مسلسل ( اولاد الذوات ) الحلقة الثالثة عشر

- ايووووووووووووووووووى يوووووووووووى ايوووووووووى ( نسوان الحلة يزغردن)
- حمد لله على السلامة يا حلوم
- الله يسلمكم( بصوت باكى)
- بركة الجاكن طيب يا بتى
- الله يبارك فيك
بدأ عصام يسلم على نسوان الحلة واحدة تلو الاخرى وبأسمها
- والله يا ولدى يا عصام ما نسيت الناس
- انتو بتتنسو يا خالتى الرضية
يذهب الجميع الى منزل ناس عصام وهنالك يلتقى عصام بأبيه ويسلم عليه ويبكى عصام بكاء حار
- حمد لله على السلامة يا ولدى
- الله يسلمك يا ابوى..... كيف حالك وحال صحتك... واخبارك
- انا كنت عيان لاكين لامن شوفتك بقيت شباب
- يعنى نشوف ليك عروس يابا( يضحك الجميع)
- ايوة شوفوا لى بت سغيرونة وحلوة عشان ترجع لى ابوك شبابو
- اجى يا الحاج.... بعد ما شاب دخلوهو الكتاب
- والله يا علوية انا بى جية ولدى عصام بقيت شاب.... عمر الزهور... عمر الغرام
- حلوم: والله يا ابوى بالغت عدييييل كده
- اقعد يا عصام يا ولدى.... كيفك ... وكيف الحال.... والغربة.... والسنين.... شنو يا ولدى مالك طولت الغيبة
- الحمد لله يا ابوى.... الطولة والغياب ما بيدى
- نفيسة: حمد لله على السلامة يا عصام
- الله يسلمك يا نفيسة... كيف ابوك عمى مختار ...وكيف امك حاجة الروضة
- كويسين يا عصام
- سميرة:والله يا عصام مشتاقيين كتييييير.... كيفك .... والله زمن يا عصام
-خدر: (بى صرة وش ونهرة غيرة): امشن يا بنات.... جيبن لينا موية وعصير.... نحن جينا تعبانين من السفر
تذهب البنات وسميرة كانت زعلانة من طردة خدر ليهن من الاوضة
- سميرة: هو خدر ده مالو يا حلوم بتأمر فينا كده
- نفيسة تضحك) غيراااااااان.... ما يغير يا بت عليك
- هى وتانى هى ... انا جنس ده ما بنفع معاى ....اكان ده من اولا داير يتأمر وينهر... بس.. وتانى بس
-حلوم: تبسى كديسة.... اتى يا سميرة لا بعجبك العجب ولا الصيام فى رجب
- نفيسة: كدى ادنى الكبابى النودى ليهم العصير
- سميرة: كدى الكبابى النودى ليهم العصير( تحاكى نفيسة)... اعصرك القطر.... خلاس حبيب القلب جا
وسرحت نفيسة.... رجعت بذاكرتها عشر سنوات للوراء..... كانت نفيسة تحب عصام حبا تعرفه كل نساء ورجال الحلة....حتى الشفع الصغار كانو يعرفون حب نفيسة لى عصام.... تذكرت نفيسة جلساتهما تحت النيمة... نيمة ود حسين ... التى كانت ملتقى العاشقين... تذكرت نفيسة كل كلمات عصام... كلمة... كلمة... حرف ..حرف
كل اغنية كتبتها فى كراسها... كل جواب ارسله لها عصام
وسالت دمعة من عينى نفيسة
لقد صبرت البت فى حبها لى عصام عشرة سنوات.... خطبها الكثيرون... رفضت
تقدم لها كل اعيان البلد والحلال المجاورة
اخلصت فى حبها لى عصام... كانت تحلم كل يوم بعودته.... ترى خياله امامها.... تحتضن صورته التى اعطاها لها وهو مغادر السودان
- نفيسة( حلوم وسميرة بصوت واحد)
- ايوة ( مهجومة)
- سرحتى وين؟
- هجمتنى ... اهجمكن الاسد
- هاك ودى العصير
- سمح .... اتن ... اصبرن لى ... النمش واجيكن.... واقعد اى واحدة فيكن فى مواعينا
- بتجى بعد كم ساعة( تضحكان)
- تجيكن الكشة....
تأخذ نفيسة العصير وتذهب به الى الاوضة
- اتفضلوا
- شكرا يا نفيسة
يخرج خدر وفوزى من الاوضة ويتركان عصام ونفيسة لوحدهما..... عفوا... ثالثهما.... الحب...والشوق...والحنين... ودار حديث طويييييييييييييييييل بينهما.......
غدا حلقة جديدة من : ( اولاد الذوات)

تسلمى يا بنتى يا هبة
انا لو طولت الحلقات ح انهى التشوق للحلقات القادمة
وزى ما انتى قلتى انك سرحتى
اها انا زى سرحانك ده دايرو عشان بى خيالك تعيشى الحلقة الجاية
وكمان تتخيلى عصام ونفيسة قالو شنو
وتسلمى يا بنتى
مسؤولة من الخيريا بتى : وين بتى هنوية
قولى ليها عمك راشد بسألك عليك كتييير
وقولى ليها مالك موقفة الكتابة
طمنينا عليك يا هنوية

راشد حسن طه كتب:

تسلمى يا بنتى يا هبة
انا لو طولت الحلقات ح انهى التشوق للحلقات القادمة
وزى ما انتى قلتى انك سرحتى
اها انا زى سرحانك ده دايرو عشان بى خيالك تعيشى الحلقة الجاية
وكمان تتخيلى عصام ونفيسة قالو شنو
وتسلمى يا بنتى
مسؤولة من الخيريا بتى : وين بتى هنوية
قولى ليها عمك راشد بسألك عليك كتييير
وقولى ليها مالك موقفة الكتابة
طمنينا عليك يا هنوية

يا سلاااااام يا عم راشد والله اتاريها نفيسة دي سااااااكته كدده ورااااها حكااااية

شفتي يا هبوية ده الحب ولا بلاااااااش

تسسلم يا عم راشد بس ذي ما قالت ليك هبوية

انا الجمعة والسبت بكون برة الشبكة

السبت والجمعة بتكونى برة الشبكة مالك
قاعدة تمشى لى خالتك علوية ولا شنو
والكلام القولتيهو لى هبوية .... هبوية ما كلمتنى بيهو
دايرات تبقن لى زى سميرة مالكن يا بناتى