يا هنداوي شوف

تحية لكل المتداخلين ...
ياهنداوى بركة دا ما اصلو خفيف ولفيف .... بجيبوا لى روحو براهو ...
سرد غاية الامتاع .. لاتدعونا ننتظر كثيرا .....

[color=black][font='الشهيد محمد الدره']والله يا وراق في السوق تجنن وفي تمبول تفنن ، عليلكم الله البوست دا مش بقى زي من الأسكلة وحلا وقام من البلد ولـــــــى ودمعي للتياب بل ، ناس تستف في ناس إستعداداً لترحيلـهم ، من يا ترى يكون هؤلاء ؟؟ لم تمر دقائق معدودة حتى تبينت ملامحـهم ، وبيني وبينك يا ورقة ، وفي بداية الأمر ، إنتابتني هواجس غريبة وأنا في طريقي للعربة ، تغلبت عليـها بعد ما تبينتـهم ، ومع ان الإعياء قد تمكن منـهم جميعاً ، إلا أنني لم أخط ملاحظة الصلابة في وجوهـهم المتعبة ...............[/font][/color]

[color=black][font='الشهيد محمد الدره'] أها يا وراق واصل ، والله أنا تاني حدي معاك سوق الله وأكبر دا وبس ، ومن بكرة حا أجي أواصل في شجراتي التلاتة ،، إنتهينا من شجرة محمود الطراق ، وأسي واقفين في الشجرة القدام دكان أحمد عبيد ،، وحانجي للتالتة المقابلة لصيدلية عبد الكريم علي موسى من الناحية الجنوبية ، وكان فيـها طيب الذكر عمك موسى صاحب المراتب واللحفات ،،،،،، [/font][/color]

[color=black][font='الشهيد محمد الدره']تلات شجرات لابسات تيابن ،، ومقنعات [/font][/color]

[color=black][font='الشهيد محمد الدره']لــي أزاي أنا [/font][/color]

[color=black][font='الشهيد محمد الدره']شغلن قلبي لمن باص الصداقة فات ،،،،،،[/font][/color]

[justify] [/justify]

والله يا محبوب فكرتني شجرة جنوب الجزارة والتي كانت مقابلة لدكان موسي مرتبة.. كانت هذه المنطقة من اهم مواقع الحصاحيصا الاستراتيجية لدرجة انها كانت بمثابة سوق الجمعة .. لا احد في الحصاحيصا لا يطوف علي هذه المنطقة او يمر عليها .. تجد فيها كل ناس الحصاحيصا لوجود الجزارة و سوق السمك وسوق الدواجن وسوق شراء العتان والحملان.. المكان رائج بكل الوان واشكال البشر..
عنك بكري النوش يجلس علي كرسي خشبي خلف ماكينة الخياطة يرشف في فنجان قهوة وبجانبه عمك عثمان الشايقي ( والد ديسكو) في ونسة دقاقة ومن بعيد يلوح مبروك عبد الله آدم يحمل بعض الفررايج بيمناه وبيده اليسري ديك رومي يصدر في اصوات مزعجة.. خليفة عبدالرحمن يجرب بعض ( المح) بيض وضعه في صحن ماء وتقف احدي القرويات من الشرق تنتظر ان يدفع لها خمسة قروش ثمنا للمح..عمك حمد النيل يساوم في رحمة النوباوي الذي جاء السوق مع ابنه الذي يقود عنبلوق مدوعل بالموشك ..رائحة عطور بلدية خليط من خمرة ودلكة تفوح من امرأة تحشرج صوتها من سهرة الخميس اذابت الشمس بقايا مساحيق وروج وضعتها علي عجل تصطحب بنت فلاته تحمل لها قفة و كيس في انتظار جمعة ان يذبح لهم 5 اجواز حمام لا احد ( البراغلة ) من زباين تخلفوا من الامس ينتظرها في منزلها بالمزاد..بالقرب من بتاعين الفراريج تمهلت حاجة خديجة الفلاتيه مكومة المدمس امامها تقوم بتعبئة قراطيس الدكوة وفي صينية من الطلس عرضت قطع من لحم الشرموط وصوابع الويكاب واقراص الكول السوداء وعلي شمالها نسوان صفيتة والعزيبة .. ست البنات .. موجود ..عشة.. ومن نسوان الحصاحيصا حاجة سكينة وزيري والنظامية من اشهر بائعات الخضار في الحصاحيصا القديمة.. قبالة اجزخانة عبدالكريم علي موسي تجمع ناس الصداقة مع مجموعة من الحواتة حول بعض مقاطف سمك يعرضونه لعمك علي ابراهيم ( جد القاضي بشرية ) وحولهم بعض من صبية فريق النوبه بحي فور يكومون طايوق وبعض كتل المخ.. الادروب ادريس يحوم بصينية من الجمر عليها بعض جبنات القهوة ..بعض عساكر الاشلاق تبرع بعض المساكين (الهندي وعبدالله الفوراوي ) بحمل اغراضهم من اللحوم والخضار في قفة هي الاكبر .. النور عطية يقف بجانب عثمان فضل السيد في حوار حول عملهم كمتعهدين غذاء للمدارس والسجن حالما يفرغ العربجية ( اب زرد ..باب الله ..علوب ) من تحميل تموين السجن والمدارس الثانوية مجموعة من الحبشيات بزيهم الابيض الجميل ( الزوريا ) اخلوا السوق تماما من الديوك الحمراء ومن الناحية الغربية تقف بعض عربات التاكسي الكونسول البيضاء امامها اصحابها عربه عمك عطايا و رحمة الله عبيد . ميرغني منصور.. عثمان نقد وبلة من من سائقي اربجي يقف قبالة بار استراتوس في انتظار الركاب و في ذلك الزمان الجميل لا توجد ركشاتا و كان بائعي التلج. هم الوحيدين الذين يقومون بتكسيره ....ونواصل

هنداوى ...... سلام
يااخوى والله المحبوب ووراق ديل الا تسوق ليهم الفيت ..... خلى الهواء يجينا كان جايي ... جماعتك ركبوهم فى الكومر , ما كان اخير ليهم الفيت , كدى ركزمعاي خلينا النشوف الجماعه ديل حيكبوهم وين ...ادخل ياوراق

راشد محمد الجاك كتب:: تحية لكل المتداخلين ...
ياهنداوى بركة دا ما اصلو خفيف ولفيف .... بجيبوا لى روحو براهو ...
سرد غاية الامتاع .. لاتدعونا ننتظر كثيرا .....

..........
ياراشد عوافى , ياخى القصه سخنت والحكى صار له طعم خاص , خلينا ندردق الجماعه

كاسك يا المحبوب.. هنداوي بقي راسو خفيف طوالي فطوني فطوني يعني نكملا راس والله شنو؟؟ وبعدين عبد الوهاب احمد صالح دا اكل مزتنا كلها وما داير ياخد ليهو بقة معانا ترا الباقين بعيدين ع الوهاب قاعد وكمان خاتي شالو في كتفو .. شنو الكوكبة دي يالله ورينا عدلك!!

تدردق منو يا بركة ،، وكت الحسنة ما جابتك بعدا شيل شيلتك ، ووالله ات برميل ما تدردقوا ،، على قول واحد من ناس التكينة نزل من بص جائي من الخرطوم صباح أحد أيام سنة 1976 ،، لقى الناس متلمة جمب الظلط ، والنسوان محزمات يبكن يكابرن في إحداهن تندب حظ إبنـها ، سمعت في نشرات الرادي سنة 1976 بأنه سيزيع بيان هام للشعب السوداني بعد قليل ،،

سالهم : يا ناس في شنو والمات منو ؟؟

شبت ليه أم ((( واحد اسمه زي اسم قائد الانقلاب حسن حسين )))) تقشقش في مخاخيتا ودموعا عيش فتريتا ،، ،،،

وقالت ليه : قالو ولدي قلب الحكوووووووووما ،

قال ليـها : والله ولدك خليتو الآن شايل صفيحتو يبيع في الموية في السوق الشعبي ، وللشي الشايفو فيه ، والله مروة يقلب بيـها مرتبة ما عندو ،، خلي يقلب ليه حكومة ،،،،،

بعدين يا هنداوي ما تمسك العصاية من النص ،، ونحن بفضل إعلامنا (( اللهو اعلام حكومتنا وحزبنا في نفس الوقت )) تعلمن بان المامعانا فهو ضدنا ،، حدد موقفك بسرعة والآن قبل بكرة ومعاك 24سنة فقط ،،،،

نرجع لدابي الكركرة اسد الخلا اب عاجات (( بعدما سمعنا بأنك على عثمان أخونا بكري عثمان حمد حفظه الله )).

يا وراق قبل شجرة عمك موسى ،، كدي خلينا ناخد سندة شوية فوق ربوع شجرة دكان أحمد عبيد بعد ما مرينا على شجرة محمود الطراق ،، ولو لا حظت يا وراق بأن هنالك علاقة عجيبة للشجرات التلاتة بما ومن حولـها ، فجميعـها على علاقة فيـها شي من الحميمية بالقوت المتمثل في السمك واللحوم والدواجن ، وإن شئت الإستزادة فلن يتيسر لك بأي حال من الأحوال تخطي قدور الفول بجميع تشكيلاته.

وبالتالي يتعايش تحت ظلالـها التجار والمنتجين والصناع والمزارعين والعاملين والمستهلكين والوسطاء ، لم تفرق بينـهم ثقافة ، ولا جنس ، ولا موطن جغرافي ولا مركز مالي او اقتصادي ، تجدهم جميعاً رجال ونساء تتفاوت أعمارهم وتختلف سحناتـهم في تمام وقت إختلاف أديانـهم ، وتتقاطع تعابيرهم لفظاً وإشارة ، وبحكم ذلك فقد أوجدت الشجيرات في السوق لغة ونظم للمعاملات "خلت في كثير من الأحوال" من أهوال وغلواء الغبن والتطفيف ، ، وبالتالي فقد جسدت الشجيرات معاني التعايش الآمن والجمع بين الناس والأشياء في تناغم إرتسمت نوتة موسيقاه على أوراق نيم خضراء تحلق في رحابة وتبعث من عليائـها ظلالاً وتمني.

وزي ما قلت ليك يا ورقة ، عبرنا شجرة محمود الطراق ، وقد تشبعنا "حد الثمالة" برائحة السمك المقلي التي لم تقلل من عبقـها رائحة " القُفُاف التي تصطف على الأرض ويقف على رأس كل مجموعة منـها إخوة أعزاء وكرماء ، ذكرت منـهم ياورقة عبدالله الضقالي ، ونميري ، وعثمان وزيري ، وقسم السيد المشهور بقرقار ، وأخونا المرحوم الطاهر شريف تغمده الله بواسع رحمته.

ونرجع لشجرة دكان أحمد عبيد ، فقد مرينا عليـها في مداخلة سابقة ، وتوقفنا عند الناس الوجهاء الذين أشرنا إلى أنـهم أول من أدخلوا ظاهرة الجلوس على الكراسي تحت الشجر في السوق ، ولو لاحظت يا وراق فإن هذه الشجرة تتفوق "على شجرة محمود الطراق وشجرة المراتب" ببعض الدرجات ، وإمكن دا بحكم وقوعـها على صفحة الجزارة الورانية على خلاف الشجرتين الأخريتين اللتين تقعان على نفس خط طول الجزارة القدامية مما جعلـهما عرضة لما تحمله الرياح الجنوبية صيفاً والشمالية شتاءاً ، وقد يكون هذا هو السبب في تواجد الناس الوجهاء على طول تحت هذه الشجرة.

ولا تخطي الأعين "أبداً" قسمات وجوه هؤلاء الوجـهاء ، فـهم عابسين على الدوام ، يضعون على وجوههم مساحيق مضادة للإبتسامة ، ولو لقيت واحد منـهم تحت أي شجرة في الحلة فلن تتردد أبداً في ترفع معاه الفاتحة على روح الفقيد ، وإن كنت من بتاعين كسير التلج فلن تتوان نـهائياً من أن تحتويه بكلتا يديك ، ميمماً وجهك شطر كتفه الأيسر ومتمتماً بعبارات غير مفهومة تتبعـها بجعيرة حارة إن إستطعت لذلك سبيلا.

بالمناسبة ، أي زائر للشجرة أو عابر سبيل يلاحظ بأن الهدوء هو السمة الغالبة تحت ضل هذه الشجرة ، هدوء يسبق حالات من التجاذب والمناقشات الحادة التي لا تنتهي بشكلة أبداً ، فلم تشهد هذه الشجرة أي معركة حقيقية ، مع ان كل المشاكل في السوق (( بالطبع ما عدا مشاكل الوجهاء )) كانت بتنتهي بسرعة وبأقل ما يمكن من خسائر ، ودا بعود لكثافة الحجازين من جانب ، وقلة الأسلحة ومن ضمنـها قِص الطوب على الرغم من عدم جدوى إستعماله في أي شكلة داخل السوق ، وأي بتاع مشاكل بيدرك جيداً بأنه لو لقى ليه قصِة طوب فسوف يستعملها كهواب "يوامي بيها ساكت" ولا يجرؤ على فكـها في خصم لأنـها ببساطة يمكن أن تصيب الأبرياء العُزل من النساء ، والاطفال الذين يضجُ بـهم السوق "بتاع أكياس أو ست تسالي أو بتاع جرائد أو حتى بتاع اورنيش".

والوجهاء الذين يرتادون ضل هذه الشجرة لا يتناولون طعام الإفطار في المطاعم المحيطة بالشجرة ، ويفضل مستضيفهم أن يأخذهم لأحد المطاعم المفتخرة ، مطعم ميرغني محمد عثمان ، ومطعم عبد الرازق بخيت ، ومطعم عبد الله حامد ، حيث الشواء بالحصحاص الخرصاني الغليظ والأملس في نفس الوقت ، أما القلي ، فبكون دائماً في طوة داكنة السواد سيرة وسريرة ، يعني السواد الفي قلبـها على لسانـها ، كما ان الزيوت التي يتم استعمالـها غير مكرورة ، يقلل من شدة غليانـها نار الفحم الهادئة على خلاف لظى وسعير السدر والحراز التي يستعملـها الجماعة بتاعين صيجان السمك نفعنا الله بجاههم .

يدخل الوجيه المطعم بعدما يمر بمغسلة يتم تركيبـها بالقرب من أحد مداخل ومخارج المطعم ، يتسرب الماء من حنفياتـها من غير يسر " لدواعي عدادات الموية " ويُلقى على جنباتـها ببعض قطع صابون الغسيل عديم الرائحة ، ولا تتواجد بالطبع أنصاص قطع الليمون الممصورة التي تتناثر في مغاسل مطاعم السمك عادة ، وكعادة بعض الوجهاء فالغسل قبل وبعد الأكل يتم لأطراف الأصابع الأربعة الصغار بمرور أكبرهم عليـها " لليد اليمين فقط " بمساعدة حبيبات الماء غير الدفاق أو غير الرقراق كيفما يكون الحال ، وكثيراً ما يتململ الوجهاء عند المغسلة " بعد القزقزة " في إنتظار بعض مرتادي تلك المطاعم من أكلة البلدي سواءاً برشوشة مشبعة بالدهون أو بلدي الشريفة او الشريفية إن لم تخن الذاكرة ، وهؤلاء يأخذون وقتاً طويلاً أمام المغسلة يزيد من طوله لحس الأصابع أو نخس السنون أيما كان الحال ،،،،

وسأتيكم ببقية قصة هؤلاء الوجهاء في مداخلة قادمة نختتم بيها حديثنا عن شجرة دكان أحمد عبيد توطئة لعمل بعض الإضافات لمداخلة وراق بشأن شجرة المراتب ،، ،،

تدردق منو يا بركة ،، وكت الحسنة ما جابتك بعدا شيل شيلتك ، ووالله ات برميل ما تدردقوا ،، على قول واحد من ناس التكينة نزل من بص جائي من الخرطوم صباح أحد أيام سنة 1976
............
المحبوب عوافى
كلام زول التكينة ده سنة 1976 وده تاريخ موغل فى القدم يعنى ممكن يكون معاصرنو نا س عبد الوهاب احمد صالح ووراق وهنداوى , انا الوقت داك كنت ( ننو) هاك الننو ده ........ بعدين كلامك صاح انا برميل ما بقدر ادردقو لكن بدردق ( برمبل ) وحاجات تانيه حاميانى ... اسأل وراق ده قول ليهو برمبل يعنى شنو ........
منتظر مرورك على ضل الاشجار وحقيقى مستمتع بالسرد

يا هنداوي قوم فكها .. خلاص .. كفاك نوم

عند التاسعة مساء شقت بنا العربة ازقة و شوارع وصوت مقدمة المسلسل التلفزيوني ( ليالي الحلمية ) تنبعث من البيوت التي مرت بها العربة .. الشوارع تخلو من السابلة ولا اثر لاحاديث التسكع في الشوارع وعند نواصي الكناتين..لا صوت الا ما ينبعث من التلفزيونات التي تبث الحلقة الاخيرة من المسلسل .. نباح كلب من بعيد يختلط مع مولد ماكينة لستر يؤكد اننا بالقرب من مزرعة او مولد كهربائي ينبئ عن نقطاع التيار الكهربائي في تلك الناحية..توقفت العربة امام بوابة كبيرة تتوسط مبني كبير مثل دار الرياضة .. تم السماح لنا بان نتبين الامر لحين اكتمال اجراءات فتح البوابة لدخول العربة..بسم الله الرحمن الرحيم..مجلس ريفي تمبول .. وحدة مكافحة التهريب.
لم تستغرق اجراءات تسليمنا لتلك الوحدة طويلا .. لا احد البتة هنالك سوي احد الجنود برتبة عريف بالزي الغير رسمي وضع سريره في منتصف حوش الوحدة وامامه تلفزيون ملون 12 بوصة . كانت اللحظة الوحيدة التي تمكنا فيها من متابعة بعض احداث الحلقة الاخيرة من المسلسل والتي تسمر الحرس في متابعتها تاركا فرصة ثمينة للذين يرغبون في متابعة ابداع صلاح السعدني وهو يزداد ضعفا امام نظاكا هانم او صفية العمري التي جذبت الجميع باداء دور هوانم الباشوات سليلة الشراكسة الاتراك .
المكان عبارة عن حوش كبير به مكتب مغلق يشبه مخازن السلاح او مكاتب الصرافين .. سقفه منخفض و باب من الحديد الصاج احكمت عليه الاقفال ومن خارجة درابزين من السيخ كباب ثاني اشبه بابواب الحراسات والزنازين و المسافة بين البابين بعرض اقل من طوبة ونصف ضيق البياض المساحة اكثر لتقارب حوالي قدم تقريبا وعلي بعد امتار من المبني غرفة مخزن مفتوحة ولا اثر لاضاءة ومن الناحية الجنوبية توجد عدد من المكاتب بسقف من الزنك الجملون وبرندات مكشوفة المبني مطلي بللون الاخضر المعروف ب 66 والابواب والنوافذ باللون الاخضر الغامق .علي الناحية الغربية اما م حنفية المياه كمية من اشجار البان وشجرة نيم صغيرة واخري شوكية كالسدر .. كميات من الحشائش لخريف مجلي وفاتر بقيت مصفرة جدباء.
انتهت الحلقة الاخيرة من المسلسل ليالي الحلمية لتبدأ احداث مسلسل جديد ابتدأت مقدمته من صياح الحرس .. انتو قاعدين تتفرجوا كمان .. انتباه.......ونواصل

يا ورقة شايف صاحبك بركة واقف يهاتر ، وبقول نحن من سنة 76 ، ولأننا ما جُبِلنا على الضيق بالآخر ، وندع لسبيل هذا البوست بالحكمة والموعظة الحسنة ،، لذلك بنقول ليه حاول اسمع الأغنية دي :

على كيفك تفوت ،، على كيفك تعال

وأدخل براحات البيوت في العتمة ،، في العتمة أو نصت نـهـار

،،،،،،،،،،، ،،،،،،،،،،، ،،،،،،،،،،،

لمتين مبارياك غربتك ملت حدود الرحلة حالات الدوار

يوماتي بتلاقيك مدن ،، يوماتي راجيك كم مطار

قست الديار ولا الرحيل والغربة نسوك الديار

صالبني في وجع النـهارات غربة وهواجس وإنتظار

مرات أشوف وعدك حقيقي مرات ألاقي هزار هزار

كان إعتذارك بالغياب عن بيتنا محتاج إعتذار

على كيفك أمش

وعلى كيفك تعال ،،،،

أها يا بركة قصرنا معاك ،، مدن وهواجس ومطارات وإعتذارات مش زي غناكم كلو حاجات ما مفهومة زي (( أسكلة وفيات وركشات وأمجاد غابرة )) ، ووالله لو بعرف تكنولوجيا إضافة الأغاني في البوستات كت نزلت ليك الأغنية زي ما هي بصوت مُبدعـها الرائع مفخرة بورسودان عادل مسلم (( يا ناس ما في واحد من الاخوة الأعضاء يتضامن معانا ويتكرم علينا بشرح الطريقة ووصف المقادير )).

بعدين ياورقة ما تشيل هم المزة ، أنا مخصوص جبتـها فول سوداني ، خليـها تنفخم تلحقم الغتُس ، وعما قريب ومع البوست الزي بوهيات المهندس دا حا تسمع بي خبر " عبد الوهاب أحمد صالح وقعـت من البلكونة " ، وعليك الله يا ورقة اكان عندك شريط صديق متولي فشغل لينا أغنية ،، ظلموني ظلموني ،، ترم ترم ،، من ريدو فطوني ،، ترم ترم ،، من ريدو فطوني ،،،،

يا خوي ما نشوف لينا متلت ومربع رايك شنو ، عشان راسك الزي رأس زوما بتاع جنوب افريقيا دا والله إلا نصلحو بزيت سمسم ،، ولا أقول لك ،، أدينا إن شاء الله ما تنينا ،، وسنعود

على كيفك تفوت ،، على كيفك تعال
.............
ود الزمزمى
عليك النبي تجي
ود الزمزمى
تمشي وتجي تجي
ود الزمزمى
بنضبح عنزنا
ود الزمزمي
وحيده عندنا
.........
غنا زي ده ماعندكم يا المحبوب ( توجد سكسكه)
وجب جب جب جلبا
شال الفانتا قام شربا

يا حبو :
يا مبدع يا رائع
وزي ما بقول بكري ( الله يجازي محنك) انا والجنبي في ضحك متواصل من عبارتك الخفيفة:

بعدين ياورقة ما تشيل هم المزة ، أنا مخصوص جبتـها فول سوداني ، خليـها تنفخم تلحقم الغتُس ، وعما قريب ومع البوست الزي بوهيات المهندس دا حا تسمع بي خبر \" عبد الوهاب أحمد صالح وقعـت من البلكونة \"

زولك قديم قدم من زمن ود الزمزمي والذي كان احد مراسلات مامور المركز الانجليزي مستر سام والتي كانت تنطق زام وتحورت الي زامي......

وبعدين صاحبك بركة حمدالله كثيرا لمان جات مناسبة 76 وحب يتسلبط والولد عامل فيها صغير الزمن داك.. اقول ليك علي حاجة؟؟ الوقت داك مبارك كان في هيئة الدفاع عن المتهمين بالانقلاب مع الاستاذ المحامي عقيل احمد عقيل عليه الرحمة قال 76 .. اليجي يرضع!! ياخي الزول دا سنة 67 ( مقلوب الرقم 76) يعني قبل 11 سنة من عام 76 اذكر مبارك الربو تماما كان لا يخرج من بيته الا عند الثانية الا ربع ظهرا ( عندما تنتقل اذاعة ام درمان لبث برنامج الجنوب ) متهندما وبكامل اناقته رائحة عطر كالتي تشمها عند الحلاقين فقط يقف زي ( الزريق ) زمان عند ناصية منزله يكثر النظر من معاينة ساعته ماركة شنجال والتي كانت مخصصة لهداية النجاح لسعرها المقدور عليه ،،وكانه علي موعد ،، يتحرك في قلق ناحية منزل العمدة الدحيش وينظر ناحية ناس تلودي تم يواصل الي ناصية ناس زينوبة وقرشي مساعد ( الناصية الشمالية لناس الدحيش ) ثم يخفي جسده تماما ويمد راسه وينظر ناحية الغرب في اتجاه ثانوية البنات موعد خروج الطالبات وبحركة سريعة يكبر اللفة ويمشي مخبا حتي يصل منزل يوسف حسن ويبدأ في سير متمهل يده اليمني في جيبه واليسري لتشغله قليلا بالنطر الي الساعة في حركة تمويهية..يكثر النظر من فوق اكتافه كالملازم الذي ترقي حديثا الي رتبة النقيب..و مع ظهور اول طلائع الطالبات يخرج عمر بوتو من منزله ( يادوبك صاحي من نومة امس ) يبحث عن متاعب تعيد اليه نشاطه,, في تلك اللحظة وقبل مرور السرب الاول من حسان الطالبات بالقرب من الربو يصيح بوتو باعلا ما يملك من صوت رافعا يديه زي ( حسن موزون ) ومرددا بيت شعر ( قاطعو من راسو ) يلفت به انتباه البنات ويغيظ مبارك الربو:
الربو.. الربو، الربو اذا شك القميصً ، فانه شك قلوب (الدائشات ) باسهم
ثم ينفجربوتومثل( صفاقين الشايقية ) مصفقا بكلتا يديه منحنيا تجاه الارض في مشهد ميلودرامي في ضحك هستيري يجذب انتباهات الفتيات الائي رحن متغامزات في ضحك شارط من وراء الطرح والثياب.. ونواصل

يالطيف
يالطيف
يالطيف
وراق دخل تقيل وقال عقيل احمد عقيل .... المحبوب مرقنا من الورطه دى ... بحق الزماله
بعدين يامحبوب بيت الشعر هو :
ربو اذا شكأ القميص
فانه شكأ قلوب الفاتنات باسهم
يالطيف يالطيف يالطيف

يا بركة أنا من البداية كلمتك ما سمعت كلامي ، قلت ليك ناس زي وراق وبكري ديل الزول لازم يحايلـهم ويجرهم لمنابر الحوار الحر الديموقراطي وعندها سيموتون موت الضان ، ناس زي ديل تفكهم ساي وتـقنب تزازي لي باستراليا ، وجزر سومطرة وبلاد سو شنو كدة ما عارف !! أها شوف هندواي صاحبك الكت خات يدك عليهو لبد وخلاك براك !!

أنا ممكن أمرقك من الورطة دي وأشغِل ليك وراق ، وأمسكو من يدو البتوجعو ، ونرفع ليه بوستاتو البترفع ليه ضغطو وتقلل ليه الكنترول ، زي البوست بتاع مقبرة المبيدات الماتعرفت بداية دفنـها ولا نـهاية إقتلاعـها ، وبوست سوق الفواكه القسمو غنائم على السوائم ، وبوست الإنتخابات العصيدة وملاحـها في جوبا ، والله تاني كان تشوفو تاني يهبشك بي شي تضحك علي ، وبخلاف ذلك فتأكد يابركة بأنو حا يمر على هذا البوست من وقت لاخر ويلقاك مشنط وشاقي شعرك القرقدي دا يقوم يسلط عليك عصفورتو ام قدوماً تلاتة بوصة دي ويلحقك أمات طه ،،

وعلى كيفك تفوت وعلى كيفك تعال

وأدخل براحات البيوت في العتمة ،، في العتمة أو نصت نـهـار

محبوب يا محبوب الملايين
غايتو اخوك بقت عليه قصة كمال ترباس
نصحوك ابيت تسمع كلام
وهدوك ابيت ما تهتدى
ما منك من العليك
.........
بس وراق صاحبك ده وصاف جنس وصف ( كدى عيد قراءة بوستو السابق) بعدين بينى وبينك انا منتظر , بعد ما انتهت الحلقه الاخيره فى ليالى الحلميه , المسلسل بتاعم كيف استمرأ وكيف سار

المحبوب الحبيب ،هنداوى الغالى وابوعلى ومبارك الاجلاء لك الود والمعزه .
لفت نظرى حسن وراق لهذا البوست امس ، وسعدت ايما سعاده به وانا اتصفحه طوال اليوم .وجالت بخاطرى ذكريات مايئه بالشجن ،بعضها جميل واكثرها ما كنت اظن انها ستصبح ذكريات ونحن احياء بهذه الدنيا . تذكرت صمود عاكف بذلك الصمت الرهيب ،وعفيف وهو يكسر عتمة المعتقل بتلك القدره على السرد والحكى اللطيف لروايات ماركيز ،وقدرة ود العمده على نثر درر الشعر القومى لدار جعل ،هدوء معروف وانفعاله النادر فى تلك الليله حين تدف ماء الجك فى محل النوم (الناس ماشيين على نوم المويه ليهم شنو)رغم انو يوميا ظلت تلك الممارسه داخل الحراسه الضيقه تحسبا لحبس قد يطول احيانا ، ولاانسى ثرثرة زروق الناجى وكلامه الذى لاينتهى عن نهاية النظام وتكهناته بالافراج عنا كلما ظهر زائر لوحدة الامن ،واقسى تعذيب ظل يمارس علينا ليس (من افراد الامنوما اكثره)ولكن من المحبوب حين يدور الجنريتر ويحيل ليل الزنانه الموحش فى العتمه والصمت الى منطقه صناعيه ،وهنالك يجلس عبدالكريم عبد النور وهو يحمل عمته على كتفه وكانه سيخرج الان ،وهنداوى يقعد فى الكلام (فى الحته دى والمسأله بكلام المثقفاتيه الذى لاينتهى )،وحسن وراق والوضوء الذى ظل ماسكا له طيلة واحد وعشرين يوما .

الله الله ،، أهل النبي جو ،، هلا هلا

والله لو ما كلامك دا كان ضبحنا ليك عتود مكرب ، لكن زي بعضو ، حا نجيك بالبارد والساخن ، والزارعنا غير الله اللجي يقلعنا .

بس حكاية الشخير دي صعب عليك تثبتـا ، وأنا عندي شهود ما كانو بنومو ، الليل كلو صاحيين وعلى رأسـهم وراق ومعروف ، أها ديل عندك فيـهم شك " ؟؟

يا ورقة ، طالع لينا مداعي ، أها خم وصر ، كدي خلينا في المهم " تديلو ولا أديلو " ، ودا طبعاً يا ورقة في إطار تحالفنا الإستراتيجي معاك ، أعمل معروف وأديهو من العيار التقيل إياه ، وركز على الوضو ، وأبعد من حكاية الشخير دي عشان هو ما عندو عليـها إثبات ، وكمان ما بتوقع هنداوي حا يساندو كتير ، خصوصاً بعد حكاية قعيد الكلام الإتـهموهو بيـها دي وهو منـها براء ،،

ولينا عودة معتبرة ، إن شاء الله

يا محبوب حكاية الشخير اصلا اكتر زول كان متضرر منها هو هنداوى (دايما بقول ما تشغلوا الجنريتر الا لما ننوم ) عشان كده هو مش شاهد هو مدعى اصيل (كما تقولون فى القانون ) .بعدين حسن وراق ده لسه بكون ماسك وضوه ، ما تحاول تحيدو فى المسائل دى .
ذكريات وشجون تمبول لا تستطيع ان تجعلنا ان نمر على ما طرح فى البوست من اشياء اعتقد انها اساسيه جدا واهم ما ذكر المرحوم عمنا الجراد (وده ما كسير تلج )لانو الجراد ملك عام ،وعندما يذكر الجراد تتجسد كل القيم الانسانيه وليس السودانيه فقط ،تتخيل قيم الرجاله والكرم وكل ما يذكر تبعا لذلك واهم ما كان يميزه ان كل من يعرفه يحس انه صديقه الوحيد وليس سواك ،وكان يدخل مباشره الى القلب ،وحقيقة برحيله تحس حقيقة بالفقد وانك فقدت اشياء كثيره ضروريه للحياه ويظل مكانه شاغرا فى وجدان كل من عرفه .

يا حبو.,
التحالفات الاستراتيجية قائمة،،
انت عليك بي ناس الداخل لانو عندك صواريخ عابرة للبوستات،،
اما ناس برا ديل امرهم ساهل وخليهم علي اصلنا ( دافننو سوا )!!
انت خليك مع وهبة اما هنداوي دا امرو ساهل وانا كاشف سرو،،،
بعدين لو ملاحظ هنداوي كان ( يتضاقل) بضقاليته مع كل واحد الا وهبة،،
تعرف السر؟؟
طبعا اقول ليك عليك نور،،
اصل الحكاية..التقي الزميلان في قلب حسنا غيداء، كل منهم متيم ،، المرتبات راحت في العطور.. اماريج..اوبن .. جلدا.. واحيانا كلونيا والشالات المنمنمة والجلاليب من نوع السكروتة والتو باي تو والشيت والجبردين والشنطون والزبدة وحتي البفتة ماركة الفراشتين والمداسات الماخمج من مراكيب الاصلة والنمر والشبشب الامازيقي والكشف الطلياني..يبدو ان الشدة كانت مصطلح ذلك الوقت...ما يجمع ( الوهبتين ) جدعة الشال في الكتف ووضع الطاقية بزاوية واحدة مع فارق ( الفواخير ) كانت كيمياء الحواس بينهما متشابهة تماما وكل واحد فيهم يحاول اضافة عنصر جديد ليخرج معادل آخر يتفوق به فالتقت طرق ( الوهبتين ) في روما السودانية كل واحد يمني نفسه بالظفر بقلب روما.... بقية العقد،، ترتورة ..بكري.. عاكف.. سيف..رؤوف.. عثمان ع الله .. سيف رمضان .. نور الدين..زروق.. فضل الله ... مهندس محمد مراد...بلال حسن اسماعيل...حسان ..عثمان تميم..عفيف..سين...كاف..نون..غادة..فايزة.. في حوار جاد ابتدأ بالبنيوية في شعر الحداثة وتشعب الي البرجوازية الحاكمة وانتهازية الجزولي دفع الله وما تناولته الوطن حول فضيحة القصر العشوائي وعثمان خالد مضوي...( الوهبتين ) كل واحد يريد البوح ليحتل المستعمرة ولكن ظلت جيوشهما في حالة ( استاند باي) لفترة..لدي وهبة مكر ( روميل ) بينما يعتمد هنداوي علي انضباط ( مونتجومري )..لجأ اخيرا روميل ا اقصد وهبة الي ( تطبيق الائحة ) في التعامل السوداني بأن يطلب من هنداوي ان يستغل علاقاته الطيبة مع الجيران للحصول علي قطع من الثلج لان روما تفضلها مثلجة للتتحرك النخوة واشياء اخري عله يقترب من قلب روما .. هب واقفا بعد ان وضع الشال ليحجز به الكرسي ( وظيفة اخري للشالات ) وخرج ناحية الجيران وقبل ان يصل الباب تذكر ان الدنيا برد شديد ( راس سنة ) والثلج لا يمكن تكسيره.. رجع الي قواعدة ليجد وهبه قد احتل دفء المشاعر بالبوح وخل ليك هنداوي من ديك يتلفت زي بتاع الفلسكة...
دار التحالف/ راس السنة 86
بعد دا كلو ياهنداوي .. فطوني؟؟
يا خي املا كاسك واصبر دقائق مجلسك منضوم ، شوفو رايق عقدو ناقص زول والله تام؟؟؟
ويا هنداوي شوف!!

يا حسن وراق انا منتظر مداخلة هنداوى وبعدين بعلق ليك لانك (فى الحته دى يا دوب المسأله جات فى الاشكاليه الاساسيه) طبعا دى بلغة المثقفاتيه وانا كنت متهم من عثمان عبدالله وعفيف وهنداوى انى ما بفهم فى الثقافه والابداع وانى عدو لدود للشنيطات الفى الكتوف ولغة القصيده النخله والقصيده البتمها الجماهير (التامه عشاها نوم). ولى عوده بعد مرور هنداوى .

اهو انا جيت ومشتاق لى الكل ....بس نعمل شنو للمشغوليات وزمنا المقلوب
لمن نصحا من النوم الناس فى الشق الاخر من الدنيا فى الحلمة الثالثة ويادوبك النوم بقى حلو....
مالك يا المبارك باريت ورقة وعايز بوتو يجى يخلط المدسوس وحليل زمن الشكة والشقة
الزى أبراهيم عوض ....والله يا عبدالوهاب ليك وحشة ومشتهى قعدة ونسة لامه ويا ريت
يكون بيناتنا أخونا فضل الله رحمة الله ...أين هو وما أخباره ؟؟؟؟؟؟؟؟؟ لازم ,,,,,,,.
.....بعد ليلة مليانة فرح وهجيج وزغاريد وحنة وبكرة العرس وأخوكم جاهز للحفلة ولمة الحسان
ومنيت نفسى بشوية راحة ونومة هنيئه والسرير الفى نص الحوش والهواء يداعب فى الملاية
فى تناغم وصوت مسيقى فرحا بولود يوم جديد .....وقبل سماع الصرخة الاولى ليوم ملئ بالفرح
يدق الباب وأخوكم فى جلابية النوم (يعنى معروفة للعزابة ) جلابية بلا جيوب ولها شبابيك فى الابطين
وبها بعض بقع زيت السمسم وجات عليهو غبرة حمراء وبعض الدك الاسود من حريق قصب
السكر الأتى من مصنع الجنيد(هو المصنع ده لسة بى عافية أم لحق أمات طه؟) ده منو يجينى صوت انا اعرفه حق المعرفه ولى معه تواصل وعلاقة(وعلى ما اعتقد الأن من الوجوه الاتلمعت ويضع طاقية لا تشبهه) وفى أطمئنان ...هنداوى أفتح الباب .....مرحب .....وبعده عينك ما تشوف الا النور ماهم لاكن يحملون كلانشكوف وعربيتهم الكل يعرفها أنهم... زوار الليل ......
وهنا اتانى جواب على سؤالى... هنالك علاقة ما بينهم جيران فى مكاتبهم ويجاورون شارع مدنى الخرطوم
الذى يفصلهم عن النيل وما بين مكاتبهم يتواصلون عبر سلم ......ومن هناك وعيك حسن وراق ما قصر تمة الباقى ...لكن يا المحبوب ربك حمانى وستر على من الحفلة الما حضرتها وصاحبى النكر صحبتى لأنو خايف يقلعوا ليهو مقاديفوا.......!!!!!!يا وهبة انت من وين تبدأ يكون معاك الحكى الجميل وما لى رأى فيك لكن عايز اكون رأى فيك بعد التعديل(بعد قدوم الرائعين سبلاءو سياب ) ممكن يكونو غيروا فى الأهتمامات
وجاريت الحداثة ....وما أخر أبداعات المبدع عثمان عبدالله ليتكم تزفونا ببعض من قصصة القصيرة أبتداء من (ديك العدة)......حسن وراق أحن الى تلك المناكفات ولا تسالنى عن المات منو أو ........ وانا راجع ليكم

ما اجملكم ما احلاكم ما لكل ابداعاتكم
اتمني ان لا يتوقف الجميع
هذا مشروع لتكوين روايه ممتعة جدا
يلا ياحلوين في انتظاركم

تحية لي زول بحجم وطن

يا سلام يا وهبة ، تداخلك في البوست أضفى عليه شي من جمال الكلم وطيب الحديث ، وكما ترى فإننا بنحاول نقول كلام ننفض بيه غبار كثيف إكتنف أماكن وأحداث جِسام ، فأهلاً بك في ديارك وديار الطيبين.

وكلامك عن الجراد كان ليه وقع طيب في نفوسنا ، وكعهدنا بك ، فأنت وفياً للناس في تمام وقت وفاءك للأشياء ، وما أروع أن نكون في حضرتك ، وربنا يحقق أمنياتنا جميعاً في أن نستعيد سوداننا ، وأن تسعنا أراضيه وسماواته وفضاءآته البرحة ، ونتنسم هوائه صافياً طلِقا ،،،،

ولننشد مع وراق بصوت خليل فرح :
ياجميل يا نور الشقايق
املا كاسك واصبر دقايق
مجلسك مفهوم شوفو رايق
عقدو ناقص زول ولا تام

يا ودعيسى حبابك
وأبقى لي جوة ،،
حللت سهلاً ، وطلتك نورت البوست ، ومتنورين بمساهماتك المتعددة في هذا الموقع ، ومتعشمين في مداخلاتك ، إن ما شالتك الكتوف ففي العيون متسع للطيبين من أمثالك.

وأهلاً بك ويامراحب

» مرحب عبد المنعم سيد احمد
» [color=red]عادل القصاص هذا المبدع [/color]
» يا هنداوي عاجل جدا
» هنداوي فى السودان الف مرحب
» أمجد هنداوي عيد ميلاد سعيد