- حلوم..... حلوم..... حلوم اجرى..... اجرى ....سريييع( بدرية تنادى )
- فى شنو يا بدرية( جارت ناس حلوم)
- اخوك... اخوك عصام ضرب فى محل الاتصالات وقال وصل المطار وجاى جاى
- الحمد لله
-ايووووووووووى ( تزغرد بدرية)
-نفيسة حمد لله على السلامة يا حلوم
- بركة الجاكم طيب يا حلوم( سميرة)
- حمدلله على السلامة يا بتى( علوية)
تبكى حلوم بكاء شديدا وتهرول نحو منزلهم وتحدث ابوها:-
- ابوى...يابا... عصام وصل المطار
- حمدلله على السلامة يا بتى... بركة الجا قبل ما اموت.... عشان اشوفو
- ما تقول كدى يا بوى... عصام جا وح يعمل ليك العملية
-يدخل خدر: صحى يا حلوم عصام جا
- ايوة يا خدر .... هسة هو فى المطار
- كويس انا بتصل عليهو وبمشى ليهو هناك بى عربيتى
- خلاص كويس... امشى شيل النمرة الضرب بيها فى دكان الاتصالات
-كويس
-فوزى : حمد لله على السلامة يا حلوم
- الله يسلمك يا فوزى
- انا ح امشى مع خدر عشان نجيبو من المطار
- ما بتقصروا يا فوزى
- نقصر كيف يا حلوم... عصام وانا وخدر اخوان من زمان.... قبال ما يلدوك
- النعوم:سلام.. هى ... حمدلله على السلامة... بركة الجاكم طيب
- الله يسلمك يا خالة
-حاج بابكر( ابو حلوم): اهلا يا النعوم... خشى لى جوة
- ازيك يا بابكر يا اخوى .... بركة الجاكم طيب
- الله يسلمك....يا حلوم قومى جيبى ليك موية لى خالتك
- حاضر يابوى
- والله يا بابكر .... العيال ديل الغربة كتلتن..... شن فيها بلاد برة ....بلا المرمطة
- والله يا النعوم نحن زمان لو كنا دايرينها كنا مشينا فى دربا..... الا الزمن اتغير...... اى واحد من الاولاد داير يفوت البلد.... مع انو الارض قاعدة والبتجيبو ليهم فى الغربة ما بلقوهو
- صدقت يا اخوى.... شوف جنس المحن الوقعنا فيها فوزى..... ولدو السغير نضمى بالعربى ساى ما بعرفوا
-هاهاهاها.... مجننك يا النعوم.... بكرة شفع الحلة يعلموهو ليك النضمى
- لكن فوزى ما لقى يعرس الا من الخواجات ديل.... مالن بناتنا... ما سمحات وطيبات وحنينات
- الكلام ده اولاد الزمن ده ما بعرفو ليك.... انا لامن ماتت صفية ام حلوم وعصام حرمت على نفسى النسوان.... كانت المرحومة بتحترمنى وبتعزنى شديد
- هى يا الحاج هو الزمن داك بتلقى ولا نسوانو بتلقن... والله والله ابو فوزى الله يرحمو ويغفر ليهو كان من ما يجى من السفر يسأل الاولاد اول سؤال امكم وينا؟.... حتين بعداك يخش لى جوة.... اما رجال الزمن ده.... مسخرة وقلت ادب وشكل وكلام فارغ.... يااااا حليل رجال زمان
- يدخل ولد فوزى الصغير وينادى: هبوبة... هبوبة.... انا ايز اشتارى داردمة
- هى كدى جدلينا الشافع بقى يعرف الكلام
- انا ما قلت ليك يا النعوم ... تعال هاك ... هاك امشى اشترى الداندرمة
- شكرا امو
- عمو... موش امو... هاهاهاها
- حلوم : تعال يا حمدى النشترى ليك الداردمة
- كويس
تخرج حلوم وفى الشارع تلمح عربة يقودها عصام اخوها وبجانبه خدر وفوزى..... تجرى حلوم نحو العربة بسرعة ناسية حمدى وراها .... كانت دموعها تسابقها نحو اخوها.... اخوها الذى لم تراه منذ عشر سنوات.... تتوقف العربة وينزل منها عصام..... يقلد حلوم ... وتقلده حلوم بشدة ويبكيان بأعلى صوت وسط زغاريد نسوان الحلة.......ما اقسى الغربة وما اجمل اللقاء بعد طول غياب
غدا حلقة جديدة من ( اولاد الذوات)
موضوع: مسلسل ( اولاد الذوات ) الحلقة الثانية عشر 
الإثنين 19 أبريل 2010 - 8:40
