مسلسل ( اولاد الذوات ) الحلقة الخامسة عشر

- شوف يا خدر يا اخوى انا من زمان منتظرك عشان اتكلم معاك فى موضوع
- فى شنو يا اخوى
- انا الباقر ده والحمد لله ما سغير فى الدنيا دى.... انا اكبر منك بى عشر سنين.... شقيت وتعبت فى الدنيا دى شقاوة كبيرة
- الكلام ده هسة لزوموا شنو يا الباقر
- اصلو الكلام ده انا داير اقول ليك من خلالو انو الباقر اخوك ده ما طالب منك كتير
- داير شنو يا الباقر
- دايرك تتنازل لى عن الحواشة
- الحواشة بتاعت ابوى
- ايوة
- لاكين الحواشة دى ابوى قال ووصى قبل ما يموت انها تفضل لينا كلنا عشان ما تتباع لى زول غريب
- وانا هسة داير ابيعا يا خدر
- يا الباقر انا بعرفك كويس... انت دايرنى انا اتنازل ليك عن الحواشة عشان بكرة تمشى تبيعا
- ومالو يا اخى ما نبيعا ونستفيد منها بدل المشاركة فى الزراعة مع الناس... وهم مستفيدين منها اكتر منى ومنك
- المشاركننا ديل احرص على الحواشة منى ومنك... وبعدين يا اخى كتر خيرن... زارعنها وتعبانين بى وراها... وانت مبارى لى الضللة والكلام الفارغ.... ده غير السم الهارى البتطفح فيهو كل يوم بالليل
- شوف يا خدر انا السم الهارى ده ما قاعد اشحدك قروشو.... ولو انت ما داير تتنازل لى من الحواشة... انا حقى بعرف ابيعوا كيف
- اعلى ما فى خيلك اركبو.... وانا الحواشة ما بتنازل ليك منها
- نشوف يا خدر
- فى شنو يا اولاد مالكم صوتكم عالى فى السما
- تعالى شوفى الباقر ولدك يا امى ... قال نبيع الحواشة
- ونبيعا لى شنو يا الفالح الناجح
- نبيعا عشان...... عشان.....
- عشان شنو يا سجمان يا رمدان..... نبيعا عشان تاخد نصيبك .... وياكلو منك السعاليق الانت مباريهم ديل
- انا داير القروش عشان استثمرا
- تستثمرا وين يا ابو العريف
- فى الخرتوم
- اخرتم قلبك ومصارينك... وانا بتدور تخلينى لى منو.... ما كفاية خدر اخوك ... جايينى بعد خمسة سنة
- انا يمة الغربة خلاس كجنتها وكرهتها وتانى ما راجع
- وح تعمل شنو يا خدر( الباقلر)
- ح اقعد ازرع الارض
- خلاس عشان الباقر نضم فيها حلت ليك
- احلل عصابتك اتا ما تخلى اخوك وكت الله هداهو من الغربة ... خلى اللى يزرع الارض... بدل ما اتا قاعد مبارى الفارغة والمقدودة
- انا الزراعة وعيشة الخلال ما واقعة لى فى راسى
- هو اتا راسك القاعد يقع فيهو شنو غير الهباب البتتهببو كلو يوم ده.... شوف يا ولد هوى... انا مسخرة وقلت ادب ما بنفعن معاى.... مافى بيع لشللة يعنى مافى بيع وطق راسك فى الحيطة والكلام ده لو ما عاجبك البحر قريب
- انا ما بمشى البحر لاكين البيت ده من الليلة خليتو ليكم
- طير الله لا عادك.... ما عافية ليك وما رضيانة عنك دنيا واخرة.... الله لا قز فيك بركة
- عليك الله يا امى خليهو ... ما تحرقى دمك وراهو ساكت ... هو اصلو من زمان ما زول حارة.... من كنا سغار... ما كان عندو حاجة غير النوم... ومشاغلة البنات فى الحلة.... الباقر يا امى ما تعب فى الدنيا دى... لامن الزمن جرى بيهو .. ولما شعر انو ما عمل اى حاجة لى روحو وعمرو مشى داير يلقاها باردة
- والله صدقت يا ولدى... اصلو ولد من يومو ما نافع.... ياكل وينوم ... ويستحمى ... ويغسل هدومو ويكويها... دى كل حياتو
- اها يمة بعد ده ما نعمل الخطوة الاخيرة فى موضوع سميرة
- اصبر يا ولدى خلى عصام صاحبك يعمل عملية ابوهو وبعدين نمشى نحدد مواعيد العرس
- خير يمة انا ذاتى من دربى ده ماشى لى عصام
(فى منزل علوية ):-
- انتى يا امى عصام داير يعمل عملية ابوهو متين؟
- والله يا بتى ما عارفة... لاكين شايفاهو اليوم داك وداهو للحكيم وعمل ليهم الفحوصات
- انا زاتى ما سألت حلوم عن الموضوع ده.... عصام لخمنا بى جيتو
- غايتو كان ما اخاف الكضب اقول ليك عصام ده ما ظنيتو يعمل لى ابوهو العملية
- ليه يا امى
- اتى ما شفتى الود جا عامل كيف ... شايل ليهو حبيبة شنط وشوية اكياس.... عاد ده حال زول ليهو عشرة سنة اغتراب
- هوى يمة المغتربين بقو مفتحين .... اتى من زمن المغترب البجى شايل شنط.... الضحاكات... القروش يا حاجة اهم حاجة
- والله صحى يا بتى.... برضو فوزى ما شايفاهو جاى بى شنط
- قلنا ليك الضحاكات
- الضحاكات ديل شنو يا بت
- القروش ... القروش... المصارى.... الفلوس .... القريشات يمة
تدخل نفيسة وحلوموتناديان سميرة
- خشن يا بنات مالكن
- دايرنك فى موضوع مهم يا سميرة
- سمح كدى ادخلن لى جوة
- معليش بس تعالى سريع
- خوفتنى يا بنات مالكن فى شنو
غدا حلقة جديدة من مسلسل : ( اولاد الذوات)