يا شـــــــــــــداد .. كِدا لكن ما بتفوتا علينا

((أعلنت لجنة علوم الفضاء والفلك والإرصاد الجوية بمعهد السودان للعلوم الطبيعية بجامعة الخرطوم، أن الجمعة الموافق العاشر من سبتمبر هو أول أيام عيد الفطر المبارك، وفقاً للرؤية الشرعية.
وقال مدير المعهد البروفيسور علي الطاهر في بيان امس إن هلال شهر شوال سيرى مساء يوم الخميس الموافق التاسع من سبتمبر بالعين المجردة في كل أفريقيا عدا شمالها بما في ذلك أقصى شمال السودان.)) الصحافة


((اعلن استاذ علوم الفلك بكلية العلوم جامعة الخرطوم الدكتور معاوية حامد شداد، ان الخميس الموافق التاسع من سبتمبر، هو أول شهر شوال، وأول أيام عيد الفطر المبارك بالنسبة لهم. وقال شداد، ان الاقتران المقبل للقمر حسب توقيت أم درمان سيحدث في حوالى الساعة 30ق:01س من ظهر يوم الأربعاء الموافق الثامن من سبتمبر، والاقتران هو المرحلة التي يكمل القمر دورته حول الارض، وبها ينتهي الشهر القمري القديم، ويبدأ الشهر القمري الجديد، وهو ايضا المرحلة التي لابد من حدوثها اولا ثم يمضي على حدوثها العديد من الساعات حتى تكون الرؤية بالعين المجردة للهلال الجديد ممكنة.)) نفس المصدر

يا شداد ياخي الخميس حا يكون يوم الرحمتات كيف تلولو ا وتسويهو عيد
دايرين نطلع من العصر ونلبع مطايب الحارة القضت
ونلعن ليك سلسفيل ست الدوكة الما قضت
ونرجو من الجميع التمترس في خندق لجنة مفوضية الفضاء والفلك
وكلام شداد دا بصراحة عمل لينا نفسيات
فوتنا الخمايس كلها عشان نعمل كرنفال رحمتات تنوء بأكله البُطان
تجي يا دكتور شداد تسويهو عيد
إنت مالك ياخي يقترن ولا ما يقترن
وداير تقعنا بإقتران من يوم الأربع كمان
لا
لا
لا دي شديدة والله
من الله خلقك سمعت ليك بي رمضان بدون رحمتات
ياخي هو رمضان كان ما الرحمتات كنا جلينا
غايتو أنا المرة دي واقف مع المفوضية توقد نار وتصبح رماد
والرحمتات قائم ويوم الخميس يعني قائم قائم
حتى لو إضطرينا نعيد مع ليبيا
يعني نتحرم من الرحمتات نهي
النشوفك يا شداد حا تعمل شنو
و دي ما فيها فيفا .. فيها سليقة بي رهيفا ..