمبو ليدلني على البيت "مكان التسليم" وقام بالواجب ايما قيام ودلاني على المنزل بكامل اوصافه ، وإنطلقت إلى هناك مسابقاً الزمن قبل اشللة ما تحر علينا ونبقى بعد داك في فرضيات القضا والكفارة ، وبحمد الله وصلت إلى هناك ووجدت الشوال مسجياً على حوش البيت الضيق الرحيب ، وبقدرة قادر وبمساعدة البائع الكريم رفعنا الشوال بالحيطة ودردقناه لمن وصلنا الشارع الرئيسي ، أها بعداك بالكارو حتى الصداقة.

وللدمورية بتاعة المراتب قصة طويلة وعريضة ،، إت قايلا دمورية كشا مشى ،، والله ناس مصنع الصداقة ادوني ليها بتوصية خاصة بعد ما جودت اشللة كلها ، لكن ، الحمد لله اتوفقت ولقيت لي طاقة كفت ووفت وطلعن مراتب تمام ، الحلة كلها اتعجبت فيها وفي سماحتا ،، يا هنداوي هي مراتب نصاح ،، الدمورية من مصنع الصداقة " فرمالتنا " ،، والقطن سكلاريدس وارد ماربيليس ، والله طلعنا واحدة من المراتب في الضل تحت شجرة النيم ، المرتبة بيديك الاتنين ما تقِلها " بكسر القاف" ، ووالله يا هنداوي لمن فرشناها ووهنطناها في العناقريب وسريرين المواسير بتاعة الديوان كان ما إتشهدت ما تعاين ليها ، والعجب لمن فرشنا فيها الملايات الدبلان المزينة بأشكال الكؤؤس المطرزة " مشغولة بحرير الكوروشيه" حرير أصلي ناعم وطري وبألوان مختلفة ومؤتلفة في نفس الوقت وتمامه. وبنواصــــــــــــــــــــــــــــل ،،


تخريمة

يا هنداوي مسئول من الخير ،، عفيف إسماعيل أخبارو شنو إن شاء الله قريب ليكم بالله سلم عليه سلام شديد.

المحبوب المحبوب أحمد الامين
سلامات وعوافى وحبابك ألف وحرم البيت بيتك ...
وده زى كلام الوالد المرحوم (الجراد)له الرحمةولنا الصبر والسلوان
وأنا واحد من الناس المحظوظين لأننى محتفظ بصورة تجمعنى
مع المرحوم الجراد والاخت العزيزة زهرة الشريف وأحد الاخوين
لو ما تخوننى الذاكرة (خالد )(معاويه)__________
العزيز المحبوب ... يا سلام على ونسة القمرا وكلام أنصاص الليالى فى
صغيعطة الله والرسول وأكل باقى الحلة وملاح القرع وباقى الكسرة النصها لين ونصها ناشف
والتكويعة فى باقى كوم الرملة الليستو ا بيها بيتكم امانة ما باردة والعجب الموية الكابنها
فى الصينية عشان تبرد .....والتحلية الجاية بعد العشا ما هى الشعيرية بالسمن البلدى وشاى اللبن المغنن( بكسر الميم وفتح الغين)أنت فى ده ولا الفانوس البقة وهمد .......
والله يا المحبوب سررت جدا بدخولك حوش الحصاحيصا العامر بأهلة بلا حدود
وكتر الله خير بكرى ودحمد ود ناس الطاحونة ده على حسب وصف أهلى ناس الضقالة
وكنت فى الخاطر عشان اكتب ترحيب بس انت فتحته موضوع سمح وعاتبتنى بطريقة سمحة تب عشان كدة قلت دحين يا زول اللستاذ ده كاتب كتابتا زينة نخليهو يورينا نوعية الالفاظ حقة المحامين ديل لكن لقيتك عليك امان الله ياكه الجراد زاتو بحق وحقيقة بس فاقد عكازك وتشخط فى اشلله .....بس ما تقول لى اكلنا فتة ... وجايى ليك وذكريات تمبول ....ومخدات القش ......والباقى لى قدام

الاحباء
المحبوب
هنداوى
وراق

سلامات عوافى

ياخى والله ده احلى لمة ومعنويات فى القمه , بس ياهنداوى انتا قلت عندك صوره قديمة جدا عاوز تضيفا لملف التزوير ( ولسع مانزلت ) حقو تنتهز فرصة وجود الحبيب والزميل العزيز المحبوب وتمل معاهو ( كونسلت) وتنزل الصوره
بعدين يامحبوب 36 كيف نحنا خلينا الشغله دى كانت 46 ( نفست ولا شنو )
وراق عاوزين من العيار التقيل ( اديلووووا)

[color=darkblue][font=Arial Black]

ياهنداوي ياخي مرورك دا والله بقى لي زفة المولد ، مبهج "تماماً " ، مُبهج بطول مسافات البعاد الماعرفنا تاريخ نـهايتو ،، كأنما كُتب علينا أن نمشي في الدرب البتطابق فيه الخطوات مع صوت الحوافر على قول عاطف خيري في لحظة شهقته تلك ، أتمنى أن يقرب الله المسافات بنفس درجة قرب وجداننا وإحساسنا تجاه وطن حبيب يسكن بين ضلوعنا ويتمدد في أفئدتنا (( اليومين ديل الناس متلمين في جوبا وجماعتك في الخرطوم يرددوا يا جوبا مالك علي أناااااا يا جوبا شلت عينيا أناااااااااا)).

وبالتأكيد لم يفت عليك أن تشكر الأخ بكري عثمان حمد الذي أناخ لنا ظهر هذا المنتدى الطيب ربنا يديه الصحة والعافية ، ويعلم الله دي أول عضوية أنالـها في الفضاءآت والأسافير ، وبتلاحظ إني من ضربة البداية تكلمت بحرية شديدة جداً ، وقلت الفي راسي بقولو ، وتوقد نار وتصبح رماد (( بالمناسبة بالأمس تم رفع الرقابة القبلية عن الصحف في السودان )) ، أها كان لازم أفتش عليك لأني فعلاً مشتاق كتير وعايز أعرف أخبارك وأخبار بت البحاري الصنديدة نجوى ، وأحمد الله إني ما إنتظرت كتير وجاني مرورك برداً وسلاما.

بالنسبة للصورة " البتجمع بينك وبين الوالد أحمد الجراد رحمه الله " شوقتنا لرؤيتـها وأرجو أن نراها قريباً إن شاء الله ، وحا يكون بينا كلام كتير بعيداً عن البنططو لينا زي أبو الشهيق ديل " يا مبارك عثمان جاييك ".

معليش يا هنداوي سأنتهز هذه المساحة للرد على حبيبنا مبارك " شيخ " الظهر لينا فجأة دا من غير مراعاة لطبيعة الأحجام والمقاسات ، بعدين يا مبارك شنو حكاية 46 دي انت ياخوي قاصد فيضان 46 ولا شنو ؟؟ ولو مغالط في حكاية 36 دي فأمامك أخونا كمال حسن الجمل ، وما أظنك تقدر تشكك في شهادتو بما عرف عنه من عدول ، بعدين حسن وراق ظاهر عليهو مغرض وتحريشك ليه (( .....وراق عاوزين من العيار التقيل ...... اديلووووا...)) كلـها ما بتجيب ليك حاجة ، يعني ياسيدي الأمانتي ليك ، تحريشاتك دي إلا تبلـها وتشرب مويتا ، أو أقول ليك جيب ليك متر وتعال أصلو أنا طالبك جية وعدتني بيـها في حضرة أخونا عصمت النوش في رمضان القبل الفات يعني متقومة وتمت النصاب وحال عليـها الحول.[/font][/color]

الاخ المحبوب وليد الجراد
طاب معناك والبلاء ما جاك
وسعادتى بلا حدود بيك والاخ مبارك ... يا مبارك بس خلينى ارجع البلد واوريك الصور من البداية لحدود اليوم والله بلا سمكرة وبلا بهية زى ناس كده ادوها بهية ولمن تمت أسبوع البهية طارت والبرقعة ظهرت وبقى ما نافعة بهية الأطرش ولا سمكرة التيمان وعليك أمان الله الناس جروا جرى للحلاق وادوها زيروا عشان الفضيحة من الابيض البراق ما يبين ....والغريبة يا بركة اخوى كمان جابت ليها سرقة سنتمترات عرفنا الناس الغيروا الشعر وما سنتمترين أو ثلاثة يقت عشرة
وبرضوا ما رديت على يا المحبوب انتوا اكلتوا شنو ؟؟؟ ويا بركة اسأل حسن وراق من الاكلوا اخونا المحبوب فى تمبول ؟؟؟؟وسؤالك يا المحبوب عن أخونا عفيف هو بخير ويملأ الارض أبداع ...وسو ف تجد فى أحدى صفحات هذا المنتدى .....وسلام للكرام

الحبايب
محبوب وهنداوى

يامحبوب والله مشتاقيين , بعدين انتا طالبنى جيه دى صاح وانا جاييييييييك ( بس حضر لى لزوم الذى منو ) بعدين اخونا عصمت النوش ده عزومتو بتاعت مراكبيه ساكت , بعدين اذا انت بتستشهد فى حكاية 36 و46 دى بى كمال الجمل ( مقدوح فى شهادتو) انا بستشهد بى اخونا قاسم محمد صالح ( عليك الله ذكرتك شنو)
ياهنداوى
يعنى الصور دى الا ترجع البلد , طيب التكنلوجيا دى خلقوها لى شنو قول لى ..... وبالمناسبه دى اهديك
ياحليلو مارجع البلد
والعيون ماسهرن هجد
ارقدو عافيه

ورقة وبركة وهنداوي

ياهنداوي هـوي حسن وراق دا إستفزتو حكاية الجير وداير يغرق البوست ، وإلا كان في داعي لجمع المتناقضات دي ، يعني يا هنداوي ممكن تصدق إني أفطر بي فول عليه بصل وأشق سوق السمك ، أنا ملي أعمى من صاجات السمك "الموهطة في الدانقيل " تجقجق النهار كلو لا بتكل ولا بتمل ، زمن ناس عمك عبد الرحيم وضرار والتنقور ، ومن شدة قوة الميكانزم بتاعها والله يوم واحد مافي زول شافها يغيرو ليـها في زيت ، اسي كان من صاجات الزمن دا كان تلقاها كل يومين تلاتة مشبحة يغيرو ليها في الزيت.

بالمناسبة أولاد ضرار ديل كان عندهم واحد " الله يطراه الله بالخير" من مرتادي مسطبة ناس الهلال في دار الرياضة ، وفي واحدة من ملاحم الهلال والمريخ الكان فيـها المريخ متقدم بـهدفين لواحد ، والكورة خلاص قاربت النهاية ، والناس كلـها واقفة تشيل في الفاتحة ، إلتفت عمر فضل الله مزهواً بالإنتصار الوشيك علي ناس الهلال ، ولكنه لاحظ بأن ود عمك ضرار " كان جالس وسط ناس عمك ألبع وحسين الصراف وبابكر ابن عوف واسماعيل" بعاين ليه بحرقة وأسى قام عمر فضل الله قال ليه "" هويييييييي ياود ضرار ما تحمر لي أنا يا خوي قوم أمش حمر سمكك "".

وبالمناسبة ، وأنا قدر ما أجي " بالعربية " من المحكمة أوقف العــــــــــربية بالقرب من المكان داك ( أقصد شارع السمك ) ألقى عبد الجبار ود النيل " الله يرحمو " نائم تحت الشجرة القدام دكان الناصية البعد البلوك بتاع بلوك دكاكين السمك " متوسداً سرج حمار عمك محمود "الطـــراق" ، ومع أن ودالنيل قصير القامة إلا أن رجليه كثيراً ما كانت مصدراً لتندر ناس الجزارة القدامية ، وفي مرة لقيت باركنق بصعوبة ووقفت العربية تحت وهج الشمس ونزلت ومريت على الشجرة قلت أسأل عن بعض الأشياء " الخاصة " لقيت ودمكوار" الله يرحمو " قاعد بالقرب من ود النيل النائم تحت الشجرة ، وودمكوار كعادته زهجان وروحو كاره إلا انه لا يجد بداً من إمعان النظر في الخلق البعج بيه المكان داك ، قام قال ليه " ياخي ما تصحى ، والله يوم كورعيك ديل يعترن ليهن لواحدة من ستات التسالي الحايمات زي أبو الدقيق ديل يودنـها في داهية".

نرجع لي موضوعنا ويا هنداوي ،، أبداً ما دايرنك تلتفـــــــــــــــــــــت للمغرضين ، بعدين شنو حكاية المضاف والمضاف إليه دي ؟؟ والله قريتا كم مرة حتى فهمت ،، أصلو العربي بتاعنا بقى شوية مكسر بعد ما دخلت عليه اللغات الشرق آسيوية ، مالنا ، ومافي معلوم ، وفي كثير من الأوقات بندخل في حتات صعبة وكلو بسبب الناس البتضيف ساكت دي وبتضيف في شنو ما معلوم .

ولينا عودة

للحلاق وادوها زيروا عشان الفضيحة من الابيض البراق ما يبين
..........
هههههههه

جميل ياهنداوى كده وضحت وضوح الشمس
بس الكوره فى ملعب وراق وعاوزين نعرف استاذنا المحبوب اكل شنو فى تمبول

الله يجازى محنكم ... والله الزول مزنوق .. زنقه امها بت عم ابوها ...
كما استفزانى الرشيد بالقبليه .. هاهو المحبوب ينيخ جملى ويجعلنى احط رحالى قرب هذا الابداع الذى يجعل العيون تتسابق مع العقول لتدرك ابداع الكلمه... كم بديع هذا الحوار .. الدرامى .. اللغوى . حوار .. يكشف عن ابداع هنداوى ..مكشوف .. مستور .. وملكه المحبوب فى التحبيك .. والذى منه ... ونار وراقيه هادئه تسبك المضمون ...
جاييكم راجع

حبو
ابوعلى
بركة
بكرى ود ناس الطاحونة
سلام ومحبة ..اخونا بركة المحبوب شكلو نسى الأكلو شنو فى تمبول لكن خليها مع السرد وبالترتيب .....
ابو على شكلك الفرح عندك زايد والعنب حلو وكبار !!!!!ويا حلات الجلابية البيضة ومكوية وريحة الكلونيا التلات خمسات والعجب الخضيرة الكانت سدادة الحوجات وحليل زمن التوصيلات والحفرة الحفرة وبت السفير والربوطية .....ويا شباب الربوطية دى ليها حكاية ...فى مرة وابو على يأخد الاجر من الله وهو موصلى من حى كريمة للضقالة وتقريبا فى جوار ورشة الطرق اذ بزول يأشر وهو فى حالة هلع وقبال ما العربية تقيف زولكم يفتح الباب ويدخل العربية ... حسن بادر وسأله مالك يا زول؟ الراجل بخوف شديد انا ماشى أربجى وخايف من ناس الضقالة الربوطية ........
ويا حليل الزمن الجميل ويا بركة خلى المحبوب يوريك شن أكل فى تمبول ؟؟؟؟
والله لا كبدة أبل ولا لحمة شنو هو ادرى .......
يا ابو على نسيت ناس الصداقة زروق الناجى والاخ أزهرى محمد على (العمده) والصديق عبدالكريم عبد النور والاخ عبد الوهاب احمد صالح وابوعبيدة الماحى وطه سليمان والاستاذ معروف وما تنسى يا حسن مخازن الجاز وبعد ده صاحبك قال مقاس (36)يا بركة أفهمها ....وشوالات العيش الناشف وفتة الفول والبصل القال عفيف بطهر الطعام من السموم وعلى فكرة شوالات العيش الناشف الكان لامنها عشان ناس الجهاد ونحنا استفدنا منها فى الفتة ومخدات الطوب والناس الكانت تدور مزيقته من المغرب وحكاوى عفيف ومعروف عن شكسبير وما احلى الحكى من زول يجيد التعبير والسرد وتوصيل الحس المسرحىو ما امتع تلك الايام ...ومعروضات البطانة ....يا ورقة اسرد التفاصيل وسف اساعدك بالتذكير .....
وتانى راجع لكم كان فى العمر بقية

الأحباء الأفاضل
المبجلين
المكرمين
الأشاوس:

طبعاً ما كنت سألجأ لمخاطبتكم بـهذا الحاجات لولا تداخل ووجود أخونا بكري عثمان حمد بين ثنايا هذا البوست ، ويا بكري ما ينططوا قدامك ويقولو ليك دا كسير تلج ، يعلم الله نحن عندنا تقدير كبير جداً للتلج أفراحاً وأتراحاً ، في البكاء التلج بجي قبال العنقريب " الدوام لله " ، وفي شيلة العرس ، يحسبو ليك الحاجات الجابا العريس " والله ووالله أي حاجة جابوها إتناشر إتناشر لي درجة التلج جابوه إتناشر لوح ".

وزي في تحالف خفي في طريقه للظهور في هذا البوست ، ولن تفت على نُظم المراقبة غير القمعية لدينا كذلك أجهزة الرقابة القبلية والبعدية وما بينـهما من المتشابـهات ، " فقد تم رصد إشارات" هنداوي السالبة لإحتواء بعض أعضاء الموقع نذكر منـهم على سبيل المثال لا الحصر كل من مبارك ووراق ، أها قلت أجيبا من قاصرا وأتحالف ليـهم مع ناس والله لاهاي بالنسبة ليـهم فركة كعب ، وأقل إنحراف بالبوست عن إتجاهاته المرسومة والله السودان دا تاني إلا يخشو بي أمجاد أو ركشه.

بعدين يا جماعة الخير ، شنو حكاية الكلونيا 555 الفايحة في المنبر دي ، يا ناس نحن قلنا 36 الدنيا قامت وقعدت ، شي تلفونات وشي فاكسات ، خُطب تجي ونشرات تفوت ، لكن لحدي الآن واحد ساي قال 555 دي كتيرة مافي ، وربنا بس مقدركم على السؤال عن منو أكل شنو ، وسنناشد الأخ بكري للعمل على تعديل اللوائح الخاصة بـهذا الموقع بما يضمن عدم إستعمال الكلام الكبار كبار دا.

أها يا مبارك " علشان نكتل ليهم الدش في يدهم " أنا أكبصراحة أكلت لي فته يوم الليلة ما عرفناها فتة شنو ،، فتة في صحن ألمنيوم كبير ومطرقع كسته من علِ شقوق وأخاديد يرجع تاريخـها لأيام الاخدود الأممي العظيم ، شاحب اللون ، غشته غبرة ، تآكلت مكونات صناعته حتى يُخيل ليك بأنو مصنوع من ورق سجاير البرنجي غير الفاخر ، ترتجف أوصاله بمجرد وضعه وسط سباتة الرعب التي يؤمـها آكلي القصعة المتداعين ، سدت أغواره ومجاريه المتشابكة ترسبات لزجة تداخلت في تكوين عناصرها بعض حبيبات الفول المايكوسكوبية وذرات دقيق القمح من مخلفات الرغيف مع بقايا الدهون.

أما قاعدته " ماتمشو بعيد قاعدة الصحن " ، فهي مدببة على غير حِدة وعلى خلاف قواعد صحون الألمنيوم والطلص المستحدثة أو الموروثة ، يدور حول نفسه بمجرد أن تدرك " الفته فيه " الأيادي ، والتي كثيراً ما تتشابه عليـها قطع لحم البقر والرغيف الذين يؤلف بين قلوبـهما لون يميل للأسود قليلاً، سيان إن كان السواد الجامع مستمداً من موية الفول أو موية السليقة إذا ما تعلق ببصلـها سواد الحرقة في كل الأحوال.

وما داير أسترسل كثير في الموضوع عشان ما تقولو على دكتور شداد ، لكن أحب أُذكر والذكرى تنفع المؤمنين ، اتو قبل كدة في تمبول لمن بتاع الأمن سألنا وقال إتو ماكلين شنو ، الفتح خشمو منكم منو ؟؟ ما أنا " والعياذ بالله من كلمة أنا " بعد ما بتاع الأمن فـات " الله لا عودو " قلت للجماعة ،، اكت داير أقول ليه نحن أكلنا فتة ،،

بس تمرق من خشم العدو ،، الجماعة بتاعين التلج شبو لي في حلقي بصوت واحد " والله لو كان قلت ليه ما كلين فتة أكان مرقا ليك بنخريك ،، " لاحظ " الأكل بخشوم ناس كتيرين والمروق بي نخرين زول واحد " وبعدين أكان بمرقا لي بي نخريني اتو ما شاء الله ما زي جماعة خلف الله حمد واقفين لي شنو ما تشيلو !!

وبنواصل

up

يا شباب واصلو اخوكم في زنقة

ود الجراد الرجل الحبيب سيد الفتة
ما تفتو لى النهاية وكت بديت الشتات ..ز
وانت مسعول من الخير ويييين أخونا عبدالوهاب أحمد صالح يعنى ولا شنو الحكاية ما السباتة مفروشة ومخدات الطوب الما خمج ولا الجلابية الريحتة كانت جاز جاز .....بس يا شاب ما تنطط ساى والله لا فى كسير تلج ولا تخلينا ننبلج انت براك عايزنا نجى ونرحب وبعد الترحيب كمان الونسة الحكاوى القديمة والذكريات ودايما نبداها بمتل الحاجات دى ...كدى يا حبو ( على قول ورقة ) انت مبارك ده لمن لاقيتو كان مسرح ذى أبراهيم عوض (رحمة الله عليهو )أم لاحق أخونا ابو اللمين ...ومالو غاب ما ظاهر .....
وشنو يا حبة التلج البقى يجيبوهو فى شيلة العرس دستة زمان كان اكتر حاجة بجيبوها فى العرس التلج والرغيف ..... كدى اكد لى كلامى القلتو ليك وانا راجع ما بتأخر

الحبايب
سلام
فته يامحبوب , وبعد ده كلو وفته , خليت هنداوى يفتنا ياخى , بعدين الفته دى وعارفناها الزنقه القاصدا وراق دى شنو ؟غايتو ياحبيب المجانيين كتار لكن شقى الحال يقع فى القيد ... وهنداوى ده كل مايهبشوهو يقول ليك تسريحة ابراهيم عوض , وعشان اريحك ياهنداواى لمن المحبوب كان بلاقينى انا كنت مسرح ( جمال فرفور) اها ياهنداوى رايك شنو ؟ وبعدين لو ماانتا عندك مرجع فى البيت وكان شايف الشعر عامل كيف ( اقصد الشعر الاصلى )كنتا لمن امشي التمرين اربطوا زى المرحوم يوسف العمده ( لزوم الشبال) بعدين التلج ( 12) لوح دى المحبوب صاح فيها 100% بس عليك تمييز ( اللوح) هههههههه

يا سلام يا وراق يا حكاي ، ،،،



والله لمن أقرأ كلامك بحس بأني في أجواء المباراة على طول ، بس عشان أجاريك دي عايزة نفس طويل ، والله يا ورقة إلا يجاروك ناس القيزان ، محمد عباس " طه " قال عنـهم بعد مباراة شهيرة لـهم مع النيل وزنقوا النيل زنقة شديدة وكنا شمتانين في زنقة ناس النيل ، وبنقول ليـهم ونحن طالعين من دار الرياضة ،، الحاصل ليكم شنو جايين بدون لياقة الجماعة ديل ما توروا نفس لاعبيكم !! ، وكان رد طه " والله ديل توروا نفسنا نحن القاعدين في المقصورة ".



وضحكتني يا ورقة بي حكاية السحلية الشولا والفار الاحوص ، ودي مش زي بتاعة شعر بركة المربوط على طريقة يوسف العمدة ؟؟ وبعدين ات لعبت وين يا كابتن عشان تتمرن وتربط شعرك ات قايل رقبتك مبارك سليمان ولا شنو؟؟.



ونرجع لحكاية تمبول تاني ، وحكاية الفندق الكنا نازلين فيه ، أفلا تعتقد بأن الشمات امكن يقولو نزلوهم في فندق 5 سحليات ؟؟ وإتخيل يا وراق ،، وم ان ناس حامية مكافحة التهريب اليوم داك ودأبرق ما قبضوه !! الا انـهم جو ضبحوا ليـهم خروف للغداء !! شفت المهلة دي كيف ؟ وبعدين كان ظاهر إنـهم ما قابضين أي حاجة ، بذكر لمن رئيسهم جا داخل الحوش وشافنا مجدعـــــــــــــــــــــــــــــين في الحوش وقام كشانا دخلنا للمخزن المفروش تاني ، فالسكون عمّ المكان إلا من صوته الجهير ، حينما نادى على أحد العساكر معاه وقال ليه " دخلم جوه اسي دي وجيب لي الآر بي جي والكلاشنكوف بسرعة !! على ما أذكر كان جمبي معروف قلت ليه الزول دا ما عاقل ولا شنو ؟؟ ياخي قول ليه جيب ليك مطرق ولا بسطونة لكن آر بي جي وكلاشنكوف ليه نحن أصلنا سوينا شنو قلبنا لينا حكومة ؟؟ ، طبعاً معروف بزهجتو المعتادة قام قال لي " أسكت ياخي سكت حسك خلي اليوم دا يعدي على خير " وعلى الفور أصابتني ها السكت ، و فعلاً اليوم داك مرّ على خير ، وأول بشائر الخير بالنسبة لي شخصياً تغييري للجلابية أبو جاز بعراقي من عبد الكريم عبد النور ، والغدا مدنكل ومصلح " رشوشة بالكمونية " يعني فتة برضو الله يفكنا ويفككم.



يا ورقة نرجع تاني للسوق وشجرة محمود الطراق ، والله الشجرة دي فيـها حاجات كانت كلـها غريبة ، وعلى ما أذكر كانت مرتعاً خصباً لكثير من زوار السوق ، وفي منطقتنا ديك كانو تلاتة شجرات ، واحدة قدام دكان احمد عبيد دكان ابوسلوى الحالي ، الشجرة دي كانت الشجرة الرئيسية " ات يا وراق اليومين ديل المذيعين بقولو الرئيسة " فالصاح شنو والله لخبتونا ، المـهم الشجرة الميــــــــــــــــــــــن دي برضو كان فيـها عمنا حنان الذي كان له من حروف اسمه حظ وفير بحنيته وهدوئه ودماثة خلقه ، فتلقى الناس كيمان كيمان ، وما كان يميزها على شجرة محمود الطراق ، وجود ناس قيافة كدا ، تبدو عليـهم علامات الدعه واليسار "مش المتقشف بتاع زمان" ، لا لا يسار من نوع تاني ، أجسام تميل للضخامة النضيرة وجلاليب هزازة " ما هزاز نمرة 8 " ، وطبعا أي جلابية من غير التترون والدبلان كان بتهموها بأنـها هزاز طوالي ، حتى ولو كان الإهتزاز راجع لإنعكاسات الضوء برضو هزازة ، وكثيراً ما كانو يضعون على رؤؤسـهم عمم فخيمة ويتبعونـها بشالات مشغولة بالحرير الأبيض متدلية على كتوفهم العريضة.



ومما يزيد من حدة ورجحان يسارهم ودعـتهم ، الختم " جمع خاتم " الفضية بفواريظـها الزرقاء التي تميل للتركواز " شفت التطور دا كيف " ، والساعات الجوفيال كبيرة الحجم التي تستهوي حكام الكرة ، لذلك لا تجد هؤلاء الناس يميلون للجلوس على الأرض كثيراً ، وعلى فكرة ، فهم من أدخلوا علينا ظاهرة الجلوس " على الكراسي البلاستيكية ذات الحديد المتهتك والبنابر الخشبية بحبالـها الصدئة " تحت الشجر في السوق ، ،،،،،،،،،، ونواصل حديثنا عن هؤلاء لاحقاً إن شاء الله ،،،،،،،،

والله يامحبوب انت قصتك قصه .. ياخى انت قايلنى انا قدرك انت وحسن وراق ولا شنو , عشان تعرف انا لعبت وين انتو لمن ( طلقتوا) الكوره انا بديت العب , ومال لقب ( رب الكفر ) ده جاء من وين ... برضو منتظرك خرم شويه يا السائق الفيت ....بس قوم بى طوالى ما تاخد سنده ههههههههه

يا بركة سلام
أنت من زمن يا السايق الفيت ..... الغنا بقى فرارى ولامكينى وحاجات ما قادر اكتب اسمه
وانت ماسك فى شئ بجيب ليك الفضيحة والشماتة ...............
ويا بركة هناك الما مكشوف من الأبداع عند أخونا المحبوب حقيقة له صوت يطرب وهو يعرف أن
يتغنى بجميل الأغانى والله انا كنا صالحيين ولا شاى ما شاربنو فى معروضات البطانة ودى حسن وراق ممكن يحكيها ولا تسالنى عن اخونا معروف فهو رجل يملؤك عشقا وحبا للحكى والتفاصيل الدقيقة عن ممرات الحياة التى لا تسع لمساريين......دحين يا المحبوب مقاس 36بعد الفتة ولا بعد الكمونية .....انت متأكد معروضات البطانة حتى الان فاتحة أم هجر(بضم الهاء)صاحبها؟؟؟؟ وما تنسى يا حبو تحياتى للرجل الجميل عبد الكريم عبدالنور ولى عودة ...خلى عاكف ينتظرنى .......