(مسلسل اولاد) الذوات الجزء الثانى: الحلقة الاولى

- يا حليلك يا سميرة يا بتى خلاس مفارقة امك
- يا امى التلفونات ما خلت حاجة وانا كل يوم معاك ان شاء الله بالتلفون... والله يا امى فراقك صعب خلاس لاكين الحى بلاقى
- نفيسة: خلى بالك من نفسك يا بت وما تنسينا اتصلى طوالى
- حلوم: وسلمى على خدر والجواب ده تديهو لى عصام لامن تصلى هناك
- حاضر يا بنات... هل لديكن طلبات اخرى( تضحك)
- رسلى لينا الحاجات الوصيناك عليهن( تضحك حلوم ونفيسة)
- كويس بس ان شاء الله امشى واجى القاهن نفعن معاكن
- اتى مالك بس رسليهن
حملت سميرة شنطتها المحملة بالويكة والشطة والشرموط والنبق والدوم واللالوب
واشياء اخرى وغادرت الى المطار وفى تمام التاسعة مساء اقلعت الطائرة ميممة وجهها نحو السعودية او نحو خدر... شريك حياتها والذى كان ينتظر قدومها على احر من الجمر
- يا حلوم هسة سميرة بتكون وصلت؟
- التقول على وصلت ... هى ليها خمس ساعات من سافرت
- جدليها يا يمة..... اضوقن الاغتراب اللا نام ولا اكل الطعام( تضحك)
- كدى فى الاول ضوقى العرس..... الاغتراب هين
- سمح يا حلوم اكان ما سافرت واتزوجت تضحكى على
- مبروك عليك النقوم اكلم ليك عصام اجى يعقد عليك هسة
- يعقد عليك السر ود بخيتة..... شحدت ربى عليك
- مالى بعرس ود بخيتة ... خلاس الرجال كملوا
- عم بابكر: ومالو السر ود بخيتة يا حلوم؟
- ابوى؟
- ايوة ابوك... عيبى لى السر .. مالو ما راجل وشغال وزول كويس وود ناس
- انت يا ابوى بقيت مع نفيسة ضدى ولا شنو؟
- انا داير يوم هناك وسعدك اجى سريع.... يا بنتى المرة .... واى مرة لا زم يكون فى حواها راجل يحميها ويخاف عليها ويحبها ويحترما ويقدرا
- وهسة ود بخيتة بعرف جنس الكلام القلتو ده
- انتى سألتيهو؟ امشى اسأليهو....
- برى البودينى ليهو شنو اسألو... دى كمان جديدة... والله عال
- نفيسةك كدى ارحكى نحضر المسلسل دايرة تفوتى لينا الحلقة بتاعت الليلة ولا شنو
- عم بابكر: قبل مسلسلكن ده امشن سون لى الجبنة والله راسى داير يقع
- نفيسة : خالتى علوية قالت بتعمل ليك الجبنة وتجى تشربا معاك
- اكان كدى جبنتكن ما لازمانى
- يا خى ( تضحك البنات)
- ايوة... والله ثم والله الما شرب جبنة علوية ..... ما شرب جبنة تب فى حياتو.... الجنزبيل ريحتو تجيك من بعيد... والفناجين ترقش زى الدهب..... موش زى جبنتكن الزى زيت الرجوع بتاع مكنة العربات
- سلام يا الحاج
- اهلا يا علوية يا اختى اتفضلى
- انت الفضيل يا بابكر يا اخوى
- اها ادينى جاى ... ادينى الفناجين يا علوية ... وزى ما قال عثمان حسين الله يرحمو: اروينى اروينى
- حلوم : ههاى عليك شوفى ابوى جنس الكلام البقول فيهو
- علوية: ابوك من يومو كلامو كلو غنا وشعر ... اصلو من زمان غير راديهو ده ما عندو شغلة
- والله كلام
يرن جرس التلفون المحمول والذى كان بحوزة علوية
- الو.. منو معاى
- دى انا سميرة يا امى
- اها يا بتى وصلتى؟
- ايوة وصلت.. هاكى خدر داير يسلم عليك
غدا حلقة جديدة من اولاد الذوات)

الاخ - راشد لك التحية وانت تنقل القصص الاجتماعية - والحوارات
التي تدور خلف الابواب المغلقة , تلك الحوارات التي لايجيدها الا
شخص له علاقات اجتماعية كثيرة واحتكاك مع جميع افراد المجتمع
وتواصل مع الاجيال التي سبقته - ماعاوز اقول كلام حبوبات - ولكن
الحناكيش لايفهمون هذه الكلمات , ولك الشكر

شكرا اخى عبد اللطيف على هذا الاطراء
اما انتى يا ابنتى هبة السر ده مالو عيبيهو لى
فى زول برفضوهو عشان اختو شعرها منكوش
ده كلام شنو ده يا بتى
اكان كدى ما فى زول بعرس بى اخوى واخوك