مسلسل ( اولد الذوات ) الحلقة الثامنة

تدخل نفيسة وحلوم وسميرة الى البرندة وتبحث سميرة عن المسلسل فى قناة اخرى لتشاهده حلوم ونفيسة
- والله الدعايات دى انا بكرها كره( سميرة)
- الواحد يكون منسجم مع الاحداث يقطعوا ليهو متعتو بى دعاية بايخة( نفيسة)
- لكن والله فى دعايات حلوة( حلوم)
-والله لا فى دعاية حلوة لا شتين( نفيسة)
- اتى يا حلوم الكريم الجابوهو اليوم داك لمن كنا بنحضر فى المسلسل اسمو شنو؟
- هاى لايف
- رسلتا ليهو حسن ود خلودة عشان يجيبو معاهو من سوق المدينة جاب لى واحد كده كيف كيف
- تتدخل نفيسة: هى الكريمات فى السوق دى كلها مغشوشة وما اصلية
- حلوم: اتى ما شفتى وش غادة بت العاجبة بقى عامل كيف.... الكريمات بشتننو ليها بشتنة السواد واللواد
تضحك البنات
- يا بتى هى تتدخل ( سميرة) الزول السمح اصلو من يومو سمح لا داير ليهو كريم ولا شتين
- صدقتى لكن البقنع زى ناس غادة شنو؟
- حلوم: خلونا من سيرة الناس شوفى لينا المسلسل
- اهى دى يا دوبا بدت فى القناة التانية
تشاهد نفيسة وحلوم المسلسل وتتشاغل سميرة بضرب المنكير لأنها شاهدت الحلقة فى قناة اخرى قبل حضور حلوم ونفيسة
-نفيسة: سميرة ادينى المنكير بعد ما تضربى
- سمح واتى يا حلوم ما دايرة تضربى اصابعينك
- بعد المسلسل ما ينتهى
بعد انتهاء حلقة المسلسل تحضر سميرة الفطور وتتناول الفتيات فطورهن
- اتى خالتى علوية مالا ما جات فطرت معانا
- امى انتى ما عارفاها بتفطر من الساعة سبعة بعد ما تعوس الكسرة طوالى
- واتى تكونى ناااااايمة طبعا
- ايوة لكن هى بتخلينى انوم.... تصحينى بالمقشاشة
-بركة( تضحك سميرة) اتى جنك نوم
- وهو فى شنو اصحو عشانو يعنى .... الجديد شنو عشان اقوم ليهو بدرى؟
-حلوم: النوم الكتير ده يا سميرة يا هو المأخر سعدك ( تضحك)
- يعنى انتى خلااااااص عندك اربعة اولاد وستة بنات
- تضحك نفيسة وحلوم بصوت عالى وتسمعهن علوية وتدخل عليهن فى البرندة وتخاطبهن: الله يديم الانبساطة ضحكنى معاكن
- والله يا خالة بتك سميرة دى ممسوخة( حلوم).... قلت ليها النوم الكتير يا هو المبورك وقاعدة لى يوم الليلة لا جنا ولا تنى
- سميرة:السمع كلامكن ده يا خياتى اقول ريحتكن بدقو فيها هسة( يضحك الجميع)
- والله يا بتى يا سميرة صاحباتك صدقن فى كلامن
- صدقن شنو يمة ... الصدقة اللى يوزعوها ليهن فى الجامع ( يضحك الجميع)
- علوية: هو يا بناتى البت بلا بيتا تلقى وين السعادة والهنا
- سميرة : يمة ( بصوت تحذيرى)
- كلمنها ... حدثنها يا بناتى ... قولن ليه... ورنها ووعنها..... البت دايرة تصابحنى وتماسينى زى حرس الدورية.... انا عاد شاحدة المنان وعظيم الشان..... يدقوا لى الباب داك هسة دى ويقولو لى طالبين يد بتك سميرة لى........
- تقاطعها حلوم ونفيسة بصوت واحد: لى منو؟
- لاى زول ان شاء الله بتاع العدة البجى الحلة كل شهر داك( يضحك الجميع)
- انا...انا سميرة بت جاد الله اعرس لى بتاع عدة.... الفيك اتعرفت يا امى
- حلوم : ومالوا بتاع العدة يا سميرة هو الشغل عيب ولا عيب يعنى
- خلاس عرسيهو اتى ( تضحك البنات)
- علوية:الراجل يا سميرة يا بتى ما يعيبو الا جيبو.... والراجل العاطل ما منو رجا.... وزى ما قال المثل ( ارجى سفيه ما ترجى عاطل)
- نفيسة: صدقتى يا خالتى علوية والشغل فى حد ذاتو ما عيب.... اى شغلة شريفة ما عيب والله
- سميرة تحاكى نفيسة): اى شغلة شريفة ما عيب) الشرفة الل ما تتعالجى منها
- حلوم: هوى يا سميرة المثل بقول ضل راجل ولا ضل حيطة)
- ديل رجال زمان.... موش رجال الزمن ده
- علوية ومالن رجال الزمن ده؟
-هه ديل رجال ديل الواحد همو كلو البس ليهو قميص وبنطلون ويشنط زى حكيم الاسبتالية..... ويمسح شعروا .... ويتسبسب النهار كلو.... وموبايلو فااااااااااااااضى لا رصيد فى الشريحة ولا رصيد فى الجيب... واديهون الكضب الكتير على بنات الناس.... انا بحبك ... وانا الليل ما بنومو.... وهاك يا رسايل.... عليكن الله خانى كده ... يااااااا حليل الرجال
- نفيسة: اياهو جيل الزمن الجديد... جيل العولمة
- حلوم : لكن ما تنسى يا سميرة فى رجال اولاد بلد اصيلين.. ومؤدبين ومحترمين .. ومالين مركزن
- قلال يا حلوم يا اختى... قلال وديل زاتن ما بعرسو بى اخوى واخوك
- علوية: لي ... لى ما بعرسو بى اخوى واخوك
- والله يمة الواحد من ديل يخطب البت تسعتاشر سنة.... يقعد يلقط فى الماهية ... ويلمها بى جاى .... تجى امو تقلعا منو وتجيب بيها عدة( يضحك الجميع)
طرق بالباب يسمعه الجميع
- اهلا .. .. اهلا اتفضل لى جوة....
- السلام عليكم ورحمة الله وبركاته
- الجميع وعليكن والسلام
-ده منو يا ربى ( علوية تسأل البنات)
يدخل عليهن خدر.... خدر ود بخيتة
غدا حلقة جديدة من مسلسل ( اولاد الذوات)

الليلة خدر جاء

ياربي حا يقول داير منو فيهن

انا اتخيل لي يا عم راشد حا يقول داير ......

ولا انت رايك شنو

كدي انصبر لبكرة