- يا حلوم
- ااااى يا عصام
- تعالى عليك الله جهزى حاجات ابوى دى ودخليها فى الشنطة عشان بكرة ما نتاخر فى القيام للخرطوم
-كويس يا عصام ... بس خلينى انتهى من غسيل الهدوم دى واجى على التانيات
- يا اولاد ...
- ايوة يابا
- تعالو لى بى جاى
- ااااى يا ابوى
- يا اولادى ما تنسوا اى حاجة مهمة ... شيلو لى ملايتى والرادى حقى والعكاز والحقة... بعدين يا حلوم ما تنسى معاك الفردة البتغطى بيها
- سمح يا ابوى
تدخل نفيسة :-
- حلوم ما خلاس انتهيتى
- قربت يا نفيسة
- هاكى انا كويت ليك الهدوم حقات غسيل الصباح
- تشكرى يا زوق... والله فاقدة سميرة يا نفيسة فى اليوم جه
- سميرة يا اختى الليلة فى عالم تانى
- ااااى والله ... عقبالك يا نفيسة
- وعقبالك انتى يا حلوم
- انا هينة بس ... انتى ابقى فالحة والكزى لينا الزول ده خليهو يعمل العرس بعد العملية طوالى
- يا حلوم عصام فى شنو ولا فى شنو .... كل حاجة بى وكتا... ولما ربك يقول ليها كونى بتكون
- ازيك يا نفيسة
- اهلا يا عصام.... اها ح تقوموا الساعة كم؟
- سبعة صباحا
- سبعة ما بدرى
- انا لو ما ابوى وسنو كنت داير اقوم من اربعة صباحا
- وليه الاستعجال ده
- عشان نكون اول ناس فى الفحوصات والمقابلة... وعشان امكن يرقدونا فى العنبر طوالى
- يا زول كل شئ ملحوق وان شاء الله ربنا يعدل خطوتكم... وتمشو وتجونا بالسلامة.... ولما يحددوا ليكم العملية عليك الله يا عصام اضرب لى قبال يوم عشان نجى نحضرا
- ليه التعب ده يا نفيسة
- تعب شنو يا ود الناس.... نحن اهل يا خى.... وجارك القريب ولا ود امك البعيد
- الله يبارك فيك يا نفيسة ... طول عمرك اصيلة
-حلوم:يا ربى الحاصل شنو هسة عن ناس سميرة
- والله يا حلوم ما عارفة ... يا ربى وصلوا لى شنو؟
فى منزل ناس سميرة كانت الزغاريد والغنا حدها السما
والكبار والصغار مبتهجين
وكانت البنات يغنين اغانى السيرة
اما النسوان الكبار فقد كانن يجلسن فى البرندة
بينما كان الرجال يجلسون فى غرفة ابو سميرة
وبدأ النقاش لتحديد مواعيد الزواج:-
- شوف يا ابو سميرة.... نحن جينا الليلة .. وجبنا شيلتنا ... وحددنا مواعيدنا وجينا نكلمك بيها
- خير يا التوم يا خوى( التو ده خال خدر)
- وراينا بقى على الجمعة الجاية ... العقد والدخلة ....
- والله انا شايف علوية عندها راى
- ااااى عندى راى... كيف ما عندى راى.... شوف يا التوم يا اخوى ... نحن مما قمنا فى الحلة دى قمنا اهل ... بنحس بى فرح بعض وبنشعر بى الم بعض.... وكلنا مع بعض الملح والملاح... وحاج بابكر عندو عملية يمكن تكون يوم الجمعة الجاى... اقوم انا علوية بعد العشرة الليها سنين اعمل لى عرس لى بتى وجارى راقد فى الخرتوم البلد الما هنا ... راقد بين الحياة والموت؟ الناس اقولوا على شنو؟ ما تتكلموا يا رجال
-......................................................................................................................
- اتبومتو مالكم... انا بقول عرس سميرة يكون الجمعة البعد الجاية( علوية تواصل كلاما) وكل شئ ملحوق.... ونحن زاتنا هسة عندنا حاجات كتيرة ما عملناها لى هسة فى البيت
- التوم: لاكين يا علوية انتى عارفة انو خدر اجازتو ما فضل فيها الا القليل والولد داير ازوج وامشى شهر العسل ويجى راجع ويضبح الحلالة بتاعتو.. و ح يعمل لى سميرة اجراءاتا عشان يسوقا معاهو للسعودية
- ده كلو يا التو ملحوق.. خدر ممكن يمشى السعودية وانا برسل ليهو سميرة هناك... وكل الناس قاعدة تعمل كدة
- ابو سميرة: والله يا التوم علوية كلاما صاح
- التوم : كدى نادو النعوم اختى
- النعوم: فى شنو يا التوم يا اخوى؟
يحكى لها التوم كل شئ
- التوم: اها رايك شنو يا النعوم يا اختى
- والله انا ما عندى كلام... والقول قول علوية ...هى ست الراى .. ونحن ما علينا الا نستجيب لى كلاما.. لانو علوية اختى بتتكلم بى الاصول وكلاما صاح... وخدر لو مستعجل ... انت يا التوم اعقدوا ليهو ان شاء الله هسع دى عشان خدر يقدر يعمل اجراءات سميرة
- علوية: الله يباركك يا النعوم يا اختى ... والله ووالله طول عمرك زولة نصيحة وحقانية وبتعرفى الاصول يا اختى
- خلاس يا جماعة امشو جيبو مولانا الطاهر ود العبيد خليهو يعقد لينا( التوم)
-ابو نفيسة: وانا ما عندى اى مانع...قلت شنو يا علوية؟
- يا حاج انا عاد بتنى فى قولك ... الكلمة كلمتك والشورة شورتك
- النعوم: العيدروس ... هوى يا العيدروس... امشى سوق اخوى التوم وامشوا جيبو مولانا الطاهر.... زغردن يا نسوان
ايوووووووى ايووووووى ايووووووووووووووووووووووووووووى يوى يوى يوى يوى
غدا حلقة جديدة من : ( اولاد الذوات)
(اها ارتحتن يا بناتى هبوية وهنوية اجرن سريع عشان تحضرن العقد.... سريع كل واحدة فيكن تلفح توبا وتجى)
موضوع: مسلسل ( اولاد الذوات ) الحلقة الثامنة عشر 
الخميس 29 أبريل 2010 - 10:57
