مسلسل ( اولاد الذوات ) الحلقة التاسعة عشر

فى مستشفى الخرطوم كان الجميع حضورا : علوية وسميرة بنتها ونفيسة وخدر وامه النعوم ورجال الحلة عن بكرة ابيهم
كان الجميع قلقا فقد بدأت العملية فى تمام العاشرة صباحا
كان الجميع يترقب... والقلق يسيطر على حلوم وعصام
الاطباء يدخلون ويخرجون
الممرضات ينهبن ممر العملية جيئة وذهابا
الكل كان يترقب
اعمدة الفطور ظلت على حالها فقد كان الجميع قلقا
- يا عصام
- ايوة يا دكتور
- سوق جماعتك ديل ووديهم بنك الدم ... محتاجين لى قزازتين دم فصيلة او بوظتيف(O+)
- حاضر يا دكتور
ذهب عصام وفوزى وخدر الى بنك الدم ولحسن الحظ تطابقت فصيلة فوزى مع فصيلة عم بابكر
- قزازتين كتار عليك يا فوزى يا اخوى
- يا عصام ده دم جاى من امريكا يعنى قزازتين بيساون اربعة قزازات( يضحك)
- والله انت يا فوزى هظارك ده بخفف علينا التوتر
تم اخذ قزازتين من فوزى وتم تسليمها للدكتور
- ان شاء الله العملية ح تاخد مننا زى ساعة ... او ساعة ونص .. وان شاء الله ما يحصل الا الخير
- ان شاء الله يا دكتور
جلست النسوة تحت ظل شجرة وكانت هنالك سباتة مفروشة على الارض
- دحين يا سميرة يا بتى دى ما المستشفى العمل فيها التوم ود بخيتة عملية المرارة ( علوية)
- ااااى يا امى يا ها ذاتا
- لاكين والله المستشفى اتغيرت كتير... عنابر سمحة... ومبانى سمحة... احسن من زمان كتيير والله
- ايوة
- نفيسة: يا حلوم ما ارحكى اقعدى ارتاحى من الوقفة دى
- هو انا فينى قلب اقعد بيهو يا نفيسة... ابوى جوة ليهو ساعة كاملة والدكتور قال العملية بتاخد ليها ساعة او ساعة ونص ولى هسة ما فى اى خبر
- يا بت ما تقليقى بينا... ربك موجود.. ارح
- سميرة: تعالوا اقعدو هنا خشن من الشمش
جلست البنات وتحدثن عن كل شئ قتلا للزمن الذى طال كثيرا
مرت الساعة والنصف ولم يخرج الطبيب من غرفة العمليات
- والله يا جماعة انا بديت اقلق جد جد
- يا عصام استهدى بالله... دى عملية بتاخد زمن ياخى
- الساعة ونص انهت ولسة ما فى شئ
- يا اخى فى ظروف جوة غرفة العملية بتحصل ياخى اطمئن ... انت يا عصام ما مؤمن؟(فوزى)
- ونعم بالله
- خدر: ارحكم نقعد هناك مع الجماعة ديك
- يلا
ذهب عصام وخدر وفوزى وجلسوا مع بعض الممارضين لذويهم تحت ضل شجرة نيم وارفة الظلال
- شايف لى ممرضة جات مارقة من غرفة العمليات ( عصام)
- اقعد هنا انا بمشى اسألا( خدر)
دار حديث بين خدر والممرضة ... حديث قصير .... وبعده جاء خدر مهرولا نحو عصام
نهض عصام وفوزى وسألا خدر:-
- قالت ليك شنو؟
- قالت العملية انتهت
- وابوى كيف ؟
- كويس جدا والعملية نجحت
بكى عصام بكاء حار واتجه نحو اخته حلوم واخبرها بما قالته الممرضة لخدر فبكت حلوم بكاء حارا وسط زغاريد النساء
- يا جماعة تعالو شيلو عم بابكر للعنبر( الدكتور)
- حاضر يا دكتور
حمل الجميع العم بابكر لداخل العنبر بينما كانت البنات يوزعن الحلوى للجميع
كانت الممرضة تطمئن فى حلوم وتشرح لها ما حدث بالتفصيل ... وما هو مطلوب فى المرحلة القادمة بخصوص رعاية العم بابكر فى المنزل بعد ان يتم تخريجه
كانت دموع الفرحة تنساب من عيون الكل
وتبادل الجميع التهانى
فقد كان العم بابكر هو اب للجميع... واخ للكل
ونالت علوية احترام كل اهل الحلة لموقفها النبيل تجاه تأجيل زواج سميرة حتى تتكلل عملية العم بابكر بالنجاح
غدا حلقة جديدة من: ( اولاد الذوات)
ملخص لحلقة الغد:-
زواج سميرة بعد تخريج العم بابكر
رجوع فوزى لامريكا
والباقر.......
الباقر تانى مالو؟
فى شنو؟
انتظرونا غدا

أها يا جماعة الحمدالله عم بابكر عمل العملية وبقي في خيرين تلاتة

يلا يا عم راشد باقي لينا عرس سميرة خلينا نفرح بالبنية

مستنيين حلقة بكرة علي أحرمن الجمر

ان شاء الله يا بنتى يا هنوية
وتسلمى كتير

مبروك البيت الجديد يا بنتى يا هبوية
وان شاء الله الدار ترحب بيكم
وجعل الله منزلكم عامرا
ولك التحية