مسلسل ( اولاد الذوات) الحلقة الثالثة والعشرين الحلقةالاخيرة

-يا حلوم انتى الليلة ناس سميرة بجو من شهر العسل
- ايوة انا سمعت قبيل خالتى علوية بتتكلم مع ابوى
- بالله عليك الله عاينى الايام دى مشت بسرعة كيف؟
- ااااى والله
وفى الظهيرة كانت هنالك سيارة تحمل سميرة وخدر
ونزل العروسان وسط زغاريد اهليهما
وتم ضبح الكرامة التى دعى لها كل اهل الحلة فى اليوم التانى
عاد عصام الى المملكة العربية السعودية بعد ان اوشكت اجازته على الانتهاء
- خلاص يا سميرة انا بعمل ليك اجراءاتك هناك وبرسل ليك بسرعة ان شاء الله
- خير يا خدر بس انت خلى بالك من نفسك وربنا يوصلك بالسلامة
- ان شاء الله
فى صباح اليوم الثانى غادر خدر راجعا الى عمله
اما سميرة فقد كانت تتواصل معه بالتلفون
- اجراءاتك قربت تنتهى بس باقى خطوتين كده
- كويس ... انا هنا طلعت الجواز ووثقت القسيمة
- كويس جدا
وبعد مضى شهر غادرت سميرة الى السعودية بعد ان ودعت صاحباتها نفيسة وحلوم بالدموع
- والله ح تخلى لينا الحلة مسيييييييخة يا سميرة
- انتو برضو ح تفرقوا على كتير... لاكين انا برسل تلفونى عشان تضربو لى
- هى تضربى لينا انتى ... من هسة دايرة تتعلمى بخالة المغتربين ( تضحك حلوم)
غادرت سميرة الى السعودية ومن هنالك اتصلت بصاحباتها واعطتهن رقم تلفونا الجديد
- هاك يا نفيسة احفظى الرقم ده فى الكراس عشان لو دايرين نضرب ليها نمشى دكان الاتصالات
- كويس يا حلوم
غادر فوزى راجعا الى امريكا وبصحبته طفله الوحيد
اما عصام فقد قرر ان يغادر هو الاخر على ان يعود بعد ستة اشهر للزواج من نفيسة:-
- ان شاء الله يا نفيسة امشى اجهز امورى واجى اعمل الزواج
- خير يا عصام .. خلى بالك من نفسك... ووداعة الله يا عصام
بكت حلوم كثيرا وهى تودع اخاها
وبكت نفيسة كثيرا وهى تتذكر غياب عصام الطويل
وكانت تؤمل الا يطول غياب عصام هذه المرة
كانت القرية تبكى ايضا وهى تودع ابناءها الذين توافدوا اليها
وعطروا لياليها بالحضور البهى
- علوية: بالله شوف يا حاج بابكر سفر الجنيات ديل مسخ علينا اشللة كيف؟
- والله يا علوية يا اختى انا حاسى زى الشالو منى جزء من روحى
جلست نفيسة وحلوم يتذكران الايام الجميلة
جية عصام
جية فوزى
جية خدر
زواج سميرة
وسفر الجميع الى الغربة
هذا السفر الطويل الذى اخذ عمر الشباب بعيدا عن اهاليهم
اليس لهذا السفر نهاية؟
يمكن ان تكون الاجابة نعم
ويمكن ان تكون لا
( انتهى الجزء الاول من مسلسل اولاد الذوات)
غدا الجزء الثانى ان شاء الله

يا سلااام يا عم راشد

بالجد نهاية سعيدة ليهم كلهم

بس يا عم راشد كان يعرسو لنفيسة وعصاااام ديل

عشان تكون النهاااااية أسعد

في انتظار الجزء الثاني من أولاد الذوات

زواج نفيسة وحلوم فى الجزء التانى
نفيسة ح تتجوز عصام
اما حلوم ح تتزوج منو؟
خليها مفاجأة

غدا ان شاء الله الجزء الثانى من مسلسل اولاد الذوات