( اولاد الذوات) مسلسل فى حلقات- الحلقة الثانية

كانت (امونة)تداعب صاج الكسرة بالقرقريبة وهى تتغنى بأغنية شعبية من اغانى البنات فى السبعيتيات
( يا الماشى لى باريس
جيب لى معاك عريس
شرطا يكون لبيس
ومن هيئة التدريس)
- يا بت يا امونة
-ايوة يا امى
-ما نتهيتى من العواسة؟ باقى ابوك قرب يجى للفطور
-قربن انتهى يمة
-بس راجية ( حلوم)بت خالتى عشان قالت دايرة تعوس
- هى ( قشروم) دى ما تعمل ليها صاج اجى يا بنات امى ؟ عرفنا اى حاجة كمان جابت ليها ادونى صاجكم النعوس فيهو؟
- يا امى انتى عارفة الناس ديل مساكين وما عندهم البجيبو بيهو حق الويقود خلينا نستأجر فيهم يمة
- شوفى يا بت هوى انا كلام الفلسفة بتاعك ده ما بخش لى راسى. فى زول غالبو يشترى ليهو صاج كسرة وكان للويفود مالا هى والدنها فى باريس ما تمشى الجروف تقطع الشجر زى بنات بابكر حكم والله
- يا امى انتى ما عارفة انو حلوم ما بتقدر تمرق وتخلى ابوها براهو وزى ما انتى عارفة لو هى مرقت للجروف ابوها ممكن يقع من سرير المرض الراقد فيهو مشلول ليهو عشرة سنة يا امى ادى البت خاطرك
- الخطر اليضربوهو ليك شايلك اسعاف كدى اسرعى
- سمح يمة
( يدخل والد امونة للبيت)
- الفطور يا نسوان باقى الليلة جاى معاى حمد ود السرة
- امونة : حاضر يابا
- تحضرى ما تغيبى يا بتى وين امكظ
- بى غادى فى المتبخ بتفرك فى الملاح
- نفيسة هوى يانفيسة
- نفيسة فى صوت ( طنطنة): النفس الشايلا نكير
-اى اى يا الحاج
-انتى لسة فطوركم ده ما طلع
- تطلع روحك(بى طنطنة)
- حاضر هدا الملاح جاهز بس امونة تجيب الكسرة
- الكعى يا بت خلونا نفك الريق ونشوف لينا شغلة غيركم
- ( يتم احضار الفطور)
وفجأة يدق الباب بشدة وبصورة مزعجة وتفتح امونة الباب بسرعة بينما يترقب الجميع هيئة الطارق
- ده منو يا امونة
- دى حلوم يا ابوى الحوقها دمها كابى بحر
- سجمى مالا
يهرع الجميع نحو حلوم بشفقة
-الجميع بصوت واحد : فى شنو يا حلوم؟
غدا نواصل
اولاد الذوات مسلسل فى حلقات يكتبه للمنتدى : راشد حسن طه
الحلقة الثانية:-( اولاد الذوات)
- يا ابوى حلوم كاضمة من الحديث يمة كدى جيبى ليك بصلة نشمما ليها عشان تفوق
- والد حياة يحاول ان يجعل حلوم تفيق ويقوم بانتهارها( بصوت خائف): يا بت مالك قولى بسم الله واستغفر الله
- لا تستجيب حلوم وتهرع والدة نفيسة بالبصلة وهى تلملم طرف توبا من اشللة : هاك يا بتى هاك شمميها البصلة النشوف اخرة البت دى شنو ثم تطنطن بصوت خفى( دى بت وش مصائب)
* يتم ادخال حلوم للبرندة بعد ان بدأت تستجيب بعد شمومة البصلة وتهرع نفيسة فى صب الريحة على جرح حلوم بعد ان تم ايقاف نزيفها مبكرا
- تصرخ علوية جارت ناس نفيسة فى فضول ( وهى امرأة معروفة فى الحلة بتقصى الاخبار ةترةيج الاشاعات وزيادة الكلام والروايات واختراعها احيانا كثيرة): انتى يا بتى يا نفيسة حلوم ما قالت ليكم الحاصل شنو؟
- ابدا يا خالتى يا علوية هى يا دوب فتحت عينا بعد ما شممناها البصلة
- وده شنو ده القابضاهو حلوم فى يدها ده
-( ينتبه الجميع فى ذهول الى ان حلوم تقبض بيدها بقوة على شئ لم يلاحظوه)
- نفيسة : اى والله هو ده شنو؟
- حاج الامين يتدخل كدى زحن لى يا حروم امكن البت دى هاجما رجيم ولا الفى ايدا دى مصيبة زمان
- يزحن الحروم لحاج الامين عدا علوية التى تصر على ان تكون قريبة من الحدث
- يمسك حاج الامين يد حلوم محاولا ان يتعرف على ما فى يد حلوم
- تصرخ حلوم بصوت عالى لا ....لا... لا ...لا ..لا لا...
- يا بت هجمتينى اكتر من ما انا مهجوم ده شنو الماسكاهو فى ايدك ده
- تتدخل نفيسة بهدوء: يا بوى كدى وح خلينى انا بعرف ليك الحاصل وبحدثك
- كدى يا جماعة لو سمحتم كدى اطلعوا كلكم برة خلو البت ترتاح شوية
- يخرج الجميع عدا علوية
- نفيسة ( بأدب) يا خالتى علوية معليش خلينى مع حلوم برانا
- تطنطن علوية : هن يعنى بنات الزمن ده عشان قرن جامعات عاملات بعرفن اكتر مننا . قسمت بالله لو تحت حضرنا زمن الجامعات ده كنا ابدعنا وبدعنا .هى والله حكم.(بصوت جهير) حاضر يا بتى
- نفيسة: مالك يا حلوم فى شنو؟
- ابوى يا نفيسة ابوى
- ابوك مالو يا حلوم
-ابوى قال داير يبيع البيت الساكنين فيهو عشان يتعالج بى قروشو
- وبعديت
- انا قلت ليهو يا ابوى انت عصام اخوى بدفع ليك حق العملية طالما هو حالتو ميسورة. باقى ليهو عشرين سنة مغترب فى الخارج
- وبعدين ؟
- كنت قاعدة جمب ابوى ويشيل ليك العكاز ويضربن فى رأسى ويقول لى هو عصام كان فيهو رجا ان ببيع البيت اوعك تجيبى لى سيرة الولد ده تانى انا ما عافى ليهو ومتبرى منو لى يوم القيامة
-والشايلاهو فى ايدك ده شنو يا حلوم؟
- دى شهادة البحث بتاعت البيت ختفتها من ايدو وجيت جارية عليكم جرى قلت ابوك يتفاهم مع ابوى حاكم هن صحبان من زمان
- خلاص معليش يا حلوم كدى هاك .... هاك اشربى الليمون ده واقعدى هنا وانا الليلة بعوس ليكى وبودى الفطور لى عمى بابكر( ابو حلوم)
- والله يا نفيسة انتى طوالى بتخجلينى بى مواقفك دى ... انا قاعدة اتعبك معاى
- ده كلام شنو يا حلوم انا وانت بنات فريق واحد .. اكلنا مع بعض الملح والملاح.. ولعبنا مع بعض فى بيتكم عدة عدة ما بتتذكرى يا حلوم ساعة اقوم اخرب ليك بقر الطين بتاعك وانتى تسكينى ونقعد نضحك
- ايام يا نفيسة والله رجعتينى كتيير للزمن الحلو داك يا ريت لو ما كبرنا يا حلوم يا ريت لو كنا صغار للان
( نفيسة تقلد حلوم وحلوم تقلد نفيسة وتبكيان)
- يقطع صوت علوية عليهما بكاءهما : نفيسة ابوك قال ليك تعالى
وقبل ان تقوم علوية عشان تشوف ابوها يسمع الجميع صوت والد حلوم يدخل بيت ناس نفيسة وهو يحمل عكازا فى يده ويصرخ بصوت قوى وعالى : يا بت يا حلوم ... بت يا زفت
( يحدث هرج ومرج فى منول ناس نفيسة ويخرج والد نفيسة لمقابلة والد حلوم مهدئا له)
- يا حاج بابكر يا زول انعل ابليس فى شنو؟
- البت دى وينا ؟
- البت دى جوه مع بتى نفيسة .. مالك يا بابكر انت جنيت ولا شنو شايل عكازك وداير تتم باقى دقتك للبت حرم اكان تخت عكازك ده وتهدأ ... كدى تعال ... تعال جاى
- يستجيب حاج بابكر لابو نفيسة ويدخلان الى داخل الاوضة وينادى حاج عثمان على ابنته نفيسة: يا بت تعالى هنا
- اى ... اى جيت .. جيتك يا ابوى
-تدخل نفيسة وتسلم على ابو حلوم: ازيك ياعمى بابكر
- اهلا يا بتى . حلوم وينا
- حلوم قاعدة معاى فى الاوضة الورانية
- ناديها لى
- سمح .. سمح يا عم بابكر
تدخل نفيسة الاوضة وتأتى راجعة الى ابوها وووو...... وتصرخ ...... الحقووووووونى
*غدا حلقة جديدة من ( ابناء الذوات)

فى الانتظار اخونا راشد ....

اخي راشد عايزين كل يوم حلقتين

في انتظار باقي القصة

تسلم ولك التحية

دم حلوم قرب ينشف
في انتظار البقية استاذ راشد

اخي راشد نشفتي ريق الجماعة اين البقية

لكم جميعا التحية على كريم تواصلكم
( اولاد الذوات) بكم ولكم
وان شاء الله كلو يوم فى حلقة جديدة
بس حلقتين فى اليوم بتفقد المسلسل معناهو
ولكم كل التجلة والاحترام
راشد حسن طه

الاخوة الاعزاء
مسلسل (اولاد الذوات) لكم وبكم
استطيع ان اكتب العشرات من الحلقات فى اليوم الواحد
لكن ذلك سيفقد المسلسل طعمه
وسأفقد تشوقكم له
ولكم كل الود وكثير الاحترام