مسلسل ( أولاد الذوات) الحلقة الخامسة

تدخل حلوم على والدها ويحادثها (بشئ من الحنين والاعتذار والتوضيخ المهذب):-
يا بتى اعذرينى انتى عارفة انو المرض محرق لى روحى وانتى مما تجيبى لى سيرة( قشرام) اخوك ده انا شواطينى بنقزو ... يا بت يا حلوم هو اصلو انا ح اعيش لمتين ... يا بت ابوك خلاص ... يلا حسن الختام ... الدنيا قضت غرصا فينا.... ابوك ده من مواليد تساب تمانية واربعين... لف المشروع ده بيت بيت.. وارض ارض... اى واطة انا خططتها وفى النهاية مرقت بلا واطة( يضحك بصوت عالى فيه شئ من السخرية والمرارة) ابوك .... ما خليت لى قرية فى المشروع ده ما سكنت فيها.... كل واحد فيكم مولود فى طين الجزيرة الحنينة دى
يا بت يا خلوم ما تزعلى منى
- تبكى خلوم بكاء شديدا وهى تحتضن والدها: انا ازعل منك انت يا ابوى..... انت الخير والبركة وربنا يديك طولة العمر
يتدخل والد نفيسة: خلاص يا جماعة خلونا من المطايبات دى وسوقى العجوز( بضحكة) ده على الاوضة القدامية بتاعتى ديك وامشى انتى واختك نفيسة سو لينا الغدا
- انا عجوز يا ابو نفيسة حرم انت مولود قبالى بى عشرين سنة.... انا لامن جيت حفلة السرة بت حاج حسن انا شايفك بى شنبك ده تعرض وتشيل فى الشبال من ام نفيسة حية الدنيا دى
- ابو نفيسة : والله عال انت يا حاج السكرى ده طلع ليك فى راسك وبقيت تخرف ... انا اكبر منك بى غشرين سنة.... على الطلاق انا اصغر منك ومن..........0 تتدخل ام نفيسة: ومن منو يا راجل
- ومن بتى نفيسة ها ..ها...ها...هاا.هااااااااا
( فى البرندة الورانية جلس خضر يتجاب اطراف الحديث مع علوية:-
- اها يا ولدى يا خدر ان شاء الله جاى تعرس( بخبث وفضول)
- والله .... فى الحقيقة.....
- مالك انت يا ولدى يا خدر كلما اجيب ليك سيرة العرس بتتعشرق فى الكلام... امك النعوم مانعاك لى هسة من العرس( بضحكة)
- ابدا يا خالتى علوية انا امى النعوم الله يديها العافية من زمان زانة لى اضانى بالعرس .. مما اغتربت هى دايرانى اعرس قالت دايرة تشوف جناى... بس انا شوية كده عندى حبة ترتيبات... وكمان داير ابنى واطات ابوى الله يرحمو
- هة واطات ابوك الليها عشرين سنة دى داير تبنيها انت براك؟ انت قايل البنا لعب ولا لعب .. يا ولدى الطوب الليلة الاف بتاعو بى كم والاسمنت طار السما ... وبعدين يا خدر يا ولدى اخوك الباقر بسو فى شنو ما يبنيهو هو البيت
- الباقر يا خالتى علوية انتى عارفة ظروفو من ادوهو المعاش الاختيارى فى مصلحة البريد بقى رزق اليوم باليوم... و....
- تقاطعه علوية رزق يوم شنو يا ولدى هو الباقر ما كلمك
-كلمنى بى شنو يا خالتى علوية
- لا......لا ...لا ..لا ما ..... ما ...اصلو..الباقر....
غدا حلقة جديدة من ( اولاد الذوات)
-[img][/img][img][/img]

والله الظروف يا بتى يا هبة هى الما مخليانى
لكن تانى كل يوم فى حلقة جديدة
بكرة بتعرفى الباقر الحاصل عليهو شنو
ما تشفقى
وانتظرى المسلسل قبل نشرة اتناشر ظهرا
وتحياتى لك يا راقية

ما يتأخر يا محمدكمال احتياطى كرومى
انا زى سادومبا بجى سرييييييييييييييييع

المبدع استاذ راشد
تحية طيبه
طبعا انا كل يوم بجي بقرأ المسلسل من اول حلقة
عشان ما انسي حااااجة بس علي قولة هبوية كان تورينا
الباقر ده مالو لكن ما مشكلة بكرة مستنييين الحلقة السادسة
بس ما تتأخر علينا
في انتظار ابداعاتك
ودمت بخير

جدا يا بنتى يا Hanoya
اتن ما تشفقن
والمسلسل متواصل وما فى عياب
بس ما تشفقن
ولوكن الصبر
صبر يبل الابرى ما عندكن
ولك خالص الود والاحترام