( اولاد الذوات الحلقة) الثالثة

يهرع الجميع نحو نفيسة( وبصوت واحد): فى شنو يا بت
- حلوم... حلوم
- حلوم مالا
- حلوم ما لقيتا فى الاوضة
- ام نفيسة: اجى يا بنات امى طارت وين البت دى عمى كسر رقبتا
-بتى مشيت وين يا جماعة... انا.... انا ...انا( يقع بابكر على الارض )
- علوية : سجمى يا بنات امى الراجل عندو السكرى الحقوه... الحقوه ودوه الاسبتالية
( يذهب الجميع الى المستشفى وتبقى نفيسة وحدها بالمنزل)
*وتسرح نفيسة بعيدا وهى تتذكر ذلك اليوم بكل تفاصيله... يوم ان قدم اهل حلوم الى حيهم العمالى فى تلك المدينة الصغيرة
كانت اسرة حلوم اسرة بسيطة وكان حاج بابكر هو عميد تلك الاسرة الذى افنى زهرة شبابه فى ذلك المشروع منذ الاربعينيات
كانت حلوم فتاة فائقة الجمال درست حتى الوسطى فقد حرمتها ظروف الاسرة من مواصلة تعليمها
التحقت حلوم بمدرسة الخياطة المسائية وكانت تخيط لنساء الحى الملابس بقدر استطاعة الجميع
عملت حلوم بالصباح فى السوق فى الكافتيريات مرة والاتصالات مرة حتى تستطيع توفير الدواء لوالدها الذى انهكه المرض وبات يحتاج الى تدخل جراحى سريع
عصام اخو حلوم والفتى المدلل عند والده كان ( ولد خملة)لا يعمل اى شئ ...فاشل فى مدرسته بامتياز... يجيد التسكع فى الضللة نهارا وارتياد الحفلات ليلا
وحتى عندما هاجر عصام خارج السودان فقد تم له ذلك بعد ان اعطاه ابوه كل ما مال المعاش وقروش الحقوق التى اخذها عصام واقنع والده بأنه سيردها اليه حالما يجد عملا فى غربته
انقطعت اخبار عصام بمجرد وصوله لخارج البلاد ولم يعد يتصل بأبيه او شقيقته الا نادرا
وحينما كانت حلوم تذكره بأموال ابيه وضرورة ارجاعها له حتى يتمكنوا من اجراء عملية له كان يوعدها ثم ما يلبث الا وان يقطع اتصالاته بهم عدة سنوات
وجدت حلوم الملاذ الامن فى العلاجات التى استطاعت ان توفرها هى من عملها الليلى بالمنزل ف الخياطة وعملها النهارى فى السوق
تحملت حلوم عبء السنين العشرين لوحدها بينما كان عصام غارقا فى ملذاته بتلك الدولة البترولية
كانت نفيسة تسترجع كل ذلك ودمعة حرى تنزل من خديها وفجأة....... فجأة......
-نفيسة ..... نفيسة...... نفيسة...( صوت شخص ما يهمس)
- ايوة منو.... ده منو ده؟
- دى انا حلوم
- حلوم ..... وين انتى من قبيل؟
- انا كنت هناك مدسية من ابوى
- هناك وين؟
- هناك فى خرابة السرة المجنونة
- الوداك هناك شنو يا حلوم انتى جنيتى فى زول واعى بدسا فى خرابة السرة المجنونة
- انا اصلى كنت خايفة من ابوى شديد
-ابوك هسة فى المستشفى بسبب دستك دى
- تبكى حلوم بحرقة: ابوى مالو اوعى تكون صدمة السكرى جاتو تانى
- ايوة يا حلوم وابوى وامى وخالتى علوية ودوه للمستشفى وان شاء الله يبقى كويس.. ما تقلقى عليهو يا حلوم ابوكى ده انتى متعودة على صدماتو دى.... وهو كمان متعود عليها... هسة بجيبوهو ليك شديد ونصيح
- والله يا نفيسة انا الدنيا دى زاتا ما عارفة موديانى لى وين
- ان شاء الله توديك لى بيت عدلك ياختى ( بى ضحكة)
- بيت عدل ....هو فضل فيها بيت عدل يا نفيسة
- لى ... لى .. يا حلوم بتقولى كده انت حلوة وجميلة ومهذبة والف مين يتمناك
- ان يا نفيسة فضل لى قلب احب بيهو ما انتى عارفة مصايب عصام والظروف الخلانا فيها ... انا يا نفيسة من يوم ماتت امى ما ضقت تانى للدنيا طعم
- يا زولة الموت ده كلنا جايينا بس انتى شدى حيلك وانا واقفة معاك وما تخافى ان شاء الله عم بابكر ببقى كويس ويطيب ونعمل ليهو العملية ونضبح الكرامة ونتلمى كلنا ونفرح بيك كمان يا نفيسة ياختى
- الله كريم على حلوم يا نفيسة الا الدنيا خلاص قضت غرضا والبقت بقت
- لا يا حلوم خليك شجاعة وواثقة برب العالمين
- ونعم بالله
*( طرق بالباب)
- اتفضل ..... اتفضل
- انتى الفضيلة يا نفيسة ( صوت شاب)
- اهلا خضر اهلا بيك ( يدخل خضر ويسلم عليهما)
-ازيك يا نفيسة
- اهلا يا خضر حمد لله على السلامة... كيف حالك وحال خالتى نعيمة
- الله يسلمك الحمد لله كويسين
- وشنو الغيبة الطويلة دى .... انتو يا المغتربين الواحد فيكم بقى زى التلج فى النهار يجيبوهو بى هنا ويسوح بى هنا
- لا والله يا نفيسة اصلوا الغربة شغلا كتير والواحد اهو بقى يرجى الاجازة بفارغ الصبر عشان يجى يشوف اهلو
( تسيل دمعة على خد حلوم)
غدا حلقة جديدة من مسلسل ( اولاد الذوات)

شكرا جزيلا ابنى محمد كمال
وربنا يوفقك فى دراستك
وشد حيلك
ما تبقى لينا زى ناس كاسروكا وطارق مختار وسفارى
دايرين نتيجة وشهادة بتاعت صيدلة مكربة
امنياتى لك بالتوفيق با بنى
وسلامى لكل من معاك هناك فى بلاد اكشى كومار