مسلسل ( اولاد الذوات ) الحلقة التاسعة

فى دكان الاتصالات يرن جرس التلفون يرفع السماعة صاحب الدكان:-
- الو
- الو ازيك يا عبده
- اهلا .. ازيك يا عصام
- عليك الله داير حلوم اختى هسة وضرورى جدا
- كويس... بس ادينى خمسة دقايق
- اسرع لاكين
- جدا ...جدا يا عصام
يضع عبده السماعة ويذهب لمنزل ناس حلوم
فى بيت ناس عصام كانت حلوم داخل المطبخ ... تسمع حلوم طرق بالباب وصوت ينادى.. يا حلوم ...حلوم هوووى
- ايوة يا عبده اتفضل
- شكرا مستعجل ... الدكان خليتو مافيهو زول.... عصام اخوك دايرك فى التلفون
- كويس هسى بجى
- ده منو يا حلوم؟
- ده عبده يا بوى
- مالو فى شنو؟
- قال عصام دايرنى فى التلفون
- كويس امشى شوفيهو وما تتأخرى
- حاضر يابا
تذهب حلوم لدكان عبده وتنتظر مكالمة اخوها عصام
وبعد مسافة زمن يضرب عصام التلفون:-
- الو
- الو ... اهلا يا عصام ... كيفك ...وكيف عامل
- حلوم؟ ازيك كيفك انتى وكيف ابوى
- ابوى كويس يا عصام بس المرض كتر عليهو
- الله يكون فى عونو ... ويديهو العافية
- الله يعافيك يا عصام.... اها ما داير تجينا يعنى يا عصام( تسيل من عيونا دموع تكفكفها بطرف توبا سريعا حتى لا يراها عبده)
- ما انا يا حلوم ضربت ليك عشان الموضوع ده..... انا نازل السودان قبل عيد الضحية بى يومين
- كويس والله ( بى فرحة شديدة)
- وكمان عندى ليك اخبار سمحة شديد
- اخبار شنو يا عصام..... شوقتنى
- كدى اصبرى لامن اجى... ما تشفقى
- كلنا مشتاقين ليك يا عصام
- والله انا مشتاق ليكم كتيييير.... سلمى على ابوى ..... وقولى ليهو عصام قال ليك انا جاى عشان اعمل ليك العملية
- صحى.... صحى .. يا عصام
- اااى ان شاء الله يا حلوم.... اها يا اختى ودعتك الله
- ودعتك الله يا اخوى
تذهب حلوم الى منزلهم وتحدث ابوها بما قاله لها اخوها عصام
- ربنا يجيبو بالسلامة.... اكان ما يبقى زى كل مرة..... اقول انا جاى ويقوم ما يجى
- لا لا يا ابوى المرة دى عصام كان جادى شديد
- سمح قالو الفى القدر بتجيبو المقرافة
-( تضحك حلوم ) والله انت يا ابوى عندك جنس امثال
- الدنيا يا بتى علمتنا.... ابوك ده قاعد من زمن الانجليز.... راسى ده كلو شيب ... من شنو؟ من التجارب والظروف العشتها
- الله يديك العافية وبكرة تصبح شديد وطيب بعد ما نعمل ليك العملية
تذهب حلوم الى المطبخ وتنزل حلة الملاح وتذهب الى بيت ناس نفيسة
- نفيسة... نفيسة
- ااااى ...اااى يا حلوم
- عندى ليك خبر بى مليون جنيه
- مليون جنيه عديييل كده..... فى شنو ؟
- تسوق حلوم نفيسة لداخل الاوضة: عصام... عصام ... اخوى قال جاى قبل عيد الضحية بى يومين تلاتة
- بالجد ؟ ربنا يجيبو بالسلامة.... اخيرا يا عصام.... والله يا حلوم فرحتينى ... الله يفرحك
- ( حلوم تكاوى نفيسة بصوت ناعم شديييييد) والله يا حلوم فرحتينى.... الله يفرحك
- تفكها حلوم بالسفنجة وتضحكان ضحكة طوييلة
تدخل عليهن سميرة
- بتضحكن مالكن ؟.... ضحكن معاكن
- عصام ... عصام اخو حلوم جاى قبل الضحية بى يومين تلاتة
- عصام جاى ؟ بالجد يا حلوم؟ ربنا يجيبو بالسلامة يا حلوم
- اميين يا سميرة... اها شعورك شنو لى يوم بكرة؟
- بكرة فى شنو؟
- نفيسة: الله .... الله يا سميرة.... يوم بكرة ده بتنسى.... بكرة ما فطور خدر فى بيتكم ... اتى نسيتى ولا شنو( تضحك)
- اااااا
- اااااا يعنى عاملة فيها ما شغالة بالموضوع( تضحك حلوم)
- سميرة: شوفن يا بنات... صحيح اى واحدة مننا دايرة يكون ليها بيتا... واولادا.... وراجل حنييييين... وطييييب
- وبعدين
- بعدين شنو.... اى زول عندو قسمتو..... واتن والله كلامكن لى اليوم داك حيرنى.... والله انا هسة ما عارفة زاتو اقول ليكن شنو..... حاسة انى بقيت مترددة..... لانو انا خدر ده اصلا ما ردتو.... لكن ممكن انا اكون غلطانة فى راى فيهو..... وامكن اكون ظلمتو.... وممكن اكون انا على حق فى راى فيهو
- حلوم: اسمعى يا سميرة كدى اتى صلى ركعتين صلاة استخارة... وشوفى بعد داك البحصل شنو
- كويس يا حلوم.... الله يقدم الفيها الخير
- نفيسة (بى ضحك ): يا يوم بكرة ما تسرع تخفف لى نار وجدى( تغنيها)
- سميرة: نفيسة هوى انا والله افكك بى شبشبى ده اعمل ليك نزيف داخلى
- نزيف؟ نزيف داخلى.؟.. وين؟ فى القلب؟( تضحك)
- حلوم : خلاس ما تتشاكلن فينا البنات التقول راجلكن واحد..... ارحكن ... ارحكن نشوف المسلسل
تذهب البنات لى بيت ناس سميرة وفى الشارع يقابلهن سعد ود الرضية
- سعد : يا بنات ... ازيكن
- اهلا سعد 0 (الجميع)
- عليكن الله كلمن اماتكن قولن ليهن امى الرضية قالت ليكم يوم السبت تجن تتفضلن معانا فطور... سماية اختى رشا
- كويس يا سعد.... وكمان مبروك الوليد ... نحن اليوم داك جينا... وحمدلنا السلامة
- العقبال عندكن
- تضحك البنات: امييييين
عند وصول سميرة وحلوم ونفيسة لى بيت ناس سميرة يلمحن عربة فاخرة جدا محملة بمواد غذائية... وشنط تحمل ملابس
وتقف البنات لتعرف من بداخل هذه العربة
تقترب العربة رويدا... رويدا..... تقترب العربة..... تقترب... وتقترب
وكانت مفاجأة كبيرة للبنات عندما رأين من بداخل العربة الفاااارهة
يكون ده منو يا بناتى ( هبة وهنويا) بكرة ح تعرفن وح تندهشن شديييييييد
غدا حلقة جديدة من مسلسل ( اولاد الذوات)

نهارك سعيد يا عم راشد

انا في البداية قلتا خلاص عصام ده نازل السودان عشان يخطب سميرة
لكن هو قال جاي قبل عيد الضحية بيومين
ياربي الجاء بشنطه وحاجاته ده منو
شكله عريس لقطة لسميرة
كرررررر علي يا خدر
حقك رااااااح
ده منو الجاي
يطيرك ده
الله يستر

بنتى هنوية
السلام عليكم
واسعد الله نهارك بكل خير
انتى خدر ده شكلك متعاطفة معاهو شديد
( يا بت ما تفكى عمك بالشبشب)
متعاطفة معاهو انا قاصد بيها انك حزينة لاجله
اما الزول الجاى شايل الشنط ده
ده زول مفاجأة كبييييييييرة
بكرة احضرى المسلسل بدرى
وكلمى صاحبتك هبة بت الحصاحيصا
هى صحى الليلة وينا؟
تكون قاعدة مع خالتا علوية؟

الله يجازى محنك يا هبة
والله ضحكتينى شديد
اتى ما عارفة انو هنوية لا بتركب ركشات ولا بتضرب منكير
انا عارفا
كدى ده كلو هين هنوية دى لامن تجيك وتحضر معاك المسلسل امك ما بتدعيها ولا شنو يا بتى يا هنوية؟
بعدين يا هبة يا بتى اذا جاكن خدر داخل عليكن واتقدم ليك بترضى بيهو ولا بتبقى زى سميرة رافعة نخريك فى السماء
والله يا هبة يا بتى المسلسل ده فيهو مفاجات ح تخليكن تشهقن زى المأذون بتاع خالتى علوية
ويا هنوية انا من هسة بوصيك لامن تمشى ناس هبوية امسكى خشمك عليك ما يفكوك بى شبشب

كدى الشهقة خليها
اتى منكيرك ده جانى كلام انو شدة
بعدين فى هلالابية بتضرب منكير احمر
يا بتى يا هبوية بااااالغتى

ياخوانا نعلق علي المسلسل ولا التعليقات البعد المسلسل

كويس جدا غيظيهم قدر ما تقدرى
اتى يا هنوية بتضحكى مالك
بفكك بى شبشبى ده هسى دى
واديك دعوتين من حقات خالتك علوية
ويا ولدى يا محمد كمال مالك علينا وعلى بناتى ديل حاجات بتاعت هلالاب
اقرأ مسلسلك
وعلق كويس
اعلقوك من عصباتك

هبوية انتي وعم راشد ناسين انو انا الجمعة والسبت برة الشبكة لكن ما مشكلة
المسلسل فاتني منها حلقة واحدة بس يعني حصلتها
بعدين يا عم راشد انت في حاجة ما عارفها
اقولها ليك ولا اخلي هبوية تكلمك بيها

هبوية انتي وعم راشد ناسين انو انا الجمعة والسبت برة الشبكة لكن ما مشكلة

المسلسل فاتني منها حلقة واحدة بس يعني حصلتها

بعدين يا عم راشد انت في حاجة ما عارفها

اقولها ليك ولا اخلي هبوية تكلمك بيها

انتى يا هنوية خشمك ده ما حقك
كلمينى انتى
اما هبة لو عندها حاجة بتكلمنى هى
والله يا هنوية ضحكتينى شديد
خلاص انتى خالتك علوية هدت فيك
وتعالى هنا النسألك انتى السبت والجمعة برة الشبكة ليه
كلمينى يا بتى وورينى عشان نعمل ليك حساب فى المسلسل
وتقدرى تتابعى معانا

راشد حسن طه كتب:

انتى يا هنوية خشمك ده ما حقك
كلمينى انتى
اما هبة لو عندها حاجة بتكلمنى هى
والله يا هنوية ضحكتينى شديد
خلاص انتى خالتك علوية هدت فيك
وتعالى هنا النسألك انتى السبت والجمعة برة الشبكة ليه
كلمينى يا بتى وورينى عشان نعمل ليك حساب فى المسلسل
وتقدرى تتابعى معانا

يا عم راشد نهارك سعيد

والله افتقدنا طلتك علينا

طبعا انا السبت والجمعة بكون اجازة

عشان شغالة في البيت بكنار ومتعب

والجهاز بتاعي مخستك في البيت

عشان كده تاني اعمل حسابي في الحلقات

بعدين يا عم راشد انت ما كلموووك

ولا هبة ما ادتك الشمااار ده

خلاص انا بقوله ليك

طبعا انا مريخااااابية علي السكين

يعني انا مع الأحمر الوهاااااااااااااج