مسلسل ( اولاد الذوات ) الحلقة الثامنة

يرحب الجميع بخضر( خاصة الخالة علوية)
- اهلا ... اهلا... اتفضل ... اتفضل يا ولدى
- ازيك يا خالتى علوية كيفك وكيف عمى مختار... وكيفك يا سميرة
- نفيسة وحلوم (بصوت واحد): سميرة براها يا خدر
-( يضحك) اتن لسة فى مقاشرتكن دى لى بعض.... ازيكن يا بنات ... كويسات؟
- سميرة( بى طرف نخرتا) :كويسين
- والله انا قلت اجى اسلم ... بدل الناس ما بجو يسلمو على.( بى عتاب)
- علوية: ابدا والله يا خدر يا ولدى سميرة هسى دى كانت جاياكم فى البيت تسلم عليك وتحمدل السلامة لى حاجة النعوم
- ( حلوم ونفيسة بصوت خافت جدا): جاياك جاياك يا اب شرا
- (سميرة تحدر ليهن وتؤشر لهن بيدها بعد ان سمعت غناهن): اصبرن
( تضحك البنات)
- خدر: شنو يا جماعة ما فى اتفضل لى جوة
- علوية بصوت اعتذارى وبلهفة شديدة: والله يا خدر شغلتنا .. اتفضل... اتفضل لى جوة... تعالى يا سميرة ... امشى سوى ليك ليمون لى خدر
( تضحك حلوم ونفيسة)وتلحظ سميرة ضحكهن وتحدر ليهن وتؤشر لهن بيدها ( اصبرن لى) ثم تذهب للمطبخ لتعمل الليمون
يدخل خدر وخالة علوية وحلوم ونفيسة للبرندة
- كيف ابوك يا حلوم ان شاء الله بقى كويس
- الحمد لله ... ابوى كويس
( علوية تلاحظ بى عين متلصصة لملابس خدر ..بنطلونو... وقميصو.. وكعادة النسوان طبعا اول حاجة بعاينن ليها فى الراجل جزمتو)
- علوية : اها يا خدر يا ولدى ان شاء الله جاى تبنى البيت( تمهد لسؤال جاى ح يكون عن العرس طبعا)
- والله يا خالتى علوية اليوم داك بعد ما فت منكم لمن اتلاقينا عن ناس نفيسة وشاورت الحاجة ... لقيتا مصرة على انو أعرس اول حاجة
- ومالو يا ولدى ... عاد داك ما يوم الهنا.... امك النعوم كلاما صاح ... احسن تعرس يا ولدى وتفرحا و( تفرحنى ) فى سرها
( حلوم ونفيسة يتابعان حديث خدر وعلوية باهتمام عشان يكلمن سميرة ويكاونها ويقعدن يضحكن)
- يا خالتى علوية .. هو العرس ده لعب جهلة صغار... العرس داير تشوف ليك بت حلال( بى حسرة والم متذكرا ما حدث له فى حبه الجارف لى رشا)يواصل خدر : وكمان...... ( تقاطعه علوية)
- كمان شنو ... غايتو انتو يا اولاد الزمن ده .. برى برى منكن.... قسمت بى الله امك النعوم دى عرسوها بى خمسة جنيه
- (نفيسة وحلوم بى صوت واحد يقاطعنها): وانتى يا خالتى علوية عرسوك بى كم ( بى ضحكة)
- انا....انا... (تتلعثم دايرة تكضب): والله والله واتمها بالله انا شيلتى بضربو بيها المثل لى يوم الليلة... اجى اى اى يا يمة
- خدر ( يضحك): بس انا امى زمان قالت لى انو عرسوك بى حنيهين( يضحك الجميع)
- علوية ( بى زعل): انا عرسونى بى جنيهين.... انا اسكراتش..... قسمت بالله مهرى كان تلاتين جنيه دفعن ابو سميرة حى الدنيا ده للرجال فى الجامع ساعة العقد لامن المأذون اتشهق لى يوم الليلة الشهقة الدخلت فيهو ما مرقت
(يضحك الجميع)
تدخل سميرة وهى تحمل العصير فى الصينية وفوقا كباية( البلمين):: اتفضل يا خدر.... نفيسة عليكى الله جيبى الطربيزة ديك
- شكرا ... شكرا يا سميرة ... ان شاء الله نشرب عصير فرحك
- علوية : يامين يا رب العالمين
- حلوم ونفيسة( بى ضحكة مكاواة): اميييييييييييين
- سميرة ( بى زعل ولائمة فايتة الحد): هو الداير اعرس منو ... انا شكيت ليكن... ولا بكيت ليكن... عرس شنو فى السخانة دى؟
- نفيسة(دايرة تكاوى): كيف الكلام ده يا سميرة انتى ما شاء الله سمحة خلقة واخلاق واى واحد يتمناك
- حلوم: اى والله يا سميرة .... مالك ... ما هدى بنية زى العسل والف من يتمناك
- علوية( فى سرها):انجهنها... انجهنها .... قل هو الله احد.... انجهكن الشيطان..... بس وتانى بس والتالتة للجيران
- خدر: انتى اى شاب يتمناك يا سميرة... بت مؤدبة ... وراقية
- سميرة ( فى سرها): الرغوة اللى امرقوها ليك بى نخريك)
يشرب خدر الليمون ويتعشرق من اول جغمة
- علوية:كر ... كر ... الشر برة وبعيد ...هاك... هاك يا خدر هاك الموية دى .. ودر عشرقاتك
- خدر: الله ليمون جميل يا سميرة
- تتدخل نفيسة : سميرة من يوما بتعمل اى حاجة سمحة ما شاء الله تبارك الله( وتنظر لعلوية)
- حلوم: والعجب يا خدر اكان سوت ليك ملاح نعيمية... تقطع اصابعينك العشرة وراهو... ما شاء الله تبارك الله
- علوية: برى .... بتى سميرة فاااااالحة من يوما.... وبتسمع كلامى طوالى( تنظر لى سميرة بتها)
- سميرة: الكلام ده كلو لى انا... انا سميرة دى..... هسة ما.......
يقاطعنها البنات: اااااى سميرة دى 0 يضحك الجميع)
- خدر : وانا زاتى والله مشتهى لي ملاح نعيمية من يدك الطاعمة دى يا سميرة ... ويوم بجى وافطر معاكم وبجيب معاى امى
- سميرة( فى سرها): يشتهنك كلاب لهب
- مرحب بيك طوالى يا ولدى .... امك حبيبة وقريبة... مرة توزن دهب
- بارك الله فيك يا خالتى علوية.... اها يا جماعة انا مشيت
- هى يا ولدى كمل باقى عصيرك .... بتدور تبور لى بتى الوحيدة( تضحك)
- بتك ما بتبور يا خالة ... وربنا يفرحنا بيهن كلهن( حلوم ونفيسة وسميرة)
- حلوم ونفيسة وعلوية بصوت واحد: اميييييييين
- سلم على النعوم... وقول ليها خالتى علوية قالت ليك شنو قطعتى الحركة.... عاملة فيها تقيلة يعنى ... تقيل القطر يا اختى
-خدر يضحك: حاااااااضر يا خالتى علوية
تجلس البنات لوحدهن بعد ان يذهب خضر
- سميرة: اتن تعالن لى هنا ( ترميهن بى شبشبا)وتجرى نفيسة وحلوم منها وتطاردهن سمير ة داخل البرندة ثم يضحكن كلهن بعد ان جلسن فى السرير)
- نفيسة: اتى يا سميرة ما تزعلى وتتنفرنى فينا ساكت .... اتى خدر ده مالو... عيبى لى...( تضحك)
- حلوم: ااااى والله مالك انتى .... قايمة فينا زى نار القصب.... خدر زول كويس.. وطيب.. وبتحب ( تضحك)
- سميرة: تحبكن الشكلوتة
- اميييييييين ( تضحك حلوم ونفيسة)
- يا سميرة يا اختى عليك الله البت بلا بيتا عندها شنو فى الدنيا دى... وما مرة بتيقى بلا راجل.... وزى ما قال المثل( اى شى بالخناق الا الزواج بالاتفاق) وبعدين تعالى هنا.... اتى ما لاحظتى حاجة فى كلام خدر... الزول ده من كلامو انا وحلوم اختى دى ... حسينا انو شاريك وجاى يجس النبض....
- حلوم : بعدين هو قال جايب امو معاهو ... وده معناهو اتى عارفااااااااهو.... واليوم داك لامن يجى بطلى مساختك دى... واطرحى وشك ده... والله وشك ده بقع منك.... اتى عويرة.... دايرة شنو اتى.... خدر ولد كويس ومحترم
- بس....بس ..انا... انا
-يقاطعنها: لا بس ولا حتين قولى خير
- هى ...هو جا اتقدم اتن كمان
- سميرة هوى ... المثل بيقول ( الما بشوف من الغربال يبقى اعمى) وجية خدر دى ما طبيعية.... افهميها يا ام مخن زنخ
حلوم تتناول الصينية الفاضية وتدق عليها وتغنى معاها نفيسة ده اليوم الدايرنو ليك يا سميرة مبروك عليك)
امك سوت قدرتا....يا سميرة مبروك عليك..... امك سوت قدرتا والعزاها عز قبيلتا... يا سميرة مبروك عليك( تضحك كل البنات حتى سميرة)
- تسمع علوية الغنا وتدخل البرندة وتفاجئ البنات: اعزو فيكن باقى النهار ده بركت الله اما مسخرة قلبتنو لى غنا
تضحك البنات :و(بصوت واحد): دى السيرة جات يا خالتى علوية
غدا حلقة جديدة من ( اولاد الذوات)
ملحوظة خاصة لى بناتى هبة وهنوية:-
اتن يا بنات انا داير اسألكن سؤال محرق لى روحى من زماااااااان وما لاقيهو ليهو اجابة لى هسع:-
ليه اى مرة لمن تشوف ليها راجل اول مرة تشووفو بتعاين لى جزمتو؟؟؟؟؟؟؟
انا والله الموقف ده قابلنى كم مرة
ورنى عليكن الله السر شنو فى معاينة المرة لى جزمة الراجل
الاجابة سريع
وما تورن خالكن وليد العشى بالاجابة
حدثنى براى

انت يا عم راشد سميرة دي بتتعزز كدي مالها

يعني اسي علي قولة نفيسة وحلوم بتلقي احسن منو وين

(لكن بيني وبينك سميرة دي زهجانة شديد من خدرده شكلو لايووووق وعبيط )

أما بالنسبة لحكاية الجزمة دي حكايتها حكاية ومعاها كمان الساعة

بس يا عم راشد الحكاية دي بحكيها ليك براك عشان الجماعة ما يسمعونا

سميرة بتعزز عشان..... هى قربت ابوظ حلقة بكرة
بكرة بتعرفى سميرة بتتعزز مالا
وشكرا ليك على الرد بتاع سؤالى

ياعمك