مسلسل ( اولاد الذوات) الحلقة السابعة

( فى منزل علوية)
تخاطب علوية بنتها سميرة:-
- سميرة.... يا بت يا ( قشيرة)
- نعم ...نعم يمة...
- النعامة التزوزى بيك ... تعال انسلى لى برة انا دايراك
- كويس يمة ... دقيقة بس خلى المسلسل ينتهى
- سلة عين بى عتلة ... بركت الله .... يا بت ما تجى ... تجيك الطاوية حبالا
- يمة يا خى ما دعينى ساكت... اها... اها جيت فى شنو؟( بى زهج)
- الشنينة ام قرينات.. اتى المسلسلات دى ما بتفترى منها.... ينتهى المسلسل ده ... تقبلى على التانى.... احى انا .... احى عليك
- يعنى يمة اسوى شنو .... اى حاجة انا من الصباح عملتها.... قشيت الحوش..... وغسلت العدة... وسويت ليكم الشاى .......وعملت الفطور ......ووديت فطور حبوبة.....والله يا امى انتى اصلك ما بتريحى الزول
- الراحة التضوقيها فى ود اللحد.... شحدتا ربى عليك
-( بى طنطنة)ان شاء الله اموت هسى دى عشان ارتاح من نقتكم دى
- اسمعى .... تعالى لى جاى .... انتى خضر ود بخيتة ده ما جا من السعودية مالك ما مشيتى لى خالتك بخيتة وحمدلتى ليها السلامة فى جية ولدا؟
- امش بى وين يا امى ... هو انتو مدنى فرصة... قومى سوى داك.... شوفى داك ... انا زاتى المرقة نسيتا من زمان
- ينسوك فى بص السيرة.... قومى.... قومى خشى استحمى واتنضفى ... وابقى بت زى البنات... وامشى اتحمدلى السلامة لى خالتك
- وهو انتى من بتين يمة قاعدة تقولى امشى اعملى الواجب لى فلان ولا لى ناس علان.... وبعدين اشمعنى خضر يعنى.. ما فى ناس كتار جو من الامارات والبحرين.. والسعودية ..وكل دول المنطقة العربية والاجنبية( تضحك) ما قلتى لى امشى اتحمدلى ليهم السلامة
- اكان بتقصدى جية صديق م ود بتول من الامارات ولا بتقصدى جية عثمان ود حسنة من السعودية ... انا ديل نسوان ما لازماتنى ومشاكلاهن من بدرى... وقاطعة كراعى منهن من ما جنى فى بكا خالى الامين
- هن كانن بى عذرهن ... وجنك.. ووصلنك... وعزنك .... و ورنك عذرهن
-( علوية تحاكى بتها) جنك....ووصلنك... وعزنك.... اعزوا فيك باقى النهار ده بركت الليل الامسا والاوكات الخمسة...
- اتى يا امى النصيحة اصلك ما بتدوريها.... بعدين خدر ود بخيتة ده والله انا ما نازل لى من زورى.... من اشوف خلقتو دى بطنى بتطم من الرجال لى حدهم
- يا بت...اتى عويرة ... خضر الليلة صبح اهم شاب فى الحلة دى
- هى....اهمية شنو البقت على خدر...( قال اهمية قال( فى سرها)
- خدر يا غبيانة ... اولك يا بادى جاى من الخارج بالشى التقيل.... يعلم الله الشنط جايب ليها عتالة مخصوص
وداك يا العفش يا يمة الما خمج .. ولا لعب... خدر....خدر اريتو عريس بتى بعد الحال
- ايوااااااا اتاريك ...... انتى من قبيل تسوى لى قومى يا بت .....وحمدلى السلامة.... وابقى زى البنات
-اااااى مالو انا دايرة ليك السمح يا بوم
- هو انا يمة خدر ده بكرهو عمى... ولو بقى اخر راجل فى الدنيا انا ما بعرسو..... بعدين يمة انتى دايرانى اتخفف وو.......
-( تقاطعها امها )الخفة التجيك فى عقلك.... سليتى روحى.... اتى اصلك من يومك شوم... اها اقعدى لى كدى زى كلب الحراسة لا جنا لا تنى.... صاحباتك كلهن اتعرسن ... وولدن.... ومبسوطات
- اى زول بى قسمتو
- يقسمك القطر اللى اقطعك حتة حتة
- امين
قلتى شنو..... امشى منى ... طيرى من قدامى....
- طايرة
( يطرق الباب زائر)وتنادى علوية بتها لتفتح الباب
-قشيرة.... قشيرة... تعالى افتحى الباب ده.... افتح راسك ويكتب خلاسك
- حاضر( اوف)
تفتح سميرة الباب وتدخل نفيسة وبصحبتها حلوم
-اهلا نفيسة اهلا حلوم الحمد لله الجيتن عشان تريحنى من امى دى
- ومالا امك معاك
- زى ما انتى عارفة يا نفيسة نقتا الما بتخليها دى
- تضحكان سويا
- ابوك كيف يا حلوم كويس
- كويس والحمد لله
- ارحكن.. ارح ... تعالن جوة البرندة... والله الليلة المسلسل كان سمح سماحة
- وهسة نحن حالتو جايين نحضر معاك حلقة الليلة
- فى قناة تانية قاعدة تجيبو.. تعالن
يدخلن الى البرندة بعد ان سلمن على خالتهن علوية
- اهلا يا بناتى اتفضلن
- انتى الفضيلة يا خالتى علوية( حلوم فى ادب واحترام)
- تسلمى اتى يا الرايقة الما متضايقة.... اريتك بت السرور والضرور.... موش زى......
- زى منو يا امى
- زى ديك العدة ان خلوهو وسخا وان نهروه كسرا
- الله يسامحك يمة... والله باكر يجينى عدلى وتقولى يا حليل سميرة
- ان شااااااااااء الله يا بتى داك ما يوم المنى ... بس اتى اسمعى كلام امك ( البتحبك)ودايرة سعدك... الله يخفف سعدك يا بتى يا سميرة
- امييييييييين ( البنات بى ضحكة عالية وطويلة)
غدا حلقة جديدة من ( اولاد الذوات)
ملحوظة:-
اسف جدا لتأخر زمن المسلسل نسبة لانقطاع الكهرباء
ولكم كل التحية
( ده عشان هبة وهنوية ما ينبحنى...الحلقة اتأخرت.. الحلقة اتأخرت) يأخركن بتاع الركشة يوم وقفة العيد واتن جايات من السوق بركت الله

اااااااااااامين

انت يا وليد بناتى ديل زعلان منهن للدرجة دى
وكمان معاها اااااامين
هوى يا استاذ بناتى ديل ما تدعيهن
مسلسلى ده هن اكتر ناس بتابعوهو
وكمان بكتبو كلام جميل
وانا بضحك معاهن
تقوم انت تقول ليهن ااااامين
لا انا ما برضى ليهن

انت يا وليد صحي مالك علينا

بعدين انا زاتي الحمدالله اصلي ما بركب الركشات

ويا عم راشد انت خالتي علوية دي مالها دعاااية كده

والله بطريقتها دي تمرق سميرة دي من الجنة وصقطها

والله العظيم يا بناتى انا لمن بكتب فى الحلقة السابع قلت بناتى ديل ح يقولوا علوية دى مالا دعاية كده
اها قمت كتبت اعتذار بسبب الكهرباء
وبدون ما اشعر لقيت علوية نطت لى وكتبت دعاها عليكن
لكن الغريبة وليد قال امين
وانا قلت ليهو هوى يا وليد انا بناتى ديل ما قاعد ارضى ليهن
وانا والله ما دعيتكن دى خالتكن علوية نطت بين السطور وكتبت كده
والحمد لله انكن ما بتركبن ركشات
لكن ظنى انكن بتحبن المسلسلات زى صاحباتكن سميرة وحلوم ونفيسة
بس يعنى ما علقتن على جية خدر ( غريبة دى فاتت عليكن كيف ؟)
لكن كل الود والاحترام
ونتلاقى بكرة فى حلقة جديدة( اوعى تفوتكن حلقة بكرة.... مسخنة شديد)
وبدون دعايات كمان

راشد حسن طه كتب:

يأخركن بتاع الركشة يوم وقفة العيد واتن جايات من السوق بركت الله

اميـــــــــــــــــــــــــــــــــــــــــــــن