مجموعة اغاني و"تفاني" غناء قيافة و"فاتو" الناس مسافة

سفرك طال متين الجية
سؤال يهاتي بيهو ابو داوود لمن رحل
عليه الرحمة
مصطفى السني اختتم الحلقة باداء اقرب للهمس
وادخل كتير من الحليات التي اضافت شي من العذوبة للاغنية
كالعادة قوم يا عاصام شب ليهو في حلقو لمن حيرو

والله بصراحة الحلقة دي من ابيخ الحلقات في البرنامج اولا السر قدور ما عرف يختار نماذج لغناء التم تم واولها اغنية حسن عطية سهران الليل احرج صوت مكارم بالاضافة الي الاوركسترا كانت معسمة ومتفلسفة في العزف مع انو التم تم دا واضح وراقص ما داير فلسفة ناس سعد الطيب وباقي الموسيقيين وحتي مصطفي السني كان بعيد من ابوداؤود والسبب في الاوركسترا خلقت قاب كبير وكل مؤدي يخيل ليك بغني في سلم ما حقو ..اغنية مني الخير تتناسب مع صوت هدي عربي والتي تخصصت فيها ولهذا رشحت لأغاني و أغاني .. عمنا السر قدور و الاروكسترا موشنوا الحلقة .. الواحد ندم ما تابع قهوة قوون مع المبدعة نضال حرم صلاح ادريس

بمناسبة أهل النبي
مداحين كانوا عندنا
الطار مدور وزول ساي إتحرك من محلو مافي
والصحن فاضي ولا قرش ما إنجدع فيهو
المداحين زعلوا
ومع العشاء جو ناس الجو الرطب "مصلحين"
من سمعوا الطار بدوا يسوو في البدع
زي عوض حمودي دا
ومن محلهن داك طوالي في نص الدارة
والحكاية عمرت
والقروش رقدت رز
واحد من المداحين همس في اذن واحد قال ليهو
هلا هلا هديل أهل النبي جووو

ياورقة خيرا في غيرا
والبركة في حسين الصادق
قدر يحفظ ماء وجه التم تم شوية

الحلقة 16 مع عمنا السر قدور والمجموعة
حلقة اليوم عن الثنائيات
وان شاء الله ولا اتلفت طق طق كون الثنائي
مكارم وهدى عربي
ويامداعب الغصن الرطيب
والغناء بيغني عن التغني بالمغنيين

نتلفت نحن فى انتظار الثنائى ...
جنس بشتنه .. اليوم حار ... 35 درجة .. وطويل سلبه .. ولسع باقى ثلاثه ساعات !!!
الحمد لله بس .. على قول الراحله المقيمه دكتوره سعدية حاج توم .. الرحمة والمغفرة لها ولاسرتها .. كريم يارب ببركة هذا الشهر الكريم
قادر يا كريم
رمضان كريم

السر قدور من البداية حصر الثنائيات "على سبيل المثال" في اولاد الموردة
واولاد شمبات وميرغني المامون واحمد حسن جمعة عليهم الرحمة
وزمن البرنامج قد لا يكفيه لحصر الثنائيات في الزمن الفات والحاضر
في الاغنية التانية غنى مصطفى السني حبيبي فؤادي لسيد عبد العزيز

فاطمة عمر بعد رضت علي كيفا جات وغنت بصدق
ياجميل ما بصح ليك
والمابصح كمان حركات عاصم البنا الجاب ليهو ملاكزة
وشان شنو ؟؟ يشاتر ويجهجه البنية
غايتو بقى عاصم فرفور وخلانا نقول ياحليل جمال البنا
واحد حاضر معانا الحلقة وشافنا زهجانين من البنا
قال هوي ما تزهجوا ساي والله يشيل منكن غناء جدو ود البنا
تاني كان تغنو "حرامي القلوب تلب"
ويا دكتور إتلفت بي دي لمن نسمع باقي الحلقة

عاد ود البنا وقلب لينا ظهر المجن زي ما بقولو
غنى شي عجيب في غرامك يا فريع ياسمين
الاغنية ناسبتو واداها بشكل جيد جدا وبلعنا اشواقنا وأشجانا
وزمان ما في عروس بتقيف في سباتة الا بي فريع ياسمين

والله يا حبو ودالبناء دا لو غني هذه ليلتي ما بيدخل المزاج كلهم عاملين فيا اسياد الغناء والعجب الاسمو الجقر والفرجوني و الامين البناء
عموما الحلقة ناجحة و موفقة بنسبة 95 % والي الآن لم تفصح هذي عربي عن ملكاتها الابداعية في الصوت الجميل المهضوم والاختيار والحفظ استطاعت توظيف لغة الجسد والعيون بطريقة جذابة وتجدني ميال جدا لي أن السر قدور بجامل اكثر من اللزوم و مركز علي فنانيين اي كلام وكان عليه الاستماع الييهم قبل تقديمهم حتي يختار ما يرضي الاوركسترا والجمهور وبالمناسبة دي وين الود الاسمو شريف الفحيل ؟

ياورقة صباح الخيرات
ود البنا بالضبط بعمل او في الحقيقة بجسد حكاية من كل بلد غنا
يعني المغني الشامل وما دايريحصر نفسو في قالب معين
وفي رايي هو رايح في المسافة البين بين دي
عموما لعلو يستفيد من النصايح البوجها ليهو كتير من المختصين في المجال دا
هدى عربي مغنية متمرسة واللفيت دا ما لفيت زول في بداياتو
في ثنائيتا مع مكارم طلقت صوتا بطريقة اختلفت من السابق كدي اسمعا تاني

الحلقة 17 برنامج اغاني واغاني بدت قبل شوية
اليوم السر قدور انتقل بينا شمالا
وبتبادر للذهن دون شك النعام ادم الفنان عليه الرحمة
وذكر السر قدور بان النعام كسر حكاية المغني التابع للشاعر
وجمع بين التطريب والسرد وفاوضني بلا زعل كانت اولى اغانيه
طبعا غنتا هدى عربي والصوت بدا ينطلق شوية شوية ونار الشوق كتيرة علي
اجادت واشجت واطربت وبعيونك تقولي فاوضني بلا زعل
وبي قليبك تقول لي طمني انا عندي شك
فنانة وقيافة وفاتت الناس مسافة

النعام ادم فنان اثرى الساحة الفنية بجلائل الاعمال الخوالد
والزول الوسيم واحدة من تلك الروائع
اداها عصام محمد نور واجاد نسبيا
ساعدته الفرقة المساعدة باداء اجمل ما يكون الاداء الجماعي
وحقيقي اطربونا واضافت الفرقة الموسيقية شي من الحلاوة
واشجونا عندما ادوا السكسفون دور رئيسي في التقديم

حلمك يا حبيبي علي حِن
ورحماك ياملاك قبال أجِن
أجِن حلمك ياحبيبي علي حِن
الكلام لمحمد سعيد دفع الله
غنتا انصاف فتحي بمساعدة المجموعة
وحقيقي كلام وشعر في غاية العذوبة والحنية

مقسوم لي مقدر
الحب والغرام مكتوب مسطر
ياسلام غنا مترع بالاوصاف
الاغنية غناها حسين الصادق اختتم بيها الحلقة
اليوم امكن اغاني النعام جذبتني بالاوصاف البديعة
والحلقة كشفت عن عدم التمثيل الطروب للمناطق
فالايقاعات مختلفة وكذلك التراكيب اللحنية وطرق الاداء
لذلك لم يكن الاداء بمستوى عمق الكلمات المغناة

مفارقات غريبة خلاس
الحرد والتحانيس والتفاوض والزعل أدوها لي هدى عربي وحرمونا من وصالا المتلفت !!
والحمد لله المابقت اغنية "عاجبني الكريم البكرم الضيفان ..... دابي الكركرة أسد الخلاء أب عاجات"
ولمن جات أغنية الزول الوسيم الفي طبعوا دائما يتلفت
ومن أوصافو قول أسمعني هات يا "عصام محمد نور !! أو أو أو أو
عمنا السر قدور بصراحة سواهو "أفرش وتخين"
وأنا لو كنت زيو مسئول برنامج كنت أجيبو يغني لينا يا حاسدين قوامنا يا قاصدين خصامنا

حلقة النعام آدم لا تختلف عن حلقة ع الكريم الكابلي ولكن الحلقتين فضحت مستوي الفنانين الذين ادوا الاغنيات اول حاجة طلعوا ما حافظين غير المستوي الجيد الذي ظهرت به انصاف فتحي وهي تؤدي ببراعة اغنية النعام حلمك يا حبيبي علي حِن وزي ما قال السر قدور غناء الشايقية يعتمد علي الكلمات وزول ما خافظ لا يمكن ان يظهر ابداع اغنية الشايقية ..
عموما السر قدور يتحمل فشل الحلقتين وهما جزء من تقييم المستمعين للبرنامج الذي انحدر مستواه والسبب يرجع للسر قدور والبرنامج يحتاج لاعادة نظر بشكل علمي وتدخل اساتذة و مختصين عموما نحن سنظل نتابع البرنامج بطريقة استماعنا لراديو دبنقا

ورقة المسألة أكبر من السر قدور
والقناة هي صاحبة القرار
وعموما قدرت تحقق اهدافا ونعود

اليوم مشى السر قدور ورمانا قرب المنجل المركوزعلى ضهر البلد تقيات
حلقة اليوم خصصا للراحل الامين عبد الغفار عليه الرحمة والمغفرة
وللاسف كان الاداء اقل من المتوسط حتى الالحان خرجوا عن قوالبها
واذا كانت الاغنيات ما مسموعة فكانت عندهم فرصة مرحلة الاعداد
وعلى ما اظن الحلقات تم تسجيلا من وقت مبكر جدا
وحسين الصادق وانصاف الافضل

» مجموعة اغاني شايقيه
» إلا يا ها .. هي ذاتا .. حبيبتي ذاتا
» مجموعة الأستاذ مزمل و مجموعة الأستاذ محمد سيد أحمد
» يا جماعة هوي البتزرزرو فيها دي ما "فاتو بنسودة" دي بت "فاروق كدودة"
» غناء العزلة ضد العزلm - الصادق الرّضي