مسلسل ( اولاد الذوات ) الحلقة السادسة عشر

- حلوم: شوفى يا سميرة يا اختى انا والله بتمنى ليك كل الخير ...ودايراك تتهنى فى بيتك الليلة قبال بكرة
- نفيسة: ونحن يا سميرة اصحاب واخوات من زمن طويل.... جمعنا الملح والملاح
-سميرة : فى شنو يا بنات كدى فهمنى الحاصل
-نفيسة: نحن سمعنا انو خدر جاى يحدد المواعيد بتاعت زواجو منك
- ايوة هو قال بجى الليلة يقابل خيلانى وامى وجايب معاهو اهلو
- نفيسة: ده كلام جميل لكن يا سميرة نحن بنترجاك انك تأجلى الزواج لاسبوع واح او اسبوعين
- عشان شنو؟
- عشان حلوم ابوها ح يعملو ليهو العملية فى الاسبوع الجاى
-............................................................................................................
- مالك سكتى يا سميرة قولى حاجة
- حلوم: خليها يا نفيسة ....انا قبيل قلت ليك مافى داعى تفتحى الموضوع ده مع سميرة...... نحن ما عندنا عليها كلمة.... والكلام كلو عند امها..... بعدين يا سميرة والله انا اسفة شديد للكلام القالتو ليك نفيسة ..... ربنا يتم ليك زواجك على خير .... وربنا يقدرنى اجى واحضر زواجك يا اختى( تبكى)
- ده كلام شنو ده يا حلوم يا اختى .... انا اختك قبل كل شئ ولو ما عمى بابكر عمل العملية وقام بالسلامة ما دايرة لى اى عرس
- نفيسة: طيب قبيل سكتى مالك
- انا بس كنت بفكر ارد على كلامكن البايخ ده كيف... بعدين اتن زاتكن خلعتنى خلعة شديدة خلاس... شبكتنى تعالى هنا ... وعندنا معاك موضوع... انا قلبى لامن وقع منى فى كرعى
- انتى اصيلة يا سميرة ونحن عارفنك ما بتابى لينا انك تأجلى الزواج بس دايرنك تقولى الكلام ده لى امك
- ارحكن معاى اقولو ليها قدامكن
- لا قوليهو ليها براك عشان حلوم ما تخش فى احراج... امكن امك ترفض
- خلاس انا هسة دى ماشة اكلما .. وح اقنعا تأجل العرس اسبوعين كمان
تذهب سميرة الى امها علوية :-
- امى ....يمة
- اااااى .... اااااى يا عروسنا
- انا دايراك فى موضوع
- موضوع شنو يا بتى... من متين انتى كان عندك معاى موضوع
- من هسة
- فى شنو
- انا دايراك لما خدر واهلو يجو الليلة تحددى معاهم العرس بعد اسبوعين
- وليه بعد اسبوعين
-.........................................................................................................................
- يا بت ما تنضمى ... ما تتجمى لى كده
كانت سميرة خايفة من رفض امها للتأجيل
- عشان عم بابكر
- وعم بابكر دخلو شنو فى الموضوع
- انتى ناسية انو حددو ليهو عمليتو الاسبوع الجاى... وبعدين يا امى انتى دايرة صاحباتى اقولو على انى ما عندى زوق ....
- يا بت اتى بتعرفى الاصول اكتر منى يعنى.... انا اصلا خاتا الكلام ده فوق راسى..... الا خايفة اهل خدر يقولو ما بنأجل العرس وانا اخش فى احراج
- انا بكلم خدر اكلم امو النعوم بالتأجيل.... بعدين يمة هم ما اظن يرفضو
- غايتو يا بتى انا ما عندى اى مانع .... كدى خليهم لما يجو انا بطلب تأجيل الزواج
عصام وخدر فى منزل ناس خدر:-
- قلت لى يا عصام انت ح تعمل عملية ابوك متين
- الاسبوع الجاى
- طيب كويس جدا.... فى ياتو مستشفى
- فى الخرطوم... المستشفى التخصصى
- ده مستشفى راقى جدا وفيهو دكاترة كويسين
- وانت يا خدر زواجك ح تعملو متين
- والله الليلة زى ما انت عارف نحن ماشين لى اهل سميرة عشان نحدد المواعيد
-......................................................................................................................
- يعنى ما رديت على يا عصام
- ابدا يا خدر ... ربنا يوفقك ويتمو ليك على خير
- اميين.. والله انا يا عصام مستعجل للزواج ده عشان تأشيرتى باقى ليها اسبوعين بس
-.........................................................................................................................
- عصام انت مالك الليلة
- ابدا يا خدر يا اخوى اصلو عملية ابوى عاملة لى هم شديد
- ما تخاف يا اخى كلو شئ بمشى تمام
فى الحقيقة كان عصام ينتظر من خدر ان يؤجل زواجه من اجل عملية ابو عصام ولكنه وجد ان خدر لم يتطرق لموضوع التأجيل وتحسس عصام من ان يطلب من خدر تاجيل الزواج.... عصر عصام على قلبه وتمنى لصديقه ان يتم زواجه على خير
- يدخل فوزى: خدر ... يا خدر
- ايوة يا فوزى
- تعال هنا ... انا دايرك فى موضوع.... ازيك يا عصام
- اهلا يا فوزى
- عن اذنك يا عصام انا عيز خدر ده فى كلمتين
- اتفضلو... انا زاتى ماشى البيت عشان اقعد مع الحاج حبة
يجلس خضر وفوزى داخل الاوضة ودار بينهما حديث ساخن جدا علت فيه الاصوات كثيرا
غدا حلقة جديدة من : ( اولاد الذوات)

سلام يا عم راشد

يعني يا عم راشد ما تخش لينا واسطة لخدر ده

خلي يأخر العرسشوية

اسبوعين ماكتيرة

يا كريم صلاح انا كنت اول الفصل بس ما وريتنا طيش الفصل كان منو؟والله يا كريم ذكرتنى ايام ما بتتنسى ... فطور السوق... وشقة مقابر المستشفى... ايام يا صاحبى
هو اسمو مسلسل لى شنو يا كريم؟ ما عشان قصتو بتكون حلوة وبتخليك كل مرة تتابع
اما انتن يا بناتى يا هنوية وهبوية اصبرن وامشن استعدن للحفلة
واضربن منكيركن من عصرا بدرى
العرس ده قايم قايم
بس خلن عمكن بابكر يقوم بالسلامة
جنس شفقة عليكن

يا راشد إزيك .... أغيب من المنتدي فترة أجي ألقاك ماسك الثقافية علي حسابك .. أنا ما تابعت المسلسل بتاعك ده لكن شكلو شيق وجميل .. إنت أصلك مبدع من زماااان.. منتظرين المزيد من أبداعك .

شكرا اخى الصغير يوسف السر
اولا والله مشتاقين ليك كتير
وبمجرد ما قريت رسالتك اذكرت
تفتكر اكون اذكرت شنو يا يوسفظ
اذكرت الدورات المدرسية الثقافية فى المرحلة المتوسطة
وانت تقف لتغنى لنا اغنية زيدان ابراهيم( لا هماك عذابنا)
تتذكر يا يوسف
ايام ما بتتكرر والله يا يوسف
يا اخى انا والله فرحان بى رسالتك دى فرح شديد
واتمنى دوام المرور علينا فى المنتدى
وتابع معانا المسلسل
وشكرا لى رأيك الجميل يا راقى